Robin McLaurin Williams (Chicago, 21 ad Luj dal 1951 – Paradise Cay, 11 'd Agóst dal 2014), cgnusû méj cuma Robin Williams, 'l è stâ 'n atōr, còmig, ardupiadōr, e prudutōr americàṅ.
'L è dvintâ famóś specialmènt p'r al rōl d'l aglièṅ Mork in Mork & Mindy (1978-1982) par pò butàr-'s in dal mónd dal cìnema in du 'l à purtâ a cà 'n Prèmi Òscar in dal 1998, a la quàrta nomination, cuma atōr minga prutagunìsta par Will Hunting - Genio ribelle ad Gus Van Sant ólt'r a siē Golden Globe.
La sò caréra la ciàpa 'l vōl in dal 1977 quànd Garry Marshall al gh śibìs la part ad Mork, 'l aglièṅ dimóndi gustóś dla série televiśìva Mork & Mindy, spin-off 'd Happy Days. La sò manéra 'd salutàr, faghénd Na-no Na-no cun la maṅ, l'armàgn in dla mènt ad migliòṅ ad spetadōr ad tut al mónd.
Al prim rōl impurtànt p'r al cìnema 'l è qvél ad Bras ad Fèr in dal film Popeye - Braccio di Ferro ad Robert Altman (1980). In dal 1982 al gira insém a la Glenn Close Il mondo secondo Garp ma 'l sucès a riva dabòṅ in dal 1987 cun Good Morning, Vietnam ad Barry Levinson in du 'l fà 'l militàr deejay Adrian Cronauer impgnâ in Vietnam. Al n vins minga 'l Prèmi Òscar, anc s'l è candidâ, ma almànc al s mét in bisàca 'n Golden Globe.
In dal 1989 Peter Weir 'l al sarnìs par la part dal prufesōr rivulusiunàri John Keating in L'attimo fuggente e anc chè al và davśèṅ a 'l Prèmi Òscar. Cal prèmi chè al riva par lò in dal 1998 p'r al film Will Hunting - Genio ribelle dòp che Williams 'l à laurâ anc par Kenneth Branagh (L'altro delitto), Steven Spielberg (Hook - Capitan Uncino), Chris Columbus (Mrs. Doubtfire - Mammo per sempre) e Woody Allen (Harry a pezzi).
This article uses material from the Wikipedia Emiliàn e rumagnòl article Robin Williams, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contenuto è disponibile in base alla licenza CC BY-SA 4.0, se non diversamente specificato. Images, videos and audio are available under their respective licenses. ®Wikipedia is a registered trademark of the Wiki Foundation, Inc. Wiki Emiliàn e rumagnòl (DUHOCTRUNGQUOC.VN) is an independent company and has no affiliation with Wiki Foundation.