C'l artìcul chè 'l è scrit in Miranduléś
Al Maryland (a s lèś /ˈmɛrɨlənd/ in Inglés, scólta'l chè) 'l è 'n stat di Stat Unî ch'al fà part dla regiòṅ di Stat d'l Atlàntic Mèdi, in dla còsta èst dal paéś. Al cunfìna a nòrd cun la Pennsylvania, a èst c'n al Delaware, a sud-èst cun 'l ucéan Atlàntic, a sud cun la Virgìgna e c'n al Distrét ad Culùmbia e a òvest cun la Virgìgna Ucidentàla.
'L è òṅ di stat più pìcui dal paéś (42śum pòst c'n i sò 32.133 km², divìś in vint-quàtar cuntèi e in sènt-a-ssantatrî cumùṅ) ma di abitànt al gh 'n à dimóndi, siē migliòṅ (60.8% ad biànc e 29.8% ad négar, dat dal 2010), al quìnt più pîṅ stóp. In dal 1790 'l à dâ via ssanta mia quadrâ par dar vita a 'l Distrét ad Culùmbia e tiràr sù la capitàl di Stat Unî, Washington.
Al Maryland 'l è stâ una dal trédas culògni a tōr part a la rivulusiòṅ americàna e 'l 28 'd Avrìl dal 1788, finìda la guèra cun gl'ingléś, al s è unî a la federasiòṅ di Stat Unî. Al sò scutmàj ufisiàł 'l è Old Line State (Al vèć stat in prima lìnea). Al sò mòt invéci, in d'l itagliàṅ da na vòlta, 'l è „Fatti maschii, parole femine“ ch'a vōl dir „Fat masć, paròli fémni“ par dir che chi óm i péns'n a far i fat méntar cal dóni i dascóran sōl anc se 'l guèr'n al diś ch'al sèns 'l è piutòst „Fat decìś, paròli gentìli“. Al sò nóm (in latìn, Terra Mariae) al n daśvîṅ minga da la vìrgin Marìa mo invéci 'l è stâ sarnî in dal 1634 in unōr dla regìna Enrichéta Marìa 'd Burbòṅ, mujér ad Carl I.
La sò capitàla l'è la sitadìna 'd Annapolis ma i sèntar più grand dal stat i èṅ Baltimòra, Columbia e Germantown. L'ecunumìa śvilupàda dal Maryland, ch'la pōl cuntàr su i servìsi, la risérca, al biutecnulugìi e l'istrusiòṅ, la parmét a 'l sò famìji 'd avér in mèdia più bèsi in bisàca 'd tut la nasiòṅ, 72.483 dòlar in dal 2013, davànti a 'l New Jersey e a 'l Connecticut. L'agricultùra la pòrta sidròṅ, suca, langória, furmintòṅ, pamdòr, mlòṅ e arvéa. Inólt'r al Maryland al prudùś dimóndi lat e anc dal pés.
Anc s'al stat 'l è storicamènt dagnóra sèmpar da la banda dal partî demucràtic, da 'l 2015 al gh'à 'n guvernadōr republicàṅ, Larry Hogan, al secónd in sinquànt'an.
This article uses material from the Wikipedia Emiliàn e rumagnòl article Maryland, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contenuto è disponibile in base alla licenza CC BY-SA 4.0, se non diversamente specificato. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Emiliàn e rumagnòl (DUHOCTRUNGQUOC.VN) is an independent company and has no affiliation with Wiki Foundation.