C'l artìcol chè 'l è scrit in Carpśàn
Die Straße (La strèda) 'l è 'n film mut dramàtic dirèt da Karl Grune in dal 1923.
Un marì 'd mèśa etê, in dal só apartamèint 'd sitê, cun la reśdóra urdnèda ch'la manda avànti tut i lavōr ed cà, al fà na vìta sàinsa tanti sorpréśi, sàinper quèla, e però i gh'brìlen i òć s'al stà ala fnèstra a vèder fóra tùt al muimèint e l'agitasiòun dla ginta ed sitê ch'la prìla avànti e indrē, a pē, in carósa e in màchina, ch'i gh'àn d'andèr a n's sà brìśa indùa.
L'atrasiòun per tut cal tric e trac là fóra l'è tròp grosa perchè lò al n'l gh'la chèva ed stèr bòun, e dòunca na sira, a l'óra ed diśnèr, invéci 'd mèt'res lè a biasèr sàinper cla mnèstra, al s tōś sù, in bèrba ala mujér ch'a gh'tòca 'd armàgner lè cum un bilùc, e tolt ség capêl e bastòun, al tōś la strèda, al s in và per só còunt a pasèǵ ch'a n'gh'è gnanc indevìś.
La strèda però, la gh'à anc di perìcol, dagli astùsi, che minga tut i agìnt i ìn bòun 'd adèrsen. 'L òm al cred 'd avér catê na dunlèina dolsa, interesànta, in 'n àngol dal marciapé, indû invéci a gh'è l'astùsia edla batòuna, dla poc ed bòun. Chelē la s finś dolsa e tendra mo, dòp 'd avér fat soquànt gir per la strèda ség, la cùcia 'l òm in na sèla da bâl e indû a s śoga i bési a 'l chèrti.
'L òm al n'è minga tant śgalvî e tùt i truc e i simiotamèint dla dunlèina e di só cunpàgn minga onèst, lò al li tōś per lavōr da crèd'regh, da fidères. A 'l śōg dal chèrti, 'l òm al rìsćia 'd armèt'regh anc la camìśa, s'a n'fùs che 'd un colp, un pò 'd furtùna la prìla dala só banda.
La sira e la nòt i finìsen mêl perchè i amìg dla dunlèina i còpen ùn 'd chi malcapitê lè a 'l śōg dal chèrti. La pulisìa la cred che 'l noster reśdōr al sia lò 'l asasèin, mo invéci un putèin al s lasa scapèr dìta la veritê che só pèder 'l era stê lò, al masadōr.
A 'l noster reśdōr, sfutû dala strèda e dai só lustrèin, a n'gh'armàgn èter che turnèr a cà, cun la còva da mêś a 'l ganbi, ma tant la mujér l'è incòr lè ch'l'al 'spèta, cun la supa tgnuda lè in chèld per lò.
This article uses material from the Wikipedia Emiliàn e rumagnòl article La strada (film 1923), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contenuto è disponibile in base alla licenza CC BY-SA 4.0, se non diversamente specificato. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Emiliàn e rumagnòl (DUHOCTRUNGQUOC.VN) is an independent company and has no affiliation with Wiki Foundation.