Claudia Koll

La Claudia Maria Rosaria Colacione, cgnusùda méj c'n al nóm 'd art ad Claudia Koll (Róma, 7 ad Maǵ dal 1965), l'è n'atōra itagliàna.

Dòp 'n inìsi 'd caréra in di film spurcaciòṅ cun Così fan tutte ad Tinto Brass in séguit la s davśìna a la Céśa catòlica pinsànd anc ad far-as sōra sénsa però andàr fiṅ in fónd p'r amōr ad sò fiōl.

Biugrafìa

Fiōla dna famìja 'd ciśarōi, finî i sò studi a 'l lìceo clàsic Orazio 'd Róma, la Claudia Maria Rosaria la taca a far soquànt cōrs ad teàtar in fiṅ a che 'l regìsta Tinto Brass al la sarnìs par la part ad cla purcùsa dla Diana in Così fan tutte, pelìcula 'd sucès ispiràda a l'òpra c'n al stés nóm ad Wolfgang Amadeus Mozart.

In séguit la gira 'l cumèdi Miracolo italiano (1994), Uomini sull'orlo di una crisi di nervi (1995) e Cucciolo (1998) ma la sò caréra da atōra ad cìnema la patìs un férum. La gh và méj in televiśiòṅ in dua la preśénta 'l Fèstival ad Sanrémo dal 1995 insém a Pippo Baudo e a l'Anna Falchi e la gira soquànti fiction ad sucès cuma Linda e il brigadiere (1997-2000) e Valeria medico legale (2000-2002).

In di an Dumìla la crés in lē la fēd e la Koll la taca a far di pelegrinàǵ a 'l Santuàri Puntifìsi dla Vìrgin Beàta dal Sant Ruśàri 'd Pumpèi dòp avēr anc dâ vita a la ONLUS “Gl'òpri dal Pàdar”.

Esénd malàda 'd Celiachìa l'è stada in pasâ na madrìna dl'Asuciasiòṅ Itagliàna Celiachìa.

Filmugrafìa

• 1989 - Orlando sei, regìa ad Dante Majorana
• 1992 - Così fan tutte, regìa ad Tinto Brass
• 1994 - Miracolo italiano, regìa 'd Enrico Oldoini
• 1995 - Uomini sull'orlo di una crisi di nervi, regìa 'd Alessandro Capone
• 1998 - Cucciolo, regìa ad Neri Parenti
• 2005 - Una cosa in mente. San Giuseppe Benedetto Cottolengo, regìa ad Paolo Damosso
• 2007 - Io non lo so, regìa ad Paolo Damosso
• 2007 - Petali di rosa, regìa ad Maximo De Marco
• 2011 - Isabella De Rosis, vita di amore, regìa ad Geo Coretti
• 2012 - Il tempo delle mimose, regìa ad Marco Bracco

Culegamènt estéran

• (EN) Filmugrafìa in s'l IMDb

Nòti