紐約: 美國一埠

紐約市喺美國嘅位置

紐約市（粵拼：nau5 joek6 si5；英文：New York City），舊時叫鳥約（niu5 joek6），係美國人口最多嘅城市，佢嘅商業、金融、貿易係全美國以至全世界經濟嘅重要部份。喺文化上亦重要，好多博物館、美術館、表演場地都喺紐約市。聯合國總部都喺埋度，紐約市亦係國際外交嘅「場地」之一。

紐約市有五個行政區：布朗士、布碌侖、曼克頓、皇后區、史丹頓島。全市面積 830 平方公里（321平方英里），住咗 833 萬人。紐約大都會地區係全世界最大嘅城市之一。

自第二次世界大戰之後，紐約市一直係主導全球金融嘅中心。亦係好多美國文化嘅發源地，包括哈林文藝復興文學、視覺藝術抽象表現主義繪畫、Hip Hop 音樂。自1623年荷蘭移民開埠之後，呢個城市嘅文化生命力一直強勁。2005年，全市 37% 嘅人口係外國出世，超過 138 種話會有人講。

直至九十年代，紐約市一直都係以治安差而出名，犯罪率係美國數一數二，但自2000年起紐約市嘅犯罪率係排喺美國尾十名之內。

紐約市係喺1524年畀歐洲人發現。後來到咗1613年，荷蘭人佔據咗呢一度，變成荷蘭嘅殖民地。1664年，英國人趕走咗啲荷蘭人，改名叫New York。

喺1789年美國獨立嗰陣，美國人就一度將紐約列做臨時首都，一直到1790年為止。到1800年之後，紐約市開始發展，人口越嚟越多。

紐約市係喺哈德遜河河口，大多數人口同埋商業活動都係喺曼哈頓。其中曼哈頓重係河中島。因為喺河口，紐約市整體個地勢好平坦，冇乜山。

紐約市好多土地都係人工，例如曼哈頓下城區。

紐約屬亞熱帶濕潤氣候，冬季寒冷潮濕，夏季炎熱潮濕。

紐約市係全美國以至全世界個金融中心。但整體嚟講經濟活動都係集中喺曼哈頓區。

 

紐約市有三個機場，包括甘迺迪國際機場，紐華克自由國際機場同拉瓜地亞機場。