Bon Diu
Li Bon Diu (ou Bon Diè, pus rålmint Diu u co Diè), po les crustins, les djwifs, les muzulmans (et ds ôtes pitites rilidjons å Bon Diu), c' est on tolu k' est ådzeu d' tot, k' a askepyî totafwait, et ki decide di tot çou ki s' passe el Daegne ey e cir.
On scrît s' no avou ene grande lete dins les lingaedjes rashious e-n alfabet latén.
Motlî et atuzlêyes des djins
Les scrijhaedjes e walon ont stî fwaits aprume pa des crustins. Li manire di lomer li tolu dzeutrin do monoteyisse, c' esteut "li Bon Diu". Did la li mwaisse lomaedje di cist årtike cial.
Les teyolodjins pretchèt ki l' Bon Diu di tos les creyants monoteyisses, c' est l' minme tolu.
Portant, foû del rilidjon crustinne, on wåde pacô li no k' i gn a dins l' mwaisse lingaedje del rilidjon, dabôrd : Ala (mot arabe) cwand on djåze di l' islam et Yavé (mot ebreu) po les djwifs.
Mins lomer diferinnmint li Diu unike pout leyî a pinser k' i gn a on "bon" et on "metchant" diè (li Bon, li ci des crustins, li metchant, li ci des djwifs, ki les vneut pûni di pus sovint k' a s' toû).
On ôt eto dire — pår pa des djins k' ont fwait des hôtès scoles — ki l' Bon Diu des crustins et "Ala", li ci des muzulmans, serént deus tolus diferins, e concurince po fé des pratikes, tchaeke po si rlidjon. On pout responde ki l' mot "Ala" vout biesmint dire "li Diu" (li definixhant årtile sinifeye k' end a pont d' ôte). Ciste alomåcion la, "Ala" est siervowe sifwaitmint pa les crustins arabe-cåzants, ki pa les muzulmans. Portant, e sacwants payis muzulmans (Malaizeye) on disfind d' eployî li mot "Ala" foû d' l' Islam.
-
Riprezintåcion do Bon Diu pa des letes (djwifs) -
Riprezintåcion do Bon Diu pa des letes (muzulmans) -
Riprezintåcion nén-imådjrece do Bon Diu po les crustins
Riprezintåcions do Bon Diu
Dins les troes rlidjons monoteyisses, gn a k' les crustins k' ont l' droet di rprezinter l' Bon Diu pa ene imådje di djin.
Les Djwifs li rprezintèt pa les letes YHWH (Yavé), çou ki vout dire "li cia k' est".
Les muzulmans pa الله, çou ki vout dire "li diè".
Nateure do Bon Diu
Li Bon Diu est on seu tolu po les muzulmans et les djwifs, mins est fwait di troes "djins" po les crustins (Trinité).
This article uses material from the Wikipedia Walon article Bon Diu, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Li contnou est dzo l' licince CC BY-SA 4.0 a moens k' ça soeye dit ôtrumint. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Walon (DUHOCTRUNGQUOC.VN) is an independent company and has no affiliation with Wiki Foundation.