འབྲུག་རྒྱལ་ཁབ་འདི་ ཕྱི་སྣོད་སའི་རྒྱ་ཚད་ཆུང་རུང་ ཁ་སྐད་མ་འདྲཝ་ ༡༩ ལྷགཔ་ཅིག་ཡོད་པའི་ ཁ་སྐད་ཀྱིས་ཕྱུག་པའི་རྒྱལ་ཁབ་ཅིག་ཨིན། ཁ་སྐད་དེ་ཚུའི་ནང་ལས་ རྫོང་ཁ་འདི་ དུས་རབས་ ༡༢ དེ་ཅིག་ལས་ར་ དཔོན་གྱི་སྒོ་ཁ་དང་དམག་སྡེའི་དྲག་གྲས། ཤེས་ཡོན་ཅན་གྱི་མི་བརྒྱུད། གཞུང་སྐྱོང་དང་བདག་སྐྱོང་ཚུ་གི་ཁ་སྐད་ཅིག་སྦེ་ལག་ལེན་འཐབ་སྟེ་སྡོད་ནུག ཨིན་རུང་ གཞུང་འབྲེལ་ཡི་གུ་དང་ ཁྲིམས་འབྲེལ་ཡིག་ཆ་ཚུ་ག་ར་ ཆོས་སྐད་ཀྱི་ཐོག་ལུ་བྲིས་ཏེ་སྡོད་ནུག དེ་ལས་ སྤྱི་ལོ་ ༡༩༧༡ ལུ་ མི་དབང་འབྲུག་རྒྱལ་གསུམ་པ་ དཔལ་འཇིགས་མེད་རྡོ་རྗེ་དབང་ཕྱུག་མཆོག་གིས་ རྫོང་ཁ་འདི་ འབྲུག་གི་རྒྱལ་ཡོངས་སྐད་ཡིག་སྦེ་གསལ་བསྒྲགས་མཛད་གནང་ནུག དེ་དང་གཅིག་ཁར་ རྫོང་ཁ་ལྷབ་སྦྱང་གི་དཔེ་དེབ་ཚུ་འབྲི་ནི་དང་པར་སྐྲུན་འབད་ནིའི་དོན་ལུ་ ཤེས་རིག་ལྷན་ཁག་འོག་ལུ་ རྫོང་ཁ་གོང་འཕེལ་སྡེ་ཚན་ཅིག་ཡང་གཞི་བཙུགས་གནང་སྟེ་ སློབ་གྲྭ་ཁག་ལས་ཕར་ རྫོང་ཁ་འདི་ སྐད་ཡིག་དང་རྩོམ་རིག་གི་གྲས་ཁར་ སློབ་སྟོན་གྱི་ཆོས་ཚན་ཅིག་སྦེ་འགོ་བཙུགས་གནང་ནུག
སྤྱི་ལོ་ ༡༩༨༦ ལུ་ མི་དབང་འབྲུག་རྒྱལ་བཞི་པ་ དཔལ་འཇིགས་མེད་སེང་གེ་དབང་ཕྱུག་མཆོག་གིས་ རྫོང་ཁ་གོང་འཕེལ་གྱི་འཆར་གཞི་དང་ སྲིད་བྱུས་ལམ་སྟོན་ཚུ་བརྩམ་ནིའི་དོན་ལུ་ རྫོང་ཁའི་གྲོས་ཚོགས་བཙུགས་དགོ་པའི་བཀའ་རྒྱ་གནང་ནུག དེ་ལས་སྤྱི་ལོ་ ༡༩༨༩ ལུ་ ཤེས་རིག་ལྷན་ཁག་འོག་གི་ རྫོང་ཁ་གོང་འཕེལ་སྡེ་ཚན་དང་ རྫོང་ཁའི་གྲོས་ཚོགས་གཉིས་གཅིག་ཁར་བསྡབས་ཞིནམ་ལས་ རྫོང་ཁ་གོང་འཕེལ་ལྷན་ཚོགས་འདི་རང་སྐྱོང་གི་གཙུག་སྡེ་ཅིག་སྦེ་ གཞི་བཙུགས་མཛད་གནང་ནུག ད་རེས་ ལྷན་ཚོགས་འདི་ རྒྱལ་ཁབ་ནང་ལུ་ རྫོང་ཁ་གོང་འཕེལ་དང་དར་ཁྱབ་གཏང་མིའི་གཙུག་སྡེ་མཐོ་ཤོས་གཅིག་སྦེ་གནས་སྟེ་ཡོདཔ་ཨིན།
རྫོང་ཁ་གོང་འཕེལ་ལྷན་ཚོགས་ཀྱིས་ རྒྱལ་ཁབ་ནང་ལུ་ ཤེས་རིག་ལམ་ལུགས་དང་མི་མང་ཞབས་ཏོག་གིས་མ་ཚད་པར་ སྐད་ཡིག་གནས་ཚད་ཡར་འཕེལ་དང་ རྒྱ་སྐྱེད་ཀྱི་ཐོག་ལས་ རྫོང་ཁ་དར་ཁྱབ་གཏང་ནིའི་འཆར་གཞི་ཚུ་བརྩམས་དོ་ཡོདཔ་ཨིན།གནས་ཚད་ཡར་འཕེལ་གྱི་ནང་ བརྡ་སྦྱོར་དང་ཚིག་མཛོད། དེ་ལས་ ཡིག་སྡེབ་འབྲི་ཐངས་ཀྱི་ལམ་ལུགས་ཚུ་རྩོམ་སྒྲིག་འབད་དེ་ རྫོང་ཁའི་སྐད་ཡིག་འདི་གནས་ཚད་དང་ལྡནམ་བཟོ་ནི་ལུ་གཙོ་བོ་བཟུང་དོ་ཡོདཔ་དང་། སྐད་ཡིག་རྒྱ་སྐྱེད་ནང་ དགོས་མཁོ་དང་བསྟུན་ དེང་སང་གི་གནས་སྟངས་དང་འབྲེལ་བའི་རྫོང་ཁའི་ཐ་སྙད་བཟོ་ནི་དང་ མིང་ཚིག་གསར་རྩོམ་གྱི་ལཱ་ཚུ་འབདཝ་ཨིན།
འདི་བཟུམ་སྦེ་ རྫོང་ཁ་གོང་འཕེལ་ལྷན་ཚོགས་ཀྱིས་ ཡོངས་གྲགས་ཡོད་པའི་གློག་རིག་རིམ་ལུགས་ཚུ་ནང་ལུ་ གནས་ཚད་གཞིར་བཞག་གི་རྒྱབ་སྐྱོར་མཐུན་རྐྱེན་ཚུ་བཟོ་ནི་ལུ་བརྩོན་ཤུགས་བསྐྱེད་དོ་ཡོདཔ་ཨིན། དེའི་ནང་ལས་ ཁྱབ་ཆེ་དྲགས་སྦེ་ལག་ལེན་འཐབ་མི་འདི་ རྫོང་ཁ་གོང་འཕེལ་ལྷན་ཚོགས་ཀྱིས་བཟོ་སྟེ་བཀྲམ་སྤེལ་འབད་མི་ རྫོང་ཁ་ཡུ་ནི་ཀོཌི་གི་རིམ་ལུགས་འདི་ཨིན། རིམ་ལུགས་འདི་ ཨེམ་ཨེས་ཝུན་ཌོ་ (MS Window) དང་ ལི་ནཱགསི་ (Linux)། ཨེ་པཱལ་ཨོ་ཨེས་ཨེགས (Apple OSX) ཚུ་གིས་མ་ཚད་པ་ གཞན་ཡང་ ཡོངས་འབྲེལ་རིམ་ལུགས་ (Internet) དང་ཀུན་གྱིས་སྤྱོད་ཚུགས་པའི་གློག་རིག་རིམ་ལུགས་ (Open Office) མའི་ཀོ་རོ་སོཕཊི་ (Microsoft Office) ཨེཌོ་སྦི་ཨིན་ཌི་ཟཱནི (Adobe’s InDesign) ཚུའི་ནང་ལུ་ ལེགས་ཤོམ་སྦེ་ལག་ལེན་འཐབ་བཏུབ་བཟོ་སྟེ་ཡོདཔ་ཨིན། འདི་དང་འདྲཝ་སྦེ་ འགྲུལ་འཕྲིན་དང་བརྡ་དོན་འཕྲུལ་རིག་ཚུའི་ནང་ཡང་ རྫོང་ཁ་འདི་ལག་ལེན་འཐབ་བཏུབ་སྦེ་བཟོ་སྟེ་ཡོད།
དེ་ཁར་ རྫོང་ཁ་གོང་འཕེལ་ལྷན་ཚོགས་ཀྱིས་ རྫོང་ཁའི་རྩོམ་རིག་གི་ཐོན་ཁུངས་ཡར་དྲག་གཏང་ནི་དང་ གཞན་ཡང་འབྲུག་གི་སྐད་རིགས་ ༡༨ ཡོད་མི་ཚུ་ ཡིག་ཐོག་བཀོད་ནིའི་ནང་ བློ་སྤོབས་བསྐྱེད་བཅུག་དོ་ཡོདཔ་ཨིན། འདི་བཟུམ་སྦེ་ རྫོང་ཁ་ལག་ལེན་རྒྱ་སྐྱེད་ཀྱི་དོན་ལུ་ འབྲི་རྩོམ་དང་དཔེ་དེབ་འགྲན་བསྡུར། རྩོད་བསྡུར། དྲི་བ་འདྲི་ལན། ཡིག་སྡེབ་འགྲན་བསྡུར། དེ་ལས་ བརྡ་བརྒྱུད་ལས་རིམ་ཚུའི་ནང་ཡང་ རྒྱབ་སྐྱོར་འབད་དོ་ཡོདཔ་ཨིན།
This article uses material from the Wikipedia ཇོང་ཁ article རྫོང་ཁ་གོང་འཕེལ་ལྷན་ཚོགས, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ཇོང་ཁ (DUHOCTRUNGQUOC.VN) is an independent company and has no affiliation with Wiki Foundation.