ཚོགས་ལྷམ།
ང་བཅས་རའི་འབྲུག་རྒྱལ་ཁབ་འདི་ནང་ཡང་སྔོན་གི་དུས་ལས་ར་ རང་སོའི་དགོས་མཁོ་དང་བསྟུན་ཏེ་ དུས་དང་འཁྲིལ་བའི་ལྷམ་བཙེམས་ཏེ་བཙུགས་སྲོལ་བྱུང་སྟེ་འདུག། མཁན་པོ་ཕུན་ཚོགས་བཀྲ་ཤིས་ (གནམ་ལོ་མེད་ ༢༠༠༣ ཤོག་གྲངས་ ༡༩༥) ཀྱིས་འབད་བ་ཅིན “སྤྱིར་བཏང་ལྷམ་ལུ་སྔོན་གི་དུས་སུ་གྲྭ་ལྷམ་དང་ ཕྲུ་ལྷམ་དཀར་ཅུང་ ཚོགས་ལྷམ་ འཛོམས་པ་ལྷམ་ལ་སོགས་པ་ལེ་ཤ་བྱུང་ཏེ་ཡོདཔ་ཨིན་མས།” ལྷམ་དེ་ཚུ་ཡང་ དུས་ཚོད་དང་གནས་སྟངས་ དེ་ལས་ཐོབ་ལམ་དང་འཁྲིལ་ཏེ་བཙུགས་ནི་མ་གཏོགས་ ག་ཐོབ་སྦེ་བཙུགས་མི་ཆོག།
ལྷམ་གི་དབྱེ་བ་དང་ཐོབ་ལམ།
༡ གྲྭ་ལྷམ།
གྲྭ་ལྷམ་ཟེར་མི་འདི་ སྤྱིར་བཏང་ལུ་གཞུང་གྲྭ་ཚང་ནང་ཞུགས་མི་གྲྭ་པ་དགེ་སློང་ཚུ་གིས་བཞེས་མིའི་ལྷམ་འདི་ལུ་གོཝ་ཨིན། མཁན་པོ་ཕུན་ཚོགས་བཀྲ་ཤིས་ (ཆུ་མོ་ལུག་ལོ་ ༢༠༠༣ ཤོག་གྲངས་ ༡༩༥) ཀྱིས་འབད་བ་ཅིན ”གཞུང་གྲྭ་ཚང་གི་རྗེ་མཁན་པོ་དང་སློབ་དཔོན་བཞི་གིས་བཞེས་པའི་གྲྭ་ལྷམ་འདི་སྔོན་དང་ཕུ་ལས་ར་ འབྲུག་ལུ་དར་ཏེ་ཡོདཔ་ཨིན་པས། དེ་བཟུམ་སྦེ་གཞུང་གྲྭ་ཚང་གིས་བསྐོས་པའི་སྡེ་སྲིད་ཚུ་གིས་ཡང་གྲྭ་ལྷམ་བཞེསཔ་ཨིན། གྲྭ་ཟེར་མི་གི་ཚིག་དོན་འདི་ གྲྭ་པ་དགེ་སློང་ཚུ་ལུ་གོ་ནི་དང་ ལྷམ་ཟེར་མི་འདི་གྲྭ་པ་དགེ་སློང་ཚུ་གི་བཞེས་པའི་ཞབས་ལྷམ་ལུ་གོཝ་ཨིན།” རྒྱུ་མཚན་དེ་ལས་བརྟེན་གྲྭ་ལྷམ་ཟེར་སླབ་སྲོལ་དར་ཡོདཔ་ཨིན་མས།
༢ ཕྲུ་ལྷམ་དཀར་ཅུང་།
རང་གི་གོ་ས་གོ་གནས་དང་འཁྲིལ་ཏེ་བཙུགས་མིའི་ལྷམ་འདི་ལུ་ ཕྲུ་ལྷམ་དཀར་ཅུང་ཟེར་སླབ་ཨིན། མཁན་པོ་ཕུན་ཚོགས་བཀྲ་ཤིས་ཀྱིས་ (ཆུ་མོ་ལུག་ལོ་ ༢༠༠༣ ཤོག་གྲངས་ ༡༩༦) འབད་བ་ཅིན “ཕྲུ་ལྷམ་འདི་གཞུང་ཞབས་ལས་གནང་བའི་དཔོན་གཉིས་སྐལམ་ཡན་ཆད་ལས་བཞེསཔ་མ་གཏོགས་ གཞན་མི་སེར་དཀྱུས་མ་གིས་རྩ་ལས་གྱོན་པའི་སྲོལ་མིན་འདུག། ལུགས་སྲོལ་འདི་ལུ་གཞི་བཞག་སྟེ་ དུས་དེང་སང་གི་བར་དུ་ཡང་ སྔར་སྲོལ་མ་ཉམས་པར་བཀབ་ནེ་དམརཔོ་བཞེས་མི་དང་ རྫོང་བདག་དང་ ཁྲིམས་དཔོན་ཚུ་གི་ཡང་ཕྲུ་ལྷམ་དཀར་ཅུང་བཞེས་གནངམ་ཨིན།” ཕྲུ་ལྷམ་དཀར་ཅུང་ཟེར་སླབ་དགོ་པའི་ཁུངས་འདི་ཡང་ འབྲུག་གི་དངོས་མེད་ལམ་སྲོལ། (ཤིང་མོ་ལུག་ལོ་ ༢༠༡༥ ཤོག་གྲངས་ ༡༥༡) ལས་འབད་བ་ཅིན “དང་པ་ ལྷམ་གི་མཐིལ་དང་སྦོས་གཉིས་ཀྱི་བར་ན་ རས་དཀརཔོ་གིས་བཙེམས་སྟེ་ཡོད་མི་ལས་བརྟེན་ཨིན། ལྷམ་གྱི་མཐིལ་ཡང་ ཧེ་མ་ཀོཝ་གིས་བཙེམས་ཨིན་རུང་ ད་རེས་ནངས་པ་འགྱིབ་ཀྱིས་བཙེམ་སྲོལ་འདུག།”
༣ ཚོགས་ལྷམ།
སྤྱིར་བཏང་མི་དྲག་ཞན་ཆེ་ཆུང་མེད་པར་ག་ར་གིས་ བཙུགས་སྲོལ་ཡོད་མི་འདི་ལུ་ཚོགས་ལྷམ་ཟེར་སླབ་ཨིན། ཚོགས་ལྷམ་གི་བཟོ་རྣམས་འདི་ཡང་ མཁན་པོ་ཕུན་ཚོགས་བཀྲ་ཤིས་ཀྱིས་ (ཆུ་མོ་ལུག་ལོ་ ༢༠༠༣ ཤོག་གྲངས་ ༡༩༥) གིས་འབད་བ་ཅིན “ཚོགས་ལྷམ་ལུ་རས་དཀར་ཅུང་གི་ཚབ་ལུ་ཀོཝ་གིས་བཟོས་པ་དང་། གདོང་སྣམ་བུ་དམརཔོ་གིས་བཙེམས་སྟེ་ དབྱུག་པ་ཡང་རས་ནགཔོ་དང་ སྔོ་ནག་གང་རུང་གིས་བཙེམས་སྟེ་ཡོད། ཚོགས་ལྷམ་ལུ་ཕྲུ་ལྷམ་དཀར་ཅུང་བཟུམ་སྦེ་དཔྱལཝ་དང་རྟིང་པ་ ལོགས་སུ་ག་ཅི་ཡང་མེདཔ་ལས་ ཚོགས་ལྷམ་གྱི་མཐིལ་དང་རས་དཀར་ཅུང་ཆ་མཉམ་ཀོ་བ་ཡུག་གཅིག་གིས་བཟོཝ་ཨིན།”
༤ ཟོམ་ལྷམ།
སྤྱིར་བཏང་ཨམ་སྲུ་ཚུ་གིས་ བཙུགས་སྲོལ་ཡོད་པའི་ལྷམ་འདི་ལུ་ཟོམ་ལྷམ་ཟེར་སླབ་ཨིན། ནོར་བུའི་འཕྲེང་བ་ (ས་མོ་ཡོས་ལོ་ ༡༩༩༩) ལྟར་དུ་འབད་བ་ཅིན་ ཨམ་སྲུའི་ཟོམ་ལྷམ་འདི་ ལྷམ་གཞན་དང་འདྲཝ་ཨིནམ་དང་ལྷམ་གྱི་མ་འདི་ ཚོས་གཞི་ནགཔ་དང་སྔོ་ནག་གང་རུང་གིས་བཙེམ་ཨིན། ལྷམ་གྱི་སྦོས་དང་གདོང་འདི་གོས་ཆེན་མདར་པོའི་གུར་ མེ་ཏོག་འདི་ཚུ་ཚེམ་དྲུབ་འཐུ་སྟེ་བཙེམ་ཨིན།
རྒྱབ་རྟེན།
༡ མཁན་པོ་ཕུན་ཚོགས་བཀྲ་ཤིས། (ཆུ་མོ་ལུག་ལོ ༢༠༠༣) འབྲུག་གི་བཟོ་རིགས་བཅུ་གསུམ་གྱི་བཤད་པ་མཁས་པའི་འགའ་སྟོན། འབྲུག། ཐིམ་ཕུག། སྐལ་བཟང་གཞན་ཕན།
༢ རྒྱལ་གཟིམ་དྲགོས་རྡོ་རྗེ་རྒྱལ་མཚན། (ས་མོ་ཡོས་ལོ་ ༡༩༩༩) སྒྲིག་ལམ་རྣམ་གཞག་གི་དེབ་ཐེར་ནོར་བུའི་འཕྲེང་བ། འབྲུག། ཐིམ་ཕུག། ཀུན་གསལ་རང་སྐྱོང་ལས་འཛིན།
༣ དྲག་ཤོས་སངས་རྒྱས་རྡོ་རྗེ། ཡེ་ཤེས་ལྷུན་གྲུབ། ཡོན་ཏན་དར་རྒྱས། (ཤིང་མོ་ལུག་ལོ་ ༢༠༡༥) འབྲུག་གི་དངོས་མེད་ལམ་སྲོལ། འབྲུག། ཐིམ་ཕུག། yoez Graphics
This article uses material from the Wikipedia ཇོང་ཁ article ཚོགས་ལྷམ།, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ཇོང་ཁ (DUHOCTRUNGQUOC.VN) is an independent company and has no affiliation with Wiki Foundation.