མགོནམ་རྡོ་རྗེ།
དགོད་བྲ་སྒྱུར་མི་ མགོནམ་རྡོ་རྗེ།
སྤ་རོ་སྲོས་ལས་ཨིན་མི་མགོནམ་རྡོ་རྗེ་འདི་ འབྲུག་རྒྱལ་ཁབ་ནང་ལུ་དགོད་བྲ་སྒྱུར་མི་སྐད་ཅན་མིང་ཅན་ཅིག་ཨིན། ཁོ་ར་སློབ་གྲྭ་ནང་འགྱོ་སྟེ་ ཤེས་ཡོན་ལྷབ་སྦྱང་འབད་བའི་ཉམས་མྱོང་མེད་རུང་ ཁོ་ར་ཆུང་ཚེ་མའི་བསྒང་ལས་གཡུས་ཁར་སྡོད་དེ་ ཁོ་རའི་ཕམ་གཉིས་ལུ་ཆ་རོགས་འབད་དེ་སྡོད་ནུག།
མགོནམ་རྡོ་རྗེ་གིས་གློག་བརྙན་འགོ་དང་པ་ར་ བཀྲ་ཤིས་སྙན་ཆ་གིས་བཟོ་སྐྲུན་འབད་ཡོད་པའི་གློག་བརྙན་ མགུ་སྐོར་ཟེར་མི་ནང་ལུ་འཁྲབ་རྩེདཔ་ཕུརཔ་ཕྲིན་ལས་ཀྱི་ཚ་བོ་སྦེ་བརྩེས་ནུག། མ་གཞི་མགོནམ་རྡོ་རྗེ་འདི་སྙན་ཆ་སྐྲོག་མི་ཅིག་ཨིན་རུང་ གློག་བརྙན་འདི་ནང་ལུ་འཁྲབ་རྩེདཔ་མ་ལངསམ་ལས་ ཁོ་རའི་ཕོ་རྒནམ་མགོནམ་ཚེ་རིང་གིས་ ཁོ་གིས་འབད་ཚུགས་ཟེར་སླབ་ལས་ ཁོ་ར་གློག་བརྙན་ནང་འཛུལ་ནིའི་གོ་སྐབས་ཐོབ་ནུག། གློག་བརྙན་ནང་ལུ་མ་འཛུལ་བའི་ཧེ་མ་ མགོནམ་རྡོ་རྗེ་ཁོ་ར་སྙན་ཆ་བསྐྲོག་ནིའི་ནང་ལྕོགས་གྲུབ་ཡོདཔ་ལས་ ཁོ་རའི་ཕོ་རྒནམ་དང་གཅིག་ཁར་ རྒྱལ་གཞུང་འཆམ་དང་ཟློས་གར་ནང་ སྙན་ཆ་སྐྲོག་མི་སྦེ་ཕྱག་ཞུ་ནུག། དེ་བསྒང་ ཕོ་རྒནམ་མགོནམ་ཚེ་རིང་འདི་འཆམ་རྐྱབ་མི་སྦེ་ཕྱག་ཞུ་ནུག། མགོནམ་རྡོ་རྗེ་གིས་ འབྲུག་ལུ་ཡོད་པའི་རང་ལུགས་ཀྱི་སྙན་ཆ་མང་ཆེ་ཤོས་ཅིག་བསྐྲོག་ཤེས་དོ་ཡོདཔ་ཨིན།
མགོནམ་རྡོ་རྗེ་ཁོ་ར་ དགོད་བྲ་བསྒྱུར་ནིའི་ནང་ལུ་མཁས་མཆོག་འབདཝ་ལས་ འབྲུག་གློག་བརྙན་ཚོགས་པ་ནང་ལས་ དགོད་བྲ་བསྒྱུར་ནིའི་ནང་དྲག་ཤོས་ཀྱི་གསོལ་ར་ཡང་ལེན་ཐེངས་གཉིས་ཐོབ་སྟེ་ཡོདཔ་ཨིན་མས། མགོནམ་རྡོ་རྗེ་ཁོ་ར་ གློག་བརྙན་ནང་ལུ་དགོད་བྲ་བསྒྱུར་ནི་ལུ་མཁས་མཆོག་རྐྱངམ་གཅིག་མེད་པར་ བློ་ཟེ་བསྒྱུར་ནི་དང་གསལ་བཤད་འབད་ནིའི་ནང་ལུ་ཡང་ ལྕོགས་གྲུབ་ཡོདཔ་ཨིན། མགོནམ་རྡོ་རྗེ་ཁོ་ར་ ཤེས་ཡོན་སྦྱང་ནིའི་གོ་སྐབས་མ་ཐོབ་རུང་ ཁོ་རའི་ལྕོགས་གྲུབ་ལས་བརྟེན་ ཕྱི་རྒྱལ་ཡུ་ཨེསི་ཨེ་དང་ ཐའེ་ལེནཌ་ལུ་ གློག་བརྙན་བཟོ་བར་དང་ འཁྲབ་སྟོན་སྟོན་པར་འགྱོ་ནི་གོ་སྐབས་ཡང་ཐོབ་སྟེ་འདུག། མགོནམ་རྡོ་རྗེ་ཁོ་ར་ཁ་སླབ་ནི་དང་གསལ་བཤད་འབད་ནིའི་ནང་ལུ་འཇོན་ཐང་ཅན་ཅིག་འབདཝ་ལས་ རྒྱལ་ཡོངས་དུས་ཆེན་གྱི་སྐབས་ལུ་ གསལ་བཤདཔ་སྦེ་ཕྱག་ཞུ་དོ་ཡོདཔ་མ་ཚད་ འབྲུག་གི་གསུང་སྐད་དང་འབྲུག་མཁས་འཕགས་ཅན་ཟེར་བའི་གསུང་སྐད་འགྲན་བསྡུར་ཚུ་ནང་གི་ གསལ་བཤདཔ་སྦེ་ཕྱག་ཞུཝ་ཨིན་པས། ད་ལྟོ་ཚུན་ཚོད་ མགོནམ་རྡོ་རྗེ་གིས་ འབྲུག་གི་གློག་བརྙན་ ༤༥ དེ་ཅིག་ནང་བཅའ་མར་གཏོགས་ཏེ་ཡོདཔ་དང་ གློག་བརྙན་ཚུ་ཡང་བཟོ་སྐྲུན་འབད་དོ་ཡོདཔ་ཨིན་མས། ད་རེས་ནངས་པ་་ མགོནམ་རྡོ་རྗེ་གིས་བཟོ་སྐྲུན་འབད་ཡོད་པའི་གློག་བརྙན་ མི་ཚེ་མིག་གིས་མི་མཐོང་ཟེར་མི་འདི་ གློག་བརྙན་ཁང་ཚུ་ལས་ཕར་སྟོན་པའི་བསྒང་ར་ཡོདཔ་ཨིན་མས།
རྒྱབ་རྟེན།
ཨོ་རྒྱན་ཕུན་ཚོགས་རབས་རྒྱལ། (༢༠༢༢) རབས་རྒྱལ་དང་གཅིག་ཁར་སྲུ་ཇ་བཞེས་པ་བྱོན་ཤོག། yotube.com/c/Drukyelfilms
འབྲུག་གི་གློག་བརྙན། (༢༠༡༧) ཚེ་རིང་ཕུན་ཚོགས། https://www.movies.bt
This article uses material from the Wikipedia ཇོང་ཁ article མགོནམ་རྡོ་རྗེ།, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ཇོང་ཁ (DUHOCTRUNGQUOC.VN) is an independent company and has no affiliation with Wiki Foundation.