སྨན་ལྗོངས་འདིར་རྗེ་མཁན་པོ་རིམ་བྱོན་གྱི་གསོལ་འདེབས།

༄༅། །རྗེ་མཁན་པོ་རིམ་བྱོན་དང་མཐུ་ཆེན་ཆོས་ཀྱི་རྒྱལ་པོའི་བསྟན་པའི་གཏད་རབས་རིམ་པར་བྱོན་ཚུལ་ནི།།

ལྗོངས་འདིར་མཐུ་ཆེན་ཆོས་ཀྱི་རྒྱལ་པོའི་བསྟན་པའི་གཏད་རབས་རིམ་པར་བྱོན་ཚུལ་ལ། ཁ་རྟགས་ཅན་རྣམས་མཁན་ཆེན་རིམ་བྱོན། ཇ་རྟགས་ཅན་ནི་རྒྱལ་སྲས་འཇམ་དཔལ་རྡོ་རྗེའི་སྐུ་འཕྲེང་རིམ་བྱོན། ཞ་རྟགས་ཅན་ནི་ཐུགས་སྤྲུལ་ཞབས་དྲུང་རིམ་བྱོན། ཕ་རྟགས་ཅན་ནི་གསུང་སྤྲུལ་ཕྱོགས་ལས་རིམ་བྱོན། བ་རྟགས་ཅན་ནི་སེ་ལར་བྱམས་མགོན་སྤྲུལ་སྐུ་རིམ་བྱོན། ཏ་རྟགས་ཅན་ནི་རྒྱལ་སྲས་ཆེན་པོ་བླ་མ་ཁྲི་པ་རིམ་བྱོན། ད་རྟགས་ཅན་ནི་ཆོས་ཀྱི་ས་ནས་དྲིན་ཆེ་བའི་བཤེས་གཉེན་རིམ་བྱོན་ཏེ་ལྗོངས་འདིའི་མཁའ་ལ་བསྟན་པའི་གསལ་བྱེད་སྨྲ་བའི་ཉི་མ་ཇི་སྙེད་ཅིག་བྱོན་པ་འདི་ལྟར་རོ།། ༈ ཁ་་སྡོམ་གསུམ་འཛིན་པ་དཔལ་ལྡན་ཆོས་ཀྱི་རྗེ། །བྱམས་དང་སྙིང་རྗེའི་དབང་གིས་འགྲོ་བ་རྣམས། །བརྩེ་བས་མི་འདོར་རྟག་པར་སྐྱོང་མཛད་པའི། །པད་དཀར་འབྱུང་གནས་ཞབས་ལ་གསོལ་བ་འདེབས། །ཁ་་ཚུལ་ཁྲིམས་རྣམ་དག་ནོར་འཛིན་ཡངས་པའི་གཞིར། །གཞན་ཕན་ཐུགས་ཀྱི་དཔག་བསམ་རབ་རྒྱས་ཤིང་། །ཟུང་འཇུག་སྔགས་ཀྱི་འབྲས་བུ་ལེགས་གཏམས་པའི། །བསོད་ནམས་འོད་ཟེར་ཞབས་ལ༴ །ཏ་་ཤེས་བྱ་ཀུན་གཟིགས་དགེ་ལེགས་དུ་མའི་དཔྱིད། །ཕས་རྒོལ་གཉིས་འཐུངས་ཚོགས་ཀྱི་ཀླད་འགེམས་པའི། །སྨྲ་བའི་སེང་གེ་དཔལ་ལྡན་ངག་གི་དབང་། །བསྟན་འཛིན་རབ་རྒྱས༴། །ད་་རང་བཞིན་ལྷུན་གྱིས་གྲུབ་པ་འཇམ་དཔལ་དབྱངས། །བརྟུལ་ཞུགས་སྤྱོད་པ་འཁོར་ལོ་སྡོམ་པ་དངོས། །མ་རུང་གདུག་པ་འཇོམས་པའི་ཐུགས་རྗེ་ཅན། །འཕྲིན་ལས་འབྲུག་རྒྱལ༴ །ཁ་་གཟི་བརྗིད་ཡོད་འབར་ཚངས་པའི་དབྱངས་སྒྲ་སྒྲོག། མཁྱེན་བརྩེ་རླབས་གཡོས་འདོད་རྒུ་འབྱུང་བའི་དཔལ། །ངོ་མཚར་རྨད་བྱུང་རྡོ་རྗེ་ལྟ་བུའི་སྐུ། །པད་དཀར་ལྷུན་གྲུབ༴། །ཁ་་ཇི་སྙེད་མཁྱེན་པའི་ཆུ་གཏེར་ལས་འཁྲུངས་ཤིང་། །ཟབ་རྒྱས་ཆོས་ཀྱི་སྒོ་འབྱེད་ངག་གི་དབང་། །མ་རིག་གཉིས་འཛིན་དྲི་མ་དག་པའི་དཔལ། །དམ་ཆོས་པད་དཀར༴ །ཇ་་རྒྱལ་ཀུན་ཐུགས་རྗེའི་གར་སྒྱུར་ངག་གི་དབང་། །འགྲོ་བ་རྣམས་ལ་ཀུན་དགའི་གཉེན་གཅིག་པུ། །ཐེག་གསུམ་ཆོས་ཀྱི་རྒྱལ་མཚན་རྩེར་སོན་པའི། །ཀུན་དགའ་རྒྱལ་མཚན༴ །བྱམས་མགོན་རིམ་བྱོན་སྔོན་ནས་གཞན་དུ་བྱོན་ཟིན་པ་མཚན་རྐྱང་དུ་བཞུགས་པ། རྒྱལ་བ་བྱམས་པ། གནས་བརྟན་འོད་བསྲུང་། བདེ་མ་དྲང་སྲོང་། རྔོག་ཆོས་སྐུ་རྡོ་རྗེ། གྲུབ་མཆོག་ཟླ་བ་བཟང་པོ། གྲུབ་ཐོབ་གཏེར་ཁུང་པ། དཔལ་ལྡན་སེམས་དཔའ་ཆེན་པོ། དོན་ཡོད་མཁྱེན་པ། ལྗོངས་འདིར་བྱོན་པའི་འགོ་འདི་ནས། བ་་སྐུ་གསུམ་ཡེ་ཤེས་ལྔ་ལྡན་རྡོ་རྗེ་འཆང་། །མཆོག་གསུམ་ཞི་ཁྲོ་ཌཱ་ཀྐི་སྲུང་མའི་ཚོགས། །གསང་གསུམ་གཉུག་མའི་ངང་དུ་རོ་གཅིག་པའི། །ངག་དབང་རྒྱལ་མཚན༴ །ཁ་རྒྱལ་བ་རྣམས་ཀྱི་ཐུགས་རྗེའི་སྤྱི་གཟུགས་མཆོག། །དགེ་ལེགས་རྒྱ་མཚོ་ཀུན་གྱི་འབྱུང་ཁུངས་ཆེ། །གསང་ཆེན་རིམ་གཉིས་ཟབ་མོའི་མངའ་བདག་རྗེ། །བཟོད་པ་འཕྲིན་ལས༴ །ཁ་ཚོགས་གཉིས་ཡེ་ཤེས་དཀྱིལའཁོར་རབ་རྒྱས་ཤིང་། །ཚད་མེད་བྱམས་དང་སྙིང་རྗེའི་འོད་སྟོང་གིས། །སྐལ་བཟང་སྙིང་གི་པདྨོ་འབྱེད་པའི་གཉེན། །ངག་དབང་ལྷུན་གྲུབ༴ །ཏ་རྒྱལ་ཀུན་མཐུ་སྟོབས་ཡེ་ཤེས་རྡོ་རྗེ་ཡིས། །མ་རིག་གཉིས་འཛིན་བདུད་ཀྱི་དཔུང་འཇོམས་པ། །པདྨ་འབྱུང་གནས་མཆོག་གི་སྤྲུལ་པའི་སྐུ། །མི་ཕམ་དབང་པོའི༴།ཕ་རབ་འབྱམས་རྒྱལ་བའི་སྤྱི་གཟུགས་སྙིང་རྗེའི་གཏེར། །གྲང་ཡས་འགྲོ་ལ་བརྩེ་ཆེན་ལྷ་ཡི་ལྷ། །གསང་གསུམ་ཆོས་ཀྱི་དཔལ་ལྡན་ངག་གི་དབང་། །ཕྱོགས་ལས་རྣམ་རྒྱལ་ཞབས་ལ༴ །ཁ་ཆོས་ཀྱི་དབང་ཕྱུག་ཐུགས་རྗེ་གསང་བ་ལས། །སྲིད་ཞིའི་འདྲེན་མཆོག་བླ་ན་མེད་པའི་སྐུ། །འདོད་དགུར་འཆར་བ་སྒྱུ་འཕྲུལ་རྡོ་རྗེའི་དཔྱིད། །བསྟན་འཛིན་ནོར་བུའི༴ །ཁ་རིགས་བརྒྱའི་ཁྱབ་བདག་དཀྱིལ་འཁོར་ཡོངས་ཀྱི་གཙོ། །མཆོག་གསུམ་ཀུན་འདུས་མཁྱེན་བརྩེ་ནུས་པའི་གཏེར། །དྲི་མེད་རྒྱལ་བའི་བསྟན་ལ་རྒྱལ་བ་དངོས། །ཤཱཀྱ་རིན་ཆེན༴ཕ་དུས་གསུམ་རྒྱལ་བའི་མཁྱེན་བརྩེ་ནུས་པའི་དཔལ། །མ་ལུས་གཅིག་ཏུ་བསྡུས་པའི་ཡེ་ཤེས་འཕྲུལ། །སྒྲུབ་རྒྱུད་བསྟན་ལ་སྣང་བའི་སྒྲོན་མེ་མཆོག། །ཤཱཀྱ་བསྟན་འཛིན༴ །ད་འོག་མིན་ཞིང་དུ་ཆོས་སྐུ་རྡོ་རྗེ་འཆང་། །འཛམ་གླིང་ལྟེ་བར་ཐུབ་པའི་དབང་པོ་ཉིད། །སྨན་ལྗོངས་འདི་ནང་མཁས་གྲུབ་རིན་པོ་ཆེ། །བསྟན་འཛིན་དོན་གྲུབ༴ །ཁ་ཕྱོགས་དུས་རྒྱལ་བའི་དཀྱིལ་འཁོར་རབ་འབྱམས་དབུས། །སྙིང་སྟོབས་གང་བ་རབ་རྒྱས་ཐུབ་པའི་དབང་། །ཐབས་མཁས་ཐུགས་རྗེས་འགྲོ་འདུལ་དགེ་བའི་བཤེས། །བསྟན་འཛིན་ཆོས་རྒྱལ༴ །ཇ་རྒྱལ་ཀུན་གསང་གསུམ་ཡེ་ཤེས་རྡོ་རྗེའི་དཔྱིད། །གྲངས་མེད་རིགས་བརྒྱའི་ཁྱབ་བདག་སྐུ་བཞིའི་དབང་། །གྲུབ་རིགས་བྱེ་བའི་གཙུག་གི་རྒྱན་གྱུར་པ། །འབྲུག་སྒྲ་རྣམ་རྒྱལ༴ །ཁ་རབ་འབྱམས་འོག་མིན་ཞིང་དུ་འཁོར་ལོའི་མགོན། །རིགས་བརྒྱའི་འཕྲོ་འདུ་ངེས་གསང་མཆོག་སྦྱིན་མཁན། །སྐལ་བཟང་ཞིང་འདིར་དཔལ་ལྡན་སྤྲིན་གྱི་དབྱངས། །འཇིགས་མེད་གྲགས་པའི༴ །བ་ཁ་སྐུ་བཞིའི་དབང་ཕྱུག་གསང་བདག་རྡོ་རྗེ་འཛིན། །གང་འདུལ་མོས་ངོར་ཆུ་ཟླའི་གར་བསྒྱུར་བ། །མཁྱེན་བརྩེ་ནུས་པའི་མཆོག་བརྙེས་ཆོས་ཀྱི་རྗེ། །ངག་དབང་འཕྲིན་ལས༴ །ཁ་ཆོས་དང་ཆོས་མིན་རྣམ་པར་འབྱེད་མཛད་ཅིང་། །སྐལ་བཟང་མ་ནོར་ལམ་དུ་ཁ་ལོར་བསྒྱུར། །གྲུབ་རིགས་བསྟན་པའི་ཉིན་བྱེད་ངག་གི་དབང་། །ཀུན་དགའ་རྒྱ་མཚོའི༴། ཁ་མ་ལུས་རྒྱལ་བའི་ཐུགས་རྗེ་འདུས་པའི་ཞལ། །ཟབ་དང་རྒྱ་ཆེ་ཆོས་རྣམས་ཀུན་གྱི་མཛོད། །ཚོགས་མཆོག་ཀུན་དང་འདྲེན་མཆོག་ངག་གི་དབང་། །ཡོན་ཏན་མཐའ་ཡས༴། ཁ་ཤཱཀྱ་སེང་གེ་ཆོས་ཀྱི་རྒྱལ་སྲིད་ལ། །དབང་བསྒྱུར་རིགས་བརྒྱའི་ཁྱབ་བདག་རིན་པོ་ཆེ། །རྗེས་བཟུང་མ་འདྲིས་འགྲོ་བའི་མཛའ་བཤེས་མཆོག། །བསྟན་འཛིན་རྣམ་རྒྱལ༴། །ཁ་རྒྱལ་ཀུན་མཁྱེན་པའི་ཡེ་ཤེས་འཇམ་དཔལ་དབྱངས། །སྒྲིབ་བྲལ་ཐུགས་ཀྱི་རང་གཟུགས་སྤྱན་རས་གཟིགས། །རང་བཞིན་དག་པའི་ངོ་བོ་མཉམ་ཉིད་པ། །ཀུན་བཟང་རྒྱལ་མཚན༴། ཁ་་ཡང་དག་སངས་རྒྱས་ཀུན་གྱི་ཐུགས་རྗེའི་སྟོབས། །ཁམས་གསུམ་འགྲོ་བའི་དཔལ་དུ་ལེགས་ཤར་བ། །སྤྱན་རས་གཟིགས་མགོན་མཆོག་གི་སྤྲུལ་པའི་སྐུ། །ཆོས་ཀྱི་རྒྱལ་མཚན༴ །ཁ་དཔལ་ལྡན་རྒྱལ་བ་རྒྱ་མཚོའི་རྣམ་རོལ་མཆོག། །བདག་སོགས་གདུལ་བྱའི་མོས་ངོར་ལེགས་ཤར་བ། །སྨིན་གྲོལ་ཐར་པའི་ལམ་མཆོག་སྟོན་མཛད་པའི། །ཤེས་རབ་སེངྒེ༴།ཇ་འཇིག་རྟེན་མགོན་པོ་རྒྱལ་ཀུན་གསང་བའི་མཛོད། །གྲུབ་དང་རིག་འཛིན་རྒྱ་མཚོའི་གཙུག་གི་རྒྱན། །དགེ་ལེགས་བྱེ་བའི་འབྱུང་གནས་ངག་གི་དབང་། འཇིགས་མེད་རྣམ་རྒྱལ༴ །བ་ཁ་མི་ཕམ་བྱམས་མགོན་འགྲོ་བའི་དཔལ་ཤར་བ། །མཚུངས་མེད་བླ་མ་སངས་རྒྱས་ཐམས་ཅད་ཀྱི། །གསང་གསུམ་ཡོན་ཏན་གཅིག་འདུས་ཆོས་ཀྱི་རྗེ། །འཇམ་དཔལ་ཡེ་ཤེས་རྡོ་རྗེར༴། །ཁ་ཐུགས་རྗེ་ཆེན་པོའི་སྤྱན་རས་འཇིག་རྟེན་ལ། །གཟིགས་པའི་ལྷ་ཡི་སྐུ་གསུང་ཐུགས་རྡོ་རྗེ། །སྣང་གྲགས་རིག་པ་རོ་གཅིག་ལམ་ཁྱེར་མཁན། །འཇམ་དབྱངས་རྒྱལ་མཚན༴། །ཞ་་དཔལ་མགོན་གྲུབ་པ་བྱེ་བའི་གཙུག་གི་ནོར། །བཀྲ་ཤིས་སྣང་བ་རབ་འབར་ནཱ་རོ་པ། །གདུལ་དཀའི་འགྲོ་ལ་བརྩེ་བས་རྗེས་ཆགས་སྐུ། །ངག་དབང་འཇིགས་མེད་གྲགས་པར༴ །ཕ་ངག་གི་དབང་ཕྱུག་རྣམ་པར་རྒྱལ་བའི་སྡེ། །སྐུ་གསུང་ཐུགས་ཀྱི་རོལ་གར་བསམ་ཡས་པས། །གྲུབ་རིགས་བསྟན་པའི་མགོན་བྱོན་འཇམ་པའི་དཔལ། །ཡེ་ཤེས་རྒྱལ་མཚན༴། ཁ་ངག་གི་དབང་ཕྱུག་ཆེན་པོའི་རྗེས་བཟུང་བའི། །ཆོས་ཀྱི་རྒྱལ་པོའི་རིང་ལུགས་ཉི་མའི་འོད། །ཕྱོགས་བཅུ་སྤེལ་ལ་འགྲན་ཟླ་ཀུན་བྲལ་བའི།། ངག་དབང་ཆོས་རྒྱལ༴ །ཏ་རྒྱལ་ཀུན་ཐུགས་རྗེའི་འོད་སྣང་མཐའ་ཡས་པ། །རིས་མེད་འགྲོ་བའི་གཉེན་གྱུར་འཇིག་རྟེན་དབང་། །དཔལ་ལྡན་པདྨ་ཀཱ་རའི་སྒྱུ་འཕྲུལ་ཆེ། །ངག་དབང་འཇམ་དཔལ་རྒྱ་མཚོ༴། །ཁ་རབ་འབྱམས་རྒྱལ་བའི་སྒྱུ་འཕྲུལ་རིགས་བརྒྱའི་མགོན། །རྣམ་གྲོལ་ཤེས་རབ་ཡོན་ཏན་མཆོག་གི་མཛོད། །མི་ཡི་སེངྒེས་རྗེས་བཟུང་ངག་གི་དབང་། །འཇམ་དཔལ་གྲགས་པའི༴།།ཁ་དཔལ་ལྡན་རྒྱལ་བའི་དཀྱིལ་འཁོར་རྒྱལ་མཚོའི་བདག། དྲི་མེད་སྙིང་རྗེ་ཆ་ཤས་རབ་རྫོགས་པ། །གང་མོས་དེར་སྣང་བདེ་ཆེན་འཁོར་ལོའི་མགོན། །འཇིགས་མེད་རྒྱལ་མཚན༴། །ཏ་་རབ་འབྱམས་རྒྱལ་ཀུན་མཁྱེན་པའི་ཡེ་ཤེས་གཟུགས། །ཐུགས་རྗེ་འོད་སྣང་མཐའ་ཡས་འཇིག་རྟེན་མགོན། །ཞིང་འདིར་རྡོ་རྗེ་འཛིན་པའི་རྣམ་རོལ་པ། །འཇམ་དཔལ་རྡོ་རྗེ༴ །བ་ཁ་ཤེས་བྱ་ཀུན་གཟིགས་མི་ཕམ་བསྟན་པའི་མགོན། །ཚད་མེད་སྙིང་རྗེའི་གཏེར་གྱུར་འཇིག་རྟེན་དབང་། །མཐུ་སྟོབས་བདུད་ཀྱི་དཔུང་འཇོམས་རྒྱལ་བ་དངོས། །ཤཱཀྱ་རྒྱལ་མཚན༴ །ཁ་ཤེས་རབ་ཡེ་ཤེས་ཆེན་པོའི་བདེན་གཉིས་ དོན། །ཀུན་གཟིགས་སྨྲ་བའི་སེངྒེ་འཇམ་དཔལ་དབྱངས། །ཐུབ་བསྟན་རྒྱལ་མཚན་འཛིན་པའི་བྱིན་རླབས་པ། །ཤེས་རབ་རྒྱལ་མཚན༴ །ཞ་དཔལ་ལྡན་གྲུབ་རིགས་རྒྱ་མཚོའི་གཙུག་གི་རྒྱན། །རྒྱལ་བས་ལུང་བསྟན་རྒྱལ་བའི་ཕྲིན་ལས་པ། །མཉམ་མེད་རྗེ་བཙུན་ཟླ་བའི་གཞོན་ནུ་མཆོག། །ངག་དབང་འཇིགས་མེད་ནོར་བུ༴། །ཕ་ཁམས་གསུམ་འགྲོ་བ་ཡོངས་ཀྱི་དཔལ་མགོན་མཆོག། །མཐུ་ཆེན་བདུད་འཇོམས་ངག་དབང་རྣམ་རྒྱལ་གྱི། །སྐུ་གསུང་ཐུགས་ཀྱི་རྣམ་རོལ་ཞིང་འདིའི་མགོན། །ངག་དབང་འཇིགས་མེད་རྡོ་རྗེར༴། ཁ་རྒྱལ་བ་ཀུན་གྱི་ཟག་མེད་ཡོན་ཏན་ལ། །དབང་བསྒྱུར་མཐུ་སྟོབས་ནུས་པ་རྒྱ་མཚོའི་བདག། །འཇམ་མགོན་མཆོག་གིས་རྗེས་བཟུང་འགྲོ་བའི་མགོན།། ཡོན་ཏན་རྒྱ་མཚོའི༴ །ཁ་དམ་པས་རྗེས་བཟུང་མཁྱེན་རབ་པདྨོའི་ཚལ། །རྣམ་གྲོལ་མཆོག་གི་བདུད་རྩིས་ཡོངས་སྨིན་པས། །བཟང་པོའི་ཐུགས་ཡིས་ལེགས་དྲངས་འགྲོ་བའི་མགོན། །པདྨ་བཟང་པོའི༴ །ཏ་མི་འགྱུར་བདེ་ཆེན་འོད་སྣང་ཆོས་ཀྱི་སྐུ། །མཐའ་ཡས་འགྲོ་ལ་རྗེས་ཆགས་སྙིང་རྗེའི་གཏེར། །པདྨ་འབྱུང་གནས་སྒྱུ་འཕྲུལ་རྡོ་རྗེའི་སྐུ། །ངག་དབང་འཕྲིན་ལས་རྒྱ་མཚོར། ཁ་དཀར་བརྒྱུད་བསྟན་པ་རིན་ཆེན་འཛིན་པ་ལ། །ལེགས་བྱས་སྨོན་ལམ་བཟང་པོའི་མཐུ་གྲུབ་པས། །རིས་མེད་འགྲོ་བ་ཡོངས་ཀྱི་མགོན་གྱུར་པ། །རིན་ཆེན་བཟང་པོའི༴ །ཁ་དུས་གསུམ་རྒྱལ་བ་རྒྱ་མཚོའི་ཡེ་ཤེས་འཕྲུལ།།འཇམ་དཔལ་སྨྲ་བའི་ཟླ་བ་གྲགས་པ་ཡི། །ཞབས་ཟུང་སྤྱི་བོར་ལེན་པའི་བྱིན་རླབས་པ། །འཇམ་དཔལ་རྒྱ་མཚོའི༴ །ཁ་ཟབ་རྒྱས་ཆོས་ཀྱི་གཏེར་མཛོད་རྣམ་ཕྱེ་ནས། །ཐར་འདོད་རེ་བ་སྐོང་བའི་སྐྱབས་གཅིག་པུ། །མཚུངས་མེད་འདྲེན་མཆོག་རྣམས་ཀྱིས་བྱིན་རླབས་པ། །ཡོན་ཏན་རྒྱལ་མཚན༴ །ཕ་རྒྱལ་ཀུན་འདུས་ཞལ་འཇིག་རྟེན་མགོན་པོ་ཡི། །གསང་གསུམ་རྡོ་རྗེ་མི་བཟད་སྒྱུ་འཕྲུལ་གར། །གྲུབ་རིགས་རྒྱ་མཚོའི་དཔལ་དུ་ལེགས་ཤར་བ། །མི་ཕམ་ཡེ་ཤེས་དངོས་གྲུབ༴། བ་རྒྱལ་ཀུན་མཁྱེན་པའི་སྤྱི་གཟུགས་མི་ཕམ་མགོན། །སྙིགས་མའི་འགྲོ་བ་འདུལ་ལ་ཐུགས་རྗེའི་གར། །སྐྱབས་གནས་ཀུན་འདུས་མཚུངས་མེད་ངག་གི་དབང་། །བདུད་འཇོམས་རྒྱལ་མཚན༴ །ཁ་་རབ་འབྱམས་རྒྱལ་ཀུན་གསང་གསུམ་འདུས་པའི་ཞལ། །ཟབ་དང་རྒྱ་ཆེའི་ཆོས་ཕུང་བྱེ་བའི་མཛོད། །ཟུང་འཇུག་ཉམས་བཞེས་ཚོགས་མཆོག་འདུས་པའི་དཔྱིད། །ཚུལ་ཁྲིམས་རྒྱལ་མཚན༴ །ཁ་ཕྱོགས་དུས་རྒྱལ་བའི་མཁྱེན་བརྩེའི་ནུས་པའི་གཟུགས། །གང་འདུལ་འགྲོ་བའི་མོས་ངོར་ལེགས་ཤར་བ། མཚུངས་མེད་རིགས་བརྒྱའི་ཁྱབ་བདག་རྡོ་རྗེ་འཛིན། །ཀུན་དགའ་དཔལ་འབྱོར༴ །ཁ་་བསྟན་དང་འགྲོ་ལ་ཕན་བདེའི་འོད་སྣང་འབུམ། །ཡོངས་སུ་སྤེལ་མཛད་འཇམ་མགོན་བླ་མ་ཡིས། །རྗེས་གཟུང་སྨིན་གྲོལ་གདམས་པའི་གཏེར་མཛོད་མཆོག །བཤད་སྒྲུབ་འོད་ཟེར༴ །ཁ་ཕྱོགས་དུས་རྒྱལ་བ་རབ་འབྱམས་ཐམས་ཅད་ཀྱི། །གསང་གསུམ་ཡེ་ཤེས་རྡོ་རྗེ་གཅིག་བསྡུས་པའི། །མཁྱེན་བརྩེ་ནུས་པའི་རང་གཟུགས་ཆོས་ཀྱི་རྗེ། །ཤཱཀྱ་རྒྱལ་མཚན༴ །ཁ་སྐྱབས་མཆོག་རྣམ་གསུམ་བླ་མ་ཡི་དམ་ལྷ། །མཁའ་འགྲོ་དམ་ཅན་ཀུན་འདུས་རིགས་བརྒྱའི་བདག། །སྙིང་གི་པདྨོར་བསྙེན་པས་བྱིན་རླབས་པ། །ཡོན་ཏན་དཔལ་བཟང༴ །ཞི་འགྱུར་མེད་ཡེ་ཤེས་འོད་སྣང་མཐའ་ཡས་པ། །མ་ལུས་འགྲོ་བའི་དཔལ་གྱུར་སྤྱན་རས་གཟིགས། །བདེ་ཆེན་རྒྱལ་པོ་ཨུ་རྒྱན་པདྨའི་འཕྲུལ། །ངག་དབང་འཇིགས་མེད་ཆོས་རྒྱལ༴ །ཁ་སྐལ་བཟང་རྒྱལ་བ་རྒྱ་མཚོའི་སྟོན་པ་མཆོག། །འཛིན་སྐྱོང་སྤེལ་ལ་འགྲན་ཟླ་ཀུན་བྲལ་ཞིང་། །རིས་མེད་འགྲོ་བའི་དཔལ་མགོན་ངག་གི་དབང་། །ཀུན་དགའ་སེངྒེའི༴ །ཁ་འཇམ་དཔལ་དབྱངས་དངོས་གྲགས་པའི་ཤེས་རབ་ཀྱིས། །ཟག་མེད་ཡོན་ཏན་ཀུན་ལ་དབང་བསྒྱུར་བའི། །གྲུབ་པའི་རྒྱལ་མཚན་རྣམས་ཀྱིས་རྗེས་བཟུང་བ། །བློ་གྲོས་རྒྱལ་མཚན༴ །ཁ་དཔལ་ལྡན་འཁོར་ལོའི་དབང་ཕྱུག་རིགས་བརྒྱའི་མགོན། །གསང་གསུམ་ཡོན་ཏན་རྒྱ་མཚོའི་བདག་ཉིད་མཆོག། །གྲུབ་རིགས་རྒྱལ་མཚན་འཛིན་པས་རྗེས་བཟུང་བ། །པད་དཀར་འོད་ཟེར༴། ཁ་འོད་སྣང་མཐའ་ཡས་མགོན་གྱི་ཡེ་ཤེས་འཕྲུལ། །སྙིགས་མའི་འགྲོ་བ་འདྲེན་མཛད་པདྨ་འབྱུང་། །གང་འདུལ་མོས་ངོར་དེར་སྣང་རྡོ་རྗེ་སེམས། །ངག་དབང་དོན་ལྡན༴ །ཁ་མི་ཕམ་རྒྱལ་བའི་སྒྱུ་འཕྲུལ་ཆ་རྫོགས་ཟླ། །གཞན་ཕན་སྙིང་རྗེ་འཛུམ་པའི་འོད་སྣང་གིས། །གྲུབ་རིགས་རྒྱ་མཚོ་སྤེལ་མཛད་ཆོས་ཀྱི་རྗེ། །འཕྲིན་ལས་རྒྱལ་མཚན༴ །ཁ་དཀྱིལ་འཁོར་རྒྱ་མཚོའི་ཁྱབ་བདག་རིགས་བརྒྱའི་མགོན། །འཇམ་དབྱངས་ཡོན་ཏན་རྒྱལ་བའི་མཚན་སྙན་གྱིས། །རྗེས་བཟུང་ཐུབ་བསྟན་འཛིན་པར་དབང་བསྐུར་བ།བསྟན་འཛིན་ལྷུན་གྲུབ༴ །ཁ་རྒྱལ་ཀུན་མཁྱེན་པའི་སྤྱི་གཟུགས་འཇམ་དཔལ་དབྱངས། །འགྲོ་དྲུག་འདྲེན་མཛད་སྙིང་རྗེ་སྤྱན་རས་གཟིགས།། བདུད་དཔུང་མ་ལུས་འཇོམས་ཕྱིར་གསང་བའི་བདག །འཕྲིན་ལས་རྒྱ་མཚོའི༴ །ཁ་་བསླབ་གསུམ་ཚུལ་ཁྲིམས་རྒྱ་མཚོའི་མཛོད་འཛིན་ཅིང་། །གྲུབ་རིགས་རྒྱལ་མཚན་འཛིན་པས་རྗེས་བཟུང་སྟེ། །ཟབ་ལམ་གདམས་པའི་ཐུགས་རྒྱུད་ཡོངས་སྨིན་པའི། །དམ་ཆོས་རྒྱལ་མཚན༴།།ཁ་རྒྱལ་བ་རྒྱ་མཚོ་མཁྱེན་བརྩེའི་ནུས་པའི་འཕྲུལ། །གསང་གསུམ་ཡོན་ཏན་རྒྱན་གྱི་འཁོར་ལོའི་མཛོད། །ཆོས་ཀྱི་རྒྱལ་མཚན་འཛིན་པའི་སྲས་གྱུར་མཆོག །ཤེས་རབ་ལྷུན་གྲུབ༴། །ཁ་་སངས་རྒྱས་ཀུན་གྱི་མཁྱེན་བརྩེའི་ནུས་པའི་འཕྲུལ། །རྣམ་དག་ཚུལ་ཁྲིམས་སྐུ་མངའ་ཆོས་ཀྱི་རྗེ། །ཐུབ་བསྟན་རྒྱལ་མཚན་འཛིན་པས་རྗེས་བཟུང་བ། །འཇམ་དབྱངས་རིན་ཆེན༴། ཁ་་འཇམ་དཔལ་རྡོ་རྗེ་གསང་གསུམ་ཉིན་བྱེད་ཀྱིས། །ཐུབ་བསྟན་བཤད་སྒྲུབ་པདྨོ་རྣམ་རྒྱས་ཤིང་། །བྱིན་རླབས་འོད་ཟེར་སྤྲོ་བསྡུས་རྗེས་བཟུང་བ། །རིག་འཛིན་སྙིང་པོའི༴༴།ཁ་གསང་སྔགས་རྒྱ་མཚོའི་དབུས་ན་མངོན་པར་བརྗིད། །བློ་གྲོས་ནུས་པའི་འོད་སྟོང་ཕྱོགས་བརྒྱར་འབར། །སྐུ་བཞིའི་མགོན་པོ་ཁྱབ་བདག་ཧེ་རུ་ཀ། །འཇམ་དཔལ་བཤེས་གཉེན༴། ཁ་རྒྱལ་བའི་མཁྱེན་མཆོག་འཕགས་པ་འཇམ་དཔལ་དབྱངས། །བཤད་སྒྲུབ་པདྨོའི་འོད་ཟེར་གསང་བའི་བདག། །དམིགས་མེད་སྙིང་རྗེ་ཆེན་པོས་རྗེས་བཟུང་བ། །བྱམས་པའི་སྟོབས་བཟང༴། །ཁ་ཐུབ་བསྟན་བཤད་སྒྲུབ་སྙིང་པོའི་འོད་ཟེར་གྱིས། །རང་རིག་གཉུག་མའི་ངོ་བོ་རྣམ་འབྱེད་པའི། །འཕྲིན་ལས་བསྟན་པའི་རྒྱལ་མཚན་དབང་བསྐུར་བ། །དཔལ་ལྡན་སེངྒེ༴། །བ་དགེ་ལེགས་རབ་དཀར་ཚོགས་གཉིས་གོམས་པའི་མཐུས། །དཔལ་ལྡན་སྐུ་བཞིའི་གོ་འཕང་མཆོག་བརྙེས་ཀྱང་། །མཁས་བཙུན་བཟང་པོའི་གདུལ་བྱར་མི་འདོར་བའི། །བྱམས་མགོན་རྒྱལ་མཚན༴། ཞ་མཆོག་གསུམ་ཀུན་འདུས་འཆི་མེད་སྣང་མཐའ་ཡས། །འགག་མེད་བྱམས་བརྩེ་འོད་སྣང་འཇིག་རྟེན་དབང་། །ཞིང་འདིའི་མོས་ངོར་དཔལ་དུ་ལེགས་ཤར་བ། །ངག་དབང་འཇིགས་མེད་རྡོ་རྗེར༴། །ཁ་ཐུབ་བསྟན་འདུས་སྡེར་རྒྱ་མཚོའི་དཀྱིལ་ཆེན་པོར། །ཡེ་ཤེས་རང་སྣང་ཟླ་བའི་དཔལ་ཤར་བ། །འཕྲིན་ལས་རྒྱལ་བའི་མཚན་གྱིས་དབང་བསྐུར་བའི། །ཡེ་ཤེས་ཟླ་བའི༴ །ཁ་སྐུ་བཞིའི་རྒྱལ་བ་རྒྱ་མཚོའི་ཡེ་ཤེས་འཕྲུལ། །ངེས་དོན་ཟབ་མོའི་བདུད་རྩིའི་གཏེར་ཆེན་པོ། །ཡོན་ཏན་དཔལ་ལྡན་བཟང་པོས་རྗེས་བཟུང་བ། །མི་ཕམ་དབང་པོའི་ཞབས་ལ༴ །ཁ་སྐལ་བཟང་རྒྱལ་བ་ཀུན་གྱི་མཁྱེན་བརྩེའི་གཟུགས། །མ་ལུས་གཅིག་བསྡུས་ངག་གི་དབང་ཕྱུག་བཞིན། །བཤད་སྒྲུབ་བསྟན་པའི་དགའ་སྟོན་འགྱེད་མཛད་པའི། །ངག་དབང་རྒྱལ་མཚན༴། །ཁ་རྒྱལ་ཀུན་མཁྱེན་པའི་མངའ་བདག་འཇམ་དཔལ་དབྱངས། །བྱམས་བརྩེ་སྙིང་རྗེའི་དབང་ཕྱུག་སྤྱན་རས་གཟིགས། །མཐུ་སྟོབས་ནུས་པའི་བཤེས་གཉེན་གསང་བའི་བདག །སྲིད་ཞི་རྣམ་རྒྱལ༴ །ཁ་རྨད་བྱུང་རྒྱལ་བསྟན་འཛིན་པའི་འཕྲིན་ལས་མཆོག། །ངེས་དོན་བཤད་སྒྲུབ་རྒྱལ་མཚན་རྩེར་སོན་ཏེ། །རིས་མེད་འགྲོ་བ་ཡོངས་ཀྱི་མགོན་གྱུར་པ། །ཆོས་ཀྱིདབང་ཕྱུག༴། །ཁ་བ་ཀུན་ཁྱབ་བདེ་ཆེན་བྱམས་མགོན་ཆོས་ཀྱི་རྗེ། །སྲིད་ཞིའི་གཙུག་རྒྱན་རྒྱལ་བ་ཐམས་ཅད་ཀྱི། །ཕྱོགས་ལས་རྣམ་པར་རྒྱལ་བའི་ཅོད་པན་མཆོག །བྱམས་མགོན་ངག་དབང་ཕྲིན་ལས༴། ཁ་མཁས་བཙུན་བཟང་པོའི་དཔལ་ཡོན་འབུམ་ཕྲག་གིས། །འཇིགས་མེད་ཟླ་དང་བྲལ་བར་མངོན་འཕགས་ཤིང་། །ཆོས་ཀྱི་རྒྱལ་པོའི་སྲིད་ལ་དབང་བསྒྱུར་བའི། །བསམ་གཏན་རྒྱ་མཚོའི༴ །ཁ་འཇིགས་མེད་ནཱ་རོ་ཏ་པའི་རྣམ་འཕྲུལ་མཆོག །ཆོས་ཀྱི་རྒྱལ་པོ་བདུད་འཇོམས་རྡོ་རྗེ་ཡི། །རྒྱལ་ཚབ་དམ་པར་དབང་བསྐུར་མངའ་གསོལ་བའི། །ཡོན་ཏན་བརྩོན་འགྲུས༴ །ཁ་བྱམས་མགོན་ཉིན་བྱེད་བདེ་ཆེན་སྙིང་པོ་ཡིས། །སྲས་སུ་རྗེས་བཟུང་ཐུགས་རྒྱུད་བྱང་ཆུབ་སེམས། །སྙིང་རྗེའི་མྱུ་གུ་ཐིག་ལེ་མཛོད་ཕྱེ་བ། །ངག་དབང་འཕྲིན་ལས་ལྷུན་གྲུབ༴ །ཁ་་མི་ཕམ་ཉིད་བྱེད་དབང་པོའི་བྱིན་འོད་ཀྱིས། །ཐོས་བསམ་ཐུགས་ཀྱི་པདྨོའི་གཏན་ལ་འབེབས། །ངེས་གསང་དཔལ་གྱི་དྲི་བཟང་འཛིན་པའི་དཔྱིད། །བསམ་གཏན་དཔལ་བཟང་༴ །ཁ་དཔལ་ལྡན་གནམ་རྔའི་རིང་ལུགས་ཞིང་ཀུན་ཏུ།། སྨྲ་བའི་སེངྒེ་མི་ཕམ་ཆོས་ཀྱི་རྒྱལ། །བསམ་བཞིན་འགྲོ་འདུལ་ཐུགས་རྗེས་གར་བསྒྱུར་བ། །ཡེ་ཤེས་སེངྒེའི་ཞབས་ལ༴ །ཁ་་རབ་འབྱམས་རྒྱལ་ཀུན་མཁྱེན་བརྩེ་ནུས་པའི་ཁམས། །སྤྱི་གཟུགས་འཇམ་མགོན་བྱིན་རླབས་ཉིན་བྱེད་ཀྱིས། །བཤད་སྒྲུབ་པདྨ་ཆེན་པོས་མཛེས་བྱས་པ། །ངག་དབང་ཡོན་ཏན་མཐར་ཕྱིན༴།ཁ་མདོ་སྔགས་མང་ཐོས་ལུང་གི་སྤྲིན་འཁྲིགས་ཤིང་། །མངོན་རྟོགས་བསླབ་གསུམ་ལུས་ཀྱི་རྩལ་རྫོགས་ནས། །ཟབ་རྒྱས་ཆོས་ཀྱི་མཁའ་ལ་སྒྲ་སྒྲོགས་པ། །དགེ་འདུན་རིན་ཆེན་ཞབས་ལ་གསོལ་བ་འདེབས། །ཁ་རྒྱལ་ཀུན་སྙིང་རྗེ་རང་གཟུགས་འཇིག་རྟེན་དབང་། །གང་མོས་དེར་སྣང་འཇིགས་མེད་བརྟུལ་ཞུགས་ཀྱིས། །ཡེ་ཤེས་རྡོ་རྗེ་གྲུབ་པའི་དབང་བསྐུར་བ། །འཕྲིན་ལས་ལྷུན་གྲུབ་ཞབས་ལ༴། །ད་ལྟ་འཚོ་ཞིང་གཞེས་པ། ཁ་དོན་བརྒྱུད་གདམས་པའི་བྱིན་བརླབས་ཆུ་བོའི་རྒྱུན། །ཐུགས་ཀྱི་བུམ་པར་སྐྱིལ་ནས་གསང་ཆེན་གྱི། །སྨིན་གྲོལ་བདུད་རྩིའི་མཆོག་སྩོལ་རིགས་ཀྱི་བདག། །བསྟན་འཛིན་དོན་གྲུབ་ཞབས་ལ༴ །ཁ་རྒྱལ་ཀུན་ཐུགས་རྗེའི་ཆུ་གཏེར་ལས་བལྟམས་པའི། །གསང་གསུམ་མཛད་འཕྲིན་སྟོན་ཟླའི་འོད་སྟོང་གིས། །ཐུབ་བསྟན་ཀུ་མུཏ་འཛུམ་བརྒྱ་འགྲོལ་མཛད་པ། །ངག་དབང་འཇིགས་མེད་ཆོས་གྲགས༴ །།

Tags:

🔥 Trending searches on Wiki ཇོང་ཁ:

པོ་ལེནཌིཚེ་སྒྲུབ།སེམས་རྟོགས་ཁ་རྫོང་། (གསང་སྔགས་ཟབ་དོན་ ཕོ་བྲང་།)མཉམ་མེད་སེང་གེ་དགུཡུ་ནའིཊེཊ་སི་ཊེསཟླུམ་བརྩེགས་ལྷ་ཁངབསམ་རྩེ་རྫོང་ཁགནེ་དར་ལེནཌསི་སྤུ་ན་ཁ་རྫོང་ཁགབྱང་ཀོ་རི་ཡ་དཔལ་ལྡན་བླ་མ་ལ་སྐུ་གསུང་ཐུགས་རྟེན་ཕུལ་བ།བཀྲ་ཤིས་ཆོས་རྫོང་ལས་གཡོག་ལྷན་ཁག།དངོས་ཁམས་རིག་པཤེས་རབ་སྙིང་པོའི་མདོ།གཞལམ་སྒང་རྫོང་ཁགརྒྱ་གར།༢༠༡༡ཀྲུང་ཀོགསེར་ལྡན་རྒྱལ་ཁབ་ནེཔ་ཊུནབསམ་རྩེ།༡༨༠༠པོར་ཅུ་གལ་ཕརཱནསི་བེ་ལ་རུ་སུ་རྒྱ་མི།ལྷུན་རྩེ་རྫོང་ཁགཨོ་རྒྱན་དབང་ཕྱུག་མར་པ་ལོ་ཙཱ་བ༢༠༢༡རྒྱ་ནགསྒང་སྟེང་གསང་སྔགས་ཆོས་གླིང་རྒྱལ་ཆེན་སྡེ་བཞི་བི་ཟི་ནིསི་བྷུ་ཊན།ཕྱག་འཚལ་བའི་དགོས་པའི་དོན་འབྲུག་གི་འཁྱེག་རི།མོ་རོ་ཀོཀོ་ལོམ་བི་ཡམེ་མར།རྟ་ལོག་གསང་སྔགས་ཆོས་གླིང་།ཨ་ཅོ་གདོང་དཀར།ཨེ་སི་ཡ་རིའོ་དེ་ཞ་ནེའི་རོ་ཀེ་ནི་ཡ་ཐཱའི་ལེནཌ།སྐུ་རྗེས་ ལྷ་ཁང་སྤྱི་ཟླ་གསུམ་པ། ༣༠༡༦ཟངས་མདོག་དཔལ་རིའི་སྨོན་བསྡུས་པ།འབྲུག་དབང་འདུས་རྩེ་ལྷ་ཁང་🡆 More