ས་བསླང་གི་ཆོ་གཤིན་ཏུ་བསྡུས་པ།

༈ རྣམ་མེད་ཞི་བའི་དབྱིངས་ལས་མ་གཡོས་ཀྱང་། །རྣམ་ཀུན་སྒྱུ་འཕྲུལ་དྲྭ་བའི་སྐུར་བཞེངས་ཏེ། །རྣམ་མང་གདུལ་བྱའི་འགྲོ་བ་འདྲེན་མཛད་པ།། རྣམ་པར་འཇོམས་པའི་ལྷ་ལ་ཕྱག་འཚལ་ལོ། །ཆོས་རྣམས་བདེན་མེད་སྟོང་པའི་མེ་ལོང་དུ། །ཀུན་རྫོབ་རྟེན་འབྲེལ་གཟུགས་བརྙན་མི་བསླུ་བས། །རྒྱུ་འབྲས་ཡིད་ཆེས་ཅན་ལ་ཕན་པའི་ཕྱིར། །ས་བདག་བརྟག་པའི་ཆོག་ཁྲིགས་འདི་ན་སྤེལ། _{།དེ་ཡང་བདག་ཅག་གི་སྟོན་པས་རྒྱུད་སྡེ་རྣམས་སུ། དབང་བསྐུར། རབ་གནས། སྦྱིན་སྲེག །དཀྱིལ་འཁོར། ལྷ་ཁང་སོགས་ཀྱི་སྔོན་དུ་ས་བདག་བརྟག་པའི་ཆོ་ག་བྱ་དགོས་པར་གསུངས་ཤིང་གོང་མ་རྣམས་ཀྱི་ཕྱག་བཞེས་སུ་མཛད་པ་བཞིན་འདིར་འཇུག་བདེ་བཀླག་ཆོག་ཏུ་འགོད་པ་ལ། སྦྱོར་བ་སྔོན་འགྲོ་བའི་རིམ་པ་དང་། དངོས་གཞི་ཆོ་གའི་རིམ་པ་གཉིས་ལས། དང་པོ་ནི། ས་གཏན་ནས་མ་བརྐོའི་སྔོན་དུ་ཡུལ་ལྷ་གཞི་བདག་ལ་གཏོར་མ་དང་གསེར་སྐྱེམས་གང་ལེགས་ཕུལ་ཞིང་ས་བསླང་བསྡུས་པ་ཞིག་བྱ་ཞེས་གསུངས་པའི་ཚུལ་སྤྲོ་ན། ལྷ་བསངས་བཀྲ་ཤིས་རེ་སྐོང་གི་གཞུང་བསྲངས་ཏེ།} རང་རང་སོ་སོའི་གནས་སུ་གཤེགས། _{།ཞེས་པའི་བར་མཐར་ཆགས་སུ་འདོན། བདག་བསྐྱེད་མི་བསྡུ་བར་གསལ་བཞིན་པའི་ངང་ནས། མདུན་གྱི་གཞི་དེར་དྲིའི་ཐིག་ལེའི་སྟེང་མེ་ཏོག་གི་ཚོམ་བུ་འགོད། དེའི་མདུན་དུ་གཏོར་མ་དང་མཆོད་པ་བཤགས་ཏེ།} མདུན་དུ་ལཾ་ལས་སའི་ལྷ་མོ་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་གཡས་ཁས་ལེན་པའི་ཕྱག་རྒྱ་དང་གཡོན་གསེར་གྱི་བུམ་པ་འཛིན་པ་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ་ལྟེ་བ་ཡན་ཆད་ས་གསེབ་ནས་འཐོན་པར་_{བསམ་ལ།} རང་གི་སྙིང་གའི་འོད་ཟེར་གྱིས་ཡེ་ཤེས་ཀྱི་ལྷ་མོ་མདུན་གྱི་ནམ་མཁར་བཛྲ་ས་མཱ་ཛ༔ _{ཞེས་སྤྱན་དྲངས་ཏེ།} ཧཱུྃ༑ ལྷ་མོ་ཆེན་མོ་ས་འཛིན་འཇིག་རྟེན་ཡུམ། །རིན་ཆེན་སྣ་ཚོགས་ན་བཟའི་བརྒྱན་གྱིས་རྒྱན། །དོ་ཤལ་རྐང་གདུབ་རྒྱན་ལྡན་སེམས་མ་ཁྱོད། །མཆོད་པ་འདི་བཞེས་འདི་རུ་བྱིན་བརླབ་མཛོད། །ཨེ་ཧྱེ་ཧི་པྲི་ཐི་ཝི་དི་ཝཱི་ཨཱ་ཀརྵ་ཡ་ཛ༔ _{ཞེས་བརྗོད། ནམ་མཁར་བྱོན་པ་ལ།} ཨོཾ་སུམ་བྷ་ནི་_{སོགས་ཀྱིས་ཕྱི་འབྲང་གི་བགེགས་བསྐྲད།} ཛ༔ཧཱུྃ་བཾ་ཧོ༔ ཨོཾ་རཏྣ་ཨ་བྷི་ཥིཉྩ་ཧཱུཾ། ཞེས་དབང་བསྐུར་བས་རིན་པོ་ཆེས་དབུ་བརྒྱན་པར་གྱུར། ཨོ་པྲི་ཐི་ཝི་དི་ཝཱི་ཨརྒྷཾ་པྲ་ཏི་ཙྪ་ཧཱུཾ་སྭཱཧཱ། _{དེ་བཞིན་དུ།} པཱ་ཏྱཾ་_{སོགས་རྣམ་ལྔ་རོལ་མོ་དང་བཅས་པས་མཆོད།} ཨོཾ་ཨ་ཀཱ་རོ་_{སོགས་ཀྱིས་གཏོར་མ་ཕུལ།} ཁྱོད་ནི་ས་འཛིན་ལྷ་མོ་སྟེ། །སྐུ་ཕྱེད་འཐོན་པ་གསེར་གྱི་མདོག། །རིན་ཆེན་སྣ་ཚོགས་བརྒྱན་གྱིས་རྒྱན། །ས་འོག་གཙོ་མོ་ཁྱོད་ལ་བསྟོད། _{།ཅེས་བསྟོད། ས་གནོན་གྱི་ཕྱག་རྒྱ་དང་བཅས་ཏེ།} སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱིས། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེངྒེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། _{།ཞེས་དང་།} ས་ལ་རྒྱུ་བའི་ལྷ་ཀུན་དང་། །གང་ཡང་ས་ལ་བརྟེན་པ་རྣམས། །སེམས་ཅན་རྣམས་ལ་དགེ་དོན་དུ། །བྱམས་པའི་སེམས་ཀྱི་གནང་བར་མཛོད། _{།ཅེས་གསོལ་བ་བཏབ་པས།} རྡོ་རྗེ་འཛིན་པ་ཁྱོད་ཀྱིས་སའི་ཕྱོགས་འདིར་ཅི་དགའ་བར་སྤྱོད་ཅིག་ཅེས་གནང་བར་བྱིན་པར་_བསམ། ཨོཾ་པྲི་ཐི་ཝི་དི་ཝཱི་ཨརྒྷཾ་པྲ་ཏི་ཙྪ་ཧཱུཾ་སྭཱཧཱ། _{སོགས་གོང་བཞིན་བརྗོད།} ཨོཾ་པྲི་ཐི་ཝི་དི་ཝཱི་བཛྲ་མུཿ ཞེས་བརྗོད་པས་དེ་ཉིད་དུ་ཐིམ་པར་བསམ་མོ། །དེ་ནས་བྱེ་བྲག་སའི་བདག་པོའི་གཏོར་མ་དང་མཆོད་པར་བཤམས་ཏེ། སྙིང་གའི་ཧཱུཾ་ཡིག་གི་འོད་ཟེར་གྱིས་བྱེ་བྲག་སའི་བདག་པོ་འཁོར་བཅས་ཨ་ཀར་ཡ་ཛཿ ཞེས་པས་བཀུག་ལ། བྷུ་མི་པ་ཏི་ས་པ་རི་ཝཱ་རེ་ཨོཾ་ཨ་ཀཱ་རོ་_{སོགས་ལན་གསུམ་གྱིས་བསྔོས་ནས།} གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །དཀྱིལ་འཁོར་དོན་དུ་ས་ཕྱོགས་འདི། །བདག་ཞུ་ཁྱོད་ཀྱིས་སྩལ་དུ་གསོལ། །ཞེས་བརྗོད་པས་ཅི་དགའ་བར་གྱིས་ཅེས་གནང་བ་བྱིན་ནས། བཛྲ་མུཿ _{རང་གནས་སུ་གཤེགས་པར་བསམ་ལ་ཚོམ་བུ་དང་མཆོད་རྫས་བསྡུ། དགེ་རྩ་བསྔོ་བ་སོགས་སྔར་གྱི་དཀྱུས་ལ་འཇུག་སྟེ་གྲོལ། སྐབས་འགར་ས་བསླང་བའི་ཆོ་ག་བསྡུས་པ་བྱ་དགོས་ན་འདི་ཙམ་གྱིས་ཀྱང་ཆོག་གོ །ཞེས་པའང་ཤཱཀྱའི་དགེ་སློང་འཇིགས་གྲགས་པས་སོ།། །།}