འབྲུག་པའི་བཞེས་སྒོ།
འབྲུག་རྒྱལ་ ཁབ་ འདི་ ཕྱིའི་རྒྱལ་ཁབ་ ཚུ་དང་དོ་འགྲན་འབད་ནིའི་ རྒྱུ་སྟོབས་དང་མི་རློབས་ དེ་ལས་འཕྲུལ་རིགས་ཚུ་ ག་ནི་ཡ་མེད་དེ་འབད་རུང་ ད་ལྟོ་ཚུན་ཚོད་ རང་དབང་སྦེ་སྡོད་ཚུགས་མི་འདི་ ང་བཅས་རའི་སྔར་སྲོལ་ལམ་ལུགས་ བཟང་པོ་ཚུ་མ་ཉམས་པར་ཡོད་མི་དང་ རྒྱལ་ཁབ་ཀྱི་ ངོ་རྟགས་མ་འདྲཝ་ལེ་ཤ་ཡོད་མི་ཚུ་ལས་བརྟེན་ཏེ་ཨིན། ངོ་རྟགས་མ་འདྲཝ་ཚུ་གི་གྲས་ལས་གཅིག་འདི་ འབྲུག་པའི་བཞེས་སྒོ་འདི་ཨིན། འབྲུག་པའི་ བཞེས་སྒོ་ཚུ་ཡང་ འཛམ་གླིང་རྒྱལ་ཁབ་ གཞན་ཚུ་དང་ མ་འདྲཝ་སྦེ་ཡོདཔ་ཨིན། འབྲུག་པའི་ བཞེས་སྒོ་ཚུ་ཡང་ ང་བཅས་རའི་ རྒྱལ་ཁབ་ནང་ལས་འཐོན་མིའི་རྫས་སྦྱོར་ མ་འདྲཝ་ཚུ་གིས་ བཟོཝ་ལས་ བྲོཝ་ཡང་ མ་འདྲཝ་སྦེ་ཡོདཔ་ཨིན། ཨེ་ཤི་ཡ་ ལུང་ཕྱོགས་ཀྱི་ རྒྱལ་ཁབ་ཇ་པཱན་དང་རྒྱ་ནག་ ཚུ་དང་འདྲཝ་སྦེ་ འབྲུག་རྒྱལ་ཁབ་ནང་ལུ་ བཞེས་སྒོ་ཚུ་ ལགཔ་གིས་ཟ་ནིའི་ སྲོལ་འདི་ ད་ལྟོའི་བར་ན་ཡང་ ཡོདཔ་ཨིན། བཞེས་སྒོ་ཚུ་ མ་ཟ་བའི་ཧེ་མར་ ལྟོ་མཆོད་གཏང་ནི་དང་ལྟོ་ཕུད་གཏོར་ནི་འདི་ འབྲུག་པའི་ལམ་སྲོལ་ བཟང་པོ་ཅིག་ཨིན།
འབྲུག་པའི་ བཞེས་སྒོ་བཟོ་ཐངས་འདི་ ཁ་ཚ་དྲགས་སྦེ་ཡོདཔ་དང་ རྫས་སྦྱོར་ཚུ་ གི་གྲས་ལས་ ཨེ་མ་འདི་འབྲུག་པའི་ བཞེས་སྒོ་གི་རྫས་སྦྱོར་ངོ་མ་ཅིག་ར་ཨིནམ་དང་ འབྲུག་པའི་བཞེས་སྒོ་ མང་རབས་ཅིག་ནང་ར་བླུག་ནི་ཡོདཔ་ཨིན།
ཨེ་མ་དར་ཚི་ འདི་འབྲུག་གི་རྒྱལ་ཡོངས་ བཞེས་སྒོ་ཅིག་ཨིན། དེ་ནང་རྫས་སྦྱོར་མ་འདྲཝ་ཚུ་ཡང་ ཨེ་མ། དར་ཚི། སྒོགཔ། མར་ཁུ་ ཚུ་ངེས་བདེན་ར་ བླུག་ནི་ཡོདཔ་དང་ བླམ་བན་ད་ འདི་ རང་རང་སོ་སོ་གི་ ཁམས་དང་བསྟུན་ཏེ་ བླུག་སྲོལ་ ཡོདཔ་ཨིན། བཞེས་སྒོ་དེ་ནང་ ཨེ་མ་འདི་ཡང་ ག་ནི་བ་ ཁ་ཚ་དྲགས་དང་ དར་ཚི་དེ་ ནང་འཁོད་ལས་འཐོན་པའི་བ་གི་ དར་ཚི་ཚུ་བླུག་སྲོལ་ ཡོདཔ་ཨིན། ད་རུང་ དེ་བ་ལྷག་པའི་ད མིགས་བསལ་གྱི་ ཆོག་སྒྲིག་བཀལ་ཐངས་ཚུ་ཡང་ མར་ཁུ་གི་ཚབ་ལུ་བ་མར་དང་ དར་ཚི་འདི་ ལ་ནོར་གྱི་ དར་ཚི་ཚུ་བླུག་སྲོལ་ ཡོདཔ་ཨིན། ཨེ་མ་དར་ཚི་གུར་ གཞན་ཡང་ ཀེ་བ་དང་སྲནམ་ཅུམ་ ལ་སོགས་པ་ཚུ་བླུགས་ཏེ་ བཞེས་སྒོ་གཞན་ཡང་ བཟོ་སྲོལ་ཡོདཔ་ཨིན།
བཞེས་སྒོ་གཞན་ ཚུ་གི་གྲས་ལས་ དང་པ་ར་ ཨེ་མ་དར་ཚིའི་ནང་ལུ་ ཀེ་བ་སླ་བསྲེས་རྐྱབ་པ་ཅིན་ ཀེ་བ་དར་ཚི་ ཟེར་སླབ་ཨིན། འཛམ་གླིང་ནང་ལུ་ ཀེ་བ་གི་བཞེས་སྒོ་རྣམ་པ་སྣ་ཚོགས་སྦེ་གྱངས་ཁ་མ་ཆོདཔ་ཅིག་ བཟོ་ནི་ཡོད་རུང་ ཀེ་བའི་ནང་དར་ཚི་བླུགས་ཏེ་བཟོ་མི་འདི་ འབྲུག་རྒྱལ་ཁབ་ནང་ རྐྱངམ་གཅིག་ ར་ཨིན་མས། ཚོདམ་དེ་ དགའ་སྟོན་དང་ སྤྲོ་སྟོན་གྱི་ལས་རིམ་ ཚུ་བརྩི་སྲུང་འབད་ས་ལུ་ ཤ་མ་ཟ་མི་ཚུ་གི་དོན་ལུ་ དམིགས་བསལ་གྱི་བཞེས་སྒོ་ ཆོག་སྒྲིག་ ཅིག་སྦེ་བརྩིཝ་ཨིན་པས།
ཆོག་སྒྲིག་ ཚུ་གི་དབང་དུ་གཏངམ་ད་ ཤ་ཟ་མི་ཚུ་གི་དོན་ལུ་ ཕག་ཤ་པགས་དང་ཤ་སྐམ་པགས་གཉིས་ ག་ཅི་དེ་སྤྲོ་ཅན་གྱི་ ཟས་ཅིག་སྦེ་བརྩིཝ་ ཨིན། མ་གཞི་ དམ་པའི་ཆོས་དང་འཁྲིལཝ་ད་ ཤ་ཟ་ནི་འདི་ སྡིག་ཅན་ཅིག་སྦེ་བརྩིས་རུང་ ད་ལྟོའི་བར་ན་ཡང་ ཤ་ཟ་ནི་དེ་ བཀག་མ་ཚུགས་པར་འདུག། སྔོན་དང་ཕུ་ལས་ར་ འབྲུག་རྒྱལ་ཁབ་ཀྱི་ ལུང་ཕྱོགས་མང་རབས་ཅིག་ནང་ ལོ་ཆོག་གི་ཕགཔ་ཟེར་གསོ་སྲོལ་ཡོདཔ་ལས་ ཕག་ཤ་པགས་འདི་ སྤྲོ་ཅན་གྱི་ཟས་ཅིག་ཨིན་པས། ཕག་ཤ་པགས་དེ་ དགའ་སྟོན་དང་ལོ་ཆོག་ ལ་སོགས་པའི་ སྤྲོ་བའི་ལས་རིམ་ཚུ་ནང་ མཐོ་གང་རེ་སྦེ་ དེ་ནང་ཨེ་མ་དམརཔོ་ དང་སྒོགཔ་ཚུ་བླུགས་ཏེ་ མར་ཁུ་ནང་བརྔོ ་སྟེ་ ཟ་སྲོལ་ ཡོདཔ་ཨིན།
ཁུངས་གཏུག།
- ཡོངས་འབྲེལ། http://www.bbs.bt
This article uses material from the Wikipedia ཇོང་ཁ article འབྲུག་པའི་བཞེས་སྒོ།, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ཇོང་ཁ (DUHOCTRUNGQUOC.VN) is an independent company and has no affiliation with Wiki Foundation.