འབྲུག་གི་འཁྱེག་རི།
འབྲུག་རྒྱལ་ཁབ་ཀྱི་སའི་རྒྱ་ཁྱོན་ གྲུ་བཞི་ཀི་ལོ་མི་ཊར་ ༣༨,༣༩༤ ཡོད་ས་ལས་ བརྒྱ་ཆ་གསུམ་ འཁྱེག་རི་གིས་ཁྱབ་སྟེ་ཡོདཔ་ཨིན། འཁྱེག་ རི་འདི་ཚུ་ འབྲུག་རྒྱལ་ཁབ་ནང་ཡོད་པའི་གཙང་ཆུ་ཚུ་འཐོན་སའི་གཞི་ཨིནམ་དང་ འཁྱེག་རི་ཆགས་ས་གཙང་ཆུའི་ནང་ན་དང་གྲང་བསིལ་གྱི་ ས་གནས་ཚུ་ནང་ཨིན། འཁྱེག་རི་ལུ་ལུང་གཤོང་འཁྱེག་རི་དང་གངས་ཀྱི་འཁྱེག་རི་ཟེར་ སྤྱིར་བཏང་དབྱེ་བ་གཉིས་ཡོདཔ་ཨིན། ལུང་གཤོང་ འཁྱེག་རི་ཟེར་མི་འདི་ གཙང་ཆུ་དང་མཚོ་ དེ་ལས་ བསིལ་ལྡན་གྱི་ལུང་དང་གཤོངམ་ཚུ་ནང་ཆགས་མི་ལུ་གོ་ནི་དང་ གངས་ཀྱི་འཁྱེག་རི་ཟེར་མི་འདི་ མཐོ་བའི་གངས་རི་ཚུ་གི་ཐོག་ཁར་ཆགས་ཡོད་པའི་ འཁྱེག་རི་ཚུ་ལུ་གོ་ནི་ཨིན། འབྲུག་རྒྱལ་ཁབ་ནང་ ལུང་གཤོང་འཁྱེག་རི་ཆགས་སའི་གཙང་ཆུ་གཙོ་བོ་ དབང་ཆུ་ སྤུ་ན་གཙང་ཆུ་དང་ མ་ནཱསི་གི་གཙང་ཆུ་གསུམ་ཨིན། འདི་གསུམ་གྱི་ནང་ལས་ དང་པ་དབང་ཆུ་འཁྱེག་རི་གཙང་ཆུ་ལུ་ སྤ་ཆུ་ ཧཱ་ཆུ་ ཐིམ་ཆུ་བཅས་ འཁྱེག་རི་ཆགས་སའི་ཡན་ལག་གཙང་ཆུ་གསུམ་ཡོདཔ་དང་ གཉིས་པ་སྤུ་ན་འཁྱེག་རི་གཙང་ཆུ་ལུ་ ཕོ་ཆུ་ མོ་ཆུ་ དྭངས་ཆུ་བཅས་ འཁྱེག་རི་ཆགས་སའི་ཡན་ལག་གཙང་ཆུ་གསུམ་ཡོདཔ་ཨིན། འདི་བཟུམ་སྦེ་ གསུམ་པ་མ་ནཱསི་འཁྱེག་རི་གཙང་ཆུ་ལུ་ མང་སྡེ་ཆུ་ ལྕམ་མཁར་ཆུ་ སྐུ་རི་ཆུ་ གྲང་མི་ཆུ་བཅས་ འཁྱེག་རི་ཆགས་སའི་ ཡན་ལག་གཙང་ཆུ་བཞི་ཡོདཔ་ཨིན། སྤྱི་ལོ་ ༢༠༡༦ ལོ་གི་སྙན་ཞུ་དང་འཁྲིལཝ་ད་ སྤུ་ན་གཙང་ཆུ་ནང་འཁྱེག་རི་གྱངས་ཁ་ ༣༤༡ བཅས་ འཁྱེག་རི་གྱངས་ཁ་མཐོ་ཤོས་ཆགས་ཡོདཔ་སྦེ་བཀོད་དེ་ཡོདཔ་དང་ གྲུ་བཞི་ཀི་ལོ་མི་ཊར་ ༤༥.༨༥ འབད་མི་འཁྱེག་རི་སྦོམ་ཤོས་འདི་མང་སྡེ་ཆུ་ནང་ཆགས་ཡོདཔ་སྦེ་བཀོད་དེ་ཡོདཔ་ཨིན། འདི་བཟུམ་སྦེ་ འབྲུག་རྒྱལ་ཁབ་འདི་བསིལ་ལྡན་གངས་རི་གིས་བསྐོར་བའི་ རི་བྲག་གི་རྒྱལ་ཁབ་ཅིག་འབདཝ་ལས་ གངས་ཀྱི་འཁྱེག་རི་ལེ་ཤ་ ཆགས་སྟེ་ཡོདཔ་དང་ ཐོར་ཐོར་མི་ལ་སོགས་པའི་འཁྱེག་མཚོ་ལེ་ཤ་རང་ཡོདཔ་ཨིན། འཁྱེག་རི་འདི་ཚུ་ལུ་བརྟེན་ འབྲུག་རྒྱལ་ཁབ་ནང་གཙང་ཆུའི་རྒྱུན་ལེགས་ཤོམ་སྦེ་འབབ་དོ་ཡོདཔ་དང་ འབབ་ཆུ་འདི་ཚུ་ལེ་བརྟེན་ གློག་མེ་ལས་འཛིན་གྱི་དཔལ་འབྱོར་ཐོན་ཁུངས་ལུ་ རྒྱུ་རྐྱེན་སྦོམ་འབད་དོ་ ཡོདཔ་ཨིན། འདི་བཟུམ་སྦེ་ འཛམ་གླིང་གནམ་གཤིས་འགྱུར་བ་དང་བསྟུན་ འཁྱེག་རི་ཚུ་བཞུ་འགྱོ་དོ་ཡོདཔ་ལས་ ཆུ་རུད་ཀྱི་ཉེན་ཁ་ཡང་སྦོམ་ འགྱོ་དོ་ཡོདཔ་ཨིན། ཨིན་རུང་ ད་རེས་འཁྱེག་རི་དང་འབྲེལ་བའི་ཉེན་ཁ་ཚུ་ བསྟན་རྒྱས་ལྷན་ཁག་འོག་གི་ ས་རིག་དང་ས་གཏེར་ལས་ཁུངས་ཀྱིས་ འབྲུག་རྒྱལ་ཉེན་སྲུང་གི་དོན་ལུ་ ལྟ་རྟོག་དང་བཟློག་ཐབས་ཀྱི་ལཱ་ཚུ་འབད་བཞིན་ཡོདཔ་ཨིན།
ཁུངས་གཏུག།
- Wiki contributors. (2021). Glaciers of Bhutan. In Wikipedia, The Free Encyclopedia. Retrieved from https://www.duhoctrungquoc.vn/wiki/en/Glaciers_of_Bhutan
This article uses material from the Wikipedia ཇོང་ཁ article འབྲུག་གི་འཁྱེག་རི།, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ཇོང་ཁ (DUHOCTRUNGQUOC.VN) is an independent company and has no affiliation with Wiki Foundation.