འཇིགས་མེད་དངོས་གྲུབ།
འབྲུག་གློག་བརྙན་ཚོགས་པ་ནང་ལུ་ འཁྲབ་རྩེདཔ་ཡོདཔ་རྐྱངམ་གཅིག་གིས་ གློག་བརྙན་ལེགས་ཤོམ་འགྱོ་བའི་དཔེ་མེདཔ་ལས་ སྐད་འཐེན་མི་ཡང་དགོཔ་ངེས་བདེན་ཨིན། དེ་ལུ་བརྟེན་ཏེ་ འབྲུག་གློག་བརྙན་ཚོགས་པ་ནང་ལུ་ སྐད་འཐེན་མི་ཡོངས་གྲགས་ཅན་ལེ་ཤ་ཡོད་པའི་གྲས་ལས་ གཅིག་འཇིགས་མེད་དངོས་གྲུབ་ཨིན། འཇིགས་མེད་དངོས་གྲུབ་འདི་ མོང་སྒར་རྫོང་ཁག་ནང་སྐྱེས་ནུག། འཇིགས་མེད་དངོས་གྲུབ་འདི་ འབྲུག་གློག་བརྙན་ཚོགས་པ་ནང་ལུ་ སྐད་འཐེན་མི་ཚུ་གི་གྲས་ལས་ རྙིང་ཤོས་ཅིག་ཨིནམ་དང་ དེ་ཡང་ སྤྱི་ལོ་ ༡༩༩༦ གི་ལོ་ལུ་ ནོར་གླིང་སྒྲ་དབྱངས་ཀྱི་བཟོ་སྐྲུན་འབད་ཡོད་པའི ཞབས་ཁྲ་རྟེན་འབྲེལ་བཟངམོ་ཟེར་མི་དེ་འཐེན་ནུག། ཞབས་ཁྲ་དེ་ འབྲུག་གི་གཡུས་ཚན་མཐའ་དབུས་མེད་པའི་ནང་ལུ་ ཡོངས་གྲགས་སོང་ནུག། འཇིགས་མེད་དངོས་གྲུབ་ལུ་ གཞན་གྱིས་ཡིད་ཆེས་བསྐྱེད་ཚུགསཔ་དང་ བློ་གཏད་ཚུགས་པའི སྐད་ཀྱི་གཞི་དང་སྐད་ཀྱི་སྤུད་ཚད་ཡོདཔ་ཨིན་མས། ཁོ་རའི་ སྐད་འཐེན་ནིའི་ལྕོགས་གྲུབ་འདི་ལུ་བརྟེན་ཏེ་ ད་ལྟོ་ཚུན་ཚོད་ཀྱི་རིང་ལུ་ གློག་བརྙན་ནང་ལུ་ཞབས་ཁྲ་གཅིག་སྟོང་ལྷགཔ་ཅིག་འཐེན་ཏེ་འདུག། དེ་སྦེ་ གློག་བརྙན་ནང་ལུ་ ཞབས་ཁྲ་འཐེན་མི་ལུ་ དགའ་ཚོར་དང་ངལ་རངས་ཀྱི་རྟགས་ལུ་ ཕོ་སྐད་འཐེན་མི་དྲག་ཤོས་ཀྱི་གསོལ་ར་ཡང་ ལེན་ཐེངས་བདུན་དེ་ཅིག་ལེན་ཡོདཔ་ཨིན་མས། གཞན་ཡང་ ཁོ་ར་གཞི་ག་ནི་བ་བཟང་དྲགས་ཡོད་པའི་སྐྱེ་བོ་ཅིག་ཨིནམ་ལས་ འབྲུག་གློག་བརྙན་ཚོགས་པ་ནང་ལུ་ ཀུན་གྱིས་དགའ་བའི་མི་ངོམ་ཅིག་ཨིན་མས། འཇིགས་མེད་དངོས་གྲུབ་ཀྱིས་ སྤྱི་ལོ་ ༡༩༩༦ ལས་འགོ་བཟུང་སྟེ་ ད་ལྟོ་ཚུན་ཚོད་ཀྱི་རིང་ལུ་ བསམ་ལས་ལྷག་པའི་ཡོངས་གྲགས་སོང་བའི་གླུ་གཞས་ཚུ་ཡང་
༡༽ ལོ་ན་གཞོན་པའི་དུས་ལུ།
༢༽ རྣམ་ཤེས(གློག་བརྙན་མགར་ས་བླ་མའི་སེང་གེ)
༣༽ སེམས་ཉོ་ཚོང་(གློག་བརྙན་རྩིསཔ་འཆོལ་ལོ)
༤༽ ཧིང་གཏམ་གསེར་གྱི་ཐིག་པ(གློག་བརྙན་ཧིང་གཏམ)
༥༽ ཁྱོད་ལེགས་པའི་དགའ་འཛུམ(གློག་བརྙན་སྲིད་པ་བར་དོ)
༦༽ སྟག་ཤར་གཞོན་པའི་སྐུ་གཟུགས(གློག་བརྙན་དབའེ་ཆ་རོགས)
༧༽ བརྟེན་འབྲེལ(གློག་བརྙན་མུ་ཏིག་འཁྲི་ཤིང་)
༨༽ ཚེ་ད་རེ་ཕྱད་པའི་ཆ་རོགས(མུ་ཏིག་འཁྲི་ཤིང་)
༩༽ ལེགས་པའི་གངས་ཀྱི་མེ་ཏོག།
༡༠༽ རྟེན་འབྲེལ་བཟངམོ་ཚུ་ཨིན་མས།
གཞན་ཡང་ འཇིགས་མེད་དངོས་གྲུབ་ཀྱིས་ སྤྱི་ལོ་ 1999 ལུ་ གློག་བརྙན་ལུང་བསྟན་ཟམ་པ་ནང་ལུ་ འཁྲབ་རྩེདཔ་རྒྱབ་སྐྱོར་པ་སྦེ་བརྩེས་ཏེ་འདུག། འབྲུག་གློག་བརྙན་ཚོགས་པ་ནང་ལུ་ སྐད་འཐེན་མི་སྦེ་འཛུལ་བའི་ཉིནམ་ལས་ ད་ལྟོ་ཚུན་གྱི་རིང་ལུ་ གཟེངས་རྟགས་ཀྱི་གསོལ་ར་ཡང ལེན་ཐེངས་བདུན་དེ་ཅིག་ལེན་ནུག། འབྲུག་གློག་བརྙན་ཚོགས་པ་ནང་མ་དོ་བར་ འཇིགས་མེད་དངོས་གྲུབ་འདི་ ཨཱསི་ཊ་ལི་ཡ་ལུ་ དཔལ་འབྱོར་ཞིབ་རྩིས་ཀྱི་མཁས་དབང་ཅིག་སྦེ་ཡང་ཕྱག་ཞུཝ་ཨིན་མས།
རྒྱབ་རྟན།
འབྲུག་གློག་བརྙན་ཚོགས་པ་(༢༠༢༠)འབྲུག་གི་སྙན་གྲགས་ཅན་གྱི་མི་ངོམ།གདོང་དེབ།
This article uses material from the Wikipedia ཇོང་ཁ article འཇིགས་མེད་དངོས་གྲུབ།, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ཇོང་ཁ (DUHOCTRUNGQUOC.VN) is an independent company and has no affiliation with Wiki Foundation.