དཀར་བརྒྱུད་ཕྱག་མཆོད།

༄༅། །ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡེ་ཤེས་རྡོ་རྗེ་གཅིག་ཏུ་བསྡུས་པའི་ངོ་བོ། ཟབ་པ་དང་རྒྱ་ཆེ་བའི་ཆོས་ཐམས་ཅད་ཀྱི་འབྱུང་གནས། རིག་པ་དང་གྲོལ་བར་སྨྲ་བའི་འཕགས་པའི་དགེ་འདུན་ཐམས་ཅད་ཀྱི་མངའ་བདག། །ཆོས་ཀྱི་རྗེ། ཆོས་ཀྱི་རྒྱལ་པོ། ཆོས་ཀྱི་དབང་ཕྱུག །འགྲོ་བའི་མགོན་པོ་གཙང་པ་རྒྱ་རས་པའི་ཞབས་ཀྱི་པདྨོ་དྲི་མ་མེད་པ་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །དམིགས་མེད་བརྩེ་བ་ཆེན་པོས་རྗེས་སུ་བཟུང་དུ་གསོལ། །སྲིད་དང་ཞི་བའི་དཔལ་གྱུར་ཅིང་། །སྟོང་ཉིད་སྙིང་རྗེའི་སྙིང་པོ་ཅན། །སྐུ་བཞི་ཡེ་ཤེས་ལྔ་ཡི་བདག །རྡོ་རྗེ་འཆང་ཆེན་ལ་ཕྱག་འཚལ། །ཆོས་རྣམས་ཀུན་གྱི་གསང་བའི་མཛོད། །མ་ལུས་སྤྲོ་དང་བསྡུ་མཛད་ཅིང་། །རྒྱལ་སྲས་ཀུན་གྱི་དབང་ཕྱུག་གཙོ། གསང་བའི་བདག་པོ་ལ༴། རྒྱལ་བ་རནམས་ཀྱིས་རྗེས་སུ་བཟུང་། བླ་མེད་ཐེག་པའི་ལམ་མཆོག་སྟོན། །བརྟུལ་ཞུགས་སྤྱོད་པའི་རྣལ་འབྱོར་པ། །ཏིལླི་ཤེར་བཟང་ལ༴། གནས་ལྔ་རིག་པའི་པཎྜི་ཏ། །བཅུ་གཉིས་དཀའ་སྤྱད་དངོས་གྲུབ་བརྙེས། །མི་བརྗེད་གཟུངས་ཐོབ་རྣལ་འབྱོར་པ། །ནཱ་རོ་པཎ་ཆེན་ ལ༴ །སྐད་གཉིས་སྨྲ་བའི་གཙུག་གི་རྒྱན། །ཟབ་དོན་རྒྱུད་སྡེ་རྒྱ་མཚོའི་བདག། རྡོ་རྗེ་འཛིན་པའི་མཆོག་གྱུར་པ། །མར་པ་ལོ་ཙཱ་ལ༴ །ཐ་མལ་འཆིང་བ་རྒྱུན་བཅད་ནས། །གཡོ་མེད་འོད་གསལ་དྷཱ་ཏཱིའི་ངང་། །བདེ་ཆེན་ནམ་མཁའི་རྣལ་འབྱོར་པ། །མི་ལ་རས་པ་ལ༴ །གང་ཡང་ཟབ་མོའི་ཆོས་ཉིད་ཀྱིས། །བླང་དོར་མ་ལུས་གསལ་བར་མཛད། །ཐབས་མཁས་ཐུགས་རྗེ་ཆེ་མངའ་བའི། །དྭགས་པོ་ལྷ་རྗེ་ལ༴ །ཟབ་ཅིང་རྒྱ་ཆེའི་ཆོས་རྣམས་ཀུན། །གདུལ་བྱའི་བློ་དང་འཚམ་པར་སྟོན། །སྨིན་གྲོལ་ལམ་ལ་འགོད་མཛད་པའི། །མཐའ་རྩ་པ་ལ༴ །འཁོར་དང་མྱ་ངན་འདས་པའི་ཆོས། །ཆོས་དབྱིངས་རྒྱ་མཚོའི་རོལ་པར་ཤར། །ཟུང་འཇུག་རྟོགས་པའི་གླུ་དབྱངས་མཁན། །གྲུབ་ཐོབ་གླིང་རས་ལ༴ །གང་གི་སྐུ་གསུང་ཐུགས་ཀྱི་གསང་། །ནམ་མཁའ་ལྟ་བུར་མཉམ་པ་ཉིད། །འགྲོ་ལ་སྤྲུལ་པ་སྣ་ཚོགས་སྟོན། །གཙང་པ་རྒྱ་རས་ལ༴། །ཟབ་དོན་རྟོགས་པའི་ང་རོ་ཡིས། །ཐེག་དམན་རི་དྭགས་ཟིལ་གྱིས་གནོན། །ཐེག་ཆེན་ཆོས་ཀྱི་སྒྲ་ཆེན་སྒྲོག །སངས་རྒྱས་དབོན་རས་ལ༴ །གང་གི་བློ་གྲོས་ཟླ་མེད་པ། །མཐུ་ཆེན་གྱིས་ཀྱང་གཞལ་དཀའ་བའི། །ཟབ་དོན་གཏེར་གྱི་བུམ་པའི་བདག། །གཞོན་ནུ་སེངྒེ་ལ༴ ། འགྲོ་ཚོགས་སྡུག་བསྔལ་གྱིས་གཟིར་ཞིང་། །མ་རིག་མུན་པས་ལྡོངས་པ་ལ། །ཐེག་མཆོག་འོད་ཟེར་འགྱེད་མཛད་པའི། །ཉི་མ་སེངྒེ་ལ༴ །ཤེས་བྱའི་ཆོས་རྣམས་མ་ལུས་པ། །ཇི་སྙེད་མཁྱེན་པས་དོན་གཟིགས་ནས། །ཕྱིན་ཅི་ལོག་ལས་རྣམ་རྒྱལ་བ། །སེངྒེ་ཤེས་རབ་ལ༴ །འཁོར་བའི་གཡུལ་ངོ་ལས་རྒྱལ་ཞིང་། །མྱ་ངན་འདས་པའི་དེད་དཔོན་མཆོག །དམིགས་མེད་ཐུགས་རྗེ་ཆེ་མངའ་བའི། །སྤོས་སྐྱ་པ་ལ་ཕྱག་འཚལ་ལོ། །མཚན་དཔེས་བརྒྱན་པའི་སྐུ་མངའ་ཞིང་། །ཟབ་ཡངས་ཆོས་ཀྱི་སྒྲ་ཆེན་སྒྲོག། །མཁྱེན་བརྩེའི་ཐུགས་མངའ་ཆོས་ཀྱི་རྗེ། །བཅུ་གསུམ་པ་ལ་ཕྱག༴ །སྙིགས་དུས་ཐུབ་དབང་ཞིང་མཆོག་འདིར། ལུང་དང་རྟོགས་པའི་ཆོས་རྣམས་ལ། །རྒྱལ་བ་ཉིད་དང་དབྱེར་མེད་པ། །ཀུན་དགའ་སེངྒེ་ལ༴ །བསླབ་གསུམ་ཉེས་ལྟུང་སྐྱོན་མེད་ཅིང་། །བྱང་ཆུབ་སེམས་ལ་དབང་འབྱོར་པས། །འགྲོ་ཀུན་ཟབ་མོའི་ལམ་ལ་སྦྱོར། །རྡོ་རྗེ་རིན་ཆེན་ལ༴ །མཁྱེན་པས་འགྲོ་བའི་བློ་མུན་སེལ། །བརྩེ་བས་ལེགས་པའི་ལམ་ལ་འགོད། །རྒྱུན་མི་ཆད་པའི་ཕྲིན་ལས་ཅན། །བློ་གྲོས་སེངྒེ་ལ༴ །རང་དོན་རྟོགས་པ་མཐར་སོན་ཞིང་། །གཞན་དོན་བསྡུ་བཞིའི་ཕྲིན་ལས་ཀྱིས། །འགྲོ་ཀུན་བརྩེ་བས་རྗེས་འཛིན་པའི། །ཤེས་རབ་སེངྒེ་ལ༴ ། ཆོས་ཀུན་གདོད་ནས་སྟོང་པའི་གདངས། །སྣ་ཚོགས་སྣང་བའི་དངོས་པོ་རྣམས། །རྟེན་ཅིང་འབྲེལ་འབྱུང་ཉིད་དུ་གཟིགས། །ཡེ་ཤེས་རིན་ཆེན་ལ༴ །འགྲོ་ཚོགས་སྒྱུ་མ་ལྟ་བུ་ལ། །སྒྱུ་མ་ལྟ་བུའི་ཆོས་སྟོན་ཞིང་། །སྒྱུ་འཕྲུལ་ཆེན་པོར་རོ་གཅིག་པའི། །ནམ་མཁའ་དཔལ་བཟང་ལ༴ །ཇི་ལྟ་བ་ཡི་གནས་ལུགས་རྟོགས། །ཇི་སྙེད་པ་ཡི་ཆོས་རྣམས་མཁྱེན། །མཐའ་ཡས་ཡོན་ཏན་དུ་མའི་མཛོད། །ཤེས་རབ་བཟང་པོ་ལ༴ །ཤེས་བྱ་ཀུན་ལ་མངའ་བརྙེས་ཤིང། །གྲགས་པའི་རྔ་ཆེན་ཕྱོགས་བཅུར་སྒྲོག། འཇིགས་མེད་དཔའ་བོ་ཆེན་པོ་པ། ཀུན་དགཡ་དཔལ་འབྱོར་ལ༴ །བཤད་དང་སྒྲུབ་པའི་རིན་པོ་ཆེ། །དཀར་བརྒྱུད་རྒྱལ་མཚན་རྩེར་འཛིན་ཅིང་།།ཟབ་དོན་འདོད་དགུའི་ཆར་འབེབས་པ། །ངག་དབང་ཆོས་རྒྱལ་ལ༴ །ཚོགས་གཉིས་རྒྱ་མཚོའི་དཔལ་ལས་འཁྲུངས། །འཁོར་འདས་རང་གྲོལ་རྟོགས་པ་དང་། །དམིགས་མེད་སྙིང་རྗེའི་བདག་ཉིད་ཅན། །ཆོས་ཀྱི་གྲགས་པ་ལ༴ །མཐུ་སྟོབས་ནུས་པ་རྨད་དུ་བྱུང་། །གསང་སྔགས་མཛོད་འཛིན་རྒྱལ་བའི་སྲས། །དཔལ་ལྡན་གསང་བའི་བདག་པོ་དངོས། །ངག་དབང་གྲགས་པ་ལ༴ །ཀུན་མཁྱེན་འགྲོ་ལ་ཕན་བཞེད་པ། །ཇི་སྲིད་འཁོར་བ་གནས་ཀྱི་བར། །ཕྲིན་ལས་མཛད་པ་མི་འཆད་པ། །ངག་གི་དབང་ཕྱུག་ལ༴། ། ཡོན་ཏན་ཀུན་གྱི་གཏེར་གྱུར་པ། །འདྲེན་པ་མཆོག་གི་སྤྲུལ་པའི་སྐུ། །སེམས་ཅན་རྣམས་ཀྱི་དོན་མཛད་པ། །མི་ཕམ་པད་དཀར་ལ༴།རིགས་རུས་ཕུན་ཚོགས་ལས་འཁྲུངས་ཤིང། །ཟབ་དོན་གདམས་པའི་གཏེར་གྱི་བདག། །འགྲོ་ཀུན་ཕན་བདེའི་ས་ལ་འགོད། །མི་ཕམ་ཆོས་རྒྱལ་ལ༴ །ཟབ་དོན་གདམས་པའི་གཏེར་གྱིས་ཕྱུག །འགྲོ་ཀུན་བྱང་ཆུབ་ལམ་ལ་འགོད། །གསང་སྔགས་ཟབ་མོའི་རྣལ་འབྱོར་པ། །བསྟན་པའི་ཉི་མ་ལ༴ །མཁྱེན་པས་འགྲོ་བའི་བློ་མུན་སེལ། །བརྩེ་བས་གཞན་དོན་མི་དོར་བར། །རྒྱུན་མི་ཆད་པའི་ཕྲིན་ལས་མངའ། །ངག་དབང་རྣམ་རྒྱལ་ལ་ཕྱག་འཚལ། །སྣ་ཚོགས་སྒྱུ་མའི་རོལ་རྩེད་ཀྱིས། །འགྲོ་བ་རྒྱ་མཚོའི་དོན་མཛད་ཀྱང་། །སྐྱེ་མེད་དབྱིངས་ལས་གཡོ་མིན་པའི། །བསོད་ནམས་འོད་ཟེར་ལ༴ །རྒྱལ་བའི་བསྟན་ལ་རྒྱལ་བ་བཞིན། །བྱ་བ་མཛད་པའི་རྒྱལ་བའི་སྲས། །ཟག་མེད་རྣམ་ཐར་རྒྱ་མཚོའི་བདག། །བསྟན་འཛིན་རབ་རྒྱས་ལ༴ །ཕྱོགས་དུས་རྒྱལ་བ་སྲས་བཅས་ཀྱི། །སྐུ་གསུང་ཐུགས་ཀྱི་གསང་བའི་མཛོད། །མ་ལུས་གཅིག་འདུས་ཆོས་ཀྱི་རྗེ།། ངག་དབང་རྒྱལ་མཚན་ལ༴ །སྐྱེ་མེད་གཤིས་ལ་བརྟན་ཐོབ་ཅིང་། །འགག་མེད་གདངས་ལ་རྩལ་འབྱོངས་ཏེ། །ཟུང་འཇུག་ཀློང་ཡངས་ཆེར་རྫོགས་པ། །ཤཱཀྱ་རིན་ཆེན་ལ༴ །རིག་སྟོང་དགོངས་པའི་དབྱིངས་རུམ་ནས། །མཁྱེན་བརྩེའི་ཟླ་བ་རྒྱས་པའི་ཆུས། །གདུལ་བྱའི་ཀུན་ད་འགྲོལ་མཛད་པའི། །ཡོན་ཏན་མཐའ་ཡས་ལ༴། ཇི་ལྟའི་གནས་ལུགས་མངོན་གྱུར་ཅིང་། །ཇི་སྙེད་མཁྱེན་པའི་ཆོས་རྔའི་སྒྲས། །སྐལ་བཟང་གཉིད་ལས་སློང་མཛད་པ།། འཇམ་དབྱངས་རྒྱལ་མཚན་ལ༴ །འགྲོ་རྣམས་སྲིད་པའི་རྒྱ་མཚོ་དང་། །ཞི་བདེའི་གཡང་ ས་ལས་བསྒྲལ་ཏེ། །བྱང་ཆུབ་མཆོག་ལ་དབུགས་འབྱིན་མཁན། །ཤེས་རབ་རྒྱལ་མཚན་ལ༴ །སྨིན་གྲོལ་གདམས་པའི་ཆབ་རྒྱུན་གྱིས། །འགྲོ་བའི་ཚ་གདུང་ཀུན་བཅིལ་ནས། །ཞི་བསིལ་གཏན་བདེའི་དཔལ་སྟེར་བའི། །ཡོན་ཏན་རྒྱལ་མཚན་ལ༴ །མང་ཐོས་ལུང་གི་སྤྲིན་རུམ་ན། །མངོན་རྟོགས་ལུས་ཀྱི་རྩལ་རྫོགས་ཏེ། །ཀློག་སྤོང་ཆོས་སྒྲ་ཆེར་སྒྲོག་པ། །ཤཱཀྱ་རྒྱལ་མཚན་ལ༴།།སངས་རྒྱས་ཀུན་གྱི་ངོ་བོ་ཉིད། །དམ་ཆོས་མ་ལུས་འབྱུང་བའི་ཁུངས། །དགེ་འདུན་འདུས་པ་ཡོངས་ཀྱི་རྗེ། །འཇིགས་མེད་ཆོས་རྒྱལ་ལ༴། །བྱམས་པའི་ཆུ་བ་རབ་བརྟན་ཅིང་། །སྙིང་རྗེའི་སྡོང་པོ་རྒྱས་པ་ལ། །གཞན་ཕན་འབྲས་བཟང་གཡུར་ཟ་བ། །ཕྲིན་ལས་རྒྱལ་མཚན་ལ༴། བློ་འདས་རྟོགས་པ་སྐྱོང་བ་དང་། །བློས་བྱས་རྟེན་འབྲེལ་སྒྲིག་པ་གཉིས། །འགལ་མེད་མཉམ་ཉིད་ལམ་ཁྱེར་མཁན། །ཆོས་ཀྱི་དབང་ཕྱུག་ལ༴། །ཁ་སྦྱོར་བདུན་ལྡན་རྡོ་རྗེ་འཆང་། །ཁམས་དྲུག་ལྡན་པའི་རྫུར་ཞུགས་ནས། །སྣང་སྲིད་ཆོས་སྐུར་སྟོན་མཛཔའི། །བསྟན་འཛིན་རྒྱ་མཚོ་ལ༴ །རིགས་རྣམས་ཀུན་གྱི་ཁྱབ་བདག་ཆེ། །རབ་འབྱམས་དཀྱིལ་འཁོར་རྒྱ་མཚོའི་གཙོ། །བཀའ་དྲིན་གསུམ་ལྡན་འཁོར་ལོའི་མགོན། །རྩ་བའི་བླ་མ་ལ་ཕྱག་འཚལ། _{།ཞེས་པ་འདིའི་རྩ་བ་རྒྱལ་དབང་ཆོས་རྗེས་མཛད་པ་ལ། བརྒྱུད་རིམ་ཕྱི་མ་ཕལ་ཆེར་སྐུ་ཞབས་ཚེས་བཅུའི་ཐུགས་འདོད་བཞིན་ཤཱཀྱའི་དགེ་སློང་ཡོན་ཏན་འོད་ཀྱིས་ཁ་བསྐངས་པ་དགེའོ།། །།}