Helmut Hupac: Serbski faraŕ

Helmut Huppatz (*18. junija 1950 w Prjawozu) - jo dolnoserbski faraŕ, něnt na wuměńku. Bydli w Prjawozu. Dłujkolětny pśedsedaŕ Spěchowańskego towaristwa za serbsku rěc w cerkwi. W 2019 jo dostał myto Domowiny.

W lětach 1965-1969 wón jo wuknuł na Serbskej rozšyrjonej wušej šuli w Chośebuzu. Po abiturje wón jo był wojak. Pón wot lěta 1971 jo studěrował teologiju w Barlinju. Prědny eksamen jo złožył w lěśe 1976. Tomu jo se pśizamknuł wikariat w měsće Neuruppin a prjatkaŕski seminar w Gnadau pla Magdeburga. W lěśe 1979 jo złožył 2. teologiski eksamen. Až do lěta 1983 jo źěłał w administratiwnej cerkwinskej słužbje w Chośebuzu. Wót 1. junija 1983 jo pśewzeł zastojnstwo fararja w Korjenju.

Wón jo był jadnučki absolwent Serbskeje wušeje šule w Chóśebuzu, kótaryž teologiju jo studěrował.

W 1987 faraŕ Helmut Hupac jo był jaden ze sobuzałožarjow źěłoweje cerkwineje kupki Serbska namša. Wón jo pśewjadł tegdy w Dešnje serbske wósadne wótpołdnjo, kótarež jo źinsa wiźone ako prědna dolnoserbska namša nowšego casa.

• 2017 - Ze žywjenja serbskich muskich , redakcija: Marja Elikowska-Winklerowa (knigły k słuchanju; H. Hupac gromaźe z 9 drugimi maminorěcnymi Serbami)

• Na rozgrono smy pšosyli Helmuta Hupaca, fararja w Korjenju, Pomogaj Bog, oktober 1988, b. 2