Erwin Strittmatter

14. awgusta 1912 w Grodku; wum. 31. januara 1994 w Schulzenhofje) jo był serbsko-nimski spisowaśel, kótaryž jo w nimskej rěcy pisał.

Wón jo se naroźił ako jadno z pěśo źiśi pjakarja Heinricha Strittmattera a jogo žeńskeje Pauliny Heleny, roź. Kulka. Swójo źiśetstwo jo wón w dolnołužyskich jsach Syjk (wót 1914) a Bóšojce pla Grodka (wót 1919) póbył. W lětach 1924-1930 jo wón źěłał ako wucabnik na Grodkowskim realnym gymnaziumje, kótaryž teke wót lěta 1996 njaso jogo mě. W 1933 jo zastupił do SPD. Jo se wóženił w 1937 a wót 1941 jo był ako wójak w policajskim regimenśe w Drugej swětowej wójnje. W 1943 jo Heinrich Himmler pósćił wšyknym policajskim regimentam cłonkstwo w SS, stakim jo se Strittmatter awtomatiski SS-ak stał.

Gaž wójna jo se skóńcyła, Strittmatter nejpjerwjej jo źěłał ako pjakaŕ, pón ako redaktor źenika Märkische Volksstimme w Złym Komorowje. 1950 jo wózjawił swójo prědne literariske źěło Der Ochsenkutscher. W lětach 1959-1961 jo wón był prědny sekretaŕ Nimskego zwězka spisowaśelow.

We Łužycy znata jo jogo trilogija Loda (Der Laden), w kótarejž jo wón wopisał swóju dwójorěcnu domownju. Strittatter ale teke cesto jo wobspominał wó swójich dožywjenjach a serbskich korjenjach, na pś. we wulicowańku Sulamith Mingedö, der Doktor und die Laus pišo wón wó swójoj swajźbje; ryśarje toś togo źěła su mj. dr. jogo starki Gottfried Jurischka a starka Dorothea, jogo nan Heinrich, maś a wujk Stefan, kótaryž jo do Ameryki wudrogował.

Strittmatterowe knigły su se pśestajali do wokoło 40 rěcow.

  Commons: Erwin Strittmatter – Zběrka wobrazow, widejow a audio-datajow

• Erwin Strittmatter - Literatura w katalogu Nimskeje narodneje biblioteki (Datowa sajźba k Erwin Strittmatter • PICA-datowa sajźba)
• Strittmatterowe towaristwo w Bóšojcach (nim.)