An de Oschdere (im Regiolegd an Oschdan) dengge di Chrischde an di Ufferschdehung vum Jesus Chrischdus.
Noch em Neie Teschdamend hot er als Goddes Sohn dodemit de Dod iwwerwunne un bsiigt. Noch em chrischdlische Glauwe hot Jesus mim Dod am Kreiz freiwillisch di Sind un Schuld vun alle Mensche uf sisch genumme. Erschder dursch de Dod un di Ufferschdehung werre de Mensche di Sinde vergewwe, werre se ausem Dod gerett un erhalde ewisches Lewe. Di Oschdere sin zamme mim Kafreidag s hegschde Feschd im chrischdlische Kerschejohr.
Vor de Oschdere kummt di Kawoch mim Griindunnerschdag, em Kafreidag un em Kasamsdag. Da Oschdersunndag isch da Sunndag noch em erschde Friilingsvollmond. Des kånn friieschdens da 22. Mätz un schbädeschdens da 25. Abril soi. In de ordodoxe Kärsche, außer da Finnische un da Ostsyrische, kann da Oschdertermin bis zu fimf Woche vun demm vun de weschtlische chrischtlische Kärsche abweische, weil selle sisch bei da Bereschnung nochem Juljanische un net nochem Gregorjanische Kalenner rischde. Noch da – di Sunndeg net mitgereschend - väzisch Deg lange Faschdezeit fängt middem Oschdersunndag di eschdalische Fraidezeit åå, wu fuchzisch Deg dauert. Di Pingschde ghere noch dazu un bilde de Abschluß. In unserer Zeit werd dageje oft schun in da Faschdezeit eschderlisch degoriert un glei noch de Oschderfeierdeg di Degorazion widder abgerååmt.
In Deitschland, Eschdreisch un Frånkreisch sinn da Oschdersunndag un der Oschdermundag Feierdeg, in da Schweiz da Oschdermundag net iwweraal.
In da Nacht uf de Oschdersunndag werd di Oschdernacht gfeiert. In da kadollische Kärsch werd dabei drauß vor der Kärsch am Oschderfaier di nei Oschderkerz ågezindt. Beim Oizug mit da Oschderkerz in di dunggl Kärsch werd dreimol „Lumen Christi“ odder „Christus, das Licht“ / „Chrischdus des Lischt“ gerufe. Di Oschderkerz un s Weiwasser werre geweit.
In de deitschschbroochische Länder un in Holland werre gfärbde odder bund ågemolde Oschdereier un kläne Gschengge fä di Kinner verschdeggelt. Ma verzählt, da Oschderhas hät des gemacht. Des Wort „Oschderhas“ werd aa fä di Oschdergschengge verwendt: „Isch hab der en Oschderhas midgebrocht.“ Frieher hawwe di Kinner als Oschderhaseneschder aus Moos un annerem gebaut. Do noi hot der Has dann bis zum Oschdersunndagmorje di Eier gelegt.
Ma degoriert gern bliehende Zweige innare Vas odder Schdraischer im Gadde mit bunde Oschdereier. S gibt gebaggene Oschderlämmer odder Oschderhase un nadirlisch Schokladeeier.
Da Brauch, Oschderbrunne zu schmigge, isch im schbäde nainzehnde odder im friie zwanzigschde Jahunnert in da Fränggische Schweiz uffkumme. Vun dort hot er sisch verbreit. Inzwische werre in viele Gegende vun Siddeitschland zu Oschdere Dorfbrunne mit bunde Oschdereier un annarem degoriert.
Wann di Kinner sisch Gedannge iwwer de Oschderhas mache, saare se:
Isch weeß was isch waaß,
di Mudder is da Has.
S Huhn legt di Eier,
da Has legt se ins Gras.
(Zigglhause HD)
Ich waaß, was ich waaß:
's Hinkel is de Has;
die Mutter färbt die Aajer,
de Vatter leet se ens Gras.
(Biedesheim KIB)
Der, die, das
's Hinkel is der Has.
Die Modder färbt die Eier,
die Modder leet se ins Gras.
Un die dumme Kinner meenen
's wär de Oschderhas.
(Krottelbach KUS)
Ouschderhas', Ouschderhas'!
Lech mar en ganze Locke Eier ins Gras
(Palz)
E Gedischdl, wu ma beim Losklobbe vun da Rind fä e Weide- odder Hollerpeif gschbroche odder gsunge hot:
Saft, Saft, Seire,
Holler in die Weire,
Holler in das grüne Gras
leet mer aach de Oschterhas
(Bolande KIB)
Redensaade aus Lothringe:
Redensaade aus de Palz:
Wedderregle zu Oschdare:
This article uses material from the Wikipedia Pälzisch article Ostern, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Was do drin schded isch unna CC BY-SA 4.0 vafieschba, wonn nedd onnaschda uffgschriwwe. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Pälzisch (DUHOCTRUNGQUOC.VN) is an independent company and has no affiliation with Wiki Foundation.