Panyakik Koronavirus 2019

Panyakik koronavirus 2019 atau tanamo jo COVID-19 (Inggirih: Coronavirus disease-2019) adolah panyakik dan disababkan dek virus SARS-CoV-2.

Panyakik ko partamo kali dikataui di Wuhan, Cino, pado Desember 2019, nan kudian bakambang manjadi pandemi. Inggo 11 Juni 2020, dilaporkan alah ado 7,36 juta kasus di labiah dari 188 nagara jo teritori, sarato 416.000 kamatian. Ado 3,45 juta urang nan dilaporkan alah cegak.

Panyakik koronavirus 2019 (COVID-19)
Namo lain
  • Koronavirus
  • Korona
  • COVID
  • 2019-nCoV acute respiratory disease
  • Novel coronavirus pneumonia
  • Severe pneumonia with novel pathogens
Panyakik Koronavirus 2019
Gejala COVID-19
Palafalan
SpesialisasiPanyakik infeksi
GejalaDamam, batuak, latiah, sasak angok, ilang sensasi raso; kadang-kadang indak bagejala
KomplikasiPneumonia, sepsis, Sindrom distres panapasan akut, gagal ginja, cytokine release syndrome
Awitan2–14 ari (biasonyo 5) sajak tainfeksi
PanyababSevere acute respiratory syndrome coronavirus 2 (SARS-CoV-2)
Faktor risikoPai raun, paparan virus
DiagnosisUji rRT-PCR, CT scan
PanagahanCuci tangan, manutuik wajah, karantina, pambatasan jarak fisik
ParawatanSymptomatic and supportive
Frekuensi154.788.122 confirmed cases
Kamatian3.237.808 (2% of confirmed cases)

Virus nan manjadi panyabab panyakik ko taseba malalui kontak arek, paliang acok dek titiak liua (small droplets) nan dihasilkan dek batuak, basin, bahkan babicaro. Virus lansuang tajatuah basamo titiak liau tadi, bukan malayang lamo di udaro. Virus dapek batahan dalam tubuah urang inggo mamunculan gejala dalam duo inggo 14 ari sajak partamo kali tapajan. Paliang mamindah dalam tigo ari partamo sasudah gejala muncua dan tatap juo bakamungkinan bapindah sabalun muncua gejala atau bahkan pado urang nan indak manunjuakkan gejala samo sakali.

Gejala umum dari panyakik ko antaro lain damam, batuak, latiah, sasak angok, sarato ilang kamampuan maidu jo maraso. Banyak kasus tajumpoi dalam kondisi gejala ringan, tapi adopulo nan alah bakambang manjadi gejala barek cando sindrom distres respirasi akut, kagagalan banyak organ, syok sepsis, inggo pambakuan darah.

Panagakan diagonosis nan marupokan baku ameh (gold standard) adolah malalui uji real-time reverse transcription polymerase chain reaction (rRT-PCR) dari sampel lendir nan didapek dari usap nasofaring (tabuang angok balakang iduang). Pamindaian tomografi komputer (CT-Scan) dado dapek dilakukan untuak manunjang diagnosis pado urang barisiko tinggi tapajan. Walau baitu, pamindaian tasabuik indak disarankan sacaro rutin. Upayo nan dapek dilakukan untuak maambek pamindahan panyakik ko adolah jo mancuci tangan, manjago jarak kontak jo urang lain, karantina atau isolasi diri, manutuik muluik katiko batuak, sarato manjago tangan dari manganai muko. Pamakaian masker kain disarankan untuak pamakaian umum di antaro urang nan sihaik atau indak bagejala. Samantaro pado urang nan manunjuakan gejala atau tanago medis, mamakai masker bedah atau masker medis lainnyo untuak maambek pamindahan sarato palinduangan diri.

Sajauah ko WHO manyatokan baso alun ado ubek jo vaksin nan spesifik pado panyakik ko. Pananganan panyakik dilakukan jo maubek gejala, parawatan pandukuang (suportif), isolasi, sarato uji cubo ubek. Panyakik ko diumumkan sabagai pandemi global dek WHO pado 11 Maret 2020. Inggo kini, pamindahan panyakik sacaro lokal alah tajadi di ampia sadoalah nagara di dunia.

Tando jo gejala

Gejala paliang umum dari COVID-19 adolah badan mandamam. Tampilan damam pado tiok urang dapek babeda-beda, bahkan indak mandamam samo sakali. Walau baitu, katiko urang indak mandamam alun tantu inyo talapeh dari panyakik ko.

Gejala COVID-19
Gejala Jumlah kasus
Damam 83–99%
Batuak 59–82%
Ilang salero makan 40–84%
Latiah 44–70%
Sasak angok 31–40%
Batuak badahak 28–33%
Sakik otot jo pasandian 11–35%

Gejala lain nan muncua adolah bautak, ilang salero makan, latiah, sasak angok, badahak banyak, sarato sakik otot atau pasandian. Gejala cando mual, muntah, atau paruik mancoro dapek pulo muncua di sabagian ketek urang. Gejala lain nan labiah jarang di antoronyo basin, iduang basalemo, padiah di tabuang angok, atau kalainan kulik. Pado babarapo kasus di Cino bahkan ado nan muncua sakik dado jo dado badabok-dabok sabagai gejala partamonyo. Bakurangnyo kamampuan maidu jo maraso dapek pulo muncua.

Sarupo jo panyakik mamindah lainnyo, ado tenggang wakatu antaro masuaknyo virus inggo muncuanyo gejala. Hal iko disabuik sabagai maso inkubasi. Maso inkubasi biasonyo balansuang antaro limo atau anam ari. Walau baitu, dapek pulo muncua dalam rantang sahari inggo ampek baleh ari. Pado 10% kasus dapek muncua dalam wakatu nan labiah lamo.

Panyakik ko dapek pulo indak mamunculkan gejala samo sakali. Dek WHO, urang nan alah tamasuak virus dalam tubuahnyo, tapi indak mamunculkan gejala disabuik sabagai asimtomatik. Walau indak bagejala, urang nan asimtomatik dapek pulo manularan panyakik.

Diagnosis

Panyakik Koronavirus 2019 
Usap nasofaring (tabuang angok balakang iduang) untuak pareso COVID-19
Panyakik Koronavirus 2019 
Alaik pareso COVID-19 jo uji rRT-PCR dari CDC.

WHO alah mampublikasikan protokol pamaresoan untuak panyakik ko. Pamaresoan standar yaitu jo uji rRT-PCR. Pamaresoan ko dilakukan jo maambiak sampel lendir dari nasofaring atau tabuang angok balakang iduang. Kok indak bisa, buliah jo dahak atau lendir dari iduang. Hasia didapek dalam babarapo jam inggo duo ari. Panaliti dari Cino nan alah mandapek mandapek strain virusnyo mambagikannyo ka banyak laboratorium di banyak nagara supayo dapek mamareso surang. Pamaresoan lainnyo bisa jo sampel darah, tapi paralu duo kali ambiak jo rantang wakatu duo pakan.

Panaliti dari Universitas Wuhan juo manyarankan untuak malakukan pamaresoan darah langkok samantaro pado kondisi indak bisa dilakukan pamaresoan COVID-19. Pasien nan kamungkinan tainfeksi mampunyoi gejala demam, pneumonia, hasia darah putiah nan normal atau randah, sarato ituang limfosit nan randah.

Salain jo pamaresoan laboratorium, dapek pulo ditunjang jo pamindaian tomografi komputer (CT-Scan) dado. Namun, pamindaian ko indak disarankan rutin. Pado pasien jo COVID-19 mampunyoi gambaran karuah kaco pado banyak lobus di kedua paru (bilateral multilobar ground-glass opacities) jo distribusi perifer, asimetris, inggo ka posterior, nan umum pado infeksi awal. Pado kondisi panyakik nan samakin progresif, tampak dominasi subpleural, crazy paving (septum lobular manaba jo pangisian alveolar variabel), sarato konsolidasi (pamadekan).

Pado akhia 2019, WHO manambah kode ICD-10 untuak panyakik ko dalam kategori darurat jo kode U07.1 kamatian dek infeksi SARS-CoV-2 takonfirmasi laboratorium jo U07.2 untuak kamatian manuruik diagnosis klinis COVID‑19 tanpa konfirmasi laboratorium tainfeksi SARS-CoV-2.

Hasia pindaian tomografi komputer (CT-Scan) dado
Hasia pado fase progresif

Komplikasi

Pasien COVID-19 dapek maalami komplikasi cando pneumonia, sindrom distres panapasan akut, kagagalan banyak organ, syok sepsis, inggo kamatian. Komplikasi jantuang jo pambuluah darah dapek pulo muncua cando gagal jantuang, aritmia (gangguan irama jantuang), paradangan jantuang, inggo pambakuan darah. Ado 20-30% pasien nan takanai COVID-19 manunjuakan karusakan liver. Salain itu, kalainan saraf cando kajang, stroke, radang utak, inggo sindrom Guillan–Barre (kailangan fungsi motorik saraf).

Pancegahan

Untuak mancegah jo mangurangi kamungkinan infeksi disaranan tetap barado di rumah, mailak poi-poi jo ba'aktivitas di tampek urang rami, acok mancuci tangan jo sabun jo aia salamo 20 detik, indak mamacik mato, hiduang, atau muluik jo tangan nan indak dicuci, sarato mampraktikkan higiene pernapasan nan elok. CDC marekomendasian untuak manutuik muluik jo hiduang mangunoan tisu katiko batuak atau basin jo mangunoan bagian dalam siku jikok indak tasadio tisu. Inyo juo marekomendasian higiene tangan nan tapek sasudah batuak atau basin. Strategi pambatasan fisik diparaluan untuak mangurangi kontak antaro urang nan alah tainfeksi jo karumunan gadang jo caro manutuik sakolah dan kantua, mambatasi pajalanan, jo mambatalan patamuan gadang . Perilaku pambatasan fisik juo maliputi manjago jarak dengan urang lain sajauh 6 kaki (sekitar 1,8 meter).

Karano vaksin untuak SARS-CoV-2 baru tasadio paliang capek 2021, hal pantiang dalam pananganan pandemi panyakik koronavirus 2019 adola manakan laju panyabaran virus atau nan dikenal jo sabuikan malandai'an kurva pandemi. Hal iko dapek manurunan risiko tanago medis kawalahan dalam manghadapi lonjakan jumlah pasien, mamungkinan parawatan nan labiah elok untuak pandarito, jo ma'agiah wakatu tambahan hinggo ubek jo vaksin dapek tasadio dan siap digunoan.

Badasa WHO, panggunoan masker hanyo direkomendasian untuak urang nan sadang batuan atau basin atau nan sadang manangani pasien taduga. Disisi lain, babarapo nagori marekomendasian individu sehat untuak mamakai masker, tautamo Cino, Hong Kong, jo Thailand.

Hal-hal nan pantiang untuak mancegah panyakik ko antaro lain tetap barado di rumah, kecuali untuak mandapekan parawatan di rumah sakik; mangunoan masker; manutuik muluik jo tisu katiko batuak jo basin; rutin mancuci tangan jo sabun dan aia; sarato mahindari babagai alaik rumah tanggo pribadi. CDC juo marekomendasian untuak mancuci tangan minimal 20 datiak sasudah baliak dari toiet, katiko tangan bakarek, sabalum makan, jo sasudah batuak atau basin. Tambahan rekomendasi barikuiknyo adola mangunoan penyanitasi tangan dengan kanduangan alkohol minimal 60% jikok indak tasadio sabun jo aia. WHO manyaranan supayo mahindari mamacik mato,hiduang, atau muluik jo tangan nan alum dicuci. Maludah di sumbarang tampek indak buliah.

Panamoan

Pado 11 Februari 2020, WHO mangumuman bahwasanyo "Covid-19" manjadi namo rasmi dari panyakik ko. Direktur WHO, Tedros Adhanom Ghebreyesus, mangatoan co iolah singkekan dari "corona" (korona), vi untuak "virus", d untuak "disease" (panyakik), jo "19" untuak taun partamo kali diidentifikasi (2019). Tedros mangatoan bahwasanyo namo tasabuik dipiliah untuak ma'ilak'an referensi ka lokasi geografis tatantu, spesies hewan atau kalompok urang. Sasuai jo rekomendasi internasional untuak panamoan dalam mancegah stigmatisasi.

Indak sarupo WHO nan mangunoan huruf kapital sadoalahnyo (COVID-19), Kamus Gadang Bahaso Indonesia manyabuiknyo sabagai akronim jo tunduak pado katantuan panulisan akronim, yaitu indak mamakai huruf gadang kasadoalahnyo.

Sejarah

Virus panyobab Covid-19 diyakini sacaro alami dari binatang yaitu kaluwang malalui infeksi spillover dan manyeba ka manusia malalui parantaro satwa liar. Filogenetika mampakiroan bahwa SARS-CoV-2 muncua pado bulan Oktober atau November 2019.

Sabuah studi tahadok 41 kasus partamo Covid-19 nan alah dikonfirmasi, malaporan tanggal paliang awal timbuanyo gajalo pado 1 Desember 2019. Tajadinyo infeksi manusia partamo dilaporan di Wuhan, Hube, Cino. WHO sabagai Organisasi Kasehatan Dunia mampublikasian palaporan timbuanyo gajalo paliang awal tajadi pado tanggal 8 Desember 2019. Panularan dari manusia ka manusia alah dikonfirmasi dek WHO jo otoritas Cino pado 20 Januari 2020.

Manuruik sumber resmi Cino, kasus-kasus awal sabagian gadang takaik jo Pasar Grosir Makanan Laut Huanan, nan juo manjua binatang hiduik. Sampel binatang nan dikumpuan dari pasa makanan lauik alah dites dek Pusat Pangendalian dan Pancegahan Panyakik Amerika Serikat manunjuakan hasil negatif. Dari hasil virus partamo namun bukan tampek asa virus itu. Salain tuh, pado tanggal 18 Desember 2019 bukti lain ditamuan. Alah ditamuan jejak virus nan ado pado sampel limbah di kota Mila jo Turin, Italia.

Catatan kaki

Rujuakan

Tags:

Panyakik Koronavirus 2019 Tando jo gejalaPanyakik Koronavirus 2019 DiagnosisPanyakik Koronavirus 2019 KomplikasiPanyakik Koronavirus 2019 PancegahanPanyakik Koronavirus 2019 PanamoanPanyakik Koronavirus 2019 SejarahPanyakik Koronavirus 2019 Catatan kakiPanyakik Koronavirus 2019 RujuakanPanyakik Koronavirus 2019Bahaso InggirihSARS-CoV-2

🔥 Trending searches on Wiki Minangkabau:

2012 DK31Daftar kecamatan dan kelurahan di Kabupaten LahatMandeh9Urang BaliBahaso JapangPisangSidukuang anak (urinaria)177755Industri 4.01875HajiParahuR23IranLamangAnak Daro76Lubuak akaGalodoPantek (nomina)Daftar Wali Kota PadangMyanmar1932Ampek Angkek, Agam45MesirKabupaten Penukal Abab Lematang Ilir58PokatWikiKuciangDaftar provinsi IndonesiaKarbon dioksida145Suku KotoJorongNASALondonRusiaKarambiaDaftar tokoh Sumatera BaratTari IndangKimiaDaftar kecamatan dan kelurahan di Kabupaten LangkatHabiburrahman El ShirazyTurkiGalembongDaftar kecamatan dan kelurahan di Kabupaten Way KananDaftar kabupaten jo kota di Sumatera UtaraJuliSarabi1905Agus Salim94Bahaso OcuSusilo Bambang Yudhoyono422Babako34Gulai kurmaSanggar Batik JambiKota Padang PanjangKuciang lalokDaftar tokoh seniman Minangkabau🡆 More