Kusta, atau Lepra, atau namo lainnyo Panyakik Hansen (Inggirih: Hansen's desease atau disingkek HD), adolah infeksi kronis nan disabaukan dek bakteri Mycobacterium leprae jo Mycobacterium lepromatosis.
Awal-awal infeksi indak ado gajalo nan nampak, dan biasonyo tatap sarupo ko salamo 5 taun atau bahkan dapek juo inggo 20 taun. Gajalo-gajalo nan bakambang kudian tamasuak granuloma saraf, saluran panapasan, kulik jo mato. Iko dapek manyabaukan ilangnyo kamampuan untuak marasoan sakik, dan karanonyo dapek ilang pulo bagian tubuah nan di ujuang-ujuang dek karano luko nan baulang-ulang nan indak diraso. Lamah pancaliakan jo rabun mato dapek pulo tajadi.
Kusta | |
---|---|
Klasifikasi dan sumber eksternal | |
Rang mudo 24 taun dari Norwegia kanai kusta, 1886. | |
ICD-10 | A30. |
ICD-9 | 030 |
OMIM | 246300 |
DiseasesDB | 8478 |
MedlinePlus | 001347 |
eMedicine | med/1281 derm/223 neuro/187 |
Patient UK | Kusta |
MeSH | D007918 |
Panyakik kusta dibagi duo jinih kok ditinjau dari jumalah bakterinyo: pausibasiler (saketek bakteri) jo multibasiler (banyak bakteri). Kaduo jinih ko dibedoan dek jumalah kapiang kulik bapigmen buruak (lesi kulik) nan ado; dima pausibasiler ado 5 kapiang atau kurang dan multibasiler ado labaih dari 5 kapiang. Diagnosisnyo dapek dipastian jo panamuan basil tahan asam pado biopsi kulik, atau malalui pamaresoan DNA jo reaksi rantai polimerase. Panyakik ko acok timbua di antaro urang misikin dan dipicayo bajangkik malalui landia (mukosa) iduang. Panyakik ko sabananyo indaklah sangaik manula.
Kusta dapek disambuahan jo barubek. Pangubatan untuak kusta pausibasiler dapek mamakai dapson jo rifampisin salamo 6 bulan. Pangubatan untuak kusta multibasiler dapek mamakai rifampisin, dapson, jo klofazimin salamo 12 bulan. Pangubatan ko disadioan bebas biayo dek Organisasi Kasiatan Dunia (WHO). Salain tu ado pulo antibiotik lain nan dapek dipakai juo untuak barubek. Sacara global, pado taun 2012 jumalah kasuih kusta adolah 180.000, dima ado panurunan nan sabana banyak sajak 1960-an. Sabagian gadang kasuih nan baru tajadi di 16 nagara, dan labiah dari satangan tajadi di India. Dalam ukatu 20 taun balakangan, 16 juta urang di saluruah dunia alah barasia sambuah dari kusta.
This article uses material from the Wikipedia Minangkabau article Kusta, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Konten tasadio di bawah CC BY-SA 4.0 kacuali dinyatoan lain. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Minangkabau (DUHOCTRUNGQUOC.VN) is an independent company and has no affiliation with Wiki Foundation.