ليتيحاد الدولي ديال كورة

هاد لمنضامة داخل فيها 211 عضو (بلدان وأراضي). تأسس هاد ليتيحاد نهار 21 ماي 1904 ف باريز باش يراقب التورنوايات الدوليين اللي كانو مابين ألمانيا، بلجيكا، الدانمارك، فرانسا، هولاندا، الصبليون، السويد وسويسرا، وتزادو ليها شي دول قبل من لحرب لعالمية اللولة بحال كانادا ف 1913 ولميريكان ف 1914.

ليتيحاد الدولي ديال كورة
شعار: For the Game. For the World.
معلومات عامة
تأسسات	21 ماي 1904 ف باريز
لمقر ف	زيورخ
رياضة د	كورة، كرة الصالات و كرة القدم الشاطئية
مترأسة على	عالميًّا
لمدير ديالها	جياني إنفانتينو
معلومات خرين
لوغات رسميين	نڭليزية، لفرانساوية، لألمانية و صبليونية
السيت الرسمي	fifa.com

ليوما لمقر ديالها كاين فمدينة زوريخ فسويسرا، وكايترأسها السويسري الطالياني جياني إنفانتينو من 26 فبراير 2016. أشهر حاجة معروفة بيها لفيفا هي كاس لعالم، واللي تنضم أول مرة فمدينة موتيڤيديو، اللي هي لعاصيمة ديال لأوروݣواي. لفيفا كاتدخل لفلوس من ليشهارات والصپونصورات، واللي وصلو ف 2018 ل 4.7 مليار دولار ميريكاني (42 مليار درهم مغريبي)، وكان فيهوم رباح ديال 1.2 مليار دولار ميريكاني (10 دلمليار ديال الدرهم). لخزينة ديال لفيفا وصلات 2.7 مليار دولار ميريكاني (24 مليار درهم) فلافان ديال لفترة مابين 2015 و2018.

 

لعضو لمجهد ݣاع فلمؤسسات ديال لفيفا هو لكونݣريس د لفيفا (بالنݣليزية: FIFA Congress)، اللي هو مجليس فيه ممتيلين من كولا بلاد وأرض عضو واللي كايتدار لمؤتمر ديالو لعادي مرّة كولّا عام، ومن 1986 جوج مرات فلعام. لكونݣريس هو بوحدو اللي عندو لحق يبدّل لقوانين ديال لفيفا.كاينة اللجنة ليستيعجالية ديال لفيفا، واللي كاتعامل معا لحوايج ولمشاكل الضروريين مابين كولا مجمع ديال لونݣريس.

هاد لكونݣريس كايصوت على الدخول ديال بلدان وأعضاء جداد وكاينتاخب الرايس ديال لفيفا ولأمين لعام واللجنة التنفيدية. الرايس ديال لفيفا ولأمين لعام كايݣابلو اللي طاري فلفيفا وبرّا ديالها، أما اللجنة التنفيدية واللي كايترأسها الرايس د لفيفا هي اللي مسؤولة على لوقات ولبلايص والشكال ديال التورنوايات. لفيفا كاينة فسويسرا، داكشي لاش هي مؤسسة اللي تابعة وكاتحتارم لقانون السويسري.

 

الراية ديال لفيفا هي راية زرقة وفيها اللوݣو ديال لفيفا بلبيض. الراية الجديدة ديال لفيفا بدات كاتخدّم من لحفلة ديال لحلّان د كاس لعالم 2018 ديال روسيا، ومن تما وديما لفيفا خدامة بيها.

النشيد ديال لفيفا هو نشيد صاوب لألماني فرانز لامبرت اللحن ديالو من 1994، وعاودو ليه روب ماي وصايمون هيل لينتاج. كايتغنى النشيد فلميطشان والتورنوايات اللي كاتنضمهوم لفيفا. من 2007 فرضات لفيفا على الشوركة دياولها اللي كايدوزو لميطشان باش يدوزو مورصو صغير ديال النشيد قبل ومن مورا لميطشان، هادشي باش تزير لفيفا تشهر لمستشهيرين ديالها.

كاينين ستة ديال لكونفيديراليات ولمنضامات الدولية اللي معتارفة بيهوم لفيفا باللي تابعين ليها. هاد لمنضامات هوما:

•   لكونفيديرالية د كورة ف آسيا (AFC) (47 عضو)
•   لكونفيديرالية د لكورة لإفريقية (CAF) (56 عضو)
•   لكونفيديرالية د كورة ف أمريكا الشمالية ولوسطانية ولكاريبي (CONCACAF) (41 عضو)
•   لكونفيديرالية د كورة د أمريكا لجانوبية (CONMEBOL) (10 دلأعضاء)
•   لكونفيديرالية د كورة ف أوقيانوسيا (OFC) (13 عضو)
•   ليتيحاد ديال لجاميعات لؤروپية د كورة (UEFA) (55 عضو)

فلمجموع، لفيفا كاتعتارف ب 211 جامعة وطنية ديال لكورة و129 فرقة ديال لكورة ديال لعيالات.