ؤسطراليا

ؤسطراليا (بالنݣليزية: Commonwealth of Australia) هي واحد الدولة فلجنوب الشرقي د آسيا ولغرب د لمحيط لمهدن، لعاصمة ديالها هي كانبيرا. ؤسطراليا بلاد فيها بزاف د لجزر منها لجزيرة لكبيرة د ؤسطراليا وطازمانيا وبزاف د لجزر خرا. لمساحة د ؤسطراليا (7.69 مليون كم²) هي ميساحة كبيرة خلاتها تكون سادس أكبر بلاد فلعالم من ناحية لميساحة.

ؤسطراليا
Australia (en-au)
نشيد	زيدي ؤسطراليا الزوينة (19 أبريل 1984)
لعاصيمة	كانبيرا
الساكينة
شحال دالسكان	26,473,055 (2023)
السمية ديال السكان	ؤسطرالي، ؤسطرالية، ؤسطراليين, ؤسطراليات
اللوغات الرسمية	إنجليزية أسترالية لغة أوسلان
متوسط ديال لعمر	82.5 (2016)
لجغرافيا
لميساحة	7,692,024 كم²
لقمة لعالية	راس ماوسون (2,745 م)
لبلاصة الطايحة	ضاية إييري (−15 م)
تاريخ
توارخ مهمة	تشريع وستمنستر لعام 1931 (1931)
أعياد	النهار لوطني د أسطراليا (26 يناير) نهار أنزاك (25 أبريل) الجمعة لمقدس (يوماين قبل پّاك) التنين د پّاك (پّاك + نهار) راس لعام (1 يناير) عيد لميلاد (25 دجنبر) نهار الصنادق (26 دجنبر)
لإدارة
نضام الدولة	ديمقراطية تمثيلية، ملكية دستورية و دولة فيديرالية
لماليك د أسطراليا	تشارلز التالت
لوزير اللّول د أسطراليا	أنتوني ألبانيز
لبرلمان	لبرلمان د أسطراليا
سلطة لقضائية لكبيرة	لمحكمة لعليا د أسطراليا
لقتيصاد
الناتج الداخلي لكامل	1,675,418,665,067 $ (2022)
الناتيج الداخلي لكامل للواحد	54,348.23 $ (2019)
لبيطالة (شوماج)	6 % (2014)
مؤشر التنمية لبشرية	0.951 (2021)
لفلوس	دولار أسطرالي
معلومات خرة
توقيت ديال لبلاد	ڭرينيتش +10
رمز لبلاد	AU
رمز لانترنيت	‎.au‎
رمز التيليفون	+61
نماري د ليرجونس	000، 112 و 106
جيهة د صوڭان	ليسر
السيت الرسمي	australia.gov.au

تيسكنو فؤسطراليا تقريبا 25.6 مليون د الناس، لأغلبية ديالهم (60%) ساكنين فلمدون، وبالضبط فلمدون لكبار د لجنوب الشرقي، بحال سيدني، ميلبورن، بريزبان، پيرت وأديلايد. لبلاد مقسومة لستة ديال لويلايات وجوج دلأراضي.

سكن بنادم فؤسطراليا من هادي 65.000 عام، قبل ما يجيو ليها لبحارة لهولانديين فاللول د لقرن 17 (ف 1606) وسماوها هولاندا الجديدة. تفناو لأغلبية دالسكان لقدام ديال ؤسطراليا بسباب الجدري. ف 1788 حتلاتها بريطانيا وولات مستعمرة ديالها. ف 1 يناير 1901، تجمعات لمستعمرات لبريطانية اللي فديك النواحي وأسسات اتحاد فيديرالي اللي تسما لكومونويلت د ؤسطراليا، اللي هي بلاد عندها نظام ديموقراطي ليبيرالي، و هو النظام اللي متبّعاه لبلاد تال دابا.

ؤسطراليا معروفة بالصيناعة ديال التعدين بحال لحديد والدهب ولماس ولكريصطال ولفاخر، وبلينتاج ديال الصوف وهي لمنتيج اللول فلعالام ديال لبوكسيت، اللي كايتخرّج منّو لألومينيوم.

ؤسطراليا معروفة حتّا بلحياة لبرية لغنية ولمتنوعة اللي فيها.

 

كاينة لأرض ديال ؤسطراليا اللي فيها 7,617,930 كيلوميطر مربع فالصفيحة لهيندية لؤسطرالية. هاد لبلاد بانت فوق لأرض هادي 3.8 مليار عام وعندها تاريخ جيولوجي مهدّن ومستاقر. هاد لبلاد داير بيها لمحيط لهندي ولمحيط لمهدن وعندها 34,218 كيلوميطر ديال السواحل وعندها ميساحة ديال لبحر واصلة ل8 دلمليون كيلوميطر مربع. لأرض ديال هاد لبلاد تفرقات على لقارات لخرين، الشي اللي خلّا يكونو فيها حياوانات ماكاينينش فقنت آخور فلعالام بحال لكوالا ولكانݣارو.

جاو الناس اللولين لؤسطراليا هادي كتر من خمسين آلف عام. هاد لأسطراليين لقدام كايتسمّاو السكان لأصليين دؤسطراليا.

ݣاع لمستعمرات لأسطرالية اللي عمّراتها لمملكة لمتحدة ولّات مستاقلّة فلعوام د1850 و تجمعات ففيديرالية وحدة نهار 1 يناير 1901. أول وزير لول فالتاريخ ديال ؤسطراليا كان هو إدموند بارتون ف1901. لبلاد عندها واحد النيضام ديموقراطي برلاماني وملكية دستورية اللي تشارلز التالت هو لماليك ديالها وعندها راس ديال الدولة وحاكيم عام كايختارو لوزير اللول باش يدير لمهام ديال لمليكة فؤسطراليا.

لويلايات ولمدون

 

ؤسطراليا فيها ستة ديال لويلايات، جوج ديال لأراضي كبار وبزّاف ديال لأراضي الصغار. لويلايات هوما نيوساوت ويلز، كوينزلاند، ؤسطراليا دلجانوب، طازمانيا، ڤيكطوريا وؤسطراليا دلغرب. الجوج ديال لأراضي لكبار هوما لأرض دالشمال ولأرض دلعاصيمة دؤسطراليا (ACT).

ف2013 وبحساب لبنك الدولي، ؤسطراليا كان فيها كتر من 23 مليون دلبشري. لأغلبية ديال الناس دؤسطراليا كايعيشو فلمدون اللي على لبحر، بحال سيدني، ميلبورن، بريزبان، پيرت، داروين، هوبارت وأديلايد. أكبر مدينة فالداخل هي كانبيرا، واللي هي لعاصيمة ديال لبلاد. أكبر مدينة فؤسطراليا هي سيدني.

ؤسطراليا راها دولة كبيرة بزاف، ولأغلبية ديال لأرض تاعها ناشف ولوسط ديال لقارة غاليبيتو صحرا. غير لمناطيق حدا السواحيل د الشرق، لغرب ولجانوب هي اللي كاتطيح فيها شتا كافية وفيها موناخ (ماسخونش بزّاف) مزيان باش يكونو لفوارم ولمدون.

الشعوب لقديمة

 

جاو السكان لأصليين دؤسطراليا للبلاد هادي خمسين آلف عام أولّا كتر ݣاع. حتال قبل لمجية ديال لمستعميرين للبريطانيين ف1788 عاش الشعوب لأصلية على الصيد والجميع ديال الطعام من لارض. هادوك الناس عاشو فݣاع لموناخات وقدرو يسيّرو لأرض ديالهوم بطرق مختالفة. متلا لأرض اللي فيها دابا سيدني كانو كايشعلو فيها لعافية مرة فكولّا شوية دالسنين وكايحرقو الربيع والشجار الصغار.

هادشي كايعني باللي بزاف ديال الربيع كايرجع ولاكين ماشي بزاف ديال الشجار لكبار. لكانݣاروات عزيز عليهوم يعيشو فالربيع ماشي فلغابات. هادوك لكانݣاروات هوما اللي كانو السكان لأصليين كاياكلوهوم حيتاش بهاد الطريقة كايكونو كتار واخّا هكاك، ماكانوش كايصيدوهوم كاملين حيتاش كانوا كايخافو ينقارضو ليهوم. السكان لأصليين دؤسطراليا ماكانوش كايبنيو الديور وماكايبنيوش لحيوط ولسوار وماكايصاوبوش لحديد ولفخّار ولحوايج والسهوم ديال الصيد، وماكانش عندهوم لبݣر ولغنم ولعود باش يبنيو فين بربّيوه. لمباني ولمنشآت لقدام واللي بقاو واللي دابا معروفين تاع دوك السكّان هوما مصيدات ديال لحجر فلويدان وكواخ ديال لحجر فڤيكطوريا وطازمانيا.

كانو هاد الناس كايستاعملو لبوميرانݣ للصيد والرياضة. كان هادوك السكان كايحساب ليهوم باللي لأرض ماشي ديالهوم وغير كايكبرو منها وكانت بحال لواليدة ديالهوم، وباللي كاينتاميو هوما للّرض.

طيرا ؤسطراليس

 

فلقرن 17 تاجرو لهولانديين معا لجزر دباطاڤيا (ليوما إندونيسيا) اللي كاينة فالشمال ديال ؤسطراليا وشي باريخات قاسو الطرف دلبحر الشمالي دؤسطراليا. لحاكيم لهولاندي ڤان ديمين سيفط هابيل طازمان وهو اللي كتاشف طازمانيا وسمّاها أرض ڤان ديمين. تبدّلات السمية ديالها من بعد باش يديرو التكريم لهاداك اللي كتاشفها. لحوكومة دالنݣالزة كانو متأكدين باللي كاينة شي أرض كبيرة فلجانوب مازال ماتكتاشفاتش، داكشي لاش صيفطو جيمز كوك باش يقلّب فلمحيط لمهدّن.

لكاپتين كوك شاف السكان لأصليين دؤسطراليا بالطريقة لبسيطة باش كانو عايشين. شافهوم كايصيدو فلبحر ولرض وكايجمعو لبدور والديسير، ولاكين ماكانو لا ديور ولا سوار. فبزاف ديال لقنات فلعالام الناس كاتحط سور وكاتبني وسط منّو دار باش تبيّن لملكية ديالها لهاد لرض، ولاكين هادوك الشعوب لأصلية ماكانوش كايديرو هاكّا. لمبدأ ديالهوم كان باللي "لأرض ماشي ديالهوم وغير كايكبرو منها وكانت بحال لواليدة ديالهوم، وباللي كاينتاميو هوما للّرض." لكاپتين كوك جرا لعند النݣالزة ووصل ليهوم التنقنيقة باللي حتى واحد ماعندو شرعية على ديك لرض. من هنا غادي يبداو مشاكيل كبار عند هاد الشعوب.

ليستيعمار

 

فلقرن 18 كانو لقوانين ولحكام عند النݣليز قاسحين، بزاف دالناس كانو مافحالهومش ولحباسات عامرين. الناس اللي تشدّات كانت كاتصافت نيشان للميريكان اللي كانت مازال تابعة ليهوم، ولاكين فالسبعينات ديال لقرن 18 لمستعمرات ديال النݣليز ستاقلّات على التاج لبريطاني. هاد الشي خلّا بريطانيا مايبقاش عندها لحق تسيفط الناس لتمّا. بلمجية ديال التمانينات دلقرن 18 ولّاو لحباسات عامرين حتى ولّاو كايشدّوهوم فپاريخات قدام ومصدّيين. لحوكومة ديك الساعات قررات تصاوب مستعمارة تمّاك وتصيفت أول أسطول فيه 11 سفينة لنيوساوت ويلز واللي كانو فيه بحّارة ومحابسية وشوية ديال لمستعمرين لحرار. تمّا تأسس أول ڤيلاج غايولّي من بعد هو مدينة سيدني.

فلعوام اللولين ديال لمستعمارة كولشي كان صعيب. حتى شي حوكومة عند النݣليز مافكرات فإنا نوع ديال لمتّهمين غاتصيفت لتما. كان مابين دوك اللي مشاو فلّاح واحد. مكانش لا بنّاي ولا حدّاد ولا اللي يصاوب الدوزان إلا خسر. ݣاع لبهايم اللي دّاو هربو. ݣاع النباتات كانو مختالفين وحتّى واحد ماكان عارف واش كانو يصلاحو باش يتكالو. كانت لحوكومة معتاقدة باللي كولشي اللي مشاو للمستعمارة الجديدة غايموتو من الجوع. ولاكين اللي طرا هو أن دوك الشوية دلخيام ولكوخ ديال لحاكيم أرتر فيليپ كبرو ؤولّاو ڤيلاج صغير فيه زناقي وݣنطرة دايزة على لواد الصغير، طاحونة ديال الدݣيݣ وبلايص فين يوقفو لباطوات. دازو لمستعمرات لطازمانيا وحتال سواحل خرين فين تكتاشف لفاخر، وللداخل فين لقاو لبهايم اللي ضاعت ليهوم ولّات كسيبة كبيرة. ماوصلات 1820 حتى ولّاو كايكبّرو لغنم لغليض وكايصيفطوه بالصوف ديالو للوزينات ديال بريطانيا. كان ليستيعمار كايكبر فنيوساوت ويلز وطازمانيا. لمناخ ديال طازمانيا كان مزيان وكايشبه لديال النݣليز، ولفلّاحة قدرو يكبّرو لغلة بحال كيما دارو جدادهوم فبلاد لأصل.

ليكتيشاف

كانت الناس كاتفكّر باللي ؤسطراليا تقدر تهز بزّاف ديال الناس حيتاش كانت أرض كبيرة بلا قياس. فليام اللولين ديال ليستيعمار، بزاف ديال لمستكشفين مشاو كايقلّبو على أرض مزيانة فين يديرو لفّارم. فاش مشاو للغرب ديال سيدني شافو سنسلة ديال الجبال سماوها الجبال الزرقة. هاد السنسلة ماكانتش كاتبان عالية بزّاف ومافيهاش لحدر بزاف، ولاكين الناس مازعموش يفوتوها للهيه. ف1813 جوج رجال ودرّي ديال 17 عام قطعو الجبال ولقاو من موراهوم أرض زوينة صالحة للفلاحة. طريق تّبنات على لبلاصة اللي دازو منّها ولحاكيم ديال ديك لوقت بنا مدينة باتروست اللي بعيدة ب160 كيلوميتر على سيدني. بزاف ديال الناس كان يحساب ليهوم باللي ضروري غايكون شي بحر وسط لݣزيرة لكبيرة، ومشاو يقلّبو عليه. بزاف ديال الناس اللي كايديرو ليستيكشاف ماوجّدوش للرحلات ديالهوم مزيان، أولّا مشاو كايقلّبو فلوقت السخون ديال لعام.

لحكم الداتي

التقلاب على الدهب فنيوساوت ويلز وڤيكطوريا من 1851 خلّا بزاف ديال الناس يهجرو لمدون ولڤيلاجات ديالهوم. الساكنة كبرات فلجانوب الشرقي ديال لبلاد ودارت الصيناعة وولّاو لاباس عليهوم. ف1853 الدهب خّلا الناس اللي كانو ضعاف فلحالة لمادّية ديالهوم بوكو فلوس.

لمصيفطة ديال لمحابسية ولمتهمين لؤسطراليا سالات مابين الربعينات ولخمسينات ديال لقرن 19، وبزاف ديال التغييرات طراو. الناس ديال ؤسطراليا بغاو يحكمو لبلاد لراسهوم ماشي تملي عليهوم لندن مايديرو. لحوكومات اللولين كانو فيهوم حكّام اللي جايين من لمملكة لمتحدة. من موراها الناس بغات الديموقراطية ولحكم الداتي ولحوكومة تكون منهوم ماشي من برّا. ويليام وينتوورت (واحد من التلاتة اللي قطعو الجبال الزرقة) أسس لجمعية لوطنية لؤسطرالية (أول حيزب سياسي فؤسطراليا). ف1855 تعطا حكم داتي محدود لنيوساوت ويلز وڤيكطوريا وؤسطراليا دلجانوب وطازمانيا. فنفس لعام تعطا لحق للتصويت لݣاع الرجال اللي عندهوم فوق 21 عام فؤسطراليا دلجانوب. لويلايات لخرين تبعو هاد لويلاية اللي تعطات فيه لحق للعيالات باش يصوتو ف1895 وولاو أول عيالات فلعالام يتعطاهوم هاد لحق. لؤسطراليين كانو عندهوم برلامانات ديموقراطيين ولاكين كانو باغين كولشي يتجمع تحت لحوكم ديال برلامان واحد وحوكومة وحدة وبلاد وحدة.

لكومونويلط دؤسطراليا

 

حتال 1901 ؤسطراليا ماكانتش أمة ولاكين ستة ديال لمستعمارات حاكماهوم بريطانيا. هاد الناس صوتو باش يتجمعو فدولة وحدة تسمّات لكومونويلط دؤسطراليا. ف1901 هاد الدولة كانت مازال تابعة لإمبراطورية دلمملكة لمتحدة وبغات غير لبريطانيين ولأوروپيين باش يجيو ليها. موراها ولّا عندهوم لعسكر ولبحرية ولفلوس ديالهوم بوحدهوم.

فهاد لوقت فؤسطراليا كانت النقابات صحيحة بزاف وقدرات تبدا حيزب سياسي هو حيزب لعمّال لؤسطرالي اللي قدر يدوّز بزاف ديال لقوانين اللي ساعفات وعاونات تحسّن لوضعية ديال لخدّامة.

ف1914 بدات لحرب لعالمية للولا فأوروپا. ؤسطراليا مشات معا بريطانيا ضد ألمانيا و لوطريش-هنݣاريا و لإمبراطورية لعتمانية. لعسكر ديال ؤسطراليا مشاو لݣاليپّولي فلإمبراطورية لعتمانية. تقتلو تمّا بشجاعة ولاكين غلبوهوم التواركة. لؤسطراليين كايحتافلو بالدكرى ديال هاد لمعراكة فعيد أنزاك (بالنݣليزية: ANZAC Day). كتر من 60 آلف ؤسطرالي تقتلو فهاد لحرب.

دازو لحروب وفالستّينات ولّات ؤسطراليا بلاد كايجيو ليها الناس من الشينوا وڤييطنام وماليزيا وبزاف ديال لبلدان لاخرين فآسيا. ؤسطراليا ولّات فلخمسينات والستينات مابين الدول اللي لاباس عليهوم بسباب التيجارة ديال الصوف ولفاخر. بدات ؤسطراليا التبادل التجاري معا لميريكان ومن موراها معا الجاپون. ف1973 تحلّات دار لأوپيرا دسيدني. مابين التمانينات والتسعينات حيزب لعمّال ولحيزب الليبيرالي دارو بزاف ديال التغييرات للسيستيم ديال ليقتيصاد، الشي اللي خلّاه يطيح مزيان ف1991. ولاكين فاش طرات لأزمة ديال 2008، ليقتيصاد ديال ؤسطراليا بقا واݣف على الصح.

ليوما ؤسطراليا هي بلاد لاباس عليها ومسالمة وديموقراطية. والاكين عندها مشاكيل مازال مافكّاتهوم. ف2010 وصلات لبيطالة فلبلاد ل4 حتال 5 فلمية، وبزاف ديال لأراضي قدرات ترجع للسكان لأصليين اللي بزاف منهوم عايشين فلفقر. كولا عام كاتختار لحوكومة بزاف دالناس من لعالام كاملو باش يجيو يعيشو فلبلاد. هاد لبلاد كايمشيو إما حيتاش باغين يديرو التجارة أولّا حيتاش باغين يعيشو فالديموقراطية، أولّا يتّلمو معا لفاميلة ديالهوم أولّا لاجيئين هربانين من لحرب أولّا شي كاريتة طبيعية. ؤسطراليا ستاقبلات 6 دلمليون ديال لمهاجرين من سالات لحرب لعالمية التانية، ومابينهوم 660 آلف لاجئ.

تقدر تزيد شوف بزاف د تّصاور و لمعلومات ديال Australia ف ويكيميديا كومنز.