أنترنيت

لانترنيت هوّا ريزو ديال رّيزوات فيها لّي عمومية ؤ لّي خصوصية، تاتخدم كولّها ب نفس لپروطوكولات. لأنترنيت ماشي هوّا لويب. هاد لّخّر هوّا رّيزو ديال لپاجات لّي كتحدّد ب لأدريسة د لويب (بحال https://ary.wikipedia.org)، ؤ لّي مرتابطة بيناتها بستيعمال ليانات. بمعنى أخور، لأنترنيت كيمتل رّيزو لمادي ديال لپيسيات ؤ لأجهزة لّي مرتابطة بيناتها، ؤ لويب كيمتل رّيزو لمعلوماتي لّي مأمپليمونطي فوق من لأنترنيت. ف ليستيعمال لعادي كاينين بزاف د نّاس ماكيفرقوش بيناتهم.

لأصل ديال أنترنيت بدا ف لميريكان، ملّي لعسكر ديالهم خرّجو طّيكنولوجيا د آرپانيط ف 1969، ؤ لّي هيّا لمرة لّولة ف لعالم رتابطو فيها بزاف ديال لورديناطورات بيناتهم. تطورات هاد طّيكنولوجيا، ولاكين بقات مخدّمة غي عند لعسكر، تال تّمانينات ديال لقرن لعشرين فين ولاّو كيخدّموها تا لجامعات. سّميّة تبدّلات ؤ ولاّت أنترنيت ف 1 يناير 1983.

تّخدام د أنترنيت من نّاس كاملين ولاّ مسموح ف لّول ديال تّسعينات، ؤ لموقع لّول تدار ف لويب ف 1991، ؤ موراها بدا تيتزاد لعدد د نّاس لّي تيخدّموه ف لعالم كامل. لمغريب دخّل لأنترنت ف 1994.