Ŋun Zaŋ Sariga M-Pili O Maŋ' Suurili

Ŋun Zaŋ Sariga M-pili O Maŋ' Suurili

surah

Pahi la	Alikuraan
Zuliya wuhibu	المدثر
Japan zuliya (yuli kana) sabbu ni	くるまるもの
Be lɛbigili zuliya nima ni	74. The One Wrapping Himself Up, Q31204740
Balli tuma bɛi balli yuli	laribanchi
Tuma ŋɔ maa zaa bɛla URL maa ni	https://quran.com/74
Nahingbaŋ	Meccan surah

Ŋun Zaŋ Sariga M-pili O Maŋ' Suurili (Al-Muddaththir ٱلْمُدَّثِّر)

Suurili ŋɔ maa wuhirila wa’azulana kam ni tu kamaata ni o pili wa’azu o yiŋa, ka naan zaŋ li yi sambani ni shεm, ka lahi wuhiri Naawuni gaŋsibu, ni tipawumli lana kam ni yɛn ti be hali shεli puuni bεɣuni Chiyaama.

Aaya nima:

• 1. Yaa nyini ninvuɣu so ŋun zaŋ sariga m-pili o maŋa (Annabi Muhammadu)!
• 2. Yiɣisim niŋ wa’azu.
• 3. Ka tibgi a Duuma (Naawuni).
• 4. Ka niŋ a sitira kasi.
• 5. Ka niŋ katiŋ’ ka chɛ ni buɣa jεma.
• 6. Yaha! Miri ka a ti pini ka bɔri ni bɛ ti pahi a shɛli di zuɣu.
• 7. Yaha! Niŋmi suɣulo a Duuma (Naawuni) zuɣu.
• 8. Dinzuɣu, bɛ yi ti piεbsi kikaa ni (Zaadali),
• 9. Tɔ! Dindali maa n-nyɛ dabsi’ kpeeni.
• 10. Ka di pa soochi n-ti chεfurinima.
• 11.(Yaa nyini Annabi)! Chεli Ma (Mani Naawuni) ni ninvuɣu so N-ni nam ka o nyɛ o ko (ŋuna n-nyɛ Walid Ibnu Mugirah).
• 12. Yaha! Ka n-ti o arzichi din galsi.
• 13. Ni o bihi shɛba ban ʒiya n-tabi o.
• 14. Ka N (Mani Naawuni) kuli balgi bεhigu n-ti o yɛlgibu ni yɛlimaŋli.
• 15. Din nyaaŋa, ka o lahi niŋdi kore ni M (Mani Naawuni) pahi o.
• 16. Chɛli gba! Achiika! O daa nyɛla tipawumli lana ni Ti (Tinim’ Naawuni) aayanim’ wumbu.
• 17. Ni baalim, N (Mani Naawuni) nyɛla Ŋun yɛn niŋ o talahi ni azaaba kpeeni (bee ka N-chɛ ka o du saɣuudu).
• 18. Achiika! O (Walid Ibnu Mugirah) nyɛla ŋun tεhi, ka ŋma ʒiri.
• 19. Dinzuɣu, ka bɛ (Naawuni) narim o, wula ka o leei kuli niŋ tɛhi (ka ŋma ʒiri n-zaŋ jɛndi Alkur’aani)?
• 20. Din nyaaŋa, ka bɛ (Naawuni) lahi narim o, wula ka o leei kuli niŋ tɛhi (ka ŋma ʒiri n-zaŋ jɛndi Alkur’aani)?
• 21. Din nyaaŋa, ka o (Walid Ibnu Mugirah) tɛhi.
• 22. Din nyaaŋa, ka o saɣim o nini ni, ka zaɣizaɣi li.
• 23. Din nyaaŋa, ka o lԑbi biri, ka tibgi o maŋa.
• 24. Ka yεli: “Ŋɔ (Alkur’aani) maa pa shεli m-pahila sihira n-nyɛ li, ka bɛ deeri li (bukpahinim’ sani na).”
• 25. (Ka yεli): “Ŋɔ maa pa shεli naɣila ninsala yεltɔɣa.”
• 26. Ni baalim, N (Mani Nawuni) ni zaŋ o kpεhi sakara (buɣum) ni.
• 27. (Yaa nyini Annabi)! Bo n-leei baŋsi a binshɛɣu din nyɛ sakara?
• 28. Di (buɣum maa) bi kpalinda, di mi bi chɛri shɛli (naɣila di di li mi n-ti naai).
• 29. Ka di nyɛla din diri ninsalinim’ nimgbina, ka sabgiri li.
• 30. Di (sakara buɣum maa) malila (Makaaikanim’) pia ni awei (ka bɛ guli li).
• 31. Yaha! Ti (Tinim’ Naawuni) bi zali ban guli (sakara) buɣum maa m-pahila bɛ nyɛla Malaaikanima, Ti mi bi zaŋ bɛ kalinli maa leei shɛli naɣila di nyɛla dahimbu n-zaŋ ti ninvuɣu shεba ban niŋ chεfuritali, domin ninvuɣu shεba bɛ ni ti litaafi maa dihitabli (ni Alkur’aani yεlimaŋtali), ka ninvuɣu shεba ban ti Naawuni yεlimaŋli pahi ni yεlimaŋtibo. Yaha! Domin ninvuɣu shεba bɛ ni ti litaafi (Yahuudu mini Nashaaranim) maa mini ninvuɣu shɛba ban ti Naawuni yεlimaŋli di zilsi (Alkur’aani yεlimaŋtali). Yaha! Domin ninvuɣu shεba doro (bee munaafichitali) ni be shɛba suhiri ni mini chεfurinim’ yεli: “Bimbo ka Naawuni leei kuli bɔri ni ŋmahinli ŋɔ maa?” Lala ka Naawuni bɔrgiri O ni bɔri so, ka dolsiri O ni bɔri so. Yaha! (Yaa nyini Annabi)! So bi mi a Duuma tobbihi (Malaaikanim’) tariga naɣila Ŋuna. Yaha! Di (buɣum maa) pa shεli m-pahila wa’azu n-nyɛ li n-zaŋ ti ninsala.
• 32. Haifa! M (Mani Naawuni) po goli.
• 33. Ni yuŋ, di yi ti niŋ bekaali na.
• 34. Ni bekaali, di yi ti neei zaasa.
• 35. Achiika! Di (sakara buɣum) be mushiiba kara puuni.
• 36. Ka di nyɛ wa’azu n-ti ninsalinima.
• 37. Ni yi puuni ninvuɣu so ŋun bɔri ni o daŋsi (tuunvɛla), bee ka o naɣisi.
• 38. Nyɛvuli kam nyɛla bɛ ni yɛn zaŋ di ni tum shɛli n-dalim li.
• 39. Naɣila nudirgunima (ban yɛn ti deei bɛ tuuntumsa litaafi ni bɛ nudirgu).
• 40. Bɛ yɛn ti bela Alizanda yiya puuni ka bɔhira.
• 41. (Ka bɛ bɔhiri) bibɛhi yɛla.
• 42. “Bimbo n-leei kpεhi ya sakara (buɣum) ni?”
• 43. Ka bɛ yεli: “Ti daa ka ban puhiri jiŋli puuni.”
• 44. “Ti mi daa pa ban dihiri nandamba (ti daarzichi puuni).”
• 45. “Ka ti daa lahi be ban yɛri yɛltɔɣa kaha ni.”
• 46. “Yaha! Ti daa labsirila Sanyoodali (Zaadali) ʒiri.”
• 47. Hali ka dihitabli (kpibu) ti ka ti na.
• 48. Dinzuɣu, suhudeenim’ suhudee ku tooi niŋ ba anfaani shεli (Zaadali).
• 49. Bo n-leei mali ba (chεfurnim’ maa), ka bɛ lebri biriti wa’azu (Alkur’aani)?
• 50. Bɛ (chεfurinim’ maa yi nya Annabi Muhammadu), bɛ ŋmanila buŋ’ shɛŋa ban yirigi.
• 51. Ka bɛ zo ka chɛ gbiɣinli.
• 52. Chɛli gba! Bɛ (chεfurinim’ maa) zaɣiyino kam bɔrimi ni bɛ ti ba gbana (litaafi na Naawuni sani) ka di yɛrgi luɣulikam.
• 53. Haifa! Chɛli gba! Bɛ kuli bi zɔrila Chiyaama.
• 54. Haifa! Achiika! Di (Alkur’aani) nyɛla teebu.
• 55. Dinzuɣu, ninvuɣu so ŋun bɔra, tɔ! Ŋun zaŋmi li n-teei o maŋa.
• 56. Yaha! Bɛ (chɛfurinim’) bi zaŋdi li n-teeri bɛ maŋa, naɣila Naawuni yi yu, Ŋuna n-nyɛ Ŋun tu ni bɛ zo dabiεm, ka lahi nyɛ Ŋun tu kamaata ni chεmpaŋ.