August

De August, ok as Augstmaand, Augst un Aarnmaand (Oornmoond) bekannt, is na den Gregoriaanschen Klenner de achte Maand in dat Johr. Annere Beteken för de August sünd t. B. Oorntenmaand, Ohrenmaand, Ernting oder Sichelmaand wat allns dorop hendüüd, dat in disse Tiet von’t Johr de Oornt inbrocht waart. De August hett 31 Daag un warrt to de Sommermaanden rekend.

De Naam August kummt ut dat Latiensche: Dat weer de Naam von den röömschen Kaiser Augustus, de in dissen Maand in dat Johr 8 v. Chr. sien eerstet Konsulat övernahmen harr. In den röömschen Klenner weer de August de sösste Maand un hett dor ok noch Sextilis (lat.: sex = söss) heeten. De Anfang von dat Johr is 153 v. Chr. denn aver op den 1. Januar leggt worrn.

De Sextilis har toeerst 29 Daag, is denn aver dör de Reform von Julius Cäsar op 30 Daag fastleggt worrn. As he den niegen Naam kregen hett, hett man em denn noch en Daag mehr geven, dormit de Maand jüst so veel Daag har as de Juli, de jo na Caeser nöömt weer. Den Dag överher hett man bi den Februar wegnahmen – dat Johr künn jo deswegen nich länger warrn. Un dormit denn nich dree Maanden achterenanner 31 Daag harrn, hett man de Länge denn bi de nafolgend Maanden September, Oktober, November un Dezember eenfach ümkiehrt.

De August fangt in Schaltjohren mit den lieken Wekendag an as de Februar.

Man dat Woort is aver ok en Vörnaam för Mannslüüd: August (Naam). In Gegendeel to’n Maand warrt de Naam aver op de eersten Sülv betont. Männigmol warrt de ok as en Schimpnaam brukt, wenn een t. B. von’n dummen August snackt warrt.