U testu classicu
Eccu u testu originale di u Sirinatu di Scappinu:
Strofa 1 O specchiu d'e zitelle di la pieve O la miò chiara stella matuttina Più bianca di lu brocciu e di la neve Più rossa d’una rosa damaschina Più aspra d’a cipolla, e d'u stuppone Più dura d’una teppa, e d'un pentone.
Strofa 2 Tù m'hai strigatu : eo struchiu a pocu a pocu Sò spitittattu, e au core achiu gran pena. A notte un dromu, e nun ne trovu locu Cume manghiassi a nepitella a cena ; Lasciu andà le miò sciotte a gueru intornu E un tessu mancu tre fattoghje a u ghiornu.
Strofa 3 Dove fai trischie o sabatu pe u fornu Eo vengu in nice di circà u vitellu ; Ti facciu u cherchu, e ti vo sempre attornu Cumme lu tò agnellettu e cagnulellu. Ammi tant'u to cucchiu e u to mertinu ; E pò tant' odiu porti a me mischinu.
Strofa 4 Se in cherciula dai cena a u mannerinu A sera, o cogli in l'ortu l'insalata T'appostu, e tu ma' nun mi voi vicinu. Eppuru eo t'ammu, e t'achiu sempre amata Fin da quandu era tantu chiuculellu C'un m'arivava a coglie a u summerellu.
Strofa 5 Lasciava spessu scumbià l'agnelle Cullava a coglie e frutte sui chiarasci Cun tecu e mi jucava alle piastrelle, E guagnandu bulea l'impatta in basci. D'u morsu, chi per zerga a lu puchiale Tù m'attaccasti, achiu ancu u mercu avale.
Strofa 6 Un ghiornu, ch'era in tempu di sighere E d'orzu novu si fecìa lu pane Tu cantavi a diana ; eo cun piacere Sottu un sépalu stava ad ascultane. All' impruvisu ti venne la tossa ; Eo dissi : lisca ! e tu ti festi rossa.
Strofa 7 Ti ricordi in quest'ultima nivata ? Tiravi e tolle, e a u tò valcon supranu Fecìe tra mezzu a l’albe l'affaccata. Eo fecìa a boccarisa un basciamanu. Quelle sere eo venìa da te a bichiane E ghiucavamu inseme a scallamane.
Strofa 8 Bengu spessu cù a cetera à u tò fucone Mi arembu a tene, e allor sò tutto in bena, E sonu e cantu strunelli e canzone ; Mi scordu di lu sonnu e di la cena; U troppu, duv'eo sto, mi par di piumme, E nun mi curu d’acciecà di fumme.
Strofa 9 Ti diedi u core, o Filignocca ingrata E tuttu u meo ti sarìe prontu a dane. U casciu, ch’a miò vacca vracanata Mi' fa' gni jornu, eo lu vendu in citàne E all'appiattu di mamma e d'e surelle Ti ne accattu friscetti, achi e curdelle.
Strofa 10 T'achiu datu una reta crimmisina Cun quattru pendalucchi, infrisciulata Un cusacchinu à frange di stammina ; Quandu lu porti pari una spusata. In ghiescia la dumenica damane Sì l'imbilia di tutte e paesane.
Strofa 11 Bulintier lasceríe d'esse Scappinu Per esse u cusacchiu, ch'eo ti dunai E stringhie lu to senu alabastrinu ; E or chì drumendu in lettu ti ne stai Oh fussi u cavizzale, o u cuscinettu O u lenzolu supranu d'u to lettu ! U testu in corsu mudernu
Eccu u testu di u Sirinatu di Scappinu , adattatu in corsu mudernu:
O spechju di e zitelle di la pieve O la mio chjara stella matuttina Più bianca di lu brocciu è di la neve Più rossa di una rosa damaschina Più aspra di a cipolla , è di u stuppone Più dura di una teppa, è di un pentone. Tù m'hai strigatu : sdrughju à pocu à pocu Sò spitittattu, è à u core aghju gran pena. A notte ùn dormu, è ùn ne trovu locu Cume manghjà si u piverone à cena ; Lasciu andà le mio sgiotte à gueru intornu È un tessu mancu trè fattoghje à u ghjornu. Duve fai trischie u sabatu pè u fornu Eu vengu in nice di circà u vitellu ; Ti facciu u cherchu, è ti vò sempre attornu Cum'è lu to agnellettu è cagnulellu. Ami tantu u to cuchju è u to mertinu ; E pò tantu odiu porti à me mischinu.
Se in cherciula dai cena à u mannerinu A sera, coglii in l'ortu l'insalata T'appostu, è tù ma' nun mi voi vicinu. Eppuru eo t'amu, è t'aghju sempre amata Fin da quandu era tantu chjuculellu Ch'ùn m'arrivava à coglie à u sumerellu.
Lasciava scumbià l'eghje è l'agnelle Cullava à coglie e frutte sù i chiarasgi Cun tecu e mi ghjucava à le piastrelle È guagnandu bulea l'impatta in basgi. D'u morsu, chì per zerga à lu pughjale Tù m'attaccasti, aghju ancu u mercu avale.
Un ghjornu, ch'era in tempu di sighere È d'orzu novu si fecìa lu pane Tù cantavi a diana ; eo cun piacere Sottu un sepalu stava ad ascultà ne. À l'impruvisu ti vene la tossa ; Eo dissi : lisca ! è tù ti festi rossa.
Ti ricordi in quest'ultima nivata Tiravi e tolle, è à u to balcone supranu Fecia tra mezu à l’albe l'affaccata. Eo fecìa à boccarisa un basgiamanu. Quelle sere eo venìa da tè a vighjà ne È ghjucavamu inseme à scallamane.
Vengu spessu cù a cetera à u to fucone Mi arrembu à tè ne, è allor' sò tuttu in bena, E sonu è cantu strunelli è canzone ; Mi scordu di lu sonnu è di la cena; U troppu, duv'eo sto, mi par di piume, È nun mi curu d’acciecà di fume.
Ti dedi u core, o Filignocca ingrata E tuttu u meo ti sarìe prontu à dà ne. U casciu, ch’a mio vacca bracanata Mi fa' ogni jornu, eo lu vendu in cità ne È à l'appiattu di mamma è d'e surelle Ti ne accattu frisgetti, achi, è curdelle.
T'aghju datu una reta crimisina Cun quattru pendalucchi, infrisgiulata Un cusacchinu à frange di stamina ; Quandu lu porti pari una spusata. In ghjesgia la dumenica da mane Sì l'inviglia di tutte e paesane.
Vulenteri lascerie d'esse Scappinu Per esse u casacchiu, ch'eo ti dunai È stringhje lu to senu alabastrinu ; E or chì durmendu in lettu ti ne stai Oh fussi u cavizzale, o u cuscinettu O u lenzolu supranu d'u to lettu ! Referenze
Ligami
This article uses material from the Wikipedia Corsu article Sirinatu di Scappinu , which is released under the Creative Commons Attribution-ShareAlike 3.0 license ("CC BY-SA 3.0") ; additional terms may apply (view authors ). Il contenuto è disponibile in base alla licenza CC BY-SA 4.0 , se non diversamente specificato. Images, videos and audio are available under their respective licenses. ®Wikipedia is a registered trademark of the Wiki Foundation, Inc. Wiki Corsu (DUHOCTRUNGQUOC.VN) is an independent company and has no affiliation with Wiki Foundation.