U schelatru d'Atacama hè un schelatru umanoidi scupartu in u 2003 in u disertu chilenu di l' Atacama.
Hè longu quindici centimi è a so chjeccula t'hà una forma chì faci pinsà à l'icunugrafia " stratarrestra ". I partitanti di a prisenza di i stratarrestri annantu à a Terra ani sughjiritu ch'eddu s'agiscia di un stratarrestru.
Siont'è A Estrella d'Arica, di u 19 di uttrovi 2003, un ghjurnali lucali chilenu, un omu chjamatu Oscar Muñoz hà truvatu u schelatru u 19 di uttrovi 2003, quand'eddu era in cerca di ughjetti di valori storicu in A Noria, una cità fantasimu in u disertu d'Atacama.
Vicinu à una ghjesgia abbandunata, Muñoz hà scupartu "un schelatru stranu di a taglia di un criò", longu circa quindici centimi ingutuppatu in un pannu biancu, accintu di un frisgettu viulettu.
Era una criatura incù i denti pinzuti, una testa bumbuta incù un ingrussamentu stranu supplemintariu annantu à u sopra.
U so corpu era squamosu è di culori scuru. Cuntrariamenti à l'anatumia solita di l'umani, t'avia deci paghji di costi inveci di dodici.
U disertu d'Atacama hè, incù l'altupianu Antarticu, u disertu u più asciuttu di u mondu. Hè carcu di una quantità impurtanti di sali. Quissa hà pussuta parmetta a mummificazioni po' a cunsirvazioni di u corpu.
A prima futugrafia di u schelatru era l'opara d'Alejandro Davalos, un cumpagnu di Muñoz à u quali eddu hà musciatu u campionu. Davalos hà inviatu i so futugrafii à Aion, un'urganisazioni didicata à l'ufologia. Uni pochi di ghjorna dopu a scuparta, Muñoz hè vultatu à Iquique ed hà vindutu u schelatru, par solu 30000 pesos chileni, veni à dì circa 60 dullari americani, à un omu d'affari chì era unu di i so clienti è à u quali eddu s'addirizzava par venda l'ughjetti ch'eddu truvava. Siont'è Mariu Pizarro, rapprisintanti d'Aion in u nordu, u schelatru pudaria essa rivindutu avà par 80 milioni di pesos chileni, veni à dì circa 160000 dullari. U novu prubitariu di u schelatru, inquantu ad eddu, cheri 500000 pesos par a presa di una futugrafia è 750000 pesos chileni par dui.
Pocu dopu, l'affari hè cunnisciutu da a televisioni chilena : canali Chilevisión, chì hà fattu un'inchiesta dittagliata annantu à Ata, hè vinuta in a rigioni accumpagnatu di parechji ufologhi è amatori di paranurmali. U prima era Rodrigo Fuenzalida, leader d'Aion chì travagliava par a catena 13. Quiddu hà ricusatu di cunsidarà chì a criatura pudaria essa un stratarrestru. U biolugu Walter Seinfeld, capu di a filiera biulugia marina à l'università Arturo Prat, inquantu ad eddu, dopu à avè vistu i futugrafii di l'umanoidi, hà affirmatu chì era pà di veru un mammiferu, è guasgi certamenti un fetu umanu scunciatu.
Di Marzu 2018, Gary Nolan hà publicatu i risultati supplemintarii, indichendu chì a parsona avia un turbamentu raru riguardu à l'invichjamentu ussacutu, è ancu altri mutamenti genetichi in i geni assuciati à u nanisimu, a sculiosa è l'anumalii in i musculu è u schelatru. I circadori ani idantificatu 64 mutamenti inabituali in 7 geni liati à u sistemu squeletticu, è ani nutatu chì truvà tanti mutamenti chì affitteghjani in particulari u sviluppu di u schelatru ùn hè mai statu signalatu capunanzi. Ani pussutu ditarminà chì u schelatru d'Atacama era urighjinariu di l'Isula di Chiloe in u Chili.
Circuleghja annantu à Internet u rimori chì un studiu radiugraficu saria statu rializatu da u duttori Pilar Manchon di u Centru di radiulugia Manchon à Barcilona è ch'edda avaria cunchjusu chì u schelatru d'Atacama hè un fetu. 'Ssa radioluga ùn avendu mai cunfirmatu 'ssi fatti, nè publicatu annantu à u schelatru d'Atacama, 'ssi assirzioni sò da cunsidarà com'è rumori infundata.
Un prima studiu rializatu à l'università di u Paesi bascu avia cunchjusu à un fetu mummificatu. U Dr Francisco Etxeberria Gabilondo, prufissori di medicina ligali à l'università di u Paesi bascu (Universidad del País Vasco), era assistutu di un spicialistu in antrupulugia di l'università di Madrid. Cunchjudi : "In l'insemu, i prupurzioni di a struttura anatomica, u liveddu di sviluppu di ognunu di i so ossa è a so cunfigurazioni macruscopica ci parmettini di pinsà senza l'ombra di un dubbitu ch'eddu si tratta di un fetu umanu mummificatu, annosu di circa quindici sittimani."
A ghjurnalista Caroline Alexander hà fattu, in u 1994, un'inchiesta annantu à i corpi ristrittiti. Hà intesu parlà di l'esistenza di corpi ristrittiti in China ma ùn ni hà micca truvatu traccia.
This article uses material from the Wikipedia Corsu article Schelatru d'Atacama, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contenuto è disponibile in base alla licenza CC BY-SA 4.0, se non diversamente specificato. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Corsu (DUHOCTRUNGQUOC.VN) is an independent company and has no affiliation with Wiki Foundation.