وتارە ئاڵۆزەکان ئاسان بکە بۆ تێگەیشتن
ناوەڕۆکی وتارەکان و نووسینەوەکان پێویستە بە سادەیی، لە ھەمان کاتدا پێشکەوتوو، بنووسرێنەوە و تێگەیشتن لێیان بۆ ھەمووان ئاسان بێت.
 | ئەم پەڕەیە ڕێسایەکی ویکیپیدیای کوردیی ناوەندی دەخاتە ڕوو. ئەم پەڕەیە ستانداردێکی پەسەندکراوە و پێشبینی لە ھەموو بەکارھێنەران دەکرێت کە گوێڕایەڵی بن. لەوانەیە ھەندێکجار بۆ باشترکردنی ویکیپیدیا پەسەند بکرێت کە یەکێک لەم ڕێنماییانە پشتگوێ بخرێت. ھەر جۆرە دەستکارییەک لەم پەڕەیەدا بکرێت پێویستە لەسەر یەکدەنگی ئەنجام درابێت. ئەگەر گومانێکت ھەیە، لەسەر پەڕەی وتووێژ باسی بکە. |
 | ئەم پەڕەیە بە کورتی: ھەوڵ بدە بە شێوەیەکی پرۆفیشناڵ بنووسیت و لە ھەمان کاتیشدا ھەموو بەشەکانی وتارەکان ئاسان بکەیت بۆ تێگەیشتن. لەکاتی نووسینەوە ئەوەت لەبیر بێت کە لەوانەیە خۆت لە بابەتەکە بزانیت، بەڵام خوێنەری وتارەکە لەوانەیە ھیچی لەسەر نەزانێت و لە زۆر دەستەواژە تێنەگات. |
خوێنەرانی ویکیپیدیا ھەر کەسانی پسپۆڕ نین و زۆرێک لە کەسانی ئاسایی ڕوو لە ویکیپیدیا دەکەن بۆ تێگەیشتن لە بابەتە ئاڵۆزەکان. لەکاتی نووسینەوەی وتار لە ویکیپیدیا، پێویستە بالانسی نێوان فەرمییەتی و ئاسانبوون ڕابگیرێت. وتارەکانی ویکیپیدیا ھەموو دەبێت بە شێوەیەکی پێشکەوتوو و زانستنامەییانە بنووسرێنەوە، لە ئاسانکاریی بۆ تێگەیشتن مەبەست لە دەرچوون لە زانستیبوون نییە بەڵکو کەمکردنەوەی بەکارھێنانی زمانی ئاڵۆز و تەکنیکییە.
خوێنەران
ویکیپیدیا وێبگەیەکە کە خوێنەری بە تەمەن و ئاستی جیاواز ھەیە. زۆرێک لە خوێنەران ھیچ زانیارییەکیان لەسەر بابەتەکە نییە بۆیە ڕوو دەکەنە ویکیپیدیا تا شارەزای ببن، ھەندێکی تریش بە ئاستێکی مامناوەند زانیارییان ھەیە و دەیانەوێت زیاتر بزانن، زۆرێکی تریش کەسانی پێشکەوتوون و پسپۆڕن لە بابەتی وتارەکە، بەڵام سەردانی ویکیپیدیا دەکەن تا بزانن لە ویکیپیدیا چۆن بابەتەکە باس کراوە، یانیش بۆ پەرەپێدانی. خوێنەرانی گشتی ویکیپیدیا دەکەونە نێوان، یان ڕێک، کۆمەڵەی یەکەم و دووەمەوە. یان ھیچ زانیارییەک لەسەر بابەتەکە نازانن یانیش بە ئاستی مامناوەند زانیارییان لایە، ھەشە دەکەوێتە نێوان ئەو دووانەوە؛ ھەر بۆیە دەبێت وتارەکان بە شێوەیەک بنووسرێنەوە کە ئەم دوو کۆمەڵەیە بە گشتی بە ئاسانی لێیان تێ بگەن و لە ڕاددە بەدەر ئاڵۆز و ورد نەبن.
This article uses material from the Wikipedia Soranî / کوردی article ویکیپیدیا:وتارە ئاڵۆزەکان ئاسان بکە بۆ تێگەیشتن, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ناوەرۆک لەبەردەستە لەژێر CC BY-SA 4.0دا، مەگەر پێچەوانەی وترابێ. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Soranî / کوردی (DUHOCTRUNGQUOC.VN) is an independent company and has no affiliation with Wiki Foundation.