ئێڤەنێسنس: گرووپێکی مۆسیقیی ئەمریکی

  ئەم وتارە سەبارەت بە گرووپی ڕۆکی ئێڤەنێسنس نووسراوە. بۆ بینینی وتارە هاوشێوەکان بڕوانە ئێڤەنێسنس (ڕوونکردنەوە).

دوای تۆمارکردنی چەند ئەلبومێکی سەربەخۆ گرووپەکە یەکەم ئەلبومی درێژخایەنی ستودیۆیان بڵاوکردەوە بەناوی کەوتوو لە ڕێگەی تۆمارەکانی وایند-ئەپەوە. کەوتوو زیاتر لە ١٧ میلیۆن کۆپی لێ فرۆشرا لە جیھاندا یارمەتی گرووپەکەشی دا بۆ بردنەوەی ٢ خەڵاتی گرامی لە کۆی ٧ جار کاندیداکردن و ھەروەھا بەدەست ھێنانی ژمارە ٦ی باشترین ئەلبومە فرۆشراوەکانی ١٠ ساڵی ڕابردووی سی بی ئێس. دوای ساڵێک ئێڤەنێسنس یەکەم ئەلبومی ڕاستەوخۆی بڵاوکردەوە بەناوی ھەرشوێنێک جگە لە ماڵەوە، کە زیاتر لە ١ میلیۆن کۆپی لێ فرۆشرا لە ھەموو جیھاندا. لە ٢٠٠٦دا گرووپەکە دووەم ئەلبومی ستودیۆی بڵاوکردەوە بەناوی دەرگا کراوەکە، کە زیاتر لە ٥ ملیۆنی لێ فرۆشرا.

ئێڤەنێسنس
ئێڤەنێسنس لە ٢٠١٥. ڕاست بۆ چەپ: ویڵ ھەنت، ترۆی مەکلاوەرن، ئەیمی لی، تیم مەککۆرد و جێن ماجورا
زانیاریی پشتێنە
چەشن	ھارد ڕۆک، ئاڵتەرنەتڤ مێتاڵ، گۆتیک مێتاڵ
ساڵانی چالاکبوون	١٩٩٥ (1995)–ئێستا
کۆمپانیاکانی تۆمارکردن	وایند-ئەپ کۆنکۆرد بایسیکڵ
وێبگە	www.evanescence.com
ئەندامان	ئەیمی لی جێن ماجورا تیم مەککۆرد ویڵ ھەنت ترۆی مەکلاوەرن
ئەندامانی پێشوو	بێن موودی دەیڤد ھاجێز ڕاکی گرەی جان لێکامت ویڵ بۆید تێری باڵسامۆ

گرووپەکە چەندجارێک گۆڕانکاری بەسەردا ھاتووە: دەیڤد ھاجێز لە ٢٠٠٢دا گرووپەکەی بەجێھێشت و دۆزەرەوەی گرووپ بێن موودی لە ٢٠٠٣ (لە نیوەی گەشتەکەی کەوتوو دا)، بەیسژەن ویڵ بۆید لە ٢٠٠٦ و بەدوایدا جان لێکامت و ڕاکی گرەی لە ٢٠٠٧دا و تێری باڵسامۆ لە ٢٠١٥، لە ئەنجامدا ھیچ کامێک لە سێ ئەلبومەکانی ستودیۆی ئێڤەنێسنس ھەمان ئەندامانی لەخۆ نەگرتووە، کۆتا دوو گۆڕانکاری بووە ھۆی وچانێکی درێژخایەن بۆ گرووپەکە. بیلبۆرد پلەی حەفتا و یەکەمینی بە ئێڤەنێسنس داوە لە لیستی باشترین ھونەرمەندانی دەیە.

ئێڤەنێسنس دواتر بە سێھەم ئەلبومیانەوە کە سەرکەوتنێکی گەورەی بەدەست ھێنا، لەگەڵ نوێترین لاین-ئەپی گرووپەکە دەرکەوتنەوە، ئەلبومی ئێڤەنێسنس کە سێھەم ئەلبومی ستودیۆی گرووپەکەیە و بە ناوی گرووپەکەوە ناو نراوە لەبەر «خۆشەویستی ئەیمی لی بۆ ئێڤەنێسنس.» کە لە ١١ی تشرینی یەکەمی ٢٠١١ بڵاوکرایەوە. ئەلبومەکە ژمارە ١ی بەدەست ھێنا لە بیلبۆرد ٢٠٠ بە ١٢٧٬٠٠٠ فرۆشەوە ھەروەھا لە ژمارە ١ی چوار لە چارتەکانی تریش مایەوە وەک: دە ڕۆک ئەلبومز، دیجیتاڵ ئەلبومز، ئاڵتەرنەیتڤ ئەلبومز و ھارد ڕۆک ئەلبومز. گرووپەکە ساڵی ٢٠١٢یان بەڕێکرد بە گەشتەکەیان بۆ ئەلبومەکە لە پەنا چەند ھونەرمەند و گرووپێکی تریشدا وەک دە پریتی ڕێکلێس و فەیر تو میدلاند. ھەر لە ھەمان ساڵدا ترۆی مەکلاوەرن وەک ئەندامێکی فەرمی گەڕایەوە بۆ ناو گرووپەکە. دوای کۆتایی ھاتنی گەشتی ئەلبومەکە، گرووپەکە دووبارە بۆ ماوەیەکی درێژخایەن لە گوێگرەکانیان دابڕان.

لە ساڵی ٢٠١٥ گرووپەکە وای بڵاوکردەوە کە پشووەکەیان کۆتایی پێھاتووە و دووبارە دەستدەکەنەوە بە گەشتکردن، لە ھەمان کاتیشدا، ئەوان بڵاوکردنەوەی ئەلبوم و کاری نوێیان ڕەتکردەوە چونکە ئەیمی لی خەریکی بەرھەمێکی تەنیایی بوو، بەڵام لە چاوپێکەوتنێکی لاودوایەر گوێگرەکانی دڵنیا کردەوە کە «ئێڤەنێسنس لە داھاتوودا ھەیە.» ھەر لە ھەمان ساڵدا بڵاوکرایەوە کە تێری باڵسامۆ کە ئەندامێکی فەرمی ئێڤەنێسنس و یارمەتیدەری نووسینی ئەیمی لی بووە لە ساڵی ٢٠٠٣ەوە، گرووپەکەی بەجێھێشتووە و جێن ماجورا جێی گرتۆتەوە. لە ئازاری ٢٠١٧دا، لی وتی کە ئێڤەنێسنس کار لەسەر ئەلبومی چوارەمی گرووپەکە دەکات و وتیشی لە ھەمان ساڵدا بڵاو دەبێتەوە.

١٩٩٥–٢٠٠١: دامەزران و ساڵانی پێشوو

 

ئێڤەنێسنس لە لایەن گۆرانیبێژ و پیانۆژەن ئەیمی لی وە گۆرانیبێژ و گیتارژەنی پێشوو بێن موودی دامەزراوە. ئەو دووانە لە ساڵی ١٩٩٤ یەکتریان ناسی لە کامپێکی گەنجان لە لیتل ڕاک، کاتێک کە موودی گوێی لە لی بوو گۆرانی «ئەتوانم ھەمووشتێک بکەم بۆ خۆشەویستی» دەوت لەسەر پیانۆکەی. یەکەم گۆرانیان پێکەوە ناوی «تەنیایی» و «پێمی ببەخشە» بوون و ھەردووکیان نووسراوی دەستی لی بوون، وە «تێگەیشتن» و «نەمرەکەم» ھەردووکیان نووسراوی دەستی موودی بوون و ھەردووکیان گۆڕانکاریان تێداکردوون. دوو گۆرانییان لەسەر ڕادیۆی ناوخۆ پەخشکرا و خەڵکی دەستیانکرد بە ناسینیان و ھەردووکیان بیریان لە کۆنسێرتێک کردەوە، دوای ماوەیەک گرووپەکە کۆنسێرتێکی ڕاستەوخۆیان ئەنجامدا و بوون بە بەناوبانگترین گرووپ لەو ناوچەیە.

دوای ھەڵسەنگاندنی ناو وەکو: «خواستی منداڵانە» و «بریندارکراو» گرووپەکە ئێڤەنێسنسی ھەڵبژارد کە بە مانای کاڵ بوونەوە یاخود ون بوون دێت. (لە وشەی ئێڤەنێسی زمانی لاتینی وەرگیراوە کە بە مانای ون بوون یاخود نەمان دێت). گرووپەکە دوو تۆمارکراوی درێژخایەنیان بڵاو کردەوە یەکەمیان بە ناوی گرووپەکەوەیە «ئێڤەنێسنس» کە لە ساڵی ١٩٩٨بڵاو کرایەوە کە نزیکەی ١٠٠ کۆپی لێ درووستکرا و لە کۆنسێرتەکاندا دابەشکرا و دووەم تۆمارکراوی درێژخایەنیش بە ناوی «لە خەوتوو دەچێت» و بە «چرپە» ناسراوە لە ساڵی ١٩٩٩ بڵاو کرایەوە وە ھەروەھا تۆمارکراوێکی درێژخایەنی تریشیان ھەبوو کە ناسرابوو بە میستری کە لە ساڵی ٢٠٠٣ بڵاو کرایەوە لە ئەلبومی ئۆریجن کە ٢٫٥٠٠ کۆپی لێ فرۆشرا. لە چاوپێکەوتنێکی سەر ڕادیۆدا، موودی و لی ھانی گوێگرەکانیاندا کە گۆرانییە کۆنەکانیان لە ئینتەرنێتەوە دابگرن.

٢٠٠٢–٢٠٠٥: کەوتوو و ھەرشوێنێک جگە لە ماڵەوە

یەکەم چاوپێکەوتنیان لەگەڵ کۆمپانیاکان لەگەڵ ئاردین ستودیۆس بوو لە مێمفیس و زۆریش بە دڵیان بوون. دەرھێنەر پیت ماتیوس ھەندێک لە گۆرانییەکانی بۆ ھاوڕێکەی، دیانا مێڵتزەر لێدا لە وایند-ئەپ ڕیکۆردز. کاتێک کە گوێی لە گۆرانی نەمرەکەم بوو، گرووپەکە سەرنجی ڕاکێشا و بوو بە سپۆنسەریان و وتیشی کە ئەو دەیزانی کە «سەرکەوتنی گەورە بەدەست دێنێت» نووسەرەکانی وایند-ئەپ ڕیکۆردز ھەرچەندە کە وتیان ئەندامانی گرووپەکە جیاواز و بەھرەمەندن، بەڵام ھەر پێیان وابوو ھێشتا گەنجن و دەبێت وانەیان پێ بگوترێتەوە، وتیشیان کە «ئەگەر کات و ھەلیان بدرێتێ، ئەوا دەتوانن دەنگێکی سەرسامکەریان ھەبێت» کاتێک کە گرووپەکە گرێبەستیان کرد لەگەڵ کۆمپانیاکە، نێردرانەوە بۆ لۆس ئانجلۆس و باڵەخانەیەکیان پێ درا، بۆ ئەوەی بتوانن لەوێ کاروباری خۆیان بەڕێوە ببەن. لەوێ لی وانەی نواندن و ڕێکیی دەنگی خوێند. دوای نزیکەی دوو ساڵ دەرھێنەر دەیڤ فۆرتمن بە کرێ گیرا بۆ دەرھێنانی یەکەم ئەلبومیان بە ناوی کەوتوو لە سەرەتادا کۆمپانیای بڵاوکردنەوەکە ڕەتیکردەوە کە ئەلبوومەکە بڵاوبکەنەوە مەگەر ئەوەی گۆرانیبێژێکی نێرینە زیادبکەن بۆ گرووپەکە، ئەیمی لی لە پۆستێکدا ڕایگەیاند «ئەوان دەیانویست بە من بڵێن کە تۆ تەنھا کچی ئەم جۆرە گۆرانیانە بڵێت، کەس گوێت لێ ناگرێت بە تەنھا دەبێت گۆرانیبێژێکی نێرینە ھەبێت لە ئەلبومەکە.» کاتێک کە گرووپەکە بەم مەرجە ڕازی نەبوون، بەڕێوەبەرانی کۆمپانیاکە دەستیان ھەڵگرت لە داواکارییەکەیان، بەڵام ھێشتاش سوور بوون لەسەر ھەبوونی گۆرانیبێژێکی نێرینە لە تاکی ئەلبومەکە بمھێنە بۆ ژیان. ھەرچەندە لی ئەمەشی پێ خۆش نەبوو بەڵام ھەر ڕازی بوو.

دواتر لە ساڵی ٢٠٠٣ ئەندامانی گرووپەکە پێکھاتبوون لە ئەیمی لی و بێن موودی ھاوڕێکانی جان لێکامت، ڕاکی گرەی و ویڵ بۆید کە ھەموویان کاریان لەسەر گۆرانییەکانی پێشوویان کردبوو. کاتێک گرووپەکە خەریکی ڕێکخستن و چاککردنی ئەلبومەکە بوون ئۆفەرێکیان بەدەست ھێنا لە لایەن کۆمپانیا نینتێندۆ بۆ ئەوەی ھەندێک لە گۆرانییەکانیان پەخش بکەن لە «نینتێندۆ فیوژن تور» بە خۆشحاڵییەوە ئۆفەرەکەیان وەرگرت و لە ساڵی ٢٠٠٣ نینتێندۆ کۆنسێرتێکی بۆ کردن.

ئەلبومی کەوتوو ٤٣ ھەفتە لە چارتەکانی ١٠ باشترین ئەلبوم مایەوە، ٧ بڕاوانامەی پلاتینەمی پێبەخشرا لە ویلایەتە یەکگرتووەکان و زیاتر لە ١٧ میلیۆن کۆپی لێ فرۆشرا لە جیھاندا. ئەلبومەکە دوای ئەوەی لە ١٠ باشترین ئەلبوم نەما، بۆماوەی ١٠٤ ھەفتە لە (٢٠٠ باشترین ئەلبوم) مایەوە. وە یەکێک لەو ٨ ئەلبومانە بوو کە بۆ ماوەی ساڵێک لەسەر چارتی (٥٠ باشترین ئەلبوم) مایەوە.

لە ٢٢ی تشرینی یەکەمی ساڵی ٢٠٠٣ بێن موودی گرووپەکەی بەجێھێشت، وەک و لی و موودی دەڵێن بەھۆی جیاوازی ھونەرییەوە بووە. لە کاتی چاوپێکەوتنێک دا دوای چەند مانگێک لی وتی «ئێمە گەشتین بە بڕیارێک ئەگەر شتێکمان نەگۆڕیایە، نەمان دەتوانی ئەلبومێکی دیکە بکەین» ئەمە یەکسەر بووبە دوودڵییەک لە نێوان گوێگرەکانی ئێڤەنێسنس چونکە موودی و لی لە ئەلبومی کەوتوو گوتویانە کە ئەوان باشترین و نزیکترین ھاوڕێن. لی وتی کە ئەوە شتێکی باش بوو کە ئەو ڕۆیشت لەبەر ئەو گرژییەی لە گرووپەکەدا دروست ببوو. لە چاوپێکەوتنێکی تردا، لی وتی «نازانم، من چاوەڕێی ئەمەم دەکرد، ئەو کەسێکە کە ئارەزووی لە ناوبانگ و ناودارییە و من وا نەبووم، من ئارەزوم دەکرد شتێک بکەین کە جیاواز بێت و ئەویش دەیەویست ئەوە بکات کە خەڵکی حەزیان لێیە گوێیان لێبێت، بۆیە ئەوە بەشێکی زۆری ھۆکاری ئەوەی کە ئێستە نووسین زۆر خۆشترە ئەوەیە کە بیر لەو شتانە ناکەینەوە، کارەکان زۆرتر دەربارەی ئەوەن کە 'حەزمان لە چییە؟'، 'چی خۆشە؟' و 'دەمانەوێت چی بکەین کە جیاواز بێت؟'» تێری باڵسامۆ ئەندامی پێشووی «کۆڵد» جێی موودی گرتەوە.

تاکی ئێڤەنێسنس «بمھێنە بۆ ژیان» بە یارمەتی گۆرانیبێژ پۆڵ مەککۆی ئەندامی «١٢ ستۆنس» یەکێک بوو لە سەرکەوتووترین گۆرانی گرووپەکە لە ھەموو جیھاندا، توانی بگاتە ژمارە ٥ لە بیلبۆردی (باشترین ١٠٠ گۆرانی).

لە بەریتانیا بۆ ماوەی مانگێک پلەی پێنجەمی بەرکەوت و بووبە ساوندتراکی فەرمیی دەبلیوو دەبلیوو ئی: ڕێگای چوونەدەرەوە نییە لە ساڵی ٢٠٠٣. یەکێکی تر لە ھەرە بەناوبانگترین تراکی ناو ئەلبومەکە نەمرەکەم بوو کە چووە ژمارە حەوتی باشترین ١٠ گۆرانی لە بەریتانیا و ویلایەتە یەکگرتووەکان وە ھەردوو گۆرانییەکە لە فیلمی «دەیردێڤڵ» بەدی دەکرێن. «بمھێنە بۆ ژیان» ئەو تراکە بوو کە بووە ھۆی بردنەوەی «باشترین نواندنی ڕۆک» و ھەروەھا بردنەوەی باشترین ھونەرمەندی نوێ لەلایەن باندەکەوە. دوو تاکەگۆرانییەکەی تری ئەلبومی کەوتوو بریتین لە ژێرکەوتن کە لە ژمارە ٥ی بیلبۆردی باشترین ١٠ گۆرانی بەریتانیا بوو وە دەبەنگی ھەمووان لە ژمارە ٣٦ی «ڕۆکی مۆدێرنی ویلایەتە یەکگرتووەکان» مایەوە. ئەلبومی کەوتوو لە ژمارە ٦ی باشترین فرۆشراوی ١٠ ساڵی ڕابردووە.

لە ساڵی ٢٠٠٤، ئێڤەنێسنس ئەلبومێکی نوێی بڵاوکردەوە بە ناوی ھەرشوێنێک جگە لە ماڵەوە کە کۆنسێرتەکانی پاریسی تێدابوو ھەروەھا ڤیدیۆی پشت کامێراشی تێدا بڵاوکرابۆوە کە پێک ھاتبوو لە مەشق کردنی گرووپەکە پێش کۆنسێرتەکە و چاوپێکەوتنی گرووپەکە لەگەڵ گوێگرەکانیان؛ و ھەر لە ھەمان ئەلبوم لی کەڤەرێکی بۆ گۆرانی «بێ باک» کرد کە تایبەت بوو بە گرووپی ڕۆکی کۆرن.

٢٠٠٦–٢٠٠٩: دەرگا کراوەکە

یەکێک لە ئەندامی کۆمپانیاکە ١٤ی تەممووزی ساڵی ٢٠٠٦ وای بڵاو کردەوە کە ویڵ بۆید گرووپەکەی بەجێھێشتووە لەبەر ئەوەی نەیویستووە کە «گەشتێکی گەورەی تر بکات» و ئارەزووی کردووە «لە خێزانەکەیەوە نزیک بێت.» دواتر ئەیمی لی خۆی پۆستێکی کرد بۆ ئەوەی بە گوێگرەکانی بڵێت لە ماڵپەڕێکی نا فەرمی ئێڤەنێسنس. لەکاتی چاوپێکەوتنێکی لەگەڵ MTV ئەیمی لی ڕایگەیاند کە تیم مەککۆرد ئێستە جێی ویڵ بۆید ئەگرێتەوەو بەیس لێدەدات، ھەر دواتریش لە ١٠ی ئابی ساڵی ٢٠٠٦ لە ماڵپەڕەکەی خۆیاندا بڵاوی کردەوە.

 

ئەلبومەکە لەبەر چەند ھۆیەک دواخرا، یەکێک لە سەرەکیترین ھۆکارەکان ئەیمی لی بوو کە ئارەزووی نەکرد پەلە بکات و گۆڕانکاری ھونەری تێدا ئەنجام بدات، ھۆکارەکانی تریش ئەوەبوون کە گیتارژەن تێری باڵسامۆ تووشی سەکتە ببوو، ھەروەھا بەڕێوەبەرەکەی پێشویان^[کێ؟] لەدەستدا. ھەرچەندە ئەیمی لی لە بڵاوکراوەیەکدا وتی کە ئەلبومەکە لە مارتی ٢٠٠٦ تەواو دەبێت، بەڵام دواخرا لەبەر ئەوەی کۆمپانیای تۆمارەکانی وایند-ئەپ ویستی گۆڕانکارییەک لە تاکی ئەلبومەکە بکات کاتێک بانگم بکە کە بە ھۆشیت کە لە ھەردوو ڕادیۆی ڕۆکی مۆدێرن و ڕۆکی جۆراوجۆر لە ٧ی ئابی ساڵی ٢٠٠٦ پەخش کرا. ئەلبومەکە لە ١٣ تراک پێکھاتووە و بەناوی دەرگا کراوەکە، کاتێک لە ئەیمی لیان پرسی بۆچی ئەو ناوەی ھەڵبژاردووە لە چاوپێکەوتنێکدا وتی «لەبەر ئەوەی لە ساڵی ٢٠٠٦ لە کاتی دروست کردنی ئەلبومەکە، زۆر دەرگای نوێ کرایەوە لە ژیانم دا، ئەوەش ھۆکاری سەرەکییە» ئەلبومەکە لە کەنەدا و ویلایەتە یەکگرتووەکان بڵاو بۆوە لە ٣ی تشرینی یەکەمی ساڵی ٢٠٠٦، لە بەریتانیا لە ٢ی تشرینی یەکەمی ساڵی ٢٠٠٦ لە ئوسترالیاش لە ٣٠ی ئەیلولی ساڵی ٢٠٠٦ بڵاو بۆوە. ئەلبومەکە ٤٤٧٬٠٠٠ لێ فرۆشرا لە ویلایەتە یەکگرتووەکان لە یەکەم ھەفتەدا، وە چووە ژمارە یەکی باشترین ٢٠٠ ئەلبومەکانەوە، وە بوبە ٧٠٠ھەمین ئەلبووم کە بچێتە ژمارە یەکی چارتەکە لە ساڵی ١٩٥٦ وە.

کلیپی گۆرانییەکی «کاتێک بانگم بکە کە بە ھۆشیت» لە لۆس ئەنجیلس گیراوە کە ئەیمی لی تێیدا ڕۆڵی «کڵاو سور» دەبینێت، ئەلبومەکە لە ئایتیوونز بڵاو بۆوە ھەر لە ساڵی ٢٠٠٦.

کۆنسێرتی ئەلبومەکە دەستی پێکرد لە ٥ی تشرینی یەکەمی ساڵی ٢٠٠٦، کە سەردانی باکوری ئەمەریکاو ئەوروپایان کرد، بەردەوام بوون لە سەردانی وڵاتەکان بەتایبەتی جاپان و سیدنی، کۆنسێرتی «دەرگا کراوەکە» بەردەوام بوو تاکو ٥ی کانونی دووەمی ساڵی ٢٠٠٧.

لە ٤ی ئایاری ساڵی ٢٠٠٧ جان لێکامت ڕایگەیاند کە لە گرووپەکە دەرکراوە، وە وتیشی کە دوای ڕۆیشتنی ئەو ڕاکی گرەییش وازی لە گرووپەکە ھێناوە. دواتر کۆمپانیای تۆمارەکانی وایند-ئەپ لە ٢٧ی ئایاری ساڵی ٢٠٠٧ ڕایگەیاند کە دوو ئەندامی نوێ بشداری گرووپەکەیان کردووە بە ناوی ویڵ ھەنت و ترۆی مەکلاوەرن. وا گوترابوو کە ھەنت و مەکلاوەرن ھەتاکو کۆتای گەشتی فامیلی ڤالیوز لەگەڵ ئێڤەنێسنس دەبن، بەڵام ھەردووکیان تاکو کۆتای گەشتی دەرگا کراوەکە مانەوە.

٢٠٠٩–٢٠١٥: ئێڤەنێسنس و پشووەکەیان

 

لە مانگی حوزەیرانی ساڵی ٢٠٠٩ ئەیمی لی لە بڵاو کراوەیەکدا ڕایگەیاند کە ئەوان خەریکی نووسینی گۆرانی نوێن بۆ ئەوەی لە ساڵی ٢٠١٠ بڵاوی بکەنەوە، وتیشی کە ئەم ئەلبومەیان تایبەت دەبێت «باشترو بەھێزترو سەرنج ڕاکێشتر ئەبێت» ئێڤەنێسنس کۆنسێرتێکیان کرد لە مانھەتانی نیویۆرک لە مانھەتان سێنتەر گراند باڵڕوم لە ٢٠٠٩ لەگەڵ گرووپی «سیڤیڵ توایلایت.» پسوڵەکان لەماوەی پێنج خولەکدا فرۆشران. وەک ڕاھێنانێک وابوو بۆ کۆنسێرتە گەورەکەیان لە فێستیڤاڵی ماکویناریا لە ساۆ پاولای بەڕازیل.

ئێڤەنێسنس گەڕانەوە ناو ستودیۆ لە ٢٢ی شوباتی ٢٠١٠ بۆ تۆمار کردنی ئەلبومەکە. دواتر ویڵ ھەنت گەڕایەوە بۆ گرووپەکەو چێلۆژەن دەیڤد کامبڵیش کە پێشتر لە ئەلبومی «دەرگا کراوەکە» دا کاری کردبوو گەڕایەوە. ڕۆژی بڵاو کردنەوەکەی لە لایەن دەرھێنەر ستیڤ لیڵیوایت دیاری کرا، دواتر ئەیمی لی وتی کە «ئەو کەسێکی باش نەبوو بۆ ئەم کارە» بۆیە نیک ڕاسکیولونێکس جێی گرتەوە.

ئەوکاتەی کە گرووپەکە خەریکی تۆمارکردنی ئەلبومەکە بوون بڕیار وابوو کە لە ئاب یاخود ئەیلولی ٢٠١٠ بڵاوبکرێتەوە بەڵام لە ٢١ی حوزەیرانی ساڵی ٢٠١٠ ئەیمی لی لە ماڵپەڕێکی نا فەرمی ئێڤەنێسنس بڵاویکردەوە کە بۆ ماوەیەکی کاتیی ستودیۆیان بەجێ ھێشتووە بۆ ئەوەی کاری زیاتر لەسەر ئەلبومەکە بکەن. ھەروەھا ئاماژەی بەوەش کرد کە کۆمپانیای تۆمارەکانی وایند-ئەپ بە «ھەندێک کاتی سەخت دا» تێپەڕ بوون ئەمەش دەبێتە ھۆی دواخستنی ئەلبومەکە. گرووپەکە دەستیان بە تۆمارکردن کردەوە لە مانگی نیسانی ٢٠١١، گرووپەکە ئەوەشی ئاشکرا کرد کە ئەلبومەکە لە مانگێکی ساڵی ٢٠١١ بڵاودەکرێتەوە بەڵام «ھێشتا دیاری نەکراوە.»

دواتر لە ١٢ی حوزەیرانی ساڵی ٢٠١١ ئەیمی لی لەسەر تویتەرەکەی بڵاوی کردەوە کە ڕۆژی بڵاوبوونەوەی ئەلبومەکە ١١ی تشرینی یەکەمی ٢٠١١ دەبێت. وە یەکەم تاکی ئەلبومەکە ناوی چیت دەوێت دەبێت. ئەلبومەکە لە «بلاکبێرد ستودیۆ» تۆمار کراوە لە ناشڤیڵ لە کاتی چاوپێکەوتنێکی ئەیمی لی لەسەر کەناڵی!Karreng ئەیمی لی وتی کە ناوی ئەلبومەکە بە ناوی گرووپەکەوە خۆی ئەندرێت ئێڤەنێسنس وتیشی ئەم ناوەی بۆیە ھەڵبژاردووە لەبەر خۆشەویستییەکەی بۆ ئێڤەنێسنس. وە ھەروەھا زۆرێک لە ئەندامانی گرووپەکە بەشدار بوون لە نووسینی گۆرانییەکان، کە پێشتر ئەمە ڕووی نەداوە، ئەوەش ھۆکارێکی تر بوو. دەڵێت «ئەمە یەکەم جارە شتێکی وا ببێت، من پێشتر زۆر لەم شتە ئەترسام، بەڵام لە کۆتایدا ئەلبومێکی زۆر نایاب دەرچوو وە زۆریش بەدڵم بوو» چەند ناوێکی تریشی ھەیە وەک زی ئۆشنس، کوێست فۆر فریدۆم و فۆڵین ئین ڵۆڤ.

 

گەشتەکەی ئەلبومی ئێڤەنێسنس لە ١٧ی ئابی ٢٠١١ دەستی پێکرد، یەکەم کۆنسێرتیان لە «وار مێمۆریال ئۆدیتۆریوم» بوو لە ناشڤێڵ. دواتر گرووپەکە لە «ڕۆک ئۆن دە ڕانج» ی وینپینگ دووەم کۆنسێرتیان کرد لە ٢٠ی ئابی ٢٠١١، بەدوایدا لە «ڕۆک ئین ڕێۆ» لە ٢ی تشرینی یەکەم. دوای چەند کۆنسێرتێکی ئێڤەنێسنس لە باکووری ئەمریکا، ئەوان گەشتێکیان کرد بۆ ئەورووپا و سەردانی پاریس، ئەڵمانیا و بەریتانیایان کرد بۆ چەند کۆنسێرتێک. ئێڤەنێسنس کۆنسێرتێکیان کرد لە «نۆبڵ پییس پڕایز کۆنسێرت» دوو لە گۆرانییەکانیان پێشکەش کرد کە بریتی بوون لە «بمھێنە بۆ ژیان» و «لە بەھەشتدا ون بووم.»

ئێڤەنێسنس گەشتەکەیان وەستاند بۆ ئەوەی بەشداری لە گەشتی کارنیڤاڵ ئۆف مادنس بکەن لەپاڵ ھونەرمەندەکانی وەک ھەیڵستۆرم، کاڤۆ، نو مێدێسن و شیڤێڵ. ئەم گەشتە لە ٣١ی تەممووزی ٢٠١٢ دەستی پێکرد لە سپرینگفیڵدی ئیڵینۆی و بەردەوام بوو تاکو ٢ی ئەیلولی ٢٠١٢، کۆتایی پێ ھات لە بەفەڵۆی نیویۆرک. گەشتەکەی ئێڤەنێسنس دەستی پێکردەوە لە تشرینی یەکەمی ٢٠١٢ لەگەڵ چەند وەستانێکدا لە باشووری ئەمریکا، کۆستاریکا و پاناما. گەشتەکە لە ٩ی لە تشرینی دووەمی ٢٠١٢ کۆتایی پێھات لە لەندەن لە مەیدانی '«وێمبڵێی.» لی ڕایگەیاند کە پلانی گرووپەکە ئەوە بوو کە پشویەکەی درێژخایەن بدات دوای گەشتەکە، وتی «لە کۆتایی گەشتێکی دوورو درێژ پێویستە بێیتەوە سەرخۆت. پێم وایە دوای گەشتەکە پشویەک دەدەین و بیر لە ھەمووشتێک دەکەینەوە.»

لە تشرینی یەکەمی ٢٠١٣، تۆمارەکانی وایند-ئەپ بەشێک لە کەتەلۆکی ھونەرمەندەکانی فرۆشت، کە ئێڤەنێسنس و تۆمارکراوەکانیانیشی لەخۆ گرتبوو، بە کۆمپانیای بایسیکیل میوزیک لە ٣ی حوزەیرانی ساڵی ٢٠١٤ بڵاو بۆوە کە ئەیمی لی سکاڵای لەسەر تۆمارەکانی وایند-ئەپ تۆمار کردووە بەھۆی ئەوەی کە ١٫٥ میلیۆن دۆلاری گرووپەکە قەرزارە. لە ئازاری ساڵی ٢٠١٤ بە تویتەرەکەی بڵاوی کردەوە کە تۆمارەکانی وایند-ئەپ چیتر کۆمپانیای تۆمارکردنی ئەوان نییەو ئێستا ئەوان سەربەخۆن.

٢٠١٥–ئێستا: گەڕانەوە و پرۆژەی سینتسز

 

لە ٢٧ی نیسانی ٢٠١٥ بڵاوکرایەوە کە ئێڤەنێسنس کۆنسێرتێکیان لە ئۆزفێستی جاپان کردووە، کە یەکەم کۆنسێرتیان بووە لەکاتی پشووەکەیانەوە. لە ٧ی ئابی ھەمان ساڵ، لی بڵاوی کردەوە کە گیتارژەن تێری باڵسامۆ گرووپەکەی بەجێ ھێشتووەو ئێستا گیتارژەن و گۆرانی بێژی ئەڵمانی جێن ماجورا جێی گرتۆتەوە. لە تشرینی یەکەمی ٢٠١٥، لی لە چاوپێکەوتنێکدا وتی کە ئێڤەنێسنس لە ٢٠١٦دا بەردەوام دەبێت لە کۆنسێرت کردن بەڵام لەڕووی تۆمارکردنی ئەلبومێکی نوێ، بەتەمای ئەلبومێکی سۆڵۆیەو (واتە ھەر ئەیمی لی بە تەنھا) و ئێستا بەتەمای ئەلبومێکی نوێ نییە بۆ ئێڤەنێسنس. لە کۆتایییەکانی ٢٠١٦دا، گرووپەکە چەند کۆنسێرتێکیان ئەنجامدا لە چەند شارێکی دیاریکراوی ویلایەتە یەکگرووەکان، ئەوان گرووپی ڕۆکی ڤێریدیایان ھەڵبژارد کە کۆنسێرتەکانیان بۆ بکاتەوە.

لە ١٣ی ئەیلوولی ٢٠١٦دا گرووپەکە بڵاوکردنەوەی بۆکسێکی ڤینیڵیان ڕاگەیاند بە ناوی دوایین کۆکراوە کە ھەموو ئەلبومەکانی گرووپەکەی لەخۆگرتووە کە تاکو ئێستا بڵاوکراونەتەوە بە فەرمی، ئەلبومی ئۆریجنیش یەکێکە لەوان، ھەروەھا بڵاویانکردەوە کە جارێکی تر گۆرانی «ھەتا لە مردنیشدا» دووبارە تۆمارکراوەتەوە بەشێوازێکی نوێ و بۆکسەکە بەپێی ئەیمی لی «لەگەڵ چەند وێنەیەکی نەبینراودا دێن» و «پیتی e لەسەری ھەڵکەندراوە کە لەتاریکیدا دەدرەوشێتەوە.» بەرھەمەکە لە کانوونی یەکەم ٢٠١٦دا دەخرێتە بازاڕەکانەوە.

لە ١٨ی شوباتی ٢٠١٧دا، ئەلبومی چرپە ونبووەکان لە ئایتیوونز، سپۆتفای و ئەنغامی بە فەرمی بڵاوکرایەوە.

لە ٢٠ی ئازاری ٢٠١٧دا لەکاتی چاوپێکەوتنێکدا لەگەڵ AOL لەبارەی تاکەگۆرانییە نوێکەی لی بە ناوی لەگەڵم بدوێ، ئەو لەسەر ئەو ئەلبومە نوێیە قسەی کرد کە خەریکی بەرھەمھێنانین لەگەڵ ئێڤەنێسنس، وتی: «ئێمە کار لەسەر شتێک دەکەین [...] ئەو تەنھا ئەلبومێکی دواتری ئێڤەنێسنس نییە.» باسی گۆڕانی شێوازی مۆسیقاکەی کرد. لە ٢٣ی ئازاری ھەمان ساڵ لە چاوپێکەوتنێکدا، لی وتی کە کارەکە «شتێکی دەگمەنە، شتێکی ئاڵۆزە، شتێک کەمێک لە پێش ئەوانەوە – ھەروەھا بە دڵنیایییەوە ناوچەیەکی نوێیە بۆ ھەموومان.» وا داندراوە کە ئەلبومەکە لە ڕێکەوتێکی دیاری نەکراوی ساڵی ٢٠١٧دا بڵاو بکرێتەوە.

لە بڵاوکراوەیەکی فەیسبووکدا، لی ناوی ئەلبومە نوێکەیان، کە لە پاییزی ٢٠١٧ بڵاودەکرێتەوە، ئاشکرا کرد و ناوی سینتەسز دەبێت. بەپێی لی، ئەلبومەکە پارچەیەکی ئۆرکێسترایی دەبێت کە ئامێری مۆسیقی وەک براس و پێکھاتەی ئۆرکێسترایی تر. ئەو ھەروەھا ڕوونی کردەوە کە دەیڤد کامبڵ، ئەو کەسەی کە لەسەر ھەموو ئەلبومەکانی پێشووی گرووپەکە کاری کردبوو، دەگەڕێتەوە بۆ بەشداریکردن لە پرۆژەکە بە ئاوازدانان. لی وتی کە ئەلبومەکە «ئۆرکێسترا و ئەلیکترۆنیکا» دەبێت و گرووپەکەش چەند گۆرانییەکی دیاریکراوی کارە کۆنەکانیان دیاری دەکەن، گیتاری ڕۆک و تەپڵەکانیان لێ دەکەنەوە بۆ ئەوەی ھەموویان دووبارە لەگەڵ ئۆرکێسترا بنووسرێنەوە و نمایش بکرێن و ساوندتراکێکی لێ دەردەھێنن، کە لی بە ساوندتراکی ژیانی دەبات. ئەم ئەلبومە دوو گۆرانی نوێی نەبیاتراویش لەخۆ دەگرن. ئێڤەنێسنس دەست دەکەن بە گەشت بۆ ڕێکلامکردن و نواندنی ئەلبومە نوێکەیان لە پاییزی ٢٠١٧دا لەگەڵ ئۆرکێسترایەکی تەواودا.

لی وتی کە ئەو گۆرانییەکی نووسیوەتەوە بۆ فیلمی بەناوبانگی ٢٠٠٥ مێژووی نارنیا: شێرەکە، جادووگەرەکە و دۆلابی جلەکە کە ناوی لەکرایمۆسابووە و بەڵام ڕەتکراوەتەوە بەھۆی تاریکی گۆرانییەکەوە. لی وتیشی بۆیە شتێکی باشتر بوو بیکاتە ئەلبومی دەرگا کراوەکەوە. بەڵام دەرھێنەری فیلمەکە وتی کە ئەوان نەیانزانیوە کە یەکێک لە گۆرانییەکانی ئێڤەنێسنس ھەڵبژێردراوە بۆ ساوندتراکی فیلمەکە.

لە ٢٠١٠ ئێڤەنێسنس تاکێکیان بڵاوکردەوە بەناوی «جارێکی تر پێکەوە» کە بۆ ئەلبومی «دەرگا کراوەکە» نوسرابۆوە بەڵام بڵاو نەکرابۆوە، بۆیە دواتر بە دیجیتاڵی بڵاوکرایەوە دوای بومەلەرزەکەی «ھەیتی» وەک داوای لێبوردنێک بۆ قوربانییەکانی ڕووداوەکە.

ئێڤەنێسنس بە گرووپێکی ڕۆک و مێتاڵ ناسراوە، بەڵام ھەندێک لە گرووپە ڕۆکەکان و میدیاکانی تر بە گۆتیک مێتاڵ ناویان دەبەن، مێتاڵ یاخود ڕۆکی گۆتیکی بریتییە لە جۆرێک لە مۆسیقای ڕۆک/مێتاڵ کە ناسراوە بە تاریکییەکەی و خەمبارییەکەی، زۆرێک لە ھونەرمەندانی ئەم جۆرە مۆسیقایە سوود لە ڕووداوەکانی ژیانیان وەردەگرن بۆ یارمەتیدانی گۆرانییەکانیان ھەروەک ئەیمی لی خۆی، کە لە چاوپێکەوتنێکدا وتی «من تەنھا لەکاتێکدا دەتوانم گۆرانییەکانم بنووسم کە غەمباربم، لە کاتێکدا کە دڵم خۆشبێت ھەست بەوە ناکەم کە توانای نووسینەوەی گۆرانیم ھەبێت و حەز دەکەم ڕابکەم.»

نیو یۆرک تایمز، ڕەف گاید و ڕۆڵینگ ستۆن پێناسەی ئێڤەنێسنس دەکەن وەک گۆتیک مێتاڵ، بەڵام میدیای تر وەک IGN و سپین بە گۆتیک ڕۆک ناویان دەبەن. ھەروەھا بەراوردکراون بە گرووپی نیو مێتاڵ وەک لینکین پارک و گرووپی سیمفۆنیک مێتاڵ وەک نایتویش و ویتن تێمپتەیشن ھەروەھا گرووپە مێتاڵە کۆتیکەکان وەک لاکیونا کۆیڵ لە ماڵپەڕی فەرمی ئێڤەنێسنس ئەوان ھەر بە سادەیی بە جۆری مۆسیقاکەیان دەڵێن «ڕۆک.»

ئێڤەنێسنس لە سەرەتادا لە فرۆشگا کریستیانییەکان پرۆمۆت دەکران. دواتر گرووپەکە ڕوونیان کردەوە کە ئەوان نەیان دەویست کە بەشێک بن لە کریستیان مێتاڵ و نەیاندەویست بەو چەشنە مۆسیقایە بناسرێن. تێری ھێمینگس، سی.ئی. ئۆی مۆسیقای کریستیان پرۆڤیدێنت سەریسوڕما لە بڕیاری گرووپەکە و ڕایگەیاند «ئەوان بەڕوونی تێگەیشتبوون کە مۆسیقاکان لەم کەناڵە کریستیانانەدا دەفرۆشرێن.» دوای ئەوەی زۆرێک لە فرۆشگا کریستیانەکان دەستیان ھەڵگرد لە فرۆشتنی بەرھەمەکانی ئێڤەنێسنس، بەڕێوەبەری وایند-ئەپ، ئالان مێڵتزەر کۆبوونەوەیەکی ئەنجامدا لە ساڵی ٢٠٠٣ و بە فەرمی داوای کرد کە ئەم کارە ئەنجام بدەن. لە ساڵی ٢٠٠٦دا، ئەیمی لی بە بیلبۆردی ڕاگەیاند کە ئەوان «ھەر لە سەرەتاوە دژی ئەو بڕیارە بوون کە بە 'گرووپێکی کریستیان' بناسرێن.» و «ئەوە شتێکی بێن بوو.»

• کەوتوو (٢٠٠٣)
• دەرگا کراوەکە (٢٠٠٦)
• ئێڤەنێسنس (٢٠١١)
• سینتسز (٢٠١٧)

• ماڵپەڕی فەرمی ئێڤەنێسنس
• ماڵپەڕی فەرمی ئەیمی لی ١٣ی ئەیلوولی ٢٠١٤ لە وەیبەک مەشین، ئەرشیڤ کراوە.
• ئێڤەنێسنس لە فەیسبووک
• ئێڤەنێسنس لە ئینستاگرام
• ئێڤەنێسنس لە یووتیووب

•  دەروازەی مۆسیقا
•  دەروازەی ئێڤەنێسنس
•  دەروازەی ویلایەتە یەکگرتووەکانی ئەمریکا
•  دەروازەی کالیفۆڕنیا