སྟོན་པའི་རྣམ་ཐར།

༄༅།།སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་མཛད་ཆེན་རྣམ་པར་ཐར་པ་པདྨ་དཀར་པོའི་ཕྲེང་བ་ཞེས་བྱ་བ་བཞུགས་སོ།། རྩོམ་པ་པོ། ཡེ་ཤེས་རྒྱ་མཚོ། ངོ་མཚར་བཀྲ་ཤིས་བསྐལ་བ་བཟང་པོ་དྲི་མེད་ལྷ་ཡི་ལམ་ཡངས་པོར། །རྣམ་འདྲེན་ཉི་མ་སྟོང་གི་དཀྱིལ་འཁོར་རིམ་གྱིས་ཡང་དག་ཤར་བ་ལས། །བདེ་གཤེགས་བཞི་པ་ཟས་གཙང་སྲས་ཞེས་རྨད་བྱུང་གྲགས་པའི་འོད་སྟོང་ཅན། །སྟོང་གསུམ་མི་མཇེད་ཞིང་གི་ཉི་མ་ཤཱཀྱའི་ཏོག་ལ་ཕྱག་འཚལ་ལོ༑༑སྲས་མཆོག་གནས་བརྟན་ཤཱ་རིའི་བུ་དང་རྫུ་འཕྲུལ་དབང་ཕྱུག་མོོ་འགལ་བུ། །རྒྱལ་བའི་རྒྱལ་ཚབ་འོད་སྲུངས་ཆེན་པོ་མང་ཐོས་རྒྱ་མཚོ་ཀུན་དགའ་བོ། །ཤཱ་ནའི་གོས་ཅན་འཕགས་པ་ཉེར་སྦས་ངྷ་ཏི་ཀ་དང་ནག་པོ་བ། །ལེགས་མཐོང་ཆེན་མོ་ཆུ་དབུས་པ་སོགས་དགྲ་བཅོམ་ཆེན་པོ་རྣམས་ལ་འདུད། །གང་གི་རྨད་བྱུང་མཛད་པ་མཐའ་དག་སར་གནས་འཕགས་པ་རྣམས་ཀྱིས་ཀྱང་། །ཇི་ལྟ་བ་བཞིན་བརྗོད་མི་ནུས་ན་ཚུར་མཐོང་བྱིས་པས་སྨོས་ཅི་འཚལ། །འོན་ཀྱང་སྡེ་སྣོད་གསུམ་ལས་བྱུང་བའི་མཛད་ཆེན་རྣམ་ཐར་ཆ་ཙམ་ཞིག། སྔོན་གྱི་སློབ་དཔོན་རྣམས་ཀྱིས་གསུང་བཞིན་རང་གི་དད་པའི་རྟེན་དུ་འགོད།།

       དེ་ཡང་བདག་ཅག་རྣམས་ཀྱི་སྟོན་པ་ཐུགས་རྗེ་ཆེན་པོ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ། ཤཱཀྱ་སེང་གེ ཤཱཀྱའི་རྒྱལ་པོ། །སྟོབས་བཅུ་དང་ལྡན་པ། མི་འཇིགས་པ་བཞི་བརྙེས་པ། ཉིན་ལན་གསུམ། མཚན་ལན་གསུམ། འཇིག་རྟེན་ཐམས་ཅད་ལ་ཐུགས་རྗེ་སྤྱན་གྱིས་གཟིགས་ནས། གང་ནི་ཉམས། གང་ནི་འཕེལ། གང་ནི་གནོད་པ་དང་ཉམ་ང་བ་དང་མི་བདེ་བར་གྱུར། གང་ནི་ངན་སོང་ལ་གཞོལ་ཞིང་འབབ། གང་ནི་ངན་སོང་གི་ལམ་ནས་བསླང་སྟེ། མཐོ་རིས་དང་། ཐར་བ་ལ་བཞག གང་འདོད་པའི་འདམ་དུ་བྱིང་བའི་ལག་པ་ནས་དྲང་། ཐར་བ་ལ་བཞག གང་འདོད་པའི་འདམ་དུ་བྱིང་བའི་ལག་པ་ནས་དྲང་། གང་སངས་རྒྱས་འབྱུང་བ་དོན་དང་བཅས་པར་བྱ། གང་གི་དགེ་རྩ་མ་བསྐྱེད་པ་ནི་བསྐྱེད། བསྐྱེད་པ་ནི་སྨིན། སྨིན་པ་ནི་གྲོལ་བར་བྱ། ཞེས་སེམས་ཅན་ཀུན་ལ་བུ་གཅིག་པ་ལྟར་བརྩེ་བ། མཁྱེན་པ་ལ་ཐོགས་པ་མི་མངའ་ཞིང་། ནུས་མཐུ་བསམ་གྱིས་མི་ཁྱབ་པ་མངའ་བ་དེ་ཉིད་ཀྱིས། དང་པོར་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་བ་ཆེན་པོ་གྲངས་མེད་པ་གསུམ་དུ་ཚོགས་བསགས། མཐར་འོག་མིན་དག་པའི་ཞིང་དུ་མངོན་པར་རྫོགས་པར་སངས་རྒྱས་ནས་ཀྱང་། མི་མཇེད་འཇིག་རྟེན་གྱི་ཁམས་འདིར་དམ་པའི་ཆོས་ཀྱི་སྣང་བ་སྤྲོ་བའི་ཕྱིར་དང་། འཁོར་རྣམ་བཞི་རྗེས་སུ་འཛིན་པའི་ཕྱིར་དང་། སྔོན་གྱི་ཐུགས་བསྐྱེད་པའི་དམ་བཅའ་རྣམས་ཡང་དག་པར་རྗེས་སུ་བསྒྲུབ་པའི་ཕྱིར་དུ། འཛམ་བུའི་གླིང་འདིར་མང་པོས་བཀུར་པའི་རྒྱལ་རྒྱུད་རྒྱལ་པོ་ཟས་གཙང་གི་སྲས་སུ་སྐུ་བལྟམས་ཏེ། རབ་ཏུ་བྱུང་ཞིང་། དཀའ་བ་སྤྱད་དེ། གསར་དུ་མངོན་པར་རྫོགས་པར་སངས་རྒྱས་པའི་ཚུལ་བསྟན་ནས། །ཆོས་ཀྱི་འཁོར་ལོ་རིམ་པ་གསུམ་བསྐོར་ཏེ། ལྔ་སྡེ་བཟང་པོ་ནས་ཀུན་ཏུ་རྒྱུ་རབ་བཟང་གི་བར་གྱི་སྐུ་དངོས་ཀྱི་གདུལ་བྱ་རྣམས་སྨིན་གྲོལ་གྱི་ལམ་ལ་བཀོད་ཅིང་། ཕྱི་རབས་ཀྱི་སྐལ་བ་དང་ལྡན་པའི་གདུལ་བྱ་རྣམས་ཀྱང་། དམ་པའི་ཆོས་ཀྱི་བདུད་རྩི་ལ་ལོངས་སྤྱོད་པའི་ཕྱིར་དུ། ཐུགས་རྗེ་ཅན་ཉིད་ཀྱི་རྒྱལ་ཚབ་ཏུ་སངས་རྒྱས་དང་འདྲ་བའི་ཉན་ཐོས་དང་། རྒྱ་བོད་ཀྱི་སློབ་དཔོན་ཆེན་པོ་དག་ལུང་བསྟན་ཏེ། འཇིག་རྟེན་གྱི་ཁམས་འདིར་དམ་པའི་ཆོས་ཡུན་རིང་དུ་གནས་པར་བྱིན་གྱིས་བརླབས་ཤིང་། ཕྱོགས་ཐམས་ཅད་དུ་ཤིན་ཏུ་བཀྲ་ཤིས་པར་མཛད་དོ། །ཞེས་ཐོས་སོ། །དེས་ན་འདིར་སྟོན་པ་མཉམ་མེད་ཤཱཀྱའི་རྒྱལ་པོ་ལ་མཛད་ཆེན་གྱི་སྒོ་ནས་བསྟོད་པ་པདྨ་དཀར་པོ་ཞེས་བྱ་བའི་དོན་འགྲེལ་བ་ལ་གསུམ། དང་པོར་ཐུགས་བསྐྱེད་པའི་ཚུལ། བར་དུ་ཚོགས་བསགས་པའི་ཚུལ། མཐར་མཛད་ཆེན་བཅུ་གཉིས་སོགས་ཀྱི་སྒོ་ནས་འགྲོ་བའི་དོན་མཛད་པའི་ཚུལ་ལོ།། 

དང་པོ། ཐུགས་བསྐྱེད་པ།

      དང་པོ་ནི། བསྟོད་པ་ལས། རྨད་བྱུང་ཚོགས་གཉིས་རྒྱ་མཚོའི་དབུས་ན་གནས། །དགྲ་བཅོམ་གསེར་རིའི་ཕྲེང་བས་ཡོངས་སུ་བསྐོར། །བླ་མེད་སྐུ་བཞིུའི་བང་རིམ་མངོན་པར་མཐོ། །སྟོབས་བཅུའི་མཁར་འཕགས་ཐུབ་དབང་ལྷུན་པོར་འདུད། །ལས་ཉོན་རླབས་ཕྲེང་གཡོ་བའི་ཡིད་མཚོ་ལས། །ངོ་མཚར་ཡོན་ཏན་དྲན་པའི་པདྨ་དཀར། །ཁྱོད་སྐུའི་ཉིན་བྱེད་དབང་པོར་མངོན་ཕྱོགས་ཏེ། །བསྟོད་ཚིག་གེ་སར་བཞད་ལ་བརྩེ་བས་དགོངས། །ལྷར་བཅའ་འགྲོ་བའི་སྐྱོབ་པ་བླ་ན་མེད། །འཇིག་རྟེན་གསུམ་གྱི་ཡོན་གནས་ཞིང་གི་མཆོག། སྟོང་ཕྲག་ཉི་མ་འབར་བའི་གཟི་བརྗིད་ཅན། །བསོད་ནམས་བརྒྱ་ཡི་མཚན་དང་ལྡན་པ་ཁྱོད། །སྔོན་ཚེ་བདེར་གཤེགས་རིན་ཆེན་སྙིང་པོའི་དྲུང་། །བྱང་ཆུབ་ཐུགས་བསྐྱེད་སྨོན་ལམ་བརྒྱ་ཕྲག་ལྔས། །ཞིང་འདི་བཟུང་བས་རྒྱལ་ཀུན་མགྲིན་གཅིག་ཏུ། །པད་དཀར་ལྟ་བུར་བསྔགས་ལ་ཕྱག་འཚལ་ལོ། །ཞེས་སྨྲས་སོ།། 

དེ་ཡང་སྔོན་བསྐལ་བ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་པ་ན། བསྐལ་བ་ཆེན་པོ་འཛིན་མ་ཞེས་བྱ་བ་ལ་འཁོར་ལོས་སྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཅེས་བྱ་བ་ཞིག་འཇིག་རྟེན་དུ་བྱུང་ངོ་། །དེ་ལ་རྒྱལ་བུ་མིག་མི་འཛུམ་པ་ལ་སོགས་པ་སྲས་སྟོང་དང་། རྒྱལ་ཕྲན་བརྒྱད་ཁྲི་བཞི་སྟོང་མངའ་འོ། །དེའི་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་ཞེས་བྱ་བ་ལ་སྲས་བརྒྱད་ཅུ་དང་། །སློབ་མ་བྲམ་ཟེ་སྟོང་དང་བཅས་པ་ཡོད་དོ། །རྒྱ་མཚོའི་རྡུལ་གྱི་སྲས་བྲམ་ཟེ་རྒྱ་མཚོའི་སྙིང་པོ་ཞེས་བྱ་བ་མངོན་པར་རྫོགས་པར་སངས་རྒྱས་པའི་མཚན་ལ་དེ་བཞིན་གཤེགས་པ་རིན་ཆེན་སྙིང་པོ་ཞེས་བྱ་བར་གྲགས་སོ། །འཁོར་ལོས་སྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཀྱིས་སངས་རྒྱས་རིན་ཆེན་སྙིང་པོ་ལ་ཟླ་བ་གསུམ་དུ་བསྙེན་བཀུར་བྱས་སོ། །དེ་ནས་དེའི་སྲས་སྟོང་གིས་ཀྱང་ཟླ་བ་གསུམ་གསུམ་དུ་བསྙེན་བཀུར་བྱས་ཏེ། ལོ་ཉིས་བརྒྱ་ལྔ་བཅུ་དང་ཟླ་མ་གསུམ་འདས་པ་ན། བྲམ་ཟེ་རྒྱ་མཚོའི་རྡུལ་གྱིས་ཀྱང་ལོ་བདུན་གྱི་བར་དུ་བསྙེན་བཀུར་བྱས་ཤིང་ཆོས་མཉན་ཏེ་རྨི་ལམ་བརྟགས་པས། ཕྱོགས་བཅུའི་སངས་རྒྱལ་ཐམས་ཅད་ཀྱིས་པདྨ་ཉི་མའི་འོད་ཟེར་འཕྲོ་བ་ཞིག་ཉིད་ལ་བསྐུར་བ་སོགས་དང་། རྒྱལ་པོ་རྩིབས་ཀྱི་མུ་ཁྱུད་ཀྱིས་སྲོག་ཆགས་མང་པོ་ཟ་བ་དང་། བློན་པོ་འགའ་ཞིག་ཤིང་རྟ་བདེ་བ་ལས་ལམ་བདེ་བར་སོང་བ་སོགས་རྨིས་ཏེ། སངས་རྒྱས་རིན་ཆེན་སྙིང་པོ་ལ་ཞུས་པས། རྒྱལ་པོ་རྒྱལ་སྲིད་ལ་ཆགས་ཤིང་མི་དགེ་བ་སྤྱད་པས་ངན་སོང་དང་འཁོར་བར་ལུང་བསྟན། བློན་པོ་དེ་དག་ཉན་རང་དུ་ལུང་བསྟན། གཞན་མང་པོ་བྱང་ཆུབ་ཆེན་པོར་འགྱུར་རོ་ཞེས་ལུང་བསྟན་ཏོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་སྨྲས་པ། རྒྱལ་པོ་ཆེན་པོ་མིར་གྱུར་པའང་རྙེད་པར་དཀའ། སངས་རྒྱས་འཇིག་རྟེན་དུ་འབྱུང་བའང་རྙེད་པར་དཀའ། དམ་པའི་ཆོས་མཉན་པའང་རྙེད་པར་དཀའ་ཡིས། བླ་ན་མེད་པའི་བྱང་ཆུབ་ཏུ་ཐུགས་བསྐྱེད་པར་མཛོད་ཅིག ཅེས་བསྐུལ་པ་དང་། རྒྱལ་པོས་སྨྲས་པ། སངས་རྒྱས་པས་སངས་རྒྱས་ཀྱི་ཞིང་བཟང་པོ་འབྱུང་ན་སེམས་བསྐྱེད་དོ། །ཞེས་ཁས་བླངས་སོ༑༑དེ་ནས་སངས་རྒྱས་རིན་ཆེན་སྙིང་པོ་མེ་ལོང་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་སོ། །སྙོམས་པར་ཞུགས་ནས་སངས་རྒྱས་ཀྱི་ཞིང་གི་བཀོད་པ་བསམ་གྱིས་མི་ཁྱབ་པ་དག་བསྟན་ཏེ། ཞིང་གང་བཟང་བ་དག་འདམ་དུ་བཅུག་པས། རྒྱལ་པོའང་དད་དེ་རང་གི་སངས་རྒྱས་ཀྱི་ཞིང་གཟུང་བའི་ཕྱིར་ཁབ་ཏུ་ཞུགས་ནས་སེམས་པར་བྱེད་ཅིང་། རྒྱལ་བུ་སྟོང་དང་། བྲམ་ཟེ་རིག་བྱེད་ཀློག་པ་སྟོང་ལ་སོགས་པས་ཀྱང་རང་རང་གི་སངས་རྒྱས་ཀྱི་ཞིང་གཟུང་བའི་ཕྱིར་སེམས་པར་བྱེད་དོ། །དེ་ནས་རྒྱལ་པོ་འཁོར་བཅས་ལྷས་བསྐུལ་ཏེ། སངས་རྒྱས་རིན་ཆེན་སྙོང་པོའི་དྲུང་དུ་སོང་ནས་སྤྱན་སྔར་འཁོད་དེ་སེམས་བསྐྱེད་དོ། ། དེའི་ཚེ་དེ་བཞིན་གཤེགས་པ་རིན་ཆེན་སྙིང་པོས་བཀའ་སྩལ་པ། རྒྱལ་པོ་ཆེན་པོ་ཁྱོད་ནི་མ་འོངས་པ་ན་བདེ་བ་ཅན་གྱི་འཇིག་རྟེན་གྱི་ཁམས་སུ་སངས་རྒྱས་འོད་དཔག་མེད་དུ་འགྱུར་རོ། །ཞེས་ལུང་བསྟན་ཏེ། བུ་ཐུ་བོ་མིག་མི་འཛུམ་ནི། འོད་ཟེར་ཀུན་ནས་འཕགས་པ་དཔལ་བརྩེགས་ཀྱི་རྒྱལ་པོ་ཞེས་བྱ་བར་འགྱུར་བར་ལུང་བསྟན་པ་ནས། རྒྱལ་བུ་སྟོང་ཚང་བའི་བར་དུ་ལུང་བསྟན་ཏོ། །དེ་ནས་རྒྱལ་ཕྲན་བརྒྱད་ཁྲི་བཞི་སྟོང་དང་། སྲོག་ཆགས་དུང་ཕྱུར་ཕྲག་དགུ་དང་། རྒྱ་མཚོའི་རྡུལ་གྱིས་སྲས་བརྒྱད་ཅུ་དང་། བྲམ་ཟེ་རིག་བྱེད་ཀློག་པ་སྟོང་གཅིག་དང་། ཟེ་བྱེ་བ་ཕྲག་གསུམ་ཡང་ལུང་བསྟན་ཏོ། །དེ་ནས་བྲམ་ཟེ་རིག་བྱེད་ཀློག་པ་སྟོང་གི་ཐ་མས་དེ་བཞིན་གཤེགས་པ་རིན་ཆེན་སྙིང་པོ་ལ། བསྐལ་བ་བཟང་པོ་དེ་ལ་ཐུབ་པ་ཉི་མ་དུ་མཆི་བར་འགྱུར་ཞེས་གསོལ་བ་ལ། བཀའ་སྩལ་པ། ཐུབ་པ་ཉི་མ་སྟོང་དང་བཞི་འབྱུང་བར་འགྱུར་རོ། །གསོལ་བ། བདག་ནི་ཐུབ་པ་ཉི་མ་དེ་དག་གི་སྐུ་ཚེའི་ཚད་དང་གདུལ་བྱ་ལ་སོགས་པ་ཅི་ཙམ་པ་དེ་ཙམ་དུ་གྱུར་ཅིག་ཅེས་སྨོན་ལམ་བཏབ་པས། སངས་རྒྱས་རིན་ཆེན་སྙིང་པོས་ལེགས་སོ་གནང་སྟེ། སངས་རྒྱས་སྣང་མཛད་ཅེས་བྱ་བར་འགྱུར་བར་ལུང་བསྟན་ཏོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་རིན་ཆེན་སྙིང་པོའི་དྲུང་དུ་པུས་མོ་གཡས་པའི་སླ་ང་ས་ལ་བཙུགས་པ་དང་མཉམ་དུ་སྟོང་གསུམ་གྱི་འཇིག་རྟེན་གྱི་ཁམས་ཐམས་ཅད་གཡོས་ཤིང་། འོག་མིན་གྱི་བར་གྱི་ལྷ་ཐམས་ཅད་ནམ་མཁའ་ལ་འཁོད་དེ་མེ་ཏོག་ལ་སོགས་པའི་ཆར་བབས་པར་གྱུར་ཏོ། །དེ་ནས་བྲམ་ཇེ་ཆེན་པོས་འདི་སྐད་ཅེས་གསོལ་ཏོ། །བདག་གིས་སྲོག་ཆགས་བྱེ་བ་མང་པོ་ལ་བྱང་ཆུབ་འཛིན་དུ་བཅུག་པ་དེ་དག་གིས། སྙིགས་མ་ལྔ་བདོ་བའི་དུས་ཀྱི་སེམས་ཅན་སྐྱབས་མེད་པ་དཔུང་གཉེན་མེད་པ། དེ་དག་སྤངས་ནས་རང་རང་གི་སངས་རྒྱས་ཀྱི་ཞིང་བཟང་པོ་དང་། སེམས་ཅན་འདུལ་སླ་བ་དག་ཡོངས་སུ་བཟུང་ན། སེམས་ཅན་དེ་དག་ལ་སྙིང་རྗེ་བས་བདག་གི་སྙིང་ཤིང་ཀང་བུ་ཤའི་འདབ་མ་བཞིན་དུ་འདར་ཞིང་ལུས་ཤ་ཐང་བར་གྱུར་ན། བདག་མ་འོངས་པའི་དུས་སུ་བསྐལ་བ་གྲངས་མེད་པར་དེ་དག་གི་དོན་དུ་བྱང་ཆུབ་ཀྱི་སྤྱོད་པས་མི་སྐྱོ་བར་གྱུར་ཅིག དེ་བཞིན་དུ་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྔོན་སུས་ཀྱང་བསླབ་མ་མྱོང་བ་དེ་ལྟ་བུ་སློབ་པར་གྱུར་ཅིག སེམས་ཅན་རེ་རེའི་དོན་ཏུའང་བསྐལ་བ་ཆེན་པོ་བཅུར་མནར་མེད་པའི་དམྱལ་བར་གནས་ཀྱང་མི་སྐྱོ་བར་གྱུར་ཅིག སྐྱེ་རྒུ་ཚེ་ལོ་བརྒྱ་ཉི་ཤུ་ཐུབ་པ་དུག་གསུམ་ཤིན་ཏུ་བདོ་བ་ཕ་ལ་ཕར་མི་འཛིན་མ་ལ་མར་མི་འཛིན་སྡིག་པའི་ལས་ལ་དགའ་བ་ལ་སོགས་པས་ངན་འགྲོར་འགྲོ་དགོས་པའི་སེམས་ཅན་དག་འབྱུང་བར་འགྱུར་ལ། དེའི་དབང་གིས་མུ་གེ་དང་། འཁྲུག་པ་དང་། ནད་ཡམས་ལ་སོགས་པ་མི་བཟང་བ་མང་པོ་འབྱུང་བའི་དུས་དེར། བདག་དགའ་ལྡན་ནས་བབས་ཏེ་མའི་མངལ་དུ་འཇུག་པར་གྱུར་ཅིག ཅེས་སོགས་མཛད་པ་བཅུ་གཉིས་པོ་རེ་རེ་ལའང་སྨོན་ལམ་ཚད་མེད་པ་བཏབ་ཅིང་ཁྱད་པར་དུ་སེམས་ཅན་སེམས་འཁྲུལ་བ་ཉོན་མོངས་པས་དཀྲུགས་པ་རྣམས་དང་། བུད་མེད་རྣམས་ཀྱང་བདག་གི་བསྟན་པ་ལ་རབ་ཏུ་བྱུང་བར་གྱུར་ཅིག བདག་མྱ་ངན་ལས་འདས་ནས་ཀྱང་དམ་པའི་ཆོས་སྟོང་དུ་གནས་པར་གྱུར་ཅིག ལོ་ལྔ་བརྒྱར་དམ་པའི་ཆོས་ཀྱི་གཟུགས་བརྙན་གནས་པར་གྱུར་ཅིག བདག་གི་སྐུ་གདུང་རྣམས་ལ་མཆོད་པ་དང་། བསླབ་པའི་གཞི་གཅིག་ཙམ་འཛིན་པ་དང་། ཚིགས་བཅད་གཅིག་ཙམ་ཀློག་པ་ཡན་ཆད་ཐེག་པ་གསུམ་པོ་དག་ལས་སླར་མི་ལྡོག་པར་གྱུར་ཅིག བདག་གིས་བསྐལ་བ་དུ་མར་ཚོགས་བསགས་པ་དེའི་མཐུས་སེམས་ཅན་གང་དག་དམྱལ་བ་ཆེན་པོར་སྐྱེས་ནས་བདག་གི་ལུས་རྡུལ་ཕྲ་རབ་ཀྱི་གྲངས་སྙེད་དུ་གྱུར་ཅིག ལུས་རེ་རེ་ཡང་རི་རབ་ཙམ་དུ་གྱུར་ཅིག དེ་རེ་རེས་ཀྱང་སྡུག་བསྔལ་དྲག་ཅིང་རྩུབ་པ་མི་བཟད་པ་བསྐལ་བ་ཞིང་གི་རྡུལ་སྙེད་དུ་མྱོང་གྱུར་ཅིག དེ་བཞིན་དུ་དུད་འགྲོ་དང་། ཡི་དྭགས་དང་། ལྷ་མ་ཡིན་དང་། མིའི་ནང་ནའང་འོན་པ་དང་། ལོང་བ་དང་། ལྕེ་མེད་པ་ལ་སོགས་པ་རྣམས་ཀྱི་དོན་དུ་བདག་དམྱལ་བར་སྐྱེས་པར་གྱུར་ཅིག ཅེས་བྱ་བ་ལ་སོགས་པ་སྨོན་ལམ་ཆེན་པོ་ལྔ་བརྒྱ་བཏབ་པས། འཁོར་དེར་ཡོད་པའི་ལྷ་དང་མི་ལ་སོགས་པ་རྣམས་ཀྱི་མིག་ནས་མཆི་མ་འཛག་ཅིང་ཡན་ལག་ལྔས་ཕྱག་འཚལ་ཏེ། སྙིང་རྗེ་ཆེན་པོ་དང་ལྡན་པ་ཁྱོད་ནི། ལེགས་སོ། ལེགས་སོ། །ཞེས་བསྔགས་པ་བརྗོད་དེ། །ཕྱོགས་བཅུའི་ཞིང་ཁམས་ནས་སངས་རྒྱས་བཅོམ་ལྡན་འདས་རྣམས་ཀྱིས་མེ་ཏོག་གི་སྐྱེས་བསྐུར་ཅིང་། ཞིང་རེ་རེ་ནས་བྱང་ཆུབ་སེམས་དཔའ་དཔག་ཏུ་མེད་པ་བྱོན་ནས་ཕྱག་བྱས་ཤིང་བསྔགས་པ་བརྗོད་དོ། །དེ་ནས་དེ་བཞིན་གཤེགས་པ་རིན་ཆེན་སྙིང་པོས་བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའ་གཞན་ནི་མེ་ཏོག་ལྟ་བུའོ། །ཁྱོད་ནི་པདྨ་དཀར་པོ་ལྟ་བུའོ། །སྙིང་རྗེ་ཆེན་པོ་དང་ལྡན་པ་ཁྱོད་ནི། །སྐྱེ་རྒུ་ཚེ་ལོ་བརྒྱ་ཐུབ་པའི་དུས་སུ་སེམས་ཅན་མ་རུངས་པ་མི་དགེ་བཅུ་ཚང་བར་སྤྱོད་པ། མཚམས་མེད་པ་ལྔ་བྱེད་པ། ཤིན་ཏུ་འདུལ་དཀའ་བའི་སེམས་ཅན་མ་རུངས་པས་གང་བ། ཞིང་མ་དག་པ་མི་མཇེད་འཇིག་རྟེན་གྱི་ཁམས་སུ་བསྐལ་བ་བཟང་པོའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ལོ་བཞི་བཅུ་རྩ་ལྔར་སངས་རྒྱས་ཀྱི་མཛད་པ་བྱེད་དོ། །ཞེས་ལུང་བསྟན་ཏོ། །དེ་ནས་སླར་ཡང་བྱང་ཆུབ་སེམས་དཔའ་ཆེན་པོ་དེས་འདི་སྐད་ཅེས་གསོལ་ཏོ། །བདག་བྱང་ཆུབ་ཀྱི་སྤྱད་པ་སྤྱོད་པ་ན། སེམས་ཅན་གང་དག་ཕ་རོལ་ཏུ་ཕྱིན་པ་དྲུག་ལ་བཀོད་པ་དང་། །ཐ་ན་དགེ་བའི་རྩ་བ་སྐྲའི་རྩེ་མོ་ཙམ་ལ་བཀོད་པའི་སེམས་ཅན་གཅིག་ཙམ་ཞིག་ཐེག་པ་གསུམ་པོ་དག་གིས་ཕྱིར་མི་ལྡོག་པ་ལ་མ་བཀོད་ན་བདག་གིས་ཕྱོགས་བཅུའི་སངས་རྒྱས་ཐམས་ཅད་བསླུས་པར་གྱུར་ཅིག བདག་འཚང་རྒྱ་བར་མ་གྱུར་ཅིག བདག་གི་བསྟན་པ་ལ་གོས་ངུར་སྨྲིག་བགོས་ནས་རྩ་བའི་ལྟུང་བ་བྱུང་བ། སྤྱོད་ངན་པ་ལ་ཞུགས་པ་དང་། བདག་ལ་སྟོན་པའི་འདུ་ཤེས་གཅིག་ཙམ་བསྐྱེད་པ་དེ་དག་ཀྱང་ཐེག་པ་གསུམ་ལ་མ་བཀོད་ན་བདག་འཚང་རྒྱ་བར་མ་གྱུར་ཅིག ཆོས་གོས་ངུར་སྨྲིག་ལྷ་དང་བཅས་པས་མཆོད་པར་འོས་པ་སོར་བཞི་པ་ཙམ་འཆང་བ་དེ་དག་ཀྱང་དབུལ་ཕོངས་དང་ནད་ཡམས་དང་དམག་འཁྲུག་ལ་སོགས་པས་གནོད་པ་མེད་པར་གྱུར་ཅིགཅེས་སོགས་སྙིང་རྗེ་པདྨ་དཀར་པོའི་མདོ་ལས་གསུངས་སོ། །གཞན་ཡང་མདོ་སྡེ་བསྐལ་བཟང་ལས། །ང་ནི་སྔོན་ཚེ་དམན་པར་གྱུར་པ་ན། །དེ་བཞིན་གཤེགས་པ་ཤཱཀྱ་ཐུབ་པ་ལ། །འཇམ་གང་ཞིག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །ཞེས་གསུངས་ལ། འདུལ་བ་ལུང་སྨན་གྱི་གཞི་ལས། ཀུན་དགའ་བོས། འཇིག་རྟེན་གཙོ་བོ་རྣམས་འདྲེན་པ། །ཐུབ་པ་ཁྱོད་ཀྱིས་བྱང་ཆུབ་ཐུགས། །ཐོག་མར་གང་དུ་བསྐྱེད་པ་དག སྐལ་ལྡན་ཆེན་པོས་བདག་ལ་གསུངས། །ཞེས་ཞུས་པ་ན། སངས་རྒྱས་འདོད་ཆགས་བྲལ་ཐོས་ཤིང་། །གླང་པོ་དྲགས་པའི་ཤེས་ཆེན་དང་། །འཇིག་རྟེན་སྡུག་བསྔལ་གྱུར་མཐོང་ནས། །ངས་ནི་བྱང་ཆུབ་སེམས་བསྐྱེད་དོ། །མི་དབང་འོད་ལྡན་གྱུར་པ་ན། །ངས་ནི་བྱང་ཆུབ་འདོད་པའི་ཕྱིར། །ངས་ནི་བརྟན་པོར་དམ་བཅས་ཏེ། །སྐྱོན་མེད་པ་ཡི་སྦྱིན་པ་བཏང་། །ཞེས་རྒྱལ་པོ་འོད་ལྡན་གྱི་རྟེན་ལ་སེམས་བསྐྱེད་པར་གསུངས་ཤིང་། །དཔག་བསམ་འཁྲི་ཤིང་ལས། །སྐྱེ་བ་སྔར་སྐྱེས་གོམས་པ་ལས། །ཡང་དག་རྫོགས་པའི་བྱང་ཆུབ་སེམས། །རྒྱལ་པོ་ཡིས་ནི་སྨོན་སེམས་སྐྱེས། །འཁོར་བ་ཆུ་སྲིན་འབྱུང་གནས་སུ། །རྣམ་པར་བྱིང་བའི་འགྲོ་བ་འདི། །དགེ་བའི་ལམ་ནས་རྫོགས་པ་ཡི། །བྱང་ཆུབ་གྲོལ་བར་ཡང་དག་བསྒྲལ། །ཅེས་པའང་ལུང་སྨན་གྱི་གཞི་ལྟར་ཡིན་ནོ། །དེས་ན་ཐུགས་བསྐྱེད་པའི་ཚུལ་ནི་མདོ་ལས་མང་པོ་ཞིག་གསུངས་པ་ལས། བསྟོད་པ་འདི་ནི་སྙིང་རྗེ་པད་དཀར་ལྟར་བྱས་པ་ཡིན་ནོ།།

སྨྲས་པ། བདེ་ལྡན་ཞིང་གི་མགོན་པོ་སྣང་མཐའ་ཡིས། །བསྐལ་བ་ཆེན་མོ་འཛིན་མའི་འཇིག་རྟེན་དུ། །གླིང་བཞིའི་དབང་ཕྱུག་གསེར་གྱི་འཁོར་ལོས་སྒྱུར། །རྩིབས་ཀྱི་མུ་འཁྱུད་ཅེས་བྱའི་རྒྱལ་པོར་གྱུར། །དེ་ལ་རྒྱལ་བུ་བྱང་ཆུབ་སེམས་དཔའ་སྟོང་། །ས་སྐྱོང་རྒྱལ་ཕྲན་བརྒྱད་ཁྲི་བཞི་སྟོང་མངའ། །བློན་པོ་བྲམ་ཟེ་རྒྱ་མཚོའི་རྡུལ་ལ་སོགས། །བྲམ་ཟེ་རིག་བྱེད་ཀློག་པ་སྟོང་ཡང་བྱོན། །དགེ་བཅུའི་བཀྲ་ཤིས་སྣང་བ་དཀར་པོ་ཡིས། །ཕྱོགས་བཅུའི་འཁོར་ལོ་འགེངས་པའི་འཇིག་རྟེན་དེར། །སྟོབས་བཅུ་མངའ་བ་རིན་ཆེན་སྙིང་པོ་ཞེས། །ཡང་དག་རྫོགས་པའི་སངས་རྒྱས་དེ་ཡང་བྱོན། །མི་ཟད་ནམ་མཁའི་མཛོད་ལ་མངའ་བརྙེས་པའི། །རྒྱལ་བློན་སྲས་དང་བཅས་པའི་བསྙེན་བཀུར་གྱིས། །འཇིག་རྟེན་མགོན་པོ་དེ་ལ་མཆོད་པ་ནི། །ཀུན་བཟང་མཆོད་པའི་སྤྲིན་དང་མཚུངས་པར་མཛད། །གང་ཚེ་བྲམ་ཟེ་བདག་ཉིད་ཆེན་པོ་དེའི། །དྲི་མེད་ཐུགས་ཀྱི་ལྷ་ཡི་ལམ་ཡངས་པོར། །བྱང་ཆུབ་སེམས་ཀྱི་ཟླ་བ་གསར་དུ་ཚེས། །བླ་མེད་བྱང་ཆུབ་སྤྱོད་ལ་ཞུགས་པར་གྱུར། །རྒྱ་ཆེན་ཐུགས་ཀྱི་རིན་ཆེན་འབྱུང་གནས་མཚོ། །བརྩེ་ཆེན་ཐུགས་རྗེ་རླུང་གིས་ཡང་ཡང་བསྐྱོད། །སྨོན་ལམ་ཆེན་པོ་ལྔ་བརྒྱའི་རླབས་ཀྱི་ཕྲེང་། །མ་འོངས་མི་མཇེད་འཇིག་རྟེན་ཞིང་དུ་གཡོས། །དེའི་ཚེ་ཁྱོད་ནི་པདྨ་དཀར་པོ་དང་། །རྒྱུ་སྐར་ཁྲོད་ཀྱི་ཉ་རྒྱས་ཟླ་བ་ལྟར།།རྒྱལ་སྲས་གཞན་ལས་ཁྱད་པར་འཕགས་སོ་ཞེས། །རབ་འབྱམས་ཞིང་ནས་བསྔགས་བརྗོད་མེ་ཏོག་འཐོར། །དེ་ལྟར་ཐུགས་བསྐྱེད་སྨོན་པའི་ངོ་མཚར་གྱིས། །ས་ཡི་དཀྱིལ་འཁོར་ཆེན་པོ་འདར་ཞིང་གཡོས། །གྲགས་པའི་གདུགས་དཀར་འོག་མིན་ལྷ་ཡིས་བསྒྲེངས། །བདུད་ཀྱི་རྒྱལ་མཚན་ནག་པོ་ས་ལ་བསྙིལ། །རྨད་བྱུང་སྙིང་སྟོབས་ཆ་ཤས་ཡོངས་སུ་རྫོགས། །ཐུགས་རྗེ་འོད་དཀར་རིང་ནས་རིང་དུ་འཕྲོ། །རྒྱལ་སྲས་ཟླ་བ་དག་པའི་དཀྱིལ་འཁོར་ནི། །སྲིད་པའི་མཁའ་ལ་ཤར་བའི་བཀའ་དྲིན་དྲན། །གང་ལ་སེམས་ཀྱི་དམ་པ་རིན་ཆེན་ཏེ། །སྐྱེས་པ་དེ་ཡི་སྐུ་ལ་ཕྱག་འཚལ་ཞིང་། །གང་ལ་གནོད་པ་བྱས་ཀྱང་བདེ་འབྲེལ་བ། །བདེ་བའི་འབྱུང་གནས་ཁྱོད་ལ་སྐྱབས་སུ་མཆི། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ།།

གཉིས་པ། ཚོགས་བསགས་པ།

གཉིས་པ་ཚོགས་བསགས་པའི་ཚུལ་ནི། །བསྟོད་པ་ལས། །འཁོར་དང་ལོངས་སྤྱོད་ལུས་སྲོག་གཏོང་བ་སོགས། །གྲངས་མེད་གསུམ་གྱི་བསོད་ནམས་ཡེ་ཤེས་ཚོགས། །རླབས་ཆེན་སྤྱོད་པའི་དཔུང་ཚོགས་ཡན་ལག་བཞིས། །བདུད་བཞིའི་གཡུལ་ལས་རྒྱལ་ལ་ཕྱག་འཚལ་ལོ། །ཞེས་སྨྲས་སོ།།

དེ་ཡང་སྟོན་པ་ཐུགས་རྗེ་ཅན་ཉིད་ཀྱི་ཞལ་ནས། ངས་སྔོན་ནད་པའི་ཆེད་དག་ཏུ། །རང་གི་འཚོ་བ་ཡོངས་བཏང་བས། །སེམས་ཅན་ཕོངས་པ་བསྐྱབ་པའི་ཕྱིར། །བསྟན་པ་ཡུན་རིང་འབར་འགྱུར་ཅིག། བུ་དང་བུ་མོ་ཆུང་མ་དང་། །ནོར་དང་གླང་ཆེན་ཤིང་རྟ་དང་། །རིན་ཆེན་བྱང་ཆུབ་ཕྱིར་བཏང་བས། །བསྟན་པ་ཡུན་རིང་འབར་གྱུར་ཅིག། ཅེས་དང་། བརྩེ་བའི་རྒྱུ་ཡི་ཤ་ཁྲག་དང་། །འཚོ་བ་ཡོངས་སུ་བཏང་གྱུར་ཀྱང་། །ཡན་ལག་ཉིང་ལག་བཏང་བ་ཡིས། །ཆོས་ཚུལ་རྣམ་པར་འཕེལ་གྱུར་ཅིག། ཅེས་གསུངས་པ་ལྟར་ལ། སྙིང་རྗེ་ཆེན་པོ་པདྨ་དཀར་པོ་ལས། །ཀུན་དགའ་བོ། བྱང་ཆུབ་སེམས་དཔའི་སྤྱད་པ་སྤྱོད་པ་ན། །ཅི་ཙམ་དཀའ་བ་སྤྱད་པ་དེ་དག་ཐམས་ཅད་ཁྱོད་ཀྱི་དོན་དུ་སྤྱད་དོ། །ངས་རྒྱལ་སྲིད་དང་། སྡུག་པ་དང་ཀྱང་ཡོངས་སུ་བཏང་ཞིང་། བུ་ཕོ་དང་། བུ་མོ་དང་། ཆུང་མ་དང་། བདག་གི་སྲོག་དང་། ཤ་དང་། ཁྲག་དང་། རུས་པ་དང་། རྐང་དང་། རྣ་བ་དང་། སྣ་དང་། ལག་པ་དང་། རྐང་པ་དང་། མགོ་དག་ཀྱང་ཡོངས་སུ་བཏང་བ་དང་། སྡུག་བསྔལ་དུ་མ་མྱོང་བ་དེ་དག་ཐམས་ཅད་ཀྱང་ཁྱོད་ཀྱི་ཕྱིར་རོ། །ཀུན་དགའ་བོ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་ན། གང་བྱ་དཀའ་བ་དག་ཡོངས་སུ་བཏང་བར་བྱས་པ་དང་། སེམས་ཅན་རྣམས་ཀྱི་དོན་དུ་ངས་སྡུག་བསྔལ་གང་དག་མྱོང་བ་དེ་དག་ཐམས་ཅད། ཀུན་དགའ་བོ། གལ་ཏེ་བརྗོད་ན་བདེན་པར་ཡིད་ཆེས་པར་མི་འགྱུར་ན་ཚིག་ཏུ་སྨྲ་བ་ལྟ་ཅི་སྨོས། ཀུན་དགའ་བོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེས། སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཁྱོད་ཀྱི་དོན་དུ་སྡུག་བསྔལ་མི་བཟད་པ་རྩུབ་ཅིང་དྲག་པའི་ཚོར་བ་འདི་ལྟ་བུ་དག་མྱོང་ངོ་ཞེས་དེ་སྐད་བཤད་ན། དེ་བཞིན་གཤེགས་པ་དེས་བདག་ཅག་གི་དོན་དུ་དཀའ་བ་སྤྱད་དོ། །ཞེས་གལ་ཏེ་བྱིས་པ་སོ་སོའི་སྐྱེ་བོ་དག་ཚིག་བཞི་པ་གཅིག་གིས་སྙིང་རྗེ་བསྐྱེད་ན། ཀུན་དགའ་བོ། སེམས་བསྐྱེད་པ་དེའི་འབྲས་བུ་ཡང་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདས་པའི་བར་དུ་འགྱུར་བར་ང་སྨྲ་ན། ཀུན་དགའ་བོ། ང་ལ་དགེ་བའི་རྩ་བ་བསྐྱེད་པ་ལྟ་ཅི་སྨོས། ཞེས་གསུངས་སོ། །དེ་ཡང་སྔོན་སྟོན་པ་ཐུགས་རྗེ་ཆེན་པོ་དང་ལྡན་པ་དང་འདི་ཉིད་རྒྱལ་བའི་སྲས་གཞོན་ནུ་བརྩོན་འགྲུས་སྤྱོད་ཅེས་བྱ་བར་གྱུར་པའི་ཚེ། དེ་བཞིན་གཤེགས་པ་ཕུང་པོ་ཆེན་པོ་འཇིག་རྟེན་དུ་བྱོན་པ་ལ་བསྙེན་བཀུར་ཞིང་དགེ་བའི་རྩ་བ་བསྐྲུན་པ་ནས་བརྩམས་ཏེ། བསྐལ་བ་གྲངས་མེད་པ་གཅིག་ཏུ་ཚོགས་བསགས་པས་ས་དང་པོ་ཐོབ་པར་གྱུར་ཏོ། །དེ་ནས་གྲོང་ཁྱེར་འཛམ་བུ་ཆུ་བོའི་གསེར་དུ་རྒྱལ་པོ་མཛེས་པར་སྣང་བའི་སྣ་ཆེན་པོ། ཚོང་དཔོན་ཤེས་རབ་བཟང་དུ་གྱུར་བའི་ཚེ། དེ་བཞིན་གཤེགས་པ་དཀོན་མཆོག་ཡན་ལག་འཇིག་རྟེན་དུ་བྱོན་པ་ལ་བསྙེན་བཀུར་ཞིང་རྗེས་སུ་བསྟན་པ་མནོས་པ་ནས་བཟུང་སྟེ། གྲངས་མེད་པ་གཅིག་ཏུ་ཚོགས་བསགས་པས་ས་བདུན་པ་ནོན་པར་གྱུར་ཏོ། །དེ་ནས་བྲམ་ཟེ་ཁྱེའུ་སྤྲིན་ཞེས་བྱ་བར་གྱུར་པ་ན། དེ་བཞིན་གཤེགས་པ་མར་མེ་མཛད་འཇིག་རྟེན་དུ་བྱོན་པ་ལ། མེ་ཏོག་ཨུད་ལ་ལྔས་མཆོད་ཅིང་ཀྲིཥྞ་ས་རའི་པགས་པ་དང་། རལ་བ་གསེར་གྱི་མདོག་ཅན་གདན་དུ་བཏང་ནས་བསྙེན་བཀུར་བ་ནས་བཟུང་སྟེ། གྲངས་མེད་གཅིག་ཏུ་ཚོགས་བསགས་པས། ས་བརྒྱད་པ་ནས་བཅུ་པའི་བར་ཐོབ་པས་ས་བཅུ་རྫོགས་སོ་ཞེས་བྱང་ཆུབ་སེམས་དཔའི་སྡེ་སྣོད་ལས་གསུངས་ཤིང་། ཇི་སྐད་དུ། སངས་རྒྱས་མར་མེ་མཛད་ལ་ཨུད་པལ་ལྔས། །གཏོར་ཏེ་རལ་བ་གདན་དུ་བཏིང་བྱས་པས། །མི་སྐྱེའི་ཆོས་ལ་བཟོད་པ་ཐོབ་གྱུར་ནས། །ཤཱཀྱའི་རྒྱལ་པོར་འགྱུར་ཞེས་ང་ལུང་བསྟན། །ཞེས་དང་། ལུང་ལས། གང་ཚེ་མར་མེ་མཛད་ཀྱིས་ང་། །ལུང་བསྟན་གྱུར་པ་དེ་ཡི་ཚེ། །ས་བརྒྱད་པ་ནི་ཐོབ་གྱུར་ཏེ། །དབང་བཅུ་དག་ཀྱང་ཐོབ་པར་གྱུར། །ཅེས་གསུངས་སོ། །དེ་ལྟར་ན་མོས་སྤྱོད་ཀྱི་ས་ནས་ས་དང་པོའི་བར་དུ་གྲངས་མེད་པ་དང་པོའི་ཚོགས་དང་། ས་དང་པོ་ནས་ས་བདུན་པའི་བར་དུ་གྲངས་མེད་པ་གཉིས་པའི་ཚོགས་དང་། ས་བརྒྱད་པ་ནས་ས་བཅུ་པའི་བར་དུ་བསྐལ་ཆེན་གྲངས་མེད་པ་གསུམ་པའི་ཚོགས་རྫོགས་སོ། །གཞན་ཡང་། ཚོགས་ལམ་ལ་གྲངས་མེད་གཅིག་གི་ཚོགས་དང་། སྦྱོར་བའི་ལམ་ལ་གྲངས་མེད་གཉིས་ཀྱི་ཚོགས་དང་། ས་བཅུ་པོ་རེ་རེ་ལ་གྲངས་མེད་གསུམ་གསུམ་སྟེ། གྲངས་མེད་སུམ་ཅུ་རྩ་གསུམ་གསུངས་པའང་ཡོད་དེ། བརྒྱད་སྟོང་འགྲེལ་ཆེན་ལས། འདི་ལྟར་བསྐལ་བ་གྲངས་མེད་པ་དང་པོས་ནི། ཚོགས་ཀྱི་ས་ནས་བརྩམས་ཏེ་ས་དང་པོའི་བར་དུ་རྫོགས་པར་འགྱུར་རོ། །གཉིས་པས་ནི། དྲི་མ་མེད་པའི་ས་ནས་བཟུང་སྟེ་ས་བདུན་པའི་བར་དུའོ། །ཡང་བསྐལ་བ་གྲངས་མེད་པ་གསུམ་པས་ནི། ས་མི་གཡོ་བ་ནས་བཟུང་སྟེ་སངས་རྒྱས་ཀྱི་སའི་བར་དུའོ། །ཞེས་པ་ནས་འདི་ལྟར་སློབ་དཔོན་དབྱིག་གཉེན་གྱི་ཞལ་སྔ་ནས་ཀྱང་ཚོགས་ཀྱིས་ཀུན་ཏུ་རྫོགས་པར་བྱེད་པ་ན་བསྐལ་བ་གྲངས་མེད་པ་གཅིག་འདའ་བར་བྱེད་དོ། །དེའི་འོག་ཏུ་མོས་པ་སྤྱོད་པའི་ས་རྫོགས་པར་བྱེད་པ་ན་བསྐལ་བ་གྲངས་མེད་པ་གཉིས་འདའ་བར་བྱེད་དོ། །དེའི་འོག་ཏུ་རབ་ཏུ་དགའ་བ་ནས་བརྩམས་ཏེ་བྱང་ཆུབ་སེམས་དཔའི་ས་ཆོས་ཀྱི་སྤྲིན་གྱི་བར་ལ་སོ་སོ་སོ་སོར་བསྐལ་བ་གྲངས་མེད་པ་གསུམ་གསུམ་གྱིས་བྱང་ཆུབ་སེམས་དཔའི་ས་རྫོགས་པར་བྱས་ནས་སངས་རྒྱས་ཀྱིས་ཀུན་ཏུ་འོད་སྒྲུབ་པར་བྱེད་པ་ཡིན་ཏེ། དེ་ལྟར་ན་བསྐལ་བ་གྲངས་མེད་པ་སུམ་ཅུ་རྩ་གསུམ་གྱིས་སངས་རྒྱས་ཉིད་འཐོབ་པ་ཡིན་ནོ་ཞེས་བཤད་དོ། །ཞེས་གསུངས་པའི་ཕྱིར། འདུལ་བ་ལུང་སྨན་གྱི་གཞི་ལས། ཀུན་དགའ་བོས། འཇིག་རྟེན་གཙོ་བོ་རྣམ་འདྲེན་པ། །ཁྱོད་སྔོན་བྱང་ཆུབ་སྤྱོད་པ་ན། །སངས་རྒྱས་ཇི་སྙེད་དུས་གང་དུ། །ཇི་ལྟ་བུར་ནི་བསྙེན་བཀུར་མཛད། །ཅེས་ཞུས་པ་ན། སངས་རྒྱས་ཤཱཀྱ་ཐུབ་པ་ནས། །འདྲེན་པ་ཡུལ་འཁོར་སྐྱོང་གི་བར། །བདུན་ཁྲི་དང་ནི་ལྔ་སྟོང་གི། སངས་རྒྱས་རྣམས་ནི་ངས་མཆོད་དོ། །སངས་རྒྱས་མར་མེ་མཛད་ནས་ནི། །ཐུབ་པ་དབང་པོའི་རྒྱལ་མཚན་བར། །བདུན་ཁྲི་དང་ནི་དྲུག་སྟོང་གི། སངས་རྒྱས་རྣམས་ནི་ང་ཡིས་མཆོད། །སངས་རྒྱས་ལེགས་མཛད་ནས་བཟུང་སྟེ། །སངས་རྒྱས་འོད་སྲུངས་བར་དག་ཏུ། །བདུན་ཁྲི་བདུན་སྟོང་ང་ཡིས་མཆོད། །གྲངས་མེད་གསུམ་པོ་དེ་ལ་ནི། རྒྱལ་བ་ངས་ནི་མཆོད་བྱས་ཏེ། །བྱང་ཆུབ་ཕྱིར་ནི་སྤྱོད་པ་ན། །དེ་ཚོ་ང་ལ་སྐྱོ་སེམས་མེད། ཅེས་དང་། མཛོད་ལས། རྣམ་གཟིགས་མར་མེ་རིན་ཆེན་གཙུག། གྲངས་མེད་གསུམ་གྱི་ཐ་མར་བྱུང་། དང་པོ་ཤཱཀྱ་ཐུབ་པ་ཡིན། །ཞེས་གསུངས་ལ། སངས་རྒྱས་ཤཱཀྱ་ཐུབ་པ་ལ་བསྙེན་བཀུར་མཛད་ཅིང་སྨོན་ལམ་བཏབ་པའི་ཚུལ་ནི། ལུང་སྨན་གྱི་གཞི་ལས། སྔོན་གྲོང་ཁྱེར་ཡངས་པའི་རྫ་མཁན་ཡངས་པའི་འོད་ཅེས་བྱ་བར་གྱུར་པས། དེ་བཞིན་གཤེགས་པ་ཤཱཀྱ་ཐུབ་པ་བསེར་མའི་སྙུན་གྱིས་ཟིན་པ་ལ་ཆུ་འཇམ་པོས་སྐུ་ཁྲུས་གསོལ་ཏེ། མར་དང་ཏིལ་མར་གྱིས་བྱུགས་ནས། བུ་རམ་ཆུའི་བཏུང་བ་དྲངས་པས་སྙུན་ལས་གྲོལ་ཏོ། །དེ་ནས་དེ་དད་ནས། བདག་ཀྱང་རབ་ཏུ་སྦྱིན་པ་འདི་ཡིས་ཤཱཀྱའི་རིགས་སྐྱེས་ལ། །ཡོན་ཏན་རིགས་དང་རུས་དག་མཉམ་པའི་སངས་རྒྱས་ཉིད་གྱུར་ཅིང་། །བདག་གིས་ཚངས་པའི་འཇིག་རྟེན་བར་གྱི་ཉམ་ཐག་འཆི་བ་ཡི། །ཕ་རོལ་ཞི་བ་རྒྱ་ཆེན་འཇིགས་པ་མེད་པས་སྒྲོལ་བར་ཤོག། ཅེས་སྨོན་ལམ་བཏབ་བོ། །ཞེས་དང་། ང་ནི་རྫ་མཁན་གྱུར་པ་ན། །སངས་རྒྱས་ཤཱཀྱ་ཐུབ་མཐོང་ནས། །བྱང་ཆུབ་ཕྱིར་ནི་ཐོག་མར་ངས། །མར་དང་ཏིལ་མར་གྱིས་མཆོད་དོ། །ཞེས་འབྱུང་ངོ་། །དེ་ཡང་སེམས་བསྐྱེད་པ་དང་མཉམ་དུ་བསྐལ་བ་གྲངས་མེད་པའི་ཚོགས་ཀྱི་མགོ་བརྩམས་པ་མིན་ཏེ། དཀོན་མཆོག་སྤྲིན་ལས། རིགས་ཀྱི་བུ། དེ་བཞིན་གཤེགས་པ་ནི་བསྐལ་བ་གྲངས་མེད་པ་དུ་མས་ཡང་དག་པར་འགྲུབ་པ་ཡིན་ཏེ། རིགས་ཀྱི་བུ། དེ་བཞིན་གཤེགས་པ་ནི་དཔག་པ་དང་། བསམ་པ་དང་། བརྟག་པ་མི་ནུས་སོ། །བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་གསོལ་བ། བཅོམ་ལྡན་འདས། བསྐལ་བ་གྲངས་མ་མཆིས་པ་གསུམ་གྱིས་དེ་བཞིན་གཤེགས་པ་རྣམས་ཡང་དག་པར་འགྲུབ་པ་མ་ལགས་སམ།བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དེ་བཞིན་གཤེགས་པའི་ཡུལ་བསྒྲུབ་པར་བྱ་བ་ནི་བསམ་གྱིས་མི་ཁྱབ་སྟེ། དེ་ནི་བསྐལ་བ་གྲངས་མེད་པ་གསུམ་གྱིས་ཡང་དག་པར་བསྒྲུབ་པར་མི་ནུས་ཀྱི། ནམ་བྱང་ཆུབ་སེམས་དཔའ་ཆོས་མཉམ་པ་ཉིད་དུ་ཞུགས་པར་གྱུར་པ་དེའི་ཚེ་ནས་བརྩམས་ཏེ། བསྐལ་བ་བགྲང་བར་བྱ་ཡི། ཐོག་མའི་སེམས་ནས་བརྩམས་ཏེ་ནི་མ་ཡིན་ནོ། །ཞེས་གསུངས་ལ། དེས་ན་ཐེག་བསྡུས་ལས། བཟང་དང་སྨོན་པའི་སྟོབས་ཅན་དང་། སེམས་བརྟན་ཁྱད་པར་འགྲོ་བ་ཡིས། ཞེས་དང་། དེའི་འགྲེལ་བར། བཟང་བོ་ནི་དགེ་བ་སྟེ། དེ་སྟོབས་དང་ལྡན་པར་གྱུར་པ་ནི་བཟང་པོའི་སྟོབས་ཅན་ཏེ། དེ་དེ་ལ་ཡོད་པའི་ཕྱིར་རོ། །སྨོན་པ་ནི་འདིར་སྨོན་ལམ་དུ་འདོད་དེ། དེ་ལ་ཡོད་པས་སྨོན་ལམ་ཀྱི་སྟོབས་ཅན་ནོ། །དེ་ལ་དགེ་བའི་རྩ་བའི་སྟོབས་ཅན་ནི། མི་མཐུན་པའི་ཕྱོགས་ཀྱིས་ཟིལ་གྱིས་མི་ནོན་པའི་ཕྱིར་རོ། །སྨོན་ལམ་གྱི་སྟོབས་ཅན་ནི། རྟག་ཏུ་དགེ་བའི་བཤེས་གཉེན་དང་ཕྲད་པའི་ཕྱིར་རོ། །སེམས་བརྟན་པ་ཉིད་ནི། མི་དགེ་བའི་གྲོགས་པོས་བཟློག་ཀྱང་བྱང་ཆུབ་ཀྱི་སེམས་ཡོངས་སུ་མི་གཏོང་བའི་ཕྱིར་རོ། །ཁྱད་པར་དུ་འགྲོ་བ་ནི། མཐོང་བའི་ཆོས་དང་ཚེ་རབས་ཕྱི་མ་ལ་དགེ་བའི་ཆོས་འཕེལ་བ་དང་ཡོངས་སུ་མི་ཉམས་པའི་ཕྱིར་རོ། །དེ་ལྟར་གང་གི་ཚེ་དགེ་བའི་རྩ་བ་དང་སྨོན་ལམ་གྱི་སྟོབས་ཅན་དང་། སེམས་བརྟན་ཏེ་བར་མ་དོར་མི་ལྡོག་པ་དང་། ཁྱད་པར་དུ་འགྲོ་བ་སྟེ། ཡོན་ཏན་ཅུང་ཟད་ཆོག་པར་མི་འཛིན་པ་དེ་ནས་བརྩམས་ཏེ་གྲངས་མེད་པ་གསུམ་བརྩམས་སོ། །ཞེས་དགེ་བ་དང་སྨོན་ལམ་གྱི་སྟོབས་དང་བྱང་ཆུབ་ཀྱི་སེམས་ཤིན་ཏུ་བརྟན་པ་དང་། རྒྱལ་སྲས་ཀྱི་སྤྱོད་པ་མཐའ་དག་གོང་ནས་གོང་དུ་འཕེལ་བའི་སྐབས་ཤིག་ནས་བསྐལ་བ་གྲངས་མེད་པའི་ཚོགས་ཀྱི་མགོ་བརྩམས་པར་གསུངས་སོ། །ཚོགས་ཀྱི་སྐད་དོད་ནི། སམྦྷར་ཞེས་པ་ཡིན་ལ། སམ་ནི་ཡང་དག་པར་འགྲུབ་པ་དང་། བྷ་ནི་ངོ་བོ་དང་། ར་ནི་འཛིན་པ་སྟེ། དེས་ན་བསོད་ནམས་དང་ཡེ་ཤེས་ཀྱི་ཚོགས་ནི། བྱང་ཆུབ་ཆེན་པོ་ཡང་དག་པར་འགྲུབ་པའི་ངོ་བོའམ། བྱང་ཆུབ་ཆེན་པོ་ནི་ཚོགས་གཉིས་ཀྱི་འབྲས་བུར་འཛིན་པའི་དོན་གྱིས་ན་ཚོགས་སོ། །བསོད་ནམས་ཞེས་པ་ནི། གཞན་ལ་ཕན་ཞིང་བསོད་པས་གསོས་ཤིང་གནས་པའི་མིང་དུ་བམ་གཉིས་ལས་གསུངས་ལ། སྤྱིར་བསོད་ནམས་ཞེས་པ་སྐབས་འགར་དགེ་བ་སྤྱི་དང་། སྐབས་འགར་འདོད་པའི་དགེ་བའི་ལས་ལ་འཇུག་པའི་སྐབས་ཀྱང་ཡོད་དོ། །འགྲེལ་བ་དོན་གསལ་ལས་སྙིང་རྗེ་ལ་སོགས་པ་འདི་དག་གིས་ཡང་དག་པར་འགྲུབ་པའི་ངོ་བོ་བྱང་ཆུབ་ཆེན་པོ་འཛིན་པར་བྱེད་པའི་ཕྱིར་ན། སྙིང་རྗེ་ལ་སོགས་པ་ཚོགས་ཡིན་པས་ཚོགས་ཀྱི་སྒྲུབ་པ་རྣམ་པ་བཅུ་བདུན་ནོ། །དེ་ལ་ཡེ་ཤེས་ཀྱི་ཚོགས་ནི། ནང་དང་། ཕྱི་དང་། དེ་གཉིས་ཀ་དང་། སྟོང་བ་དང་། ཆེན་པོ་དང་། དོན་དམ་པ་དང་། འདུས་བྱས་དང་། འདུས་མ་བྱས་དང་། མཐའ་ལས་འདས་པ་དང་། ཐོག་མ་དང་ཐ་མ་མེད་པ་དང་། དོར་བ་མེད་པ་དང་། རང་བཞིན་དང་། ཆོས་ཐམས་ཅད་དང་། མཚན་ཉིད་དང་། མི་དམིགས་པ་དང་། དངོས་པོ་མེད་པའི་ངོ་བོ་ཉིད་དང་། དངོས་པོ་དང་། དངོས་པོ་མེད་པ་དང་། རང་གི་ངོ་བོ་དང་། གཞན་གྱི་ངོ་བོ་སྟོང་བ་ཉིད་ཀྱི་བྱེ་བྲག་གིས་རྣམ་པ་ཉི་ཤུའོ། །ཞེས་སྟོང་ཉིད་ཉི་ཤུ་རྟོགས་པའི་ཡེ་ཤེས་ཀྱི་ཚོགས་གསུངས་སོ། །མདོ་སྡེ་རྒྱན་ལས། སྦྱིན་དང་ཚུལ་ཁྲིམས་བསོད་ནམས་ཀྱི། ཚོགས་ཡིན་ཤེས་རབ་ཡེ་ཤེས་ཀྱི། །གསུམ་པོ་གཞན་ནི་གཉིས་ཀ་སྟེ། །ལྔ་ཆར་ཡང་ནི་ཡེ་ཤེས་ཚོགས། །ཞེས་ཕར་ཕྱིན་དྲུག་གི་དང་པོ་གཉིས་བསོད་ནམས་ཀྱི་ཚོགས་དང་། ཐ་མ་ནི་ཡེ་ཤེས་ཀྱི་ཚོགས་ཡིན་ལ། བཟོད་པ་བརྩོན་འགྲུས་བསམ་གཏན་གསུམ་ནི་ཚོགས་གཉིས་ཀ་དང་། འཁོར་གསུམ་རྣམ་པར་མི་རྟོག་པའི་ཤེས་རབ་ཀྱིས་ཟིན་པའི་ཚེ་ཕར་ཕྱིན་དང་པོ་ལྔ་ཆར་ཡང་ཡེ་ཤེས་ཀྱི་ཚོགས་ཡིན་པར་གསུངས་ཤིང་། འཇུག་པ་ལས། སྦྱིན་སོགས་ཆོས་གསུམ་དེ་དག་ཕལ་མོ་ཆེར། །བདེ་བར་གཤེགས་པས་ཁྱིམ་པ་རྣམས་ལ་བསྔགས། །བསོད་ནམས་ཞེས་བྱའི་ཚོགས་ཀྱང་དེ་དག་ཉིད། །སངས་རྒྱས་གཟུགས་ཀྱི་བདག་ཉིད་སྐུ་ཡི་རྒྱུ། །ཞེས་ཕར་ཕྱིན་དང་པོ་གསུམ་ནི་བསོད་ནམས་ཀྱི་ཚོགས་དང་། གཟུགས་སྐུའི་རྒྱུའི་གཙོ་བོ་དང་། ཐ་མ་གཉིས་ནི་ཡེ་ཤེས་ཀྱི་ཚོགས་དང་། ཆོས་སྐུའི་རྒྱུའི་གཙོ་བོ་དང་། བརྩོན་འགྲུས་ཀྱི་ཕར་ཕྱིན་ཚོགས་གཉིས་ཀའི་རྒྱུར་གསུངས་ཤིང་། རྒྱུད་བླ་མ་ལས། བསོད་ནམས་ཕ་རོལ་ཕྱིན་པ་ལྔ། །དེ་ལ་རྣམ་གསུམ་རྟོག་མེད་པས། །དེ་རྫོགས་ཡོངས་སུ་དག་པ་ནི། །དེ་ཡི་མི་མཐུན་ཕྱོགས་སྤང་ཕྱིར། །ཞེས་ཕར་ཕྱིན་དང་པོ་ལྔ་བསོད་རྣམས་ཀྱི་ཚོགས་དང་། དེ་ལྔ་ལ་འཁོར་གསུམ་དུ་རྣམ་པར་མི་རྟོག་པའི་ཤེས་རབ་ཀྱི་ཕར་ཕྱིན་ནི། ཡེ་ཤེས་ཀྱི་ཚོགས་དང་། སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་ལྔའི་མི་མཐུན་པའི་ཕྱོགས་སྤོང་བྱེད་དུ་གསུངས་སོ། །དེ་ལྟར་ན་གཞུང་འདི་དག་གི་དོན་ནི། ཆོས་དབྱིངས་བསྟོད་འགྲེལ་ལས། དེ་ལས་རྒྱུད་བླ་མས་ནི། སྟོང་ཉིད་རྟོགས་པའི་ལྟ་བས་མ་ཟིན་པའི་ཕར་ཕྱིན་ལྔའི་དབང་དུ་བྱས་པ། འཇུག་པས་ནི། དང་པོ་གསུམ་གཙོ་ཆེ་བ་དང་། མདོ་སྡེ་རྒྱན་གྱིས་ནི། དང་པོ་གཉིས་དང་ཕྱི་མ་གཉིས་ཚོགས་ཀྱི་ངོ་བོའི་དབང་དུ་བྱས་ཤིང་། བར་པ་གསུམ་ལ་ཚོགས་གཉིས་ཀ་ཡོད་དབང་དུ་བྱས་སོ། །ཞེས་བཤད་དོ། །དེ་ཡང་བསྐལ་བ་གྲངས་མེད་པ་གསུམ་ཞེས་པའི་གྲངས་མེད་ཀྱི་དོན་ནི། །གལ་ཏེ་བསྐལ་བ་གྲངས་མེད་པར་ལམ་སྒོམ་དོགས་ན་གསུམ་གྱི་རྣམ་གཞན་མི་འཐད་ལ། གསུམ་ཡིན་ན་གྲངས་མེད་པར་མི་འཐད་དོ་ཞེ་ན། ཡེ་གྲངས་མེད་པ་ནི་མ་ཡིན་ཏེ། འདི་ནི། གཅིག་བཅུ་བརྒྱ་སྟོང་ཁྲི་འབུམ་དང་། ས་ཡ་བྱེ་བ་དུང་ཕྱུར་རྣམས། །རྐྱང་བ་ཡིན་པར་ཤེས་པར་བྱ། །ཐེར་འབུམ་ཁྲག་ཁྲིག་རབ་བཀྲམ་དང་། །གཏམས་དཀྲིགས་མི་འཁྲུགས་ཁྱད་འབྱིན་དང་། །ཞེས་པ་ནས། གྲངས་མེད་པ་ནི་མཐའ་མ་ཡིན། །ཞེས་གསུངས་པ་ལྟར་གྱི་གྲངས་ཀྱི་གནས་དྲུག་ཅུ་པ་ལ་གྲངས་མེད་ཅེས་མིང་གིས་བཏགས་པ་དེའི་དབང་དུ་བྱས་པར་གཞུང་འགའ་ཞིག་ལས་གསུངས་ལ། བཤད་པའི་རྣམས་གྲངས་གཞན་ནི། བྱང་ས་ལས། བསྐལ་བ་ཆེན་པོ་གྲངས་མེད་པ་དང་པོས་ནི་མོས་པས་སྤྱོད་པ་ལ་གནས་པ་ལས་ཡང་དག་པར་འདས་ནས་རབ་ཏུ་དགའ་བ་ལ་གནས་པ་འཐོབ་སྟེ། དེ་ཡང་རྟག་ཏུ་འབད་པས་འཐོབ་ཀྱི་མི་འབད་པས་ནི་མ་ཡིན་ནོ། །བསྐལ་བ་ཆེན་པོ་གྲངས་མེད་པ་གཉིས་པས་ནི་རབ་ཏུ་དགའ་བ་ལ་གནས་པ་ནས། མཚན་མ་མེད་པ་ལ་གནས་པ་ལ་རྩོལ་བ་དང་བཅས་པའི་བར་ལས་འདས་ཏེ། མཚན་མ་མེད་པ་ལ་གནས་པ་ལྷུན་གྱིས་གྲུབ་པ་འཐོབ་པར་འགྱུར་རོ། །དེ་ནི་ངེས་པ་ཁོ་ན་སྟེ། འདི་ལྟར་བསམ་པ་དག་པའི་བྱང་ཆུབ་སེམས་དེ་ནི་ངེས་པར་འབད་པའི་ཕྱིར་རོ། །བསྐལ་བ་ཆེན་པོ་གྲངས་མེད་པ་གསུམ་པས་ནི། མཚན་མ་མེད་པ་ལྷུན་གྱིས་གྲུབ་པ་དང་སོ་སོ་ཡང་དག་པར་རིག་པ་ལ་གནས་པ་ལས་ཡང་དག་པར་འདས་ནས་བྱང་ཆུབ་སེམས་དཔའི་གནས་པ་མཆོག་འཐོབ་པར་འགྱུར་རོ། །དེ་ལ་བསྐལ་བ་གྲངས་མེད་པ་ནི་གཉིས་སུ་རིག་པར་བྱ་སྟེ། བསྐལ་བ་ཆེན་པོ་གང་ཡིན་པ་དེ་ཡང་ཉིད་མཚན་དང་། ཟླ་བ་དང་ཟླ་བ་ཕྱེད་དུ་བགྲང་བའི་ཚུལ་གྱིས་དུས་དཔག་ཏུ་མེད་པའི་ཕྱིར། གྲངས་མེད་པ་ཞེས་བྱའོ། །བསྐལ་བ་ཆེན་པོ་དེ་དག་བགྲང་བའི་ཚུལ་གྱིས་བགྲང་བ་ཐམས་ཅད་ལས་འདས་པའི་གྲངས་གང་ཡིན་པ་དེ་ཡང་གྲངས་མེད་པ་ཞེས་བྱ་སྟེ། བསྐལ་བ་གྲངས་མེད་པ་སྔ་མ་ཤོས་ཀྱིས་ནི། བསྐལ་བ་གྲངས་མེད་པ་མི་ཉུང་བ་ཞིག་གིས་བྱང་ཆུབ་འཐོབ་པར་འགྱུར་རོ། །བསྐལ་བ་གྲངས་མེད་པ་ཕྱི་མ་ཤོས་ཀྱིས་ནི། གསུམ་ཁོ་ནས་འཐོབ་ཀྱི་ལྷག་པས་ནི་མ་ཡིན་ཏེ། སུ་བརྩོན་འགྲུས་རྩོམ་པ་ཆེ་པོའི་ཡང་ཆེན་པོས་སྦྱོར་བ་དེའི་ནང་ན་ལ་ལ་ནི་བར་གྱི་བསྐལ་བ་མང་པོ་ཞིག་འདུམས་པར་བྱེད་དོ། །ལ་ལ་ནི་བསྐལ་བ་ཆེནཔོ་དག་གི་བར་དུ་འདུམས་པར་བྱེད་ཀྱི། གྲངས་མེད་པ་འདུམས་པར་བྱེད་པ་ནི་འགའ་ཡང་མེད་པར་རིག་པར་བྱའོ། །ཞེས་གསུངས་ལ། དེ་ཡང་སྟོན་པ་ཐུཡགས་རྗེ་ཅན་འདི་ཉིད་སྔོན་བྱང་ཆུབ་སེམས་དཔའ་བྲམ་ཟེ་ཁྱེའུ་ཞིག་ཏུ་གྱུར་པའི་ཚེ། སངས་རྒྱས་སྐར་རྒྱལ་རིའི་ཕུག་ཞིག་ན་མེ་ཁམས་ལ་སྙོམས་པར་ཞུགས་པ་མཐོང་ནས་རྐང་ཡ་གཅིག་གིས་འགྲེང་སྟེ་ཞག་བདུན་གྱི་བར་དུ། སྐྱེས་བུ་ཁྱུང་མཆོག་ཁྱོད་འདྲའི་དགེ་སྦྱོང་ཆེན་པོ་གཞན་དག་ལྷ་ཡུལ་ས་ལ་མེད། །འཇིག་རྟེན་འདི་ནའང་ཡོད་པ་མ་ཡིན་རྣམ་ཐོས་བུ་ཡི་གནས་ནའང་ཡོད་མ་ཡིན། །ལྷ་ཡི་ཕོ་བྲང་གནས་མཆོག་དག་ནའང་ཡོད་མིན་ཕྱོགས་དང་ཕྱོགས་མཚམས་དག་ནའང་མེད། །རི་དང་ནགས་སུ་བཅས་པའི་ས་སྟེང་རྒྱས་པ་ཀུན་ཏུ་ཡུལ་ཞིག་ག་ལ་ཡོད། །ཅེས་དེ་ལྟར་སྐོར་བ་བྱས་ཏེ་བསྟོད་པས་བསྐལ་བ་དགུའི་ཚོགས་འདུམས་པར་ལུང་སྨན་གྱི་གཞི་ལས། རིན་ཆེན་བཀྲ་བའི་ཕུག་ན་ཡང་། །སངས་རྒྱས་སྐར་རྒྱལ་ལ་ནི་ངས། །དེ་ཚེ་ཚིགས་བཅད་གཅིག་བསྟོད་པས། །བསྐལ་བ་དགུ་ནི་ཕྱིར་བསྙིལ་ཏོ། །ཞེས་དང་། མདོ་གཞན་ལས་ཀྱང་། བྲམ་ཟེ་དམ་པ་དེ་རིང་དུ། །དེ་བཞིན་གཤེགས་པ་ལེགས་བསྟོད་པའི། །སྟོབས་དང་བརྩོན་འགྲུས་འདི་ཡིས་ནི། །བསྐལ་བ་དགུ་ཞིག་འདུམས་པར་འགྱུར། །ཞེས་འབྱུང་བ་ལྟར་རོ།།

འདིར་སྨྲས་པ། བྱམས་དང་སྙིང་རྗེ་འཚངས་པའི་ཆུ་གཏེར་ལས། །བྱང་ཆུབ་སེམས་ཀྱི་ཟླ་བ་དཀར་པོའི་ཕྲེང་། །ས་ཆེན་བཅུ་གཉིས་ཁྱིམ་དུ་ཤར་བའི་ཚེ། །གཞན་ཕན་ཀུན་ཏུ་བཟང་པོའི་འོད་ཟེར་འཕྲོ། །དེ་ཡང་བྱང་ཆུབ་ཆེན་པོར་འདུན་པའི་སེམས། །དཀར་ཆོས་ཀུན་གྱི་གཞི་རྟེན་ས་དང་མཚུངས། །ཕན་བདེའི་བསམ་པ་འགྱུར་བ་མེད་པའི་སེམས། །དྲི་མེད་འཛམ་བུ་ཆུ་ཡི་གསེར་དང་འདྲ། །ལྷག་བསམ་ཆེན་པོ་གོང་དུ་འཕེལ་བའི་སེམས། །རྒྱུ་སྐར་ལམ་ནས་ཟླ་བ་ཚེས་པ་བཞིན། །མཁྱེན་པ་གསུམ་ལ་ཡང་དག་སྦྱོར་བའི་སེམས། །སྒྲུབ་པའི་བུད་ཤིང་སྲེག་པའི་མེ་དང་མཚུངས། །བདོག་པ་ཐམས་ཅད་གཏོང་འདོད་སྦྱིན་པའི་སེམས། །ནམ་ཡང་ཟད་པ་མེད་པའི་གཏེར་དང་འདྲ། །ཚུལ་ཁྲིམས་ཕུང་པོ་ཡོངས་སུ་རྫོགས་པའི་སེམས། །རིན་ཆེན་འབྱུང་གནས་དག་གི་རྗེས་སུ་འགྲོ། །རྣམ་པར་འཚེ་བས་གཡོ་མེད་བཟོད་པའི་སེམས། །ཤིན་ཏུ་ཟབ་པའི་རྒྱ་མཚོ་ཆེན་པོ་འདྲ། །བརྩོན་འགྲུས་ཆེན་པོའི་འོད་སྣང་འཕྲོ་བའི་སེམས། །རྡོ་རྗེ་རིན་པོ་ཆེ་དང་ཡང་དག་མཚུངས། །གཡོ་མེད་བསམ་གཏན་ཕ་རོལ་ཕྱིན་པའི་སེམས། །ཤིན་ཏུ་བརྟན་པ་རི་ཡི་རྒྱལ་པོ་བཞིན། །ལྔ་རིག་ཤེས་རབ་ཕ་རོལ་ཕྱིན་པའི་སེམས། །འགྲོ་བའི་ནད་བརྒྱ་སེལ་བའི་སྨན་དང་མཚུངས། །ཐབས་ལ་མཁས་པ་རིང་དུ་སོང་བའི་སེམས། །འགྲོ་དོན་མཛད་པའི་བཤེས་གཉེན་དཔེ་རུ་བྱས། །དབང་བཅུ་ཐོབ་པ་སྨོན་ལམ་ཆེན་པོའི་སེམས། །དགོས་འདོད་ཀུན་འབྱུང་ཡིད་བཞིན་ནོར་བུ་འདྲ། །ལེགས་པའི་བློ་གྲོས་སྟོབས་དང་ལྡན་པའི་སེམས། །སྣ་ཚོགས་འབྲས་བུ་སྨིན་བྱེད་ཉི་མ་བཞིན། །ཡེ་ཤེས་སྣང་བའི་གཏེར་དང་འགྲོགས་པའི་སེམས། །ཀུན་ཏུ་སྙན་པའི་དྲི་ཟའི་གླུ་དབྱངས་འདྲ། །མངོན་པར་ཤེས་པ་ལྔ་དང་ལྡན་པའི་སེམས། །ཐོགས་མེད་མཐུ་ལྡན་རྒྱལ་པོ་ཆེན་པོ་བཞིན། །བསོད་ནམས་ཡེ་ཤེས་ཚོགས་གཉིས་ལྡན་པའི་སེམས། །མི་ཟད་རིན་ཆེན་མང་པོའི་མཛོད་དང་མཚུངས། །བྱང་ཆུབ་ཕྱོགས་ཀྱི་ཆོས་དང་མཐུན་པའི་སེམས། །ཀུན་ཏུ་རྒྱུ་བའི་ལམ་པོ་ཆེ་ལྟ་བུ། །སྟོང་ཉིད་སྙིང་རྗེ་སྙིང་པོ་ཅན་གྱི་སེམས། །ཕྱོགས་སུ་འགྲོ་བའི་བཞོན་པ་བཟང་པོ་བཞིན། །གཟུངས་དང་སྤོབས་པ་ཆེན་པོ་ལྡན་པའི་སེམས། །ལེགས་བཤད་མི་ཟད་བཀོད་མའི་ཆུ་དང་མཚུངས། །ཆོས་ཀྱི་སྡོམ་བཞི་དག་དང་ལྡན་པའི་སེམས། །ཡིད་དུ་འོང་བའི་སྒྲ་སྙན་སྒྲོགས་པ་བཞིན། །བགྲོད་པ་གཅིག་པའི་ལམ་དང་ལྡན་པའི་སེམས། །རིས་སུ་མ་ཆད་ཆུ་བོ་ཆེན་པོ་བཞིན། །ཆོས་ཀྱི་སྐུ་དང་ལྡན་པའི་བྱང་ཆུབ་སེམས། །ཕུན་ཚོགས་ཆར་བ་འབེབས་པའི་སྤྲིན་དང་མཚུངས། །ཟླ་ཚེས་ལྟ་བུའི་ཐུགས་མཆོག་བསྐྱེད་པ་ནས། །འོད་ཟེར་ཆེན་པོའི་དབང་བསྐུར་ཐོབ་པའི་བར། །གྲངས་མེད་ཚོགས་རྫོགས་ས་ཡི་ཡོན་ཏན་ཆོས། །བརྒྱ་ཕྲག་བཅུ་གཉིས་གོང་ནས་གོང་དུ་ཐོབ། །དེ་ལྟར་རྒྱལ་སྲས་ངང་བའི་རྒྱལ་པོ་ནི༑༑ཟབ་དར་རྒྱ་ཆེའི་གཤོག་དཀར་རིང་དུ་གཡོ། །གྲངས་མེད་ཚོགས་ཀྱི་རླུང་གི་ཤུགས་སྟོབས་ཀྱིས། །རྒྱལ་བའི་ཡོན་ཏན་རྒྱ་མཚོའི་ཕ་རོལ་འགྲོ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ།།

Tags:

🔥 Trending searches on Wiki བོད་སྐད:

ཁྲི་ཆེན་རྡོ་རྗེ་འཆང་ངག་དབང་ཀུན་དགའ་ཐེག་ཆེན་དཔལ་འབར་འཕྲིན་ལས་བསམ་འཕེལ་དབང་གི་རྒྱལ་པོ།དཔལ་དུས་ཀྱི་འཁོར་ལོ་སྤེན་པའི་གདུབ་ཀོར།རོང་པོ་སྐལ་ལྡན་བློ་བཟང་ཆོས་གྲགས་རྒྱ་མཚོ།དམར་པོ།ཉི་ཧུང་འབྲས།སེ་ར་དགོན།ཚེ་རིང་རྣམ་དྲུག་སིག་གི་ཆོས་ལུགས།ཀོ་ཊི་ཌི་ཨའི་བོ་རི།རྩ་རྫས་ཀྱི་དུས་འཁོར་རེའུ་མིག།ས་སྐྱ་དགོན།ལོ་སྐོར་བཅུ་གཉིས་སྒྲོལ་མའི་མཎྜལ་བཞི་ཆོག་ལོ་གསར་ཀུན་རྟོགས་བརྒྱད་ཅུ་ལྡེ་སྣོལ་ནམ།རིག་རྩལ་བསྐྱར་དར་སངས་རྒྱས་བཅོམ་ལྡན་འདས་ཀྱི་མཛད་པ་བཅུ་གཉིས་པུ་ཨེ་ནོ་སི་ཨས་རི་སི།བོད་ཀྱི་སྐད་ཡིག།འབྲུག་གྲུ།ཏུ་ཝ་ལུ།ཝང་ཧྲེ་མིན།གཡགབེ་རི་འཇིགས་མེད་ཀྱི་སྙན་རྩོམ་དེབ་གསུམ་པ།བསེ་རུ།ལམ་གཙོ་རྣམ་གསུམ་ཟླ་༤ཚེས་༢ཉིན་སོ་ཁྲི་བཙན་པོ།ཧྲའོ་ལིན་དྲག་རྩལ།ཇི་བའོ་ཊི། (གྲོང་རྡལ།)གསང་ཆེན་རྒྱུད་སྨད་གྲྭ་ཚང་མོ་སི་ཁོ།བདེ་སྨོན་བསྡུས་པ་ས་སྐྱ་པ།ཀ་ཀོ་ལ།འཇར་མན།འབྲས་ལྗོངས།དབང་ཕྱུགཟླ་༣ཚེས་༢༧ཉིན་མོ་རོ་ཁོ།ཆུ།བར་དོ་དྲུག་གི་རྩ་ཚིག་བོད་ཀྱི་དུས་ཆེན་ཕྱོགས་བསྒྲིགས།དངོས་ཁམས་རིག་པ།ཝི་ཏི་ནམ།ཁ་ཆེའི་ཆོས་ལུགས།འཕྲུལ་འཁོར།ནི་སྒྲ་དགར་བརྣན་གྱི་སྒྲ་ལ་འཇུག་ཚུལ་བོད་ཟླ་༡༢ཚེས་༥ཉིན་རིགས་ལྔ་མཁའ་འགྲོ།ས་སྐྱ་པཎ་ཆེན་ཀུན་དགའ་རྒྱལ་མཚན།བཙན་པོའི་བང་སོ།པཎ་ཆེན་སྐུ་ཕྲེང་དང་པོ་མཁས་དགེ་ལེགས་དཔལ་བཟང་་ཀྲུང་གོགོང་ས་མཆོགཁ་ན་ཌ།དགེ་བ་བཅུ་དེང་ཁྲི་བཙན་པོ།མཚུར་བུ་དགོན།ཁ་ཆེའི་ཡུལ་ལེགས་སྦྱར་སྐད།སུམ་ཅུ་པའི་རྩ་ཚིག་ཨར་པོ་ཐེ་ཨའེ་དབྱིན་སི་ཐེན།🡆 More