རྨི་ལམ་བརྟག་ཐབས་

རྨི་ལམ་ངན་པ་རྨིས་པ་ལ་འབྱུང་རྐྱེན་མང་དུ་མཆིས་པ་སྟེ། ཉིན་རྒྱུན་གྱི་འཚོ་བའི་ནང་བྱུང་བའི་དོན་དག་ག་གེ་མོའམ། ལུས་སེམས་ཀྱི་ངལ་དུབ་དང་ན་ཚ་ལྟ་བུའམ། ཡང་ན་ཁྲག་དང་རླུང་གི་འཁོར་སྐྱོད་བདེ་བར་རྒྱུ་མ་ཐུབ་པའམ། འབྱུང་བཞིའི་བྱེད་པ་དོ་མཉམ་མ་ཐུབ་པ་སོགས་རྒྱུ་རྐྱེན་གང་རུང་ཞིག་ལ་ཁག་བྱས་ནས་དེས་སེམས་ཀྱི་ཆ་ལ་ཤུགས་རྐྱེན་ཐེབས་པ་ལས་བྱུང་བར་བསམ།

གལ་སྲིད་རྨི་ལམ་ངན་པ་དེ་དག་ལུས་དང་སེམས་ཀྱི་ཁམས་མ་སྙོམས་པའི་དབང་གིས་བྱུང་བ་ཡིན་ཚེ། ལུས་པོ་ལ་བདག་སྐྱོང་དང་སེམས་ཁམས་ལ་སྙོམ་སྒྲིག་གང་ལེགས་བྱས་པས་ཆོག་སྟེ། ནམ་ཁོམ་ལ་རི་བོའི་རྩེ་མོར་འགོས་ནས་རྒྱང་རིང་གི་མཛེས་ལྗོངས་ལ་ལྟ་བ་སོགས་ཁམས་གཡེང་གང་འཚམ་གྱིས་ཕན་ཐོགས་ཆེན་པོ་ཐོབ་ངེས། གང་ལྟར་དེའི་རྒྱུ་རྐྱེན་གསལ་བོར་རྙེད་རྗེས་ཐབས་དང་སྨན་སོགས་གང་འཚམ་བསྟེན་ནས་བསལ་ཅི་ཐུབ་བྱ་བ་ལས་ཐམས་ཅད་ལ་རྨོངས་དད་རང་བཞིན་གྱི་ལྟ་སྟངས་དང་འདུ་ཤེས་བཟུང་མི་རིགས།

གལ་སྲིད་རྨི་ལམ་ངན་པ་གཅིག་ཡང་དང་བསྐྱར་དུ་རྨིས་པ་བདེན་ཚེ་ད་ནི་ཕལ་ཆེར་སྔོན་བྱས་ཀྱི་ཉེས་སྒྲིབ་ལ་བསམ་པར་བྱ་རུང་སྟེ། གཡང་དུ་ལྷུང་བ་དང་། མེས་སྲེག་པ། གངས་ཀྱི་ཁུགས་ནས་གྲང་བས་གདུང་བ། གཞན་གྱིས་ཚུར་རྡུང་བ་དང་སྡོམ་པ་སོགས། ལན་གཅིག་ཙམ་མ་ཡིན་པར་བསྟུད་མར་རྨིས་ཚེ་ལས་སྒྲིབ་ཀྱི་སྣང་བ་དང་ཕལ་ཆེར་འབྲེལ་བར་གོ་ཆོག་ཕྱིར། ངེས་པར་དེ་དག་འདག་ཆེད་ལ་ཆོས་སྒྲུབ་ཉམས་ལེན་སོགས་བྱ་དགོས་ལ། འོན་ཀྱང་དེ་འདྲ་ལན་གཅིག་དང་གཉིས་ཙམ་ལས་མ་བྱུང་ན་ནི་སྔོན་བྱས་ཀྱི་ལས་སྒྲིབ་ལ་དགོངས་མི་རུང་།

མཚམས་ལ་ལར་ང་ཚོ་གཟུགས་མེད་ཀྱི་སེམས་ཅན་ག་གེ་མོ་ལྟ་བུས་མར་གནོན་བཞིན་པའི་སྒང་ལ་རང་ཉིད་གཉིད་ལས་ཡོངས་སུ་སད་འདུག་པ་ལྟ་བུར་སྣང་ཡང་ད་དུང་ཡང་འཕག་འཚག་དང་ཡར་ལངས་དཀའ་བ་སྟེ། དེ་དང་དེ་འདྲ་བ་རྣམས་མི་མ་ཡིན་ལ་སོགས་པས་ཚུར་གནོད་པ་ལྟ་བུར་སྣང་ཡང་། དེ་འདྲའི་ཚུལ་དག་སྐབས་ལ་ལར་རླུང་ཁྲག་གཉིས་བདེ་བར་རྒྱུ་མ་ཐུབ་པས་ཀྱང་རྒྱུན་པར་འབྱུང་ངེས་པ་ཤེས་པར་བྱའོ། ། དེ་ལྟ་ནའང་དེ་དག་མི་མ་ཡིན་ལ་སོགས་པའི་སེམས་ཅན་གཞན་གྱིས་དོན་དངོས་ཐོག་ཚུར་གནོད་པ་རྩོམ་བཞིན་པ་ཐག་གིས་ཆོད་ཚེ་དད་པ་རྩེ་གཅིག་གིས་ཤེས་རབ་སྙིང་བོ་ལན་མང་གདོན་པར་འོས།

ཁ་ཅིག་གིས་རྨི་ལམ་གང་རྨིས་པ་དེས་རང་ཉིད་ཀྱི་མ་འོངས་པའི་ལུང་བསྟན་ལྟ་བུ་ཡིན་ཟེར་མོད་མཐའ་གཅིག་ཏུ་དེ་འདྲར་ངེས་པའི་སྐབས་ཧ་ཅང་ཉུང་། དེ་ལྟ་ནའང་གལ་སྲིད་ཁྱོད་ཀྱི་རྨི་ལམ་དེ་ནམ་སྟོད་ཀྱི་དུས་ཚོད་གསུམ་པ་དང་བཞི་བའི་བར་དུ་བཏང་བ་ཡིན་ན་ནི་མ་འོངས་ལུང་བསྟན་དུ་མི་འགྲོ་བའི་ངེས་པའང་མེད་པས། ཏག་ཏག་དུས་ཚོད་དེ་ལས་བརྒལ་བའི་སྐབས་གང་ཞིག་ལ་རྨི་ལམ་ཅི་འདྲ་ཞིག་རྨིས་ཀྱང་སེམས་ཀྱི་སྣང་བ་ཚུར་འཕྲོས་པ་ཙམ་ལས་གཞན་དུ་ཅི་ཡང་མ་ཡིན་ནོ་ཞེས་རང་ཅག་གི་སྲོལ་རྒྱུན་ལ་དེ་ལྟར་དུ་གྲགས་སོ། །