འཆི་ཁ་བར་དོའི་ངོ་སྤྲོད་གསལ་བའི་མེ་ལོང་འོད་གསལ་ཉི་མའི་སྙིང་པོ་
༄༅། །ཟབ་ཆོས་ཞི་ཁྲོ་དགོངས་པ་རང་གྲོལ་ལས། འཆི་ཁ་བར་དོའི་ངོ་སྤྲོད་གསལ་བའི་མེ་ལོང་འོད་གསལ་ཉི་མའི་སྙིང་པོ་ཞེས་བྱ་བ་བཞུགས་སོ། ། ན་མོ་གུ་རུ། སྣང་བ་ཐིམ་དང་རྟོག་པ་ཐིམ། །རགས་པ་ཐིམ་དང་ཕྲ་བ་ཐིམ། །ཐིམ་པའི་རྗེས་ལ་འོད་གསལ་ངང་། །ཟུང་འཇུག་སྐུ་ནི་ངེས་པར་འཆར། །ཟུང་འཇུག་ལ་ཡང་རྣམ་གཉིས་ཏེ། །སློབ་པ་དང་ནི་མི་སློབ་པའོ། །མི་སློབ་པ་རུ་གྱུར་ཙམ་ན། །འབྲས་བུ་ཐོབ་ཅེས་བསྟན་པ་ཡིན། །སྣང་བའམ་རགས་པ་ཐིམ་པ་ལ་གཉིས་ཏེ། ཡུལ་ཐིམ་པ་དང་། འབྱུང་བ་ཐིམ་པའོ། །དང་པོ་ཡུལ་ཐིམ་པ་ནི། གཟུགས་སྒྲ་ལ་ཐིམ་ཙམ་ན།མིག་ཅུང་ཟད་རྟུལ་དུ་འགྲོ་སྟེ། རང་གི་ཚོར་རུང་མ་ཚོར་རུང་རྒྱང་མིག་མི་མཐོང་། སྒྲ་དྲི་ལ་ཐིམ་ཙམ་ན། རྣ་བ་ཅུང་ཟད་འོན་དུ་འགྲོ། དྲི་རོ་ལ་ཐིམ་ཙ་ན་སྣས་ཅུང་ཟད་དྲི་མི་ཚོར། རོ་རེག་བྱ་ལ་ཐིམ་ཙམ་ན་ལྕེས་རོ་མི་ཚོར། རེག་བྱ་འབྱུང་བ་ཆེན་པོ་བཞི་ལ་ཐིམ་པའི་དུས་སུ་ལུས་ཀྱི་འཇམ་རྩུབ་ལ་སོགས་པ་རེག་བྱ་ཅུང་ཟད་མི་ཚོར་བས་ཡུལ་ཐིམ་པའོ། །འབྱུང་བ་ཐིམ་པ་ནི། ས་ཆུ་ལ་ཐིམ་ཙ་ན་ཆུ་ནང་དུ་རྡོ་བོར་བ་བཞིན་དུ་སོང་ནས་ལུས་དམའ་ཐིམ་ཐིམ་སོང་བ་སྙམ་བྱེད༔ ང་ཡར་ཁྱོགས་དང་ཟེར་དགོས་པ་འོང་། ཆུ་མེ་ལ་ཐིམ་ཙ་ན་གྲེ་ཕུག་སྐམ་ཆམ་གྱིས་འགྲོ། ནད་གཡོག་པས་བལྟས་ཙ་ན་ཁ་སྣའི་ཆུ་འབྲུག་པ་འམ། ཡང་ན་སྐམ་ཆོམ་ལ་གདོང་པ་ཧོམ་སྐྱ་བོར་འགྲོ། མེ་རླུང་ལ་ཐིམ་ཙ་ན་རྐང་མཐིལ་ལ་སོགས་པའི་དྲོད་འཆོར་རོ། །རླུང་རྣམ་པར་ཤེས་པ་ལ་ཐིམ་ཙ་ན་དབུགས་མི་བདེ་ཁ་ནང་དུ་སྡུད་མི་ཤེས་ཏེ། ངར་ངར་བ་རྐང་ལག་ཡབ་ཡབ་ལ་ཤི་འཕྲས་བྱེད་པ་འོང་། དེ་དག་ནི་འབྱུང་བ་ཐིམ་པའོ། །དེ་ལྟར་ཡུལ་ཐིམ་པ་དང་། འབྱུང་བ་ཐིམ་པ་གཉིས་སོ། །སྣང་བ་ཐིམ་པ་ཞེས་བྱ་བ་དང་རགས་པ་ཐིམ་པ་ཞེས་བྱ་བ་བསྟན་ཏོ། །ད་ནི་རྟོག་པ་ཐིམ་པའམ་ཕྲ་བ་ཐིམ་པའི་ཐིམ་ལུགས་ནི།རྣམ་ཤེས་སྣང་བ་ལ་ཐིམ་ཙ་ན། ཕྱི་དབུགས་ཆད། ནང་དབུགས་མ་ཆད་པའི་སྐབས་སུ་སྐད་ཅིག་མ་བཞི་ལ་ཕྱི་རྟགས་དང་ནང་རྟགས་འཆར་ཏེ། སྐད་ཅིག་མ་དང་པོ་ལ།ཕྱི་རྟགས་ཟླ་བ་ཤར་བ་ལྟ་བུ་སྣང་བ་དཀར་ལམ་པ་ཞིག་འོང་། ནང་རྟགས་སུ་དུ་བ་ལྟ་བུ་ཤེས་པ་བན་བུན་དུ་འོང་། དེ་ལ་སྣང་བ་ཐིམ་པའི་ཡེ་ཤེས་ཞེས་བྱ་སྟེ། ཞེ་སྡང་ལས་གྱུར་པའི་རྟོག་པ་སུམ་ཅུ་སོ་གསུམ་འགགས་པས་སྟོང་པ་ཞེས་བྱའོ། །གཉིས་པ་ལ། ཕྱི་རྟགས་ཉི་མ་ཤར་བ་ལྟ་བུ་སྣང་བ་དམར་ལམ་པ་གཅིག་འོང་། ནང་རྟགས་སུ་སྲིན་བུ་མེ་ཁྱེར་ལྟ་བུའི་ཡེ་ཤེས་སྐེམ་པ་ཞིག་འོང་། དེ་ལ་སྣང་བ་མཆེད་པའི་ཡེ་ཤེས་བྱ་སྟེ། འདོད་ཆགས་ལས་གྱུར་པའི་རྟོག་པ་བཞི་བཅུ་འགགས་པས་སྟོང་པ་ཆེན་པོ་ཞེས་བྱའོ། །གསུམ་པ་ལ། ཕྱི་རྟགས་སུ་མུན་པ་སྲོས་པ་ལྟ་བུ་ནག་ཐིམས་པ་ཞིག་འོང་།ནང་རྟགས་སུ་མར་མེ་རླུང་གིས་མ་བསྐྱོད་པ་ལྟ་བུ་གསལ་ལ་རྟོག་པ་མེད་པའི་སེང་ངེ་བ་ཅིག་འོང་། དེ་ལ་སྣང་བ་ཉེ་བར་ཐོབ་པའི་ཡེ་ཤེས་ཞེས་བྱ་སྟེ། གཏི་མུག་ལས་གྱུར་པའི་རྟོག་པ་བདུན་འགགས་པས་ཤིན་ཏུ་སྟོང་པ་ཞེས་བྱའོ། །བཞི་པ་ལ། ཕྱི་རྟགས་ཐོ་རངས་སྐྱ་རེངས་ཤར་བ་ལྟ་བུ་སྐྱ་སེང་ངེ་བ་ཅིག་འོང་། ནང་རྟགས་ནམ་མཁའ་སྤྲིན་དང་བྲལ་བ་ལྟ་བུའི་ཆོས་ཉིད་མངོན་དུ་བྱེད་དོ། །དེ་ལ་འོད་གསལ་ཞེས་བྱ། རང་བཞིན་བརྒྱད་ཅུ་ལ་སོགས་པའི་ཕྲ་རགས་ཐམས་ཅད་འགགས་པས་ཐམས་ཅད་སྟོང་པ་ཞེས་བྱའོ། །དེ་ལྟ་བུའི་འོད་གསལ་ཐམས་ཅད་སྟོང་པ་སྟེ། མཚམས་མེད་པ་ལྔའི་ལས་བྱས་པ་ཡན་ཆད་ཀྱི་སེམས་ཅན་ཐམས་ཅད་ཀྱི་རྒྱུད་ལ་མི་མྱོང་མི་སྲིད་དོ། །དེ་ལྟ་བུའི་འོད་གསལ་དེའི་མིང་གི་རྣམ་གྲངས་ནི། འཆི་བ་འོད་གསལ་ཞེས་བྱ། རང་བཞིན་འོད་གསལ་ཞེས་བྱ། འཆི་བ་ཆོས་སྐུ་ཞེས་བྱ། འཆི་བ་དོན་དམ་པའི་བདེན་པ་ཞེས་བྱ། འཆི་བ་ཤེས་རབ་ཀྱིས་ཕ་རོལ་ཏུ་ཕྱིན་པ་ཞེས་བྱ་སྟེ། རྒྱུད་རྣམས་སུ་གྲགས་པའོ། །སེམས་ཅན་གྱིས་དེ་ཉམས་སུ་མྱོང་མོད་ཀྱི། གདམས་ངག་མེད་པས་ངོ་མ་ཤེས་པའི་སྐྱོན་གྱིས་འཁོར་བར་འཁྱམས་པའོ། །དེ་བས་ན་བར་དོའི་གདམས་ངག་ཤིན་ཏུ་གཅེས་སོ། །དེ་ངོ་མ་ཤེས་པས་ཆུ་ལས་ཉ་འཕར་བ་ལྟར་བར་དོ་ཡིད་ལུས་སུ་གྲོང་གིས་ལྷང་ངོ་། །ལུས་དེ་ཡི་མཚན་ཉིད་ནི། སྔོན་འབྱུང་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཐོགས་མེད་ལུས། །ལས་ཀྱི་རྫུ་འཕྲུལ་ཤུགས་དང་ལྡན། །རིགས་མཐུན་ལྷ་མིག་དག་པས་མཐོང་། །ཞེས་གསུངས་པས། སྔོན་འབྱུང་ཞེས་པ་ནི་བར་དོའི་ལུས་གཉིས་ལ་འགྲོ་སྟེ། སྐྱེ་བ་སྔ་མར་བཞག་པའི་ལུས་དང་། སྐྱེ་བ་ཕྱི་མར་ལེན་པའི་ལུས་སོ། །ད་ཡང་ཞག་བདུན་ཕྲག་དང་པོའི་དབང་དུ་བྱས་ན། ཞག་ཕྱེད་དང་བཞི་ཕན་ཆད་སྐྱེ་བ་སྔོན་མའི་ལུས་སུ་སྣང་ཞིང་བག་ཆགས་སྔོན་མ་ལ་སྤྱོད་དེ། སྔོན་གྱི་ཡུལ་དང་ཁང་ཁྱིམ་ལ་སོགས་པར་ཕྱིན་པ་དང་།༼གཉེན་འདུན་༽ལ་མ་དག་པའི་སྒྱུ་ལུས་ཞེས་བྱའོ། སྣང་བ་སྣ་ཚོགས་ལ་ཕྱད་ཕྱོད་ཡད་ཡུད་འོང་སྟེ་བར་དོ་ཡིན་པར་ངོ་ཤེས་པ་མི་ཡོང་ངོ་། །དེ་ལ་མ་དག་པའི་སྒྱུ་ལུས་ཞེས་བྱའོ། །དེར་ཞག་ཕྱེད་དང་བཞི་ལོན་ནས། སྐྱེ་བ་ཕྱི་མའི་ལུས་སུ་སྣང་བས་བར་དོའི་གདམས་ངག་མེད་པ་རྣམས་ནི། ཨ་བ་ཤི་ནས་འདུག་པ་སྙམ་པ་ཅིག་འོང་སྟེ། སྔར་གྱི་ཡོ་བྱད་དང་དགྲ་ལ་སོགས་པ་ལ་ཆགས་སྡང་དྲག་པོ་དེ་ཉིད་དུ་སྐྱེས་ཏེ། དེས་སྡུག་བསྔལ་གྱི་ཁ་བརྒྱུད་དེ། ཁམས་གསུམ་དུ་འཁོར་རོ། །དེས་ན་བར་དོའི་གདམས་ངག་འདི་མེད་པའི་ཐབས་མེད་དོ། །དེ་ནས་ཞག་བཞི་བཅུ་རྩ་དགུ་ཚུན་ཆད་དུ་བར་དོའི་སྡུག་བསྔལ་རྣམ་པ་སྣ་ཚོགས་ཉམས་སུ་མྱོང་སྟེ། དེར་སྐྱེ་བ་ལེན་པར་འགྱུར་རོ། །སྐྱེ་བ་ལེན་ལུགས་ནི། རྫུས་སྐྱེས་དང་། དྲོད་གཤེར་ལ་སོགས་པར་སྐྱེ་བ་ཡིན་ན་ཁང་བཟང་ངམ་བྱ་སྐྱིབས་ལ་སོགས་པར་ཆགས་ཏེ་དེར་གནས་པས་སོ། །མངལ་དུ་སྐྱེ་ན་སྲོག་ཆགས་གང་དུ་སྐྱེ་བ་དེའི་ཕ་མ་ཆགས་པ་སྤྱོད་པ་མཐོང་ནས། ཕོར་སྐྱེས་ན་མ་ལ་འདོད་ཆགས་སྐྱེ། ཕ་ལ་ཞེ་སྡང་སྐྱེས་ནས་མངལ་དུ་ཞུགས་ཏེ་འཁོར་བར་འཁྱམས་སོ། །བར་དོ་ནས་འཁོར་བར་འཁྱམས་ལུགས་སོ། །ད་ནི་བླ་མ་དམ་པའི་མན་ངག་གིས་བར་དོའི་ལམ་ལོག་པ་དེ་མ་ནོར་ཞིང་བླ་ན་མེད་པའི་ལམ་དུ་བཀོད་པ་ནི། དང་པོ་གཟུགས་སྒྲ་ལ་ཐིམ་པའི་དུས་ནས་རླུང་རྣམ་པར་ཤེས་པ་ལ་ཐིམ་པའི་དུས་ཡན་ཆོད་དུ་དྲན་པས་ཏིང་ངེ་འཛིན་ཟིན་པར་བྱས་ལ། གཟུགས་སྒྲ་ལ་ཐིམ་པ་ལ་སོགས་པའི་རྟགས་རེ་རེ་ནས་གཅིག་ཀྱང་མ་ནོར་བར་བྱས་ལ། རྟགས་རེ་རེ་ནས་བརྗེད་བསྐུལ་བྱས་ཤིང་བླ་མའི་གདམས་ངག་བསྒོམ་མོ། །བླ་མའི་གདམས་ངག་ནི། དང་པོ་གཟུགས་སྒྲ་ལ་ཐིམ་པའི་རྟགས་བྱུང་བའི་དུས་སུ། སྔོན་འགྲོ་གསུམ་དངོས་གཞི་གཅིག་སྟེ། བཞི་ཉམས་སུ་བླང་བར་བྱའོ། །སྔོན་འགྲོ་གསུམ་ནི། སྙིང་རྗེ་བྱང་ཆུབ་ཀྱི་སེམས་དྲན་པ་དང་། རང་གི་བླ་མ་དྲན་པ་དང་། ཡི་དམ་གྱི་ལྷ་དྲན་པའོ། །དང་པོ་སྙིང་རྗེ་བྱང་ཆུབ་ཀྱི་སེམས་དྲན་པ་ནི། འོ་ད་ནི་ང་འཆི་བར་འདུག་པས་བར་དོའི་གདམས་ངག་དྲན་པར་བྱའོ་སྙམ་དུ་བསམ་མོ། །བར་དོ་དང་པོ་འོད་གསལ་ངོ་ཤེས་པར་བྱས་ལ་དེ་ལ་ཟིན་པར་བྱ། དེ་མ་ཟིན་ན། གཉིས་པ་སྒྱུ་ལུས་ཀྱི་བར་དོ་ངོ་ཤེས་པར་བྱས་ལ། དེར་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་བྱས་ལ། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ལ་ཉེ་རིང་མེད་པར་ཕན་ཐོགས་པ་ཅིག་བྱ་དགོས་སྙམ་དུ་བསམ་མོ། །རང་གི་བླ་མ་དྲན་པ་ནི། བླ་མ་མདུན་དུ་ཡེར་གྱིས་བཞུགས་པར་བསྒོམས་ལ། མོས་གུས་དུང་པ་གཅིག་བྱས་ལ་གསོལ་བ་གདབ་བོ། །ཡི་དམ་གྱི་ལྷ་དྲན་པ་ནི། ལུས་ལྷ་ཡི་སྐུར་ཝལ་གྱིས་བསྒོམ། སྔོན་འགྲོ་གསུམ་མོ། །དངོས་གཞི་གཅིག་པོ་ནི་སེམས་ཕྱག་རྒྱ་ཆེན་པོ་སྟེ། རིག་པ་མ་བཅོས་པའི་ངང་ལ་ལྷོད་ཀྱིས་ཀློད་ལ་ཙན་གྱིས་བཞག་གོ །དེ་ལྟར་གཟུགས་སྒྲ་ལ་ཐིམ་པ་དང་།སྒྲ་དྲི་ལ་ཐིམ་པ་དང་། དྲི་རོ་ལ་ཐིམ་པ་དང་།རོ་རེག་བྱ་ལ་ཐིམ་པ་དང་། རེག་བྱ་འབྱུང་བ་ཆེན་པོ་བཞི་ལ་ཐིམ་པ་དང་། རླུང་རྣམ་པར་ཤེས་པ་ལ་ཐིམ་གྱི་བར་དུ། ཐད་སོ་ཐད་སོའི་རྟགས་རྣམས་མ་ཤོར་བར་དྲན་པས་བསྒྲིམས་ཏེ་ངོས་བཟུང་ལ་རྟགས་ཀྱིས་ཐད་ཀ་ཐད་ཀར་བསྐུལ་ཞིང་། སྔོན་འགྲོ་གསུམ་དངོས་གཞི་གཅིག་སྟེ། བཞི་པོ་ལ་མ་ཡེངས་པར་བྱའོ། །དེའི་རྗེས་ལ་ཕྱི་དབུགས་རྦད་ཀྱིས་ཆད། ནང་དབུགས་མ་ཆད་པའི་སྐབས་སུ་ཡུད་ཙམ་པ་ཞིག་ལ་རྟོགས་པ་ཕྲ་བ་ལ་ཐིམ་པ་འབྱུང་སྟེ། སྣང་བའི་ཡེ་ཤེས་ཤར་བའི་རྟགས་དང་། སྣང་བ་མཆེད་པའི་ཡེ་ཤེས་ཤར་བའི་རྟགས་དང་། སྣང་བ་ཉེ་བར་ཐོབ་པའི་ཡེ་ཤེས་ཤར་བའི་རྟགས་དང་། རང་བཞིན་གྱི་འོད་གསལ་ཤར་བའི་རྟགས་འཆར་རོ། །རྟགས་དེ་རྣམས་ཀྱི་དུས་སུ་སྔོན་འགྲོ་གསུམ་པོ་བྱས་ན་བློ་སྤུན་དུ་འགྲོ་བས་སྔོན་འགྲོ་གསུམ་པོ་ལིང་གིས་བཞག་ལ། རྟགས་རེ་རེ་ནས་དྲན་པས་བསྐུལ་ཞིང་སེམས་ཕྱག་རྒྱ་ཆེན་པོ་བསྒོམ་པ་ཞེས་བྱ་སྟེ། རིག་པ་གཉུག་མའི་ངང་དུ་ལྷང་ལྷང་ལྷོད་ཀྱིས་ཙན་ཙན་བཞག་གོ །དེ་ལྟར་བསྒོམ་པས་རང་བཞིན་གྱི་འོད་གསལ་སེམས་ཅན་ཐམས་ཅད་ལ་རང་ཆས་སུ་སྔོན་ནས་ཡོད་པ་དེ་དང་། བསྒོམས་པའི་འོད་གསལ་གཉིས་བླ་མ་དམ་པའི་གདམས་ངག་དང་བྱིན་རླབས་ཀྱིས་སྔར་འདྲིས་པའི་མི་དང་འཕྲད་པ་ལྟར་འཕྲད་པ་དང་ངོ་ཤེས་ཏེ། སྐད་ཅིག་མ་དེ་ཉིད་ལ་བག་ཆགས་དང་བཅས་པའི་རྣམ་པར་རྟོག་པའི་དྲི་མ་མ་ལུས་པའི་དྲུང་ཕྱུང་བ་སྟེ། འོད་གསལ་གྱི་མེས་བསྲེགས་ནས་སྐུ་གསུམ་མངོན་དུ་བྱེད་ཅེས་བྱ་སྟེ། ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་འགྱུར། དབང་པོ་རབ་ཚེ་གཅིག་གིས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་འགྱུར། དབང་པོ་རབ་ཚེ་གཅིག་གིས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ་ཞེས་བྱའོ། ། ན་མོ་གུ་རུ། འོད་གསལ་ལ་མ་ཟིན་ན་བར་དོར་དོན་གྲུབ་པ་བྱ་བ་ནི། སྒྱུ་ལུས་ལ་སློབ་པ་ཡིན་ཏེ། དེ་ཡང་བདུན་ཕྲག་དང་པོའི་དབང་དུ་བྱས་ན། ཞག་ཕྱེད་དང་བཞི་ཚུན་ཆད་ལ་བར་དོར་ཤེས་པ་མེད་པས་མ་དག་པའི་སྒྱུ་ལུས་ཞེས་བྱ་སྟེ༔ དེར་ལམ་བསྒོམ་དུ་མི་བཏུབ། ཞག་ཕྱེད་དང་བཞི་ལོན་ནས། ང་ཤི་བ་ཡིན་ཨཾ་སྙམ་པ་འོང་སྟེ།སྔོན་གྱི་དུས་སུ་བླ་མའི་གདམས་ངག་ལས་བར་དོ་ལ་བར་དོ་ངོ་ཤེས་པར་བྱའོ་གསུངས་པ་དེ་དྲན་ནས་དེ་ཉིད་ལ་བར་དོ་ལ་བར་དོར་ངོ་ཤེས་ཏེ་ད་གདམས་ངག་དགོས་སྙམ་པ་ཅིག་འབྱུང་བས་སྔར་གྱི་སྣང་བ་འམ་རགས་པ་ཐིམ་པའི་དུས་གྱི་གདམས་ངག་སྔོན་འགྲོ་རྣམ་པ་གསུམ་སྟེ། སྙིང་རྗེ་དྲན་པ། བླ་མ་དྲན་པ། ཡི་དམ་གྱི་ལྷ་དྲན་པ་དང་།དངོས་གཞི་གཅིག་སྟེ་བསྒོམ་མ་མོ་ཆེན་མོ་དྲན་པར་འགྱུར་རོ། །དེ་ནས་ཞག་བཞི་བཅུ་རྩ་དགུའི་བར་དུ་སྔོན་འགྲོ་གསུམ་དང་དངོས་གཞི་གཅིག་པོ་ལ་གོམས་པར་བྱས་པས༔ འོད་གསལ་གྱིས་མེས་བག་ཆགས་ཀྱི་རྩ་བ་མ་ལུས་པ་དྲུང་ཕྱུང་བའམ་བསྲེགས་ནས་དག་པའི་སྒྱུ་ལུས་ཞེས་བྱ། སློབ་པའི་ཟུང་འཇུག་ཅེས་བྱའོ། །དེ་ནས་ཞག་བཞི་བཅུ་རྩ་དགུ་ལོན་པའི་སྐད་ཅིག་དེ་ཉིད་ལ་སྐུ་གསུམ་མངོན་དུ་བྱེད་ཅིང་འབད་རྩོལ་དང་བྲལ་བས་དེ་ཉིད་དུ་མཆོག་ཐོབ་པར་འགྱུར་རོ། །དབང་པོ་འབྲིང་བར་མ་དོར་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པའི་ལམ། ན་མོ་གུ་རུ། དེ་ལ་མ་ཐོབ་ན། གསུམ་པ་མངལ་སྒོ་དགག་པ་ནི། དགག་ཐབས་རྣམ་པ་ལྔ་སྟེ། བླ་མ་ཡབ་ཡུམ་གྱིས་དགག་པ་དང་། ཡི་དམ་ཀྱི་ལྷས་དགག་པ་དང་། སྒྱུ་ལུས་ཀྱིས་དགག་པ་དང་།འོད་གསལ་གྱིས་དགག་པ་དང་། དྲན་པ་དང་འདུན་པས་དགག་པའོ། །དེ་ལ་དང་པོ་བླ་མ་ཡབ་ཡུམ་གྱིས་དགག་པ་ནི། རང་ཉིད་སྲོག་ཆགས་གང་དུ་སྐྱེ་བའི་ཕ་མ་ཆགས་པ་སྤྱོད་པ་མཐོང་བའི་ཚེ། བླ་མ་ཡབ་ཡུམ་གྱིས་བདག་ལ་གསང་བའི་དབང་བསྐུར་བྱེད་པར་བསམ་སྟེ། དེ་ཉིད་ཀྱི་མོས་གུས་སྐྱེ་སྟེ་ངེས་པར་ཆགས་སྡང་ལྡོག་པར་འགྱུར་རོ། །དེ་ནས་སྔར་གྱི་སྔོན་འགྲོ་གསུམ་ལ་སོགས་པ་བཞི་པོ་བསྒོམ་པར་བྱའོ། །དེས་མ་ཁེགས་ན། ཡི་དམ་གྱིས་ལྷས་དགག་པ་ནི། ཕ་མ་གཉིས་པོ་དེ་ཡི་དམ་གྱི་ལྷ་ཡབ་ཡུམ་དུ་བསམས་ལ། ཡི་དམ་ལྷའི་སྣང་བ་མངོན་སུམ་དུ་འཆར་རོ། །དེ་ལ་ཕྱག་དང་མཆོད་པ་ལ་སོགས་པ་བྱས་པས་ཆགས་སྡང་ལོག་སྟེ་སྔར་བཞིན་དུ་བསྒོམ་པར་བྱའོ། །དེས་མ་ཁགས་ན། འོད་གསལ་གྱིས་དགག་པ་ནི། ཕ་མ་ཡབ་ཡུམ་སྟོང་པར་བསྒོམས་པས་ཆགས་སྡང་ལྡོག་སྟེ་སྔར་བཞིན་དུ་བསྒོམ་པར་བྱའོ། །དེས་མ་ཁེགས་ན། སྒྱུ་ལུས་ཀྱིས་དགག་པ་ནི། ཕ་མ་ཡབ་ཡུམ་མཐོང་བའི་ཚེ། འདི་མི་བདེན་ངེས་པར་སྒྱུ་མ་ཡིན། སྒྱུ་མ་ལ་ཆགས་སུ་ཅི་ཡོད་སྙམ་དུ་བསམ་པས། ཆགས་སྡང་ལྡོག་པར་འགྱུར་ཏེ།སྔར་བཞིན་དུ་བསྒོམ་པར་བྱའོ། །དེས་མ་ཁེགས་ན། དྲན་པ་དང་འདུན་པས་དགག་པ་ནི། ཕ་མ་ཡབ་ཡུམ་མཐོང་བའི་ཚེ། ཨ་ཙ་མ་ན་སྐྱུགས་རེ་བྲོ། འདི་འདྲ་ལ་གཅིག་མ་ཆགས་པ་མ་སྤངས་པས་ཐོག་མ་མེད་པ་ནས་ཡུན་རིང་པོ་ཞིག་ཏུ་ཁམས་གསུམ་འཁོར་བའི་སྡུག་བསྔལ་ཅི་ཙམ་པ་ཅིག་མྱོང་། ད་ཡུད་ཙམ་པ་འདི་ལ་ཆགས་པའི་དཔེ་ཡོད་དམ་སྙམ་དུ་ལྷག་གིས་བྲོས་པར་བྱའོ། །དེས་ཆགས་སྡང་ལྡོག་སྟེ་སྔར་བཞིན་དུ་བསྒོམ་པར་བྱའོ། །གསུམ་པ་མངལ་སྒོ་དགག་པའི་གདམས་ངག་གོ །དེས་ཀྱང་ཁེགས་པར་མ་གྱུར་ན། ངེས་པར་མངལ་དུ་སྐྱེ་བར་སྲིད་ན། མངལ་སྒོ་གདམ་པའི་གདམས་ངག་ནི། སྐབས་འདིར་འགྲོ་དྲུག་ཐམས་ཅད་མེ་ལོང་གི་གཟུགས་བརྙན་བཞིན་དུ་དུས་གཅིག་ལ་མཐོང་བ་འོང་། འགྲོ་དྲུག་སྐད་ཅིག་ལ་བསྐོར་ནུས་པ་འོང་། དེ་གང་དང་གང་དུ་ཕ་མ་ཡབ་ཡུམ་མཐོང་པ་དང་དེའི་ཚེ་དུད་འགྲོ་དང་མཛེ་སྤྲང་དང་རིགས་ངན་ལ་སོགས་པའི་མི་འོས་པ་གང་དང་གང་མཐོང་ཀྱང་། འདི་ལ་ང་མི་ཞུགས་འདི་ལ་ཡང་ང་མི་ཞུགས་སྙམ་དུ་བསམ་ཞིང་ཧུར་ཧུར་བྲོས་པར་བྱ་ཞིང་། ཚངས་པའམ་བརྒྱ་བྱིན་ནམ་འཁོར་ལོས་སྒྱུར་བའི་རྒྱལ་པོའམ་ཁྱིམ་བདག་འབྱོར་པ་ཅན་ནམ་གྲུབ་ཐོབ་བམ། པཎྜི་ཏ་ལ་སོགས་པ་གདམ་པར་བྱས་ལ། དེར་འདུག་པའི་ཚེ་སྙིང་རྗེ་ཆེན་པོས་སེམས་ཅན་གྱི་དོན་དུ་བློ་བསྐྱེད་དེ། བླ་མ་ལ་གསོལ་བ་བཏབ་ལ་རང་ལྷ་ཡི་ང་རྒྱལ་གྱིས་མའི་མངལ་དུ་པད་ཉིའི་སྟེང་དུ་ཡི་དམ་ལྷ་ཡིས་ས་བོན་ལས་ཡི་དམ་ལྷར་བསམས་ལ། བདག་གིས་སྐྱེ་བ་ཕྱི་མ་འདི་ལ་བླ་མ་མཚན་ལྡན་བྱིན་རླབས་ཅན་ཅིག་དང་མཇལ་བར་གྱུར་ཅིག།།ཡི་དམ་གྱི་ལྷ་འདི་ཉིད་ཀྱི་སྐུར་གྱུར་ཏེ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ནས་སེམས་ཅན་ཐམས་ཅད་ཀྱི་དོན་ཡོངས་སུ་རྫོགས་པར་བྱེད་པ་ཞིག་ཏུ་གྱུར་ཅིག།།ཅེས་སྨོན་ལམ་བཏབ་ལ། ལྷ་ལ་ལྷ་ཐིམ་པའི་ཚུལ་གྱིས་མའི་མངལ་དུ་འཇུག་པར་བྱའོ། །དེས་མའི་མངལ་དེ་ཡང་སྡུག་བསྔལ་མེད་ཅིང་བདེ་བར་བཙའ་བར་འགྱུར་རོ། །དེར་ཚེ་དེ་ཉིད་ལ་བླ་མ་ཚད་ལྡན་བྱིན་རླབས་ཅན་ཅིག་དང་མཇལ་ཏེ། ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ནས་གཟུགས་སྐུ་རྣམ་པ་གཉིས་ཀྱིས་སེམས་ཅན་གྱི་དོན་མཐར་ཕྱིན་པར་འགྱུར་རོ། །འདི་ནི་བྱང་ཆུབ་སེམས་དཔའ་བསམ་བཞིན་དུ་མའི་མངལ་དུ་འཇུག་པ་ཞེས་བྱ། སྨོན་མལ་གྱི་དབང་གིས་སྐྱེ་བ་ལེན་པ་ཞེས་བྱ། སྐྱེ་བ་ལ་རང་དབང་ཐོབ་པ་ཞེས་བྱའོ། ། སུ་ལ་ཡང་བསྟན་དུ་མི་རུང་། རང་འཆི་འཆི་འདྲ་ན་ཡི་གེ་འདི་མེ་ལྷའི་ཕྱག་ལ་ཕུལ་ཅིག།།སུར་ཡ་རསྨིའི་ཐུགས་དམ་ཡིན།
This article uses material from the Wikipedia བོད་སྐད article འཆི་ཁ་བར་དོའི་ངོ་སྤྲོད་གསལ་བའི་མེ་ལོང་འོད་གསལ་ཉི་མའི་སྙིང་པོ་, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). དེ་མིན་གྱི་མཆན་འགྲེལ་ཡོད་ན་མ་གཏོགས། དྲ་བའི་ནང་དོན་ CC BY-SA 4.0 སྟེང་དུ་ཡོད། Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki བོད་སྐད (DUHOCTRUNGQUOC.VN) is an independent company and has no affiliation with Wiki Foundation.