Pandemi Covid-19

Panyakit ngini dimargaakan ulih koronavirus janis hanyar nang dibari ngaran SARS-CoV-2. Wabah COVID-19 pamulaannya taditiksi di Kuta Wuhan, Parupinsi Hubei, Tiongkok pas tanggal 1 Disimbir 2019, wan ditatapakan jadi pandimi ulih Urganisasi Kasihatan Dunia (WHO) wayah tanggal 11 Marit 2020. Sampai 5 Marit 2021, labih matan 116 juta urang sudah dilaporakan takunpirmasi pusitip labih matan 219 nagara wan wilayah sabarataan dunia, maulah labih matan 2,5 juta urang habis umur wan labih matan 65,6 juta urang sudah wigas.

Pirus SARS-CoV-2 dikirakaan manyabar di antara urang-urang tautama malalui curatan pahinakan (droplet) nang dikulihakan rahatan batuk. Curatan ngini jua kawa dihasilakan matan wahin wan pahinakan nurmal. Lain pada ngitu, pirus kawa manyabar marga manggawil parmukaan banda nang takambuh wan imbah ngitu takana muha urang. Panyakit COVID-19 liwar manjangkit rahatan paharitnya baisi gajala, walau panyabaran kawa haja tajadi sabalum gajala cungul. Pariuda waktu antara paparan pirus wan cungulnya gajala rancaknya sakira lima hari, tagal kawa jua bakisar matan dua sampai ampat walas hari. Gajala nang rancak di antaranya awak panas, batuk, wan ngalih bahinak. Kumplikasi kawa babantuk pneumonia wan panyakit pahinakan akut barat. Kadada patatambaan antipirus husus gasan panyakit ngini. Patatambaan primer nang dibari'i barupa tarapi simtomatik wan suportip. Langkah-langkah pahaga nang dianjurakan di antaranya babasuh tangan, manukupi muntung rahatan batuk, mamuruk maskar, mahatiakan jarak lawan urang, lawan pamantauan wan isulasi diri gasan urang nang marasa bahua inya tajangkit.