Аляксей Скобля

Аляксей Скобля (14 сакавіка 1990, Менск — 13 сакавіка 2022, ускрайкі Кіева) — баец-добраахвотнік Беларускага батальёну імя Кастуся Каліноўскага, які загінуў пры абароне Кіева ад войскаў Расеі. Першы загінулы ўдзельнік Беларускага батальёну. Герой Украіны.

Аляксей Скобля
Дата нараджэньня	14 сакавіка 1990(1990-03-14)
Месца нараджэньня	Менск, БССР, СССР
Дата сьмерці	13 сакавіка 2022(2022-03-13) (31 год)
Месца сьмерці	Машчун[d], Бучанскі раён, Кіеўская вобласьць, Украіна
Прычына сьмерці	загінуў у баях
Месца пахаваньня	Кіеў
Месца вучобы	Менскі дзяржаўны аўтамэханічны коледж імя Высоцкага[d]
Занятак	вайсковец
Вядомы як	баец-добраахвотнік Батальёна імя Кастуся Каліноўскага
Псэўданім	Тур
Узнагароды
Аляксей Скобля ў Вікісховішчы

Дзяцінства і юнацтва

Нарадзіўся ў Менску, мама — выхавацелька ў дзіцячым садку, бацька — кіроўца аўтобуса. Зь дзяцінства цікавіўся гісторыяй, захапляўся рэканструкцыяй.

Па дзявятай клясе паступіў у аўтамэханічны каледж у Менску. Потым працаваў мэханікам, рамантаваў аўтамабілі. Пазьней паступіў у Гарадзенскі дзяржаўны ўнівэрсытэт імя Янкі Купалы, каб атрымаць вышэйшую адукацыю па спэцыяльнасьці «эксплуатацыя аўтамабіляў», але ўнівэрсытэту ня скончыў. У 2011 годзе браў удзел у маўклівых акцыях у Менску супраць рэжыму Лукашэнкі, калі правёў у зьняволеньні двое содняў і атрымаў штраф.

Добраахвотнік ва Ўкраіне

У 2015 годзе паехаў добраахвотнікам на Ўкраіну, быў намесьнікам камандзіра групы і стаяў ля вытокаў арганізацыі беларускіх добраахвотнікаў, якія змагаліся за Ўкраіну. Быў у складзе Тактычнай групы «Беларусь». У 2021—2022 гадох служыў у Сілах спэцыяльных апэрацыяў Украіны на падставе кантракту. Працаваў інструктарам у тактыцы, мэдыцыне. Атрымаў украінскае грамадзянства, ажаніўся.

Па адкрытым нападзе Расеі на Ўкраіну стаў намесьнікам камандзіра групы Беларускага батальёну імя Кастуся Каліноўскага. Загінуў 13 сакавіка 2022 на ўскрайках Кіева, калі яго аддзел трапіў у расейскую засаду. Паранены, прыкрываў адыход сваіх вайскоўцаў. За апошні тыдзень перад гібельлю выратаваў дзесяцярых параненых аднапалчанаў, выцягнуўшы іх з дапамогай прафэсійных мэдычных навыкаў.

13 красавіка 2022 году прэзыдэнт Украіны Ўладзімер Зяленскі пасьмяротна ўганараваў Аляксея Скоблю годнасьцю Героя Ўкраіны — «за асабістую мужнасьць і гераізм, праяўленыя ў абароне дзяржаўнага сувэрэнітэту і тэрытарыяльнай цэласнасьці Ўкраіны, вернасьць вайсковай прысязе».

28 красавіка 2022 году пастановай 16-й сэсіі мескай рады Хмяльніцкага ў гонар Аляксея Скоблі перайменавалі вуліцу Пушкіна.

Цырымонія разьвітаньня адбылася 16 сакавіка ў Кіеўскім крэматорыі. На ёй быў прачытаны наступны верш:

	«Прайду няўхільна цяжкі шлях вайны бясконцай і крывавай. На нашых волатных плячах уздымем сьцяг шляхетнай славы. Як Каліноўскі наш Кастусь, мне прыклад, так і лёс Ліцьвіна. Я вызваляю Беларусь праз вызваленьне Ўкраіны. Як Тур, клянуся абараніць у пекле бітвы пабраціма. Наш гонар вечна будзе жыць у памяці маёй Радзіме».

• «… і для Ўкраіны, і для Беларусі Расея — гэта агульны вораг. І трэба дапамагчы ўкраінцам справіцца з агульным ворагам».
• «Калі ня будзе перамогі [на Данбасе], то гэта заўсёды будзе такі палаючы кацёл, які некалі выбухне ўсё ж такі. А галоўнае, каб адбылася гэтая перамога, трэба, каб Расея ці распалася, ці ўрэшце хаця б супакоілася ў сваіх імпэрскіх амбіцыях».

24 лістапада 2022 году Аляксей «Тур» быў пасмяротна ўзнагароджаны ордэнам Пагоні Рады Беларускай Народнай Рэспублікі.

• Ільля «Ліцьвін» (Хрэнаў)
• Сьпіс беларусаў, якія загінулі за Ўкраіну