Часопіс Полымя: беларускі часопіс

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Полымя (неадназначнасьць).

Выдаецца з 20 сьнежня 1922 году ў Менску штомесяц на беларускай мове. Старэйшае беларускае літаратурна-мастацкае выданьне. Падпісны індэкс выданьня на «Белпошце» — 74985.

Першыя дзесяць гадоў (да 1932) часопісам кіравала рэдакцыйная калегія, у яе ўваходзілі Зьмітрок Бядуля, Цішка Гартны, Міхась Зарэцкі, Усевалад Ігнатоўскі, Янка Купала, Якуб Колас, В. Нодэль, А. Сянкевіч, Міхась Чарот і інш. У 1932—1941 гадах выходзіў пад назвай «Полымя рэвалюцыі». У гады Вялікай айчыннай вайны не выходзіў. Адноўлены ў студзені 1945 году па распараджэньні Савета Міністраў Беларускай ССР.

На старонках часопіса былі ўпершыню апублікаваныя раманы «Людзі на балоце» Івана Мележа, «Птушкі і гнёзды» Янкі Брыля, «Сэрца на далоні» Івана Шамякіна і многія іншыя творы.

Уваходзіць у склад рэдакцыйна-выдавецкай установы "Выдавецкі дом «Звязда».

У часопісе друкуюцца творы беларускіх пісьменьнікаў, пераклады твораў клясыкаў сусьветнай літаратуры і сучасных пісьменьнікаў замежных краінаў, артыкулы па пытаньнях беларускай культуры і мастацтва, гісторыі, краязнаўства, эканомікі, грамадзка-палітычнага і сацыяльнага жыцьця Беларусі, рэцэнзіі.

• Платон Галавач (1932—1933)
• Міхась Лынькоў (1933—1941)
• Пятрусь Броўка (1945—1948)
• Максім Танк (1948—1967)
• Павал Кавалёў (1967—1972)
• Кастусь Кірэенка (1972—1986)
• Сяргей Законьнікаў (1986—2002)
• Мікола Мятліцкі (2002—2014)
• Алесь Бадак (2014—2016)
• Алена Мальчэўская (2016—2021)
• Віктар Шніп (зь ліпеня 2021)

Першую вокладку часопіса намаляваў мастак Міхась Філіповіч.

• Я. Троська Юбілей часопісі «Полымя». // Асьвета : часопіс. — 1926. — № 8. — С. 110, 111.

• Сайт «Полымя»
• Беларуская Палічка // Архіў часопіса «Полымя»
• Архіў часопіса «Полымя». ў Нацыянальнай бібліятэкі Беларусі.
• Архіў часопіса «Полымя» ў Беларускай Інтэрнэт-Бібліятэкі Камунікат