Кантынэнтальны клімат — тып клімату, які характарызуецца сьпёкай улетку, сьцюжай узімку і малой колькасьцю ападкаў.
Кантынэнтальны клімат фармуецца пераважна ў выніку ўзьдзеяньня на атмасфэру буйных масываў сушы. Гэты тып клімату характэрны для ўнутраных рэгіёнаў мацерыкоў. Кантынэнтальны клімат пануе на значнай частцы тэрыторыі Расеі, краінаў Сярэдняй Азіі (напрыклад, Казахстан, Узбэкістан), у Манголіі і ўнутраных рэгіёнах ЗША і Канады. Часткай сьвету з найбольшым распаўсюджваньнем кантынэнтальнага клімату зьяўляецца Азія. Кантынэнтальны клімат прыводзіць да ўтварэньня стэпаў і пустыняў, бо вялікая частка вільгаці мораў і акіянаў не даходзіць да ўнутрыкантынэнтальных рэгіёнаў.
Ва ўмераных шыротах для кантынэнтальнага клімату характэрныя вялікая гадавая амплітуда тэмпэратуры паветра (сьпякотнае лета і халодная зіма), а таксама значныя зьмены тэмпэратуры на працягу дня. Ад марскога клімату кантынэнтальны адрозьніваецца паніжанай сярэдняй гадавой тэмпэратурай і вільготнасьцю, у некаторых выпадках павялічанай запыленасьцю паветра. Для кантынэнтальнага клімату характэрная досыць малая хмарнасьць і малая гадавая колькасьць ападкаў, максымум якіх прыходзіцца на лета. Сярэдняя хуткасьць ветравею, як правіла, таксама невялікая. Надвор’е ў рэгіёнах з кантынэнтальным кліматам больш зьменлівае, чым у рэгіёнах з марскім кліматам.
У тропіках гадавыя ваганьні тэмпэратуры паветра не такія вялікія, як ва ўмераных шыротах, а ападкаў выпадае больш, чым пры марскім клімаце.
У палярных шыротах, для кантынэнтальнага клімату характэрныя вялікія гадавыя ваганьні тэмпэратуры паветра і вельмі зімнае лета.
Кантынэнтальны клімат можа ў саслабелым выглядзе распаўсюджвацца і на найбліжэйшыя да мацерыкоў часткі акіянаў, пры паступленьні паветраных масаў з мацерыка на тэрыторыю над акіянам на працягу ўсяго году. Кантынэнтальны клімат адрозьніваецца ад мусоннага клімату, які фармуецца пераважна дзякуючы ўплыву кантынэнтальных паветраных масаў узімку і марскіх паветраных мас — улетку. Паміж марскім і кантынэнтальным кліматам існуюць паступовыя пераходы, напрыклад клімат Заходняй Эўропы пераважна марскі, Эўрапейскай часткі Расеі — умерана-кантынэнтальны, Усходняй Сыбіры — рэзка кантынэнтальны, Далёкага Ўсходу — мусонны.
This article uses material from the Wikipedia Беларуская (тарашкевіца) article Кантынэнтальны клімат, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Зьмест даступны на ўмовах CC BY-SA 4.0, калі не пазначанае іншае. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Беларуская (тарашкевіца) (DUHOCTRUNGQUOC.VN) is an independent company and has no affiliation with Wiki Foundation.