Кале́ґіюм (ад па-лацінску: collegium — «таварыства», «садружнасьць») — закрытая сярэдняя, радзей вышэйшая навучальная ўстанова ў XVI—XIX стагодзьдзях.
Адкрывалі калеґіюмы пераважна езуіты. Лічыліся сьвецкімі, аднак сыстэма навучаньня была падпарадкавана этыцы ордэну. Вывучаліся: тэалёґія, лацінская і ґрэцкая мовы, літаратура, ґеаграфія, гісторыя, сем вольных мастацтваў і інш. Адукацыя была бясплатнай і даступнай для прадстаўнікоў іншых канфэсіяў. Поўны калеґіюм уключаў 5—6-гадовы курс сярэдняй школы (ніжэйшае і вышэйшае аддзяленьні), 3-гадовы курс філязофіі, 4-гадовы — тэалёґіі.
Калеґіюм уяўляў сабой комплекс разнастайных рознапавярховых будынкаў, у т. л. мог уключаць школу, інтэрнат, касьцёл, капліцы, кляштар, службовыя памяшканьні і інш. Займаў значную тэрыторыю ў цэнтры населенага месца, меў унутраныя двары.
На Беларусі першы калеґіюмы адкрыты ў 1570 годзе ў Вільні (з 1579 году — Віленская акадэмія). Да сярэдзіны XVIII стагодзьдзя іх было 16: у Полацку (з 1812 году — Полацкая езуіцкая акадэмія) і Пінску поўныя, у Нясьвіжы, Горадні, Мсьціславе, Наваградку, Воршы, Віцебску, Берасьці з курсам філязофіі, у Менску, Магілёве, Слоніме, Слуцку, Бабруйску і іншыя мелі статус сярэдніх навучальных установаў.
Акрамя езуіцкіх на Беларусі найбольшае распаўсюджаньне ў XVIII ст. атрымалі калеґіюмы ордэна піяраў. Існавалі ў Шчучыне, Зэльве, Расонах, Драгічыне, Віцебску і інш.
У 1773 годзе са скасаваньнем ордэну езуіцкія калеґіюмы перададзены Адукацыйнай камісіі. На беларускіх землях, якія ўвайшлі ў склад Расейскай імпэрыі, праіснавалі да 1820 году. У пачатку 1830-х гадоў усе калеґіюмы рэарґанізаваны ў прыходзкія, павятовыя вучылішчы і ґімназіі або зачынены.
This article uses material from the Wikipedia Беларуская (тарашкевіца) article Калегіюм, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Зьмест даступны на ўмовах CC BY-SA 4.0, калі не пазначанае іншае. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Беларуская (тарашкевіца) (DUHOCTRUNGQUOC.VN) is an independent company and has no affiliation with Wiki Foundation.