«Апо́стал» («Книга деания и послания апостольская, зовемая Апостал») — віленскае выданьне Скарыны, якое выйшла ў сьвет у сакавіку 1525 году.
«Апостал» — апошняе вядомае друкаванае выданьне Скарыны.
Выданьне пачынаецца тытульным лістом, пасьля ідзе прадмова («Деания светых апостолъ книгъ предмова», пасьля якой зьмешчаны кнігі Дзеяў Апосталаў, лісты апосталаў і лісты апостала Паўла, да іх таксама напісаны прадмовы. Напрыканцы лістоў даецца агульнае пасьляслоўе, а таксама тэкст пра ўжываньне ў выданьні чырвонага колеру. Пасьля ідуць службовыя разьдзелы: «Соборнікъ двунадесять месяц», «Пятдесятница», «Четырдесятница».
Кніга выдадзена на царкоўнаславянскай мове са шматлікімі лексычнымі і граматычнымі асаблівасьцямі старабеларускай мовы. Адной з крыніц перакладу лічыцца чэская Біблія 1506 году. Некаторыя цяжкія для разуменьня словы вытлумачаны на палях. Кожная частка выданьня мае прадмову, напісаная кніжным стылем старабеларускай мовы. У 22 прадмовах Скарына раскрывае маральна-этычную праблематыку і духоўную дасканаласьць чалавека. Прадмовы, у параўнаньні з прадмовамі да іншых кніг Бібліі, маюць больш царкоўна-рэлігійны характар. Фармат выданьня — у адну восьмую аркуша, такі фармат быў зручным для шырокага карыстаньня.
Аб’ём выданьня — 351 аркуш, якія сабраныя ў 45 сшыткаў. Сыгнатура адсутнічае. Фаліяцыя на верхнім баку аркуша ўверсе справа. Выданьне мае 2 тытульныя лісты. Асноўныя разьдзелы лістоў і Саборніка пачынаюцца спускавой паласой, рубрыкацыя выяўлена арнамэнтальнымі сродкамі. У «Дзеяньнях» віньеткі папярэднічаюць разьдзелам, перад якімі зьмешчаны анатацыі. Набор выкананы ў 10 радкоў вышынёй 53 мм, на паласе — 20 радоў. Апостал надрукаваны 2 фарбамі: другая фарба (кінавар) выкарыстоўваецца для пазначэньня рубрыкацыі і аблягчэньня карыстаньня кнігаю. Чырвонай фарбаю надрукаваныя: агульны загаловак кнігі на тытульным лісьце і назва першага разьдзелу, указаньні на бакавых палях дзён тыдня, ініцыялы на тытульным лісьце, віньеткі-канцоўкі.
Выданьне ня мае ілюстрацыяў, аднак у ёй ёсьць вялікая колькасьць заставак, канцовак, гравіраваных буквіц.
Захавалася 10 асобнікаў «Апостала».
This article uses material from the Wikipedia Беларуская (тарашкевіца) article Апостал (Скарына), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Зьмест даступны на ўмовах CC BY-SA 4.0, калі не пазначанае іншае. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Беларуская (тарашкевіца) (DUHOCTRUNGQUOC.VN) is an independent company and has no affiliation with Wiki Foundation.