Ігар Бабкоў

Нарадзіўся ў 1964 годзе ў Гомелі. У 1986 годзе скончыў Беларускі дзяржаўны ўнівэрсытэт (аддзяленьне філязофіі) і тамсама асьпірантуру. Працуе ў інстытуце філязофіі Акадэміі навук Беларусі і займаецца сучаснай посткаляніяльнай тэорыяй і гісторыяй філязофіі. Выкладае ва ўнівэрсытэтах Менску й Вільні.

Пры канцы 80-х быў сябрам літаратурных суполак «Бабілён» і «Тутэйшыя». Браў удзел у аднаўленьні газэты «Наша Ніва» на пачатку 90-х, быў адным з заснавальнікаў Беларускага калегіюму, выдаваў і рэдагаваў часопіс «Фрагмэнты».

Апавяданьні, вершы й эсэ Ігара Бабкова перакладзены на польскую, украінскую, нямецкую, чэскую й вугорскую мовы. Зьяўляецца аўтарам тэкстаў да песень гурту «Новае Неба».

Як адзначае Алесь Бельскі, галоўным тэматычным стрыжнем паэзіі І. Бабкова зьяўляецца тэма філязофіі быцьця. Паэт заглыбляецца ў агульначалавечыя і філязофскія пытаньні: сэнс існаваньня, душа і вечнасьць, сусьвет і зямны лёс, Бог і пошук духоўнага апірышча. Дасьледнік называе паэзію аўтара «суб’ектнадухоўнай плыньню думак і пачуцьцяў».

• «Solus Rex» (1986) — паэзія
• «Герой вайны за празрыстасьць» (1998) — паэзія
• «Адам Клакоцкі і ягоныя цені» (2001; па-польску ў перакладзе Малгажаты Бухалік, 2008; 2-е выданьне па-беларуску — 2012) — раман
• «Філязофія Яна Сьнядэцкага» (2002)
• «Каралеўства Беларусь. Вытлумачэньні ру[і]наў» (2005) — зборнік эсэ
• «Засынаць, прачынацца, слухаць галасы рыб» (2009) — паэзія
• «Хвілінка» (2014)

• Гліняны Вялес (1993, зборнік «Solus Rex»)
• Залатая літара (2005, «Каралеўства Беларусь. Вытлумачэньні ру[і]наў»)
• Шорт-ліст прэміі «Angelus» (2009, раман «Адам Клакоцкі і ягоныя цені»)
• Прэмія імя Ежы Гедройца (2014)

• У «Доме літаратара» Ігар Бабкоў і Ганна Серэхан// «Радыё свабода», 25 кастрычніка 2010.
• Герой вайны за празрыстасьць — Мн.: Мастацкая літаратура, 1998 ISBN 985-6012-50-3