Tesauro
An tesauro sarong librong toltolan na nagtitipon kan mga katagang nagkakaagidan sa mga kahulogan, asin ini parati linalaman kan mga sinonimo asin kun minsan an mga kabaliktad na kahulogan o mga antonimo; iba ini sa sarong diksyunaryo na nagtataong paliwanag asin mga kahulogan kan lambang kataga, saka an huri rinirinsay susog sa saiyang alpabeto.
An tuyo kan pagbilog nin tesauro iyo ngane an parasurat o parataram makua sa madaling paagi an mga katagang tukod na tukod sa mga naiisip niyang ipahayag, o sabi kaiyan ni Peter Mark Roget, an kaghaman kan tesaurong bantogan sa lenggwaheng Ingles, "mahanap an mga kataga na mataong eksakto, puntok, asin naangay sa ideya na boot isayod."
An siring na tesauro dai man sangkap nanggad kan mga sinonimo para sa sarong kataga. Ini pati natao man kan mga kaibahan kan sentido bagay sa sitwasyon na mas masasabotan an maninigong gamiton na tataramon. Bakong arog kan diksyunaryo, an tesauro dai matao nin depinisyon kan lambang kataga na ikinaag niya sa lista.
Etimolohiya
An katagang "tesauro" hale sa ika-16 na siglong Latin, thēsaurus, na iyo an pigLatin kan Griyegong θησαυρός (thēsauros), na boot sabihon "tambobong", "tesoreria", "kaban". Alagad, poon ika-16 sundo ika-19ng siglo, an terminong "tesauro" ginagamit man sa arinman na diksyunaryo o ensiklopedya, siring kan Thesaurus linguae latinae (1532), asin an Thesaurus linguae graecae (1572). An pakahulogan na "kadamotan nin mga katagang rininsay susog sa sentido" nahiling kan 1852 sa titulo kan hinaman ni Roget na "thesaurer" sa sinabing Middle English man ngane boot sabihon "treasurer".
Mga halimbawa kan entri sa posibleng sarong tesauro sa Bikol
- suntok: buntol, sampaling, sapuyong, dungi', sungbil, tapli', tampal, tapak, taptap, talpi', sapok, taplong, sapak.
Mga panluwas na takod
- [2] thesaurus. kinua 8-7-16.
Toltolan
This article uses material from the Wikipedia Bikol article Tesauro, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Bikol (DUHOCTRUNGQUOC.VN) is an independent company and has no affiliation with Wiki Foundation.