Kolera
An kolera sarong nakakaulakit na helang asin pwedeng ikagadan.
Ini impeksyon sa bitukang sadit dara kan bakteryang Vibrio cholerae. an mga sintomas kaini pwedeng garo mayo sana, pwedeng maluya sana o talagang makuri. An klasikong sintomas kaini iyo an pag'aariya (sobrang pagbugris) nin pirang aldaw. Pagsusuka asin paghihigot kan masel pwede man mangyari. An pag'aariya pwedeng sobrang makuri na sa laog nin pirang oras sana magresulta sa grabeng dehydration asin bakong balanseng electrolyte. Ini maresulta sa sinasabing lubog na mata, panlilipot kublit, pagkawara nin logyat kan kublit o paghihignit kan kublit, asin pagkurubot kan mga kamot asin mga bitis. Gibo kan Dehydration an kublit pwedeng mangitom o mangasul cyanosis. An sintomas nabutwa' pakalihis nin duwang oras abot limang aldaw nin pagkatambara sa pag'uulakit. An helang nakukua parati sa maating tubig na naiinom. Ngani mapondo an paglakop kan helang dapat pagsaraon an tubig asin i-agi sa pagpakala-kaga' bago ini inomon.
An kolera kinakawsa nin magkapirang bilang nin tipo kan Vibrio cholerae, na an ibang tipo naprodyusir nin makuring helang kumpara sa ibang klase. Ini nalakop parati huli sa maating tubig asin siring man sa maating pagkakan na nakontaminado orog na kan udo nin tawo na may dara kan sinasabing bakterya. An dai toltol na pakaluto kan mga may tibulakang sira (shellfish) pwede man gikanan kan helang. An tawo daa iyo mansana an paradara kan siring na bakterya]. An mga kawsa peligro para sa sinabing helang iyo an kabarali na diyan, daing toltol na sanitasyon, daing bastanteng malinig na tubig inomon, asin katiosan. An kolera nada-diagnose paagi kan paghiling kan udo o stool test. Igwang marikas na inaapod na dipstick test alagad ini dai masasarigan na gayo.
Mga likidong tomaron
Kun an komersyal na pinapabakal na mga oral rehydration solution mahal na gayo o dipisil makua, tinimplang solusyon pwedeng gibohon ta ini an remedyo sa pangana na dehydration. Sarong resipe iyo an pagtimpla nin 1 litrong gina'gang tubig, 1/2 kutsaritang asin, 6 na kutsaritang asukar, asin ini salakan nin pigrunot na batag para sa potassium makukua igdi asin ngarig magsiram an namit.
Toltolan
This article uses material from the Wikipedia Bikol article Kolera, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Bikol (DUHOCTRUNGQUOC.VN) is an independent company and has no affiliation with Wiki Foundation.