Kabulig-Bikol

Kamàwotan kan organisasyon na anduyogan asin pabantogon an arte asin kulturang Bikolnon. Pinapamayohan ini ngunyan ni Marissa Redburn.

Sarong kasararoan na inapod Kabulig Bikol Writers Association an minuknâ ni Maria Lilia Realubit kan 1993 kaiba an mga kapwa paratukdong parasurat sa Unibersidad kan Pilipinas.

Sa Syudad nin Naga minuknâ an organisasyon nin mga parasurat kaapíl sinda Francisco Peñones, Jr., Gabriel Bordado asin Honesto Pesimo, Jr. kun sain si Rudy Alano an nagin pinakainot na pamayó kan grupo. Bago kaini, hinihimò ninda Estelito Jacob, Dennis Gonzaga, Niño Manaog asin Rizaldy Manrique an sarong grupo na aapodon na Barukikik. Sa suhestyon ni Peñones na buhayon na sana an Kabulig, namuknâ an bagong organisasyon sa siring na ngaran. Nagin kabali man digdi sinda Carlos Arejola, Marissa Reorizo-Redburn, Judith Balares-Salamat, Kristian Cordero, Vic Nierva, Jason Chancoco, Aida Cirujales, Bernardo Miguel Aguay, Jr., Irvin Sto. Tomas, Jerome Hipolito, Jusan Misolas asin Kevin de Quiroz. Kan 2010, nakitakód an grupo sa Ang Ladlad, sarong organisasyon nin mga baklâ sa Filipinas. An iba pang nagin pamayo kaini iyo sinda Jacob asin Nierva. Abril 17, 2010 kan tugdason an Parasurat Bikolnon ni Aguay, Redburn asin iba pang pag-iriba sa Kabulig-Bikol.

Nag-reorganisar an grupo kan 2012 asin naiparehistro bilang Kabulig-Bikol Inc. sa Securities and Exchange Commission bilang non-stock corporation. An mga myembro kaini iyo sinda Estelito Jacob, Francisco Peñones Jr., Honesto Pesimo Jr., Marissa Reorizo-Redburn, Rizaldy Manrique asin Paz Verdades Santos.

 

An Girok sarong programa na sarong banggi nin mga rawitdawit na erotika kan Kabulig Bikol. An programa sa sarong pamanggi igwa nin katuyohan na makalikom nin pondo para sa kawsa kan reorganisadong organisasyon. Ginibo ini kan Oktobre 27, 2012 sa Señor Avelino’s sa Abenidang Bagumbayan, Syudad nin Naga. Nasundan pa an siring na okasyon nin nagkapirang beses.

Kan 2018, ibinungsod kan organisasyon an Kabulig Writers Prize, sarong premyo sa pagsurat nin rawitdawit na erotika kun sain ginana ini ni Emmanuel Barrameda kan Virac, Catanduanes. Sa ikaduwang edisyon kan patiribayan sa pagsurat nin usipon pan-aki, ginana ni Jaime Jesus Borlagdan kan Syudad nin Tabaco an inot na premyo. Kan 2019, napili an saiyang nobeletang Sa Ika-tolong Aldaw ni Anthony Diaz sa First Book Grant na pinadrinohan kaini huli kan LJ Graphics Literacy Exponent, Inc.

Nanggarana

Gikan an tataramon na kabulig sa pinagsugpon na katagang ka- asin bulig (sa Waray: buli o saróng bulig na batag) na an boot sabíhon iyo pigpaparàsan o pigtuturuwangan na darahón sa paági nin pagpàsan sa abága. An tataramon na iní pigpapatungdan man an sarong "bulig" na batag o ano pa man na bungang namuràngot. Yaon man ini sa tataramon na Kapampangan asin sa Cebuano na nangangahulugan na taong katuwang o katabang sa sarong gibohon siring man kasabwat o kakomplot.

• An Banwa: Kultura buda Artes kan Tabaco
• Arejola Foundation for Social Responsibility
• Kabikolan Cultural Association
• Kaboronyugan Cultural Group
• Developmental Institute for Bicolano Artists
• Parasurat Bikolnon
• Sumaro Bikolnon

• Websyat kan grupo (piggigibo pa)

   Sarong saringsing na artikulo ini sa Literatura. Makakatabang ka sa Bikol Wikipedia sa pagparambong kaining pahina.