Better Living Through Xeroxography Naga
An Better Living Through Xeroxography Naga o BLTX Naga sana, sarong kabtang kan Better Living Through Xeroxography sa syudad nin Naga na inot na ginibo kan 2016.
Sarong tiripon ini nin mga lokal na parasurat, parakurit asin iba pang artista sa rehiyon Bikol tanganing makapaghiras kan saindang mga suru-sadiring gibong babasahon, komiks, padukot, poster asin manlainlain na obra na kadaklan naiprodusir gamit an pagpapakopya sa paagi nin siroksograpiya o iba pang baratong paagi nin reproduksyon.
| Better Living Through Xeroxography Naga | |
|---|---|
| Kamugtakan | Aktibo |
| Genre | Surusadiring publikasyon |
| Kalakawan | Taonan |
| Lugar | Manlainlain |
| Kinamumugtakan | • Anthosia Naga • Kape Naga |
| Pinonan | 2016 |
| Kagtugdas | Jay Salvosa asin Ahj Eufracio |
| Aktibidad | Tiripon asin bentahan |
Pinonan ini ninda Jay Salvosa asin Ahj Eufracio kan Hulyo 30, 2016 pakatapos na makapagtisipar sa BLTX sa syudad nin Quezon. Dawà na nakabandera an sinyal numero uno huli sa bagyong paaboton, ginibo an tiripon na inapod DIYos Mabalos! sa Anthosia Café sa syudad nin Naga. Sinundan tulos ini bàgo matapos an taon sa parehong establisyemento. Tulos beses nang ginigibo ini sa syudad kun sain an pinakahuri ginibo sa Kape Naga kan Desyembre 15, 2017 mantang nakabandera an sinyal numero 2 sa Camarines Sur.
Mga partisipante
Kabali sa mga grupo na nagpapartisipar digdi iyo an Meet Every Other Weekend (MEOW), an Ateneo Literary Association (ALA), The Writers Project, Parasurat Bikolnon asin iba pang mga indibidwal. Nakikidungan man sa tiripon an ibang mga parasurat na igwa nin mga librong nag-agi sa darakulang prensa.
Panliteraryong publikasyon
Nagkapira sa mga ibinebenta sa tiripon iyo an mga panliteraryong publikasyon siring kan mga koleksyon nin rawitdawit sa tataramon na Bikol Sentral asin Ingles. Igwa man nin mga usipon, rikas-usip, tula asin translation o pagpalis nin mga panurat gikan sa Ingles pasiring sa Bikol Sentral asin Bikol Buhi.
Duwang myembro kan Kabulig Bikol an nagpaluwas nin suru-sadiring libro kan Hulyo asin Desyembre 2016: iniluwas ni Estelito Jacob an Matalasay na Dila asin iba pang rawitdawit asin Sa Kaskas na Taraasan nin Tingog mantang nagluwas man si Honesto Pesimo, Jr. kan saiyang Sa Ngaran Nin Aki na katiriponan nin mga rawitdawit.
Nagkapira man na publikasyon an nahaman kan Parasurat Bikolnon, Project Susog asin The Writers Project an inot na ibinungsod sa BLTX Naga.
Toltolan
Mga panluwas na takod
- BLTX Naga: DIYos Mabalos! - https://sillysili.wordpress.com
- BLTX NAGA[permanent dead link] - https://deputtanesca.wordpress.com Archived 2017-08-28 at the Wayback Machine.
This article uses material from the Wikipedia Bikol article Better Living Through Xeroxography Naga, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Bikol (DUHOCTRUNGQUOC.VN) is an independent company and has no affiliation with Wiki Foundation.