I Balu Kajanan Tekén I Balu Kelodan

Satua I Balu Kajanan tekén I Balu Kelodan (aksara Bali: ᵒi​balukajanantĕken·​ᵒibalukĕlodan·) inggih punika silih tunggil satua Bali.

Kacrita I Balu Kelodan ngencebang lalang di tukadé, lakar anggona ngraabin bale gedé. Ni Balu Kajanan tau tekén I Balu kelodan ngencebang lalang lantas palinga lalange I Balu Kelodan tekén Ni Balu Kajanan tur engkebanga di glebegné. Mara I Balu Kelodan ukana nyemak lalangné, ilang lantas. Ditu lantas I Balu Kelodan ngetutang lalangné nuut cretcetan yehné. Dening kéto, kema lantas aliha lalangné. Suba neked di umah Ni Balu Kajanané, dapetanga Ni Balu Kajanan sedek nyampat, lantas takonina tekén I Balu Kelodan kéné,

“Eh Balu Kajanan, nyai ané mamaling lalang Beliné?”

“Sing.”

“Saja nyai tusing mamaling?”

“Saja, kema ja Beli natasin!”

“Yen tepuk nyén dini lalang Beliné, bani iis titiké?”

“Bani.”

Dening kéto, alihina lantas lalangné, laut ampakanga jalanan glebegné, tepukina lantas lalangné ditu.

“Nah Balu Kajanan, éné apa lalang Beliné, jani nganti payu miis gelah nyainé.”

“Nah.”

Sajaan lantas iisa gelahné I Balu Kajanan, tur pejanga di sisin pancorané di duur don candungé tur pastuna, kéné abetné,

“Ih gelah anak, yén mai masiram Radén Mantri Kuripan, deket men gidatné!” Suba kéto, kalahina lantas tur lalangné jemaka abana mulihné.

Kacrita Radén Mantri Kuripan lunga ka beji makayun masiram, kairing baan parekanné. Sasubanné rauh di beji, lantas Ida Masiram. Mara Ida maraup, lantas deketa gidatidané baan gelah anaké. Beh geli lantas Ida Radén Mantri tur tulung-tulung ngandikaang parekanné ngediang. Tulungina lantas Ida baan parekanné nanging tusing sida-sida baana ngediang. Dening kéto ngandika lantas Radén Mantri,

“Ih parekan, yéning kené, jani gelah tusing ja juari mulih, kema suba parekan dogen mulih, aturang gelah luas ngumbara. Yan tonden ilang gelah anaké di gidat gelahé, sing ja nira lakar mulih.”

Suba jani kéto ka puri lantas parekanné. Sasubanné neked di puri, aturanga lantas saindik-indik Ida Radén Mantri ring Ida Anaké Agung, lantas Ida masesangi,

“Inggih Ratu Betara yéning rauh pianak titangé, malih pidan ja, titiang masesangi ngodalin gegedén.” Kéto koné sesanginidané.

Kacrita pamargin Ida Radén Mantri rauh lantas di alasé wayah, manggihin lantas Ida punyan sumaga tur mabuah nged pesan.

Ngandika Radén Mantri, “Ih gelah anak, makaad malu dini di don sumagané!”

Makaad lantas gelah anaké. Suba kéto munggah lantas Radén Mantri ngrereh buah sumaga. Suba usan ngrereh sumaga, tedun lantas Radén Mantri. Mara Ida rauh betén, buin lantas deketa gidatidané baan gelah anake. Dening kéto, mamargi lantas Radén Mantri sambilanga nangis. Suba joh pamargin Ida lantas manggihin punyan juuk mabuah nged, ento lantas pénék Ida, tur gelah anaké genahang Ida di don juké. Suba Ida uusan ngrereh juuk, tedun lantas. Rauh betén buin deketa gidatidané baan gelah anaké. Buin lantas Ida mamargi, lantas nepukin punyan poh mabuah nged pesan.

Ngandika lantas Ida Radén Mantri tekén gelah anaké,

“Ih iba gelah anak, dini malu iba nongos di don pohé, nyén lamun ada anak nagih nuduk ulungan pohe da baanga!”

“Inggih.”

Mara kéto munggah lantas Radén Mantri. Sasubanné rauh ba duur, lantas ngejor Ida pohé, ditu lantas gelah anaké ngulah celeng, nanging tusing nyak magedi. Mawanan gedég lantas gelah anaké, deketa lantas kuping celengé. Napi malaib lantas celengé, tur gelah anaké bareng palaibanga. Dening kéto lantas Radén Mantri tedun tur gelisang raris Ida mantuk.

Tan kacarita, di margi rauh suba di purian, beh lédang pesan kayun Aji muah biangidané, lantas Ida Anaké Agung naur sesangi ngodalin okanida tur ngawéntenang rame-rame pitung dina makelonné.