کیلوگیرم ویا کیلوقرام (اینگیلیسجه: Kilogram)، کۆتلهنین میلتلرآراسی بیریملر سیستمینده اوْلان اصلی بیریمی دیر و kg سیمگهسی ایله گؤستریلیر.
معمولا قیسا اولاراق کیلو آدلاندیریلیر. ۱ کیلوگیرم دقیقا بیر لیتر سو'یون کۆتلهسی دیر.
کیلوگیرم | |
---|---|
بیریم بیلگیسی | |
اؤلچو سیستمی | اسآی اصلی بیریملری |
نهیین بیریمی | کۆتله |
سیمگه | kg |
بیریم دؤنۆشوملری | |
۱ kg ... | ... برابر دیر ... |
آوواردوپوآ | ≈ 2.205 پوند |
British Gravitational | ≈ 0.0685 ایسلاق |
۱۷۹۵-جی ایلده کیلوگیرم بیر لیتر سو'یون کۆتلهسی اوْلاراق تعریفلنمیشدیر. ۱۸۷۹-جو ایلدن ۲۰ مئی ۲۰۱۹ تاریخینهدک، بیر پلاتین-ایریدیوم جینسیندن اوْلان سیلندر (اوستووانه)، میلتلرآراسی کیلوگیرم نومونهسی (IPK) آدلاناراق متریک سیستمینده کۆتله بیریمی اۆچون ایستاندارد سئچیلمیشدیر.
کیلوگیرم اۆچ فیزیکسل ثابیتین واسیطهسی ایله تعریفلنیر: ایشیق سۆرعتی c، اؤزل بیر اتوم گئچیش فرکانسی ΔνCs و پلانک ثابیتی h.
بو تعریفده پلانک ثابیتی 6.62607015×10−34 میقداری ایله برابر نظرده آلینیر و بیریمی kg⋅m2⋅s−1 (همان J⋅s) دیر کی بو بیریمده اوْلان متر و ثانیه c و ΔνCs واسیطهسی ایله تعریلفلنیرلر.
گیرم (1/1000 کیلوگیرم) قاباقجا ۱۷۹۵-جی ایلده بۇزون اریمه نۆقطهسینده اوْلان بیر سانتیمتر مۆکعب سویون کۆتلهسی اوْلاراق تعریفلنمیشدیر. ۱۷۹۹-جو ایلده «Kilogramme des Archives» آدلانان بیر پلاتین جینسیندن اوْلان نومونه، کیلوگیرمین ایستانداردی اۆچون یارادیلمیشدیر و ۱۸۷۵-جی ایلیندن باشلایاراق کیلوگیرمین میلّتلر آراسی نومونهسی اوْلاراق تانیملاندی. بو نومونهنین کۆتلهسی، ماکزیموم سیخلیق و اتموسفر باسقیسی آلتیندا اوْلان بیر دسیمتر مۆکعب سۇیون کۆتلهسی ایله برابر ایدی.
۱۸۷۹-جو ایلده، آغیرلیقلار و اؤلچولر کوْنفرانسیندا (CGPM) بیر پلاتین-ایریدیوم جینسیندن اوْلان سیلندر (اوستووانه)، میلتلرآراسی کیلوگیرم نومونهسی (IPK) آدلاناراق متریک سیستمینده کۆتله بیریمی اۆچون ایستاندارد سئچیلمیشدیر.
کیلوگیرم سوْنونجو اصلی بیریم ایدی کی فیزیکسل میقدارلار و ثابیتلر یئرینه اینسان الی ایله یارادیلمیش بیر نومونه ایله تعریفلنیردی.
بیریملر آراسیندا، آدینین بیر پارچاسی اسآی اؤناکی (کیلو) اوْلان تکجه بیریم کیلوگیرم دیر. کیلوگیرم آدی فرانسهجه اولان kilogramme سؤزوندن آلینمیشدیر. آنجاق بو آدین کؤکو یونانجا "مین" آنلامیندا اوْلان کیلو (χίλιοι/khilioi) و لاتینجا "کیچیک آغیرلیق" آنلامیندا اوْلان gramma سؤزلرینین بیرلشمهسیندن دۆزلمیشدیر.
کیلوگیرم کۆتلهنین بیریمی دیر. کۆتله ایلمسیزلیک (اینرسی) ایله ایلگیلی بیر کمیّت دیر. بیر جیسمین آغیرلیغی، ائتگیسینده اوْلدوغو یئرچکیمی مئیدانینا باغلی دیر، آما جیسمین کۆتلهسی یئرچکیمیندن مۆستقیل اولاراق ثابیت و دییشیلمزدیر. نئجه کی جاذیبه گۆجۆنون دییشیلمهسینه گؤره بیر جیسمین آی اۆستونده اوْلان آغیرلیغی، همن جیسمین یئر اۆزوندهکی آغیرلیغی ایله فرقلی اوْلابیلر، آنجاق اوْ جیسمین کۆتلهسی آیدا و یئرده برابر و دییشیلمز دیر. کۆتلهنین بیریمی کیلوگیرم و آغیرلیغین بیریمی ایسه نیوتون دور.
کیلوگیرم کۆتلهنین اصلی بیریمی اولدوغونا رغما، اسآی اؤناکلری «کیلوگرم» ایله یوخ، بلکه «گیرم» ایله ایشلنیرلر. چۆنکو کیلوگیرم اؤزو گیرم'ین بیر اؤناکه یاپیشماسیندان دۆزلمیشدیر. (کیلو + گیرم)
آلت ضریبلر | ضریبلر | |||||
---|---|---|---|---|---|---|
دَیَر | سیمگه | آد | دَیَر | سیمگه | آد | |
۱۰-۱ g | dg | دسیگیرم | g ۱۰۱ | dag | دکاگیرم | |
۱۰−۲ g | cg | سانتیگیرم | ۱۰۲ g | hg | هکتوگیرم | |
۱۰−۳ g | mg | میلیگیرم | ۱۰۳ g | kg | کیلوگیرم | |
۱۰−۶ g | µg | میکروگیرم | ۱۰۶ g | Mg | مقاگیرم | |
۱۰−۹ g | ng | نانوگیرم | ۱۰۹ g | Gg | قیقاگیرم | |
۱۰−۱۲ g | pg | پیکوگیرم | ۱۰۱۲ g | Tg | تراگیرم | |
۱۰−۱۵ g | fg | فمتوگیرم | ۱۰۱۵ g | Pg | پتاگیرم | |
۱۰−۱۸ g | ag | آتوگیرم | ۱۰۱۸ g | Eg | اکزاگیرم | |
۱۰−۲۱ g | zg | زپتوگیرم | ۱۰۲۱ g | Zg | زتاگیرم | |
۱۰−۲۴ g | yg | یوْکتوگیرم | ۱۰۲۴ g | Yg | یوْتاگیرم | |
چوْخ ایشلنن اؤناَکلر قالین فونت (Bold) ایله یازیلمیشلار. |
This article uses material from the Wikipedia تۆرکجه article کیلوگیرم, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). عکسی بللیلشدیریلمزسه، ایچیندهکیلر CC BY-SA 4.0 لیسانسی آلتیندادیلار. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki تۆرکجه (DUHOCTRUNGQUOC.VN) is an independent company and has no affiliation with Wiki Foundation.