मङ्गोलिया

आज जवने कय मंगोलिया कहि जात हय कउनो जमाना मे शिओंगु, शियानबेइ ,रोउरुन जइसन तमाम घुमन्ता साम्राज्य यहपै शासन किहिन । सन् 1206 म चंगेज खान  मंगोल साम्राज्य कय खडा़ कीहिस । लेकिन युआन राजवंश कय पतन कय बाद मंगोल अपने पुरान रहन-सहन पय लौटि आए। 16 वीं और 17 वीं शताब्दी मा मंगोलिया तिब्बती बौद्ध धर्म कय प्रभाव तरे आवा। 17 वीं सदी कय अंत मा मंगोलिया कय ढेर क्षेत्र मा क्विंग राजवंश कय शासन लगि गा रहा । १९११ म किंग राजवंश कय पतन कय समय मा मंगोलिया आपन स्वतंत्रता कय घोषणा कीहिस , लेकिन १९२१ तक स्वतंत्रता कय बनावै मा औ १९४५ तक अंतरराष्ट्रीय मान्यता पावै खातिर संघर्ष करैक परा रहा। यकरे नाते में देश मजबूत रूस और सोवियत प्रभाव में आवा, १९२४ मा मंगोलियाई जनवादी गणराज्य कय घोषणा कइ गै औ राजनीतिक रूप से मंगोलिया उ समय कय सोवियत राजनीति कय मानै लाग। १९८९ मा पूरुबी यूरोप मा कम्युनिस्ट शासन कय टूटैक बाद, मंगोलिया म १९९० मा लोकतांत्रिक क्रांति देखैक मिला , जवनेकै नाते से बहु-दलीय व्यवस्था बना , १९९२ मा नँवा संविधान बना औ देस बजार अर्थव्यवस्था कय ओर आगे बढा। छिगिस खान (जेका चंगेज खान कय नाँव से जानि जात है) मंगोल जातिन कय यकठ्ठा करैक औ एक्ठु बहुतै बडा साम्राज्य कय नेयइ डारिन। इ साम्राज्य चीन, रूस, पूरुबी यूरोप औ मध्य एशिया तक फइला रहा।मंगोल इतिहास मा लिखा है कि छठवा शताब्दी मा भारत से दुई आर्चाय ‘‘नरेन्द्र यशसँ’’ औ ‘‘शाक्य वंश’’ मंगोलिया आये। वे अपने साथे बौद्ध सूत्र ग्रन्थ औ मूर्ति लाये। छठवा शताब्दी मा बौद्धमत कय परचार सुरु होइ गवा औ चालु रहा। भारत से धरम गुरु हुँवा जात रहे औ मंगोल तीरथ यात्रा करै वाले, संस्कृत कय पढाई करै वाले औ धरम कय ज्ञान पावै खर्तिन भारत आवत रहेँ। 17वां शती तक इ चलतै रहा। मंगोलवासी अपने कय भगवान बुद्ध कय प्रिय शिष्य मौद्गल्यायन कय संतान मानत हैं। मूलरूप में जवन मंगोल देश रहा अब उ 3 भागन मा बंटा रहा। मंगोलिया कय एक भाग चीन कय अधीन है।जवने कय आन्तरिक मंगोलिया कहत हैं। मुख्य भाग जवन अब स्वतन्त्र है, बाहरी मंगोलिया कहा ला। कुछ भाग रूस कय अधीन है जवने कय साईबीरिया प्रदेश कय भाग बना दिहा है। यका बुयार्त गणराज्य कहत हैं। मंगोलिया कय राजधानी उलान बातर होय जवने कय माने होय 'लाल बहादुर'। मंगोलिया कय राष्ट्र पताका कय स्वयंभू (सोयंबू उच्चारण करत हैं) कहि जात हय । 'स्वयं भू' संस्कृत कय शब्द होय। बहुत मंगोल मनई संस्कृत नाँव धरा लैं। वहं भारतीय पतत्रा औ आयुर्वेद काय चलन है। महिनन कय नाँव औ हप्तन कय दिन कय नाँवो भारतै से है । जइसैे अत्तवार कय आदिया (आदित्यवार), सोम कय सोमिया, मंङ्ङर कय संस्कृत मा अंगारक शब्द है। बुद्ध=बुद्ध, बिहफै=व्रिहस्पत, शुक्क=सूकर, सनिच्चर कय सांचिर बोलत हैं।

मंगोलीया कय एक्ठु राष्ट्रपति कय नाँव शुंभू रहा। मंगोल देस कय जवन वैज्ञानिक सबसे पहिले अन्तरिक्ष में गँय, ओनकय नाँव गोरक्षथा रहा। केहु केहु कय नाँव कीर्ति, कुषली, कुमुद, कुबेर सुमेर,जय जिमित्र, वज्रमपाणि होय । मेहरारुन कय नाँव इन्द्री, रत्ना, अमृता जइसनौ रहत हय। चीन मे मंगोलवंश कय पहिला सम्राट कुब्लेखान होय। उ तिब्बत से महायान बौद्धमत कय प्रधान आर्चाय फाग्सपा (आर्य) कय पीकिग मे बोलाइकै ओनसे दीक्षा लीहिस। आर्चाय फाग्सपा कय राजगुरु कय पदवी दइ गै। ओन चीन में विहार बनवाइन। चीन कय बू-वाई शान नाँव कय पहाड पै मंजू श्रीदेवी कय बडका मंदिर बनवाइन।

यँह कय राज काज कय भाषा औ सबसे ढेर बोलि जाय वाला भाषा मंगोलियन होय । ९५% जनता इहै भाषा बोलत हँय ।

मंगोलिया म रहै वाले १५ साल से उप्पर कय मनईन मे ५३% बौद्ध धरम मानै वाले औ ३९% कवनौ धरम ना मानै वाले मनई रहें ।