Xayastanavayotsdzorwinka

Vayots Dzor
Վայոց Ձոր
	RISTULA
Patecta	Xayastana
Utcinda	Winka (marz)
Widot	Yeghegnadzor
	SANELIOPA
Sanelia	50 800 ir- (2016)
For	23 ir-/km²
Ava	Armenava
	TAWAVOPA
Welmot	2308 km²
betara	teza

Winka tir dem 3 widavafa dota isu 5 tawadayafa. Widot tir Yeghegnadzor.

Tawavopa

Tigisa vagetalte witafa Xayastana, Vayots Dzor winka tir dem walmot vas 2308 km² ( 7.8 % ke varaf welmot ke patecta ). Tir tela lesaneliakirafa winka ke patecta. Divefa jowa do Azara talteon is roneon tigid. Koefa jowa do lenteon Gegharkunik winka isu lentalteon Ararat isu geroneon Syunik tigid.

Izvon, noelafo tawavo ke winka va lok ke Vayots Dzot kola ke Syunik izvafa winka ke savsafa Armena kereler.

Vayots Dzor tir meftavafa gola. Nelkon tir dem baroya jaka : lenteon Vardenis jaka is isteon Arpa jaka is geeon Vayk jaka. Dem ontine vas 3522 m-, Vardenis tculk tir ane ontine ke winka, solve Areni krant tir ontinaf is lodomaf vas 850 m-. Vayots Sar tculkfey ontinaf gu 2586 m- riwe iste winka tigir.

Vayots Dzor tir dem jontika voa isu klita isu lavay. Tela lozolonafa kuksa tir Arpa kuksa nisa koo 92 km- koe tawavo ke winka. Inafa klita moe lenttaltefa datca ke Syunik azekonta dem ontine vas 3260 m- tigir aze va Aras kuksa konir. Tir dem yona kovoa disa va stoya dum Jermuk kuksa isu Herher.

Yeghegis kuksa tir dalafa kovoa ke Arpa. Va krantoza nendana gan bowere wetce tumtaxo ke govitafa blira konir.

Loa kuksa ke Vayots Dzor tid adalakirafa gu kaliaf cel is koliavapa. Abdumimaks ta remburera va lava ke Arpa kuksa van Sevan uzda zo skuyur. Arbureteson va celki ke Arpa kuksa, lavaberlotaf narilt bak 1981 mal Kechut oblaxuzda kal Sevan uzda tulon zo vegeduyur.

Yona uzdama koe krant ke Herher kuksa dere tigid.

Izva

Vayots Dzor yolt gan Movses Khorenatsi taneatomon zo miwayar. Soe jontik debak isu muka evlon gu gelkeraporugalaf firday ik iyekotugal bal rawopafa kojoxara koe gola zo kosmayad. Gretcaks keve kiriafa buta kaatoes va tcabanesa nakila ik sulem dere zo kosmayad. Nope batyona rawopafa vayara, izvopik al levaykad da gola tiyir saneliakirafa mali abdiizvugal. Arulatum ke Areni don Areni-1 arula guazafa gu 6100 tanda is kosmayana bal rawopafa kojoxara skuyuna wali 2007 is 2011 divnediyir da gola tiyir saneliakirafa bak -V^-eafa decitda. Tuvoraxo tiyir dem kacasis blet is tanoyo xuvasiko is yona belcetasa rumela is tawalodaf gilmok ise co tir telo losavson grupeno ke izva.

Rawopik va tanoya leltafa vukuda guazafa gu 5500 tanda dere trasiyid.

Mali -VIII^-eafa decemda, Vayots Dzor refa gola tiyir ki ke Urartu gazaxo. Kaikion tiyir pak ke Armena gazaxo, tison utca ke Syunik winka.

Jontika uja isu tucpastafa belca isu teremtaxe wali X^-eafa is XIII^-eafa decemda zo vegeduyud ugale Vayots Dzor tiyir pak ke Syunik gazaxo.

Bak Mialukugal lesovawa va gola ke Vayots Dzor remlakiyir, tulon vawa reugale kagluyasa va Martuni widava isu Yeghegnadzor. Vayots Dzor va tano zolonafo tavexo ke mialukugalafa Armena bravayar, i va Gladzor kotla zabduyuna moni 1280 gan Nerses Mush.

Rekola wali XV^-eafa decemda isu XVII^-eafa gu tela lodorikafa ke izva ke Vayots Dzor zo torigir. Gola vanpiyir meldxo wal tolgenis milk is turkaf ok iranaf grelt. Batdume jontika cugexa isu wida zo vilayad isen sanelia zo arbureyer. Gola radimion tiyir ki ke Naxçivan sersaxo isen yolt tiyir Daralagez kali 1918.

Bak taneafu acku ke XIX^-eafa decemda moi rossiapersafa geja ke 1826-1828 is nope Turkmantcay tenusa bioga ke 1828, Vayots Dzor winka mal Persa kal Rossia mwaruyur. Bak mil ilanacek va Armena warzafo ristulaxo zo kowinkayar. Bak 1849 Yerevan bowexo don Vayots Dzor zo reduyur. Vayots Dzot keon vanpiyir utca bak 1870.

Wali 1918 is 1920 gola tiyir ki ke sedielafe sokasane ke Xayastana. Moi levrotira va patecta gan Sovietafa Tanara, gola kali 1921 is cenera ke Bolcevik roti acagiyir numen Vayots Dzor winka gu Seltevafe Sovietafe Sokasane ke Xayastana zo kodoplekuyur.

Remi sovietaf ugal, refa Vayots Dzor gola tiyir ton toloya utca : Yeghegnadzor is Azizbekov. Radimi volruptesuca, ristulafa zabdura ke 1995 va sina gu tela refa winka jeayar.

Sanelia

Bak 2016, uldinena varafa sanelia ke winka tir vas 50 800 irubasik, trabe for vas 23 ir-/km².

Widavafa sanelia tir vas mon bareaca ke kotak.

Towara ke sanelia ke Vayots Dzor winka (1991-2016)

Sanelia sedme otulara. Sanelia sedme uldinera. Xantaza : ArmStat

Doteem

Doteem ke Vayots Dzor winka
Dota	Ord	Welmot (km²)	Sanelia (2011)	Widot	Wida, monaxo
Jermuk	Widava	497	7359	Jermuk	Gndevaz, Herher, Karmrashen
Vayk	Widava	184	7064	Vayk	Arin, Azatek, Por, Zedea
Yeghegnadzor	Widava	27	7944	Yeghegnadzor
Areni	Tawaday	438	10 410	Areni	Agarakadzor, Aghavnadzor, Arpi, Chiva, Gnishik, Khachik, Mozrov, Rind, Yelpin
Gladzor	Tawaday	131	5220	Gladzor	Getap, Vernashen
Malishka	Tawaday	86	4460	Malishka
Yeghegis	Tawaday	477	5961	Shatin	Aghnjadzor, Artabuynk, Goghtanik, Hermon, Horbategh, Hors, Karaglukh, Salli, Sevazhayr, Taratumb, Vardahovit, Yeghegis
Zaritap	Tawaday	468	3906	Zaritap	Artavan, Bardzruni, Gomk, Kapuyt, Khndzorut, Martiros, Nor Aznaberd, Saravan, Sers, Ughedzor

Vuestexa

	Winkeem ke Xayastana
Aragasotn • Ararat • Armavir • Gegharkunik • Kotayk • Lori • Shirak • Syunik • Tavush • Vayots Dzor • Yerevan

This article uses material from the Wikipedia Kotava article XayastanaVayotsDzorWinka, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Le contenu est disponible sous licence CC BY-SA 4.0 sauf mention contraire. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Kotava (DUHOCTRUNGQUOC.VN) is an independent company and has no affiliation with Wiki Foundation.