Suterot Winesburg, Ohio

Sherwood Anderson kobliyis bak 1876 koe Ohio galdolk tir vey wawafa is tawadayafa yasa ; lyumayas bak espanatanarasokeemafa geja, az kobayas koe iaxe, va copaf runt nobayar numen inafa gelukafa watsa di tiyir bana. Acum Anderson va jontik amerikaf suterotik dum John Steinbeck is William Faulkner is Ernest Hemingway di turestayar.

Nega ke Winesburg, Ohio koe Ohio galdolk ke Tanarasokeem dilizer milinde vergumvelt bazecker. Larma vas tol-san-balemoy berpotam koe xuta ke Winesburg widavama ruldar. Koredik tid irubasik ke Winesburg ; kot berpotam pilkovon tir aname lan koredik.

Vildeks

Taneaf luz vergumveltaf gu Neva dem vertovaca ( The Book of the Grotesque ) va teca abdifta tadler lize guazaf suterotik va kot intaf grupeyen korik trakodur aze va neva icdeon suter. Vertovaca trogarn va korik dustulen gan dilintafa onkara va ageltuca dasugdar. Kot berpotam vas lan irubasik ke Winesburg di tikir.

Nubeem ( The Hands ) taneaf berpotam va Wing Biddlebaum nakilar, i va antorik dem pilkovaf nubeem merogrufelian. Wing nope rolafa koridara al yateyer, i nope koridara ruyesa da in va rumeikye koe monefa widava nuve relingayar.

Eluxafu fixumu ( Paper Pills ) rupa tir tela ke Reefy tuguazawese kurmikye yerumase va tana anelikya, voxen arti oxam tandacku bantel mulufter.

Koe Gadikya ( Mother ) bareaf berpotam, belisik va Elizabeth Willard kosmar. Bantan tir gadikya ke George Willard tis dalaf koredik ke larma. George tir jotafe felusikye kobase mu lizukafa fela. Elizabeth akoler ise tir kosaf gu volkalafa kurera nume va kurenikye lyumar enide va sintafe nazbeye di turestapayar.

Balemeaf berpotam vergumveltaf gu Trakopik ( The Philosopher ) va diveavafe Parcival kurmikye atoer. Gestir da vrayasikaf tum va in onkar. Va inafa « birga ke bli » mbi razdar : sedme in, kot ayik tir tec gamdaytayan Kristos.

Koe direfa nega, Metan gruper ( Nobody knows ), Willard rem tayaday otcer aze va Louise Trunnion yikya ilagir. Bata skedegara kadimion askir da in pester gunaf.

Teve berpotam iku lerde yolton gu Lorbuca ( Godliness ) zo kabelcayad ise va Jesse Bentley nakilad. Bate igeltafe tawadayikye folkir koredik ke Biblia neva libuyun gan Lorik. Va Louise nazbeya me renar. Louise dene volkalafa kurera blir. Va David nazbeye ko veygadikaf viel tori tiskirama stakser. Aneyatason va sugda ke Lorik, ko aalxo gan veygadye zo star voxe zo wabergesir numaze il Winesburg di yater.

Koe Rietakirikye ( A Man of Ideas ) saneafa nega, Joe Welling sipoyik va lantanya dem fiunton sotafe gadikye isu berikye facnar.

Stuva ( Adventure ) diref berpotam tir dem Alice Hindman koredafa antiikya. Ina trakur da intaf « renapanik » va Winesburg weti konaka tanda buluyur voxaze mea di dimlapiyir.

Gotarkanuca ( Respectability ) berpotam va izva ke Wash Williams kareizur, i va riozafe sumesutesikye vliguse va ayikyeem golde mesaguca ke intafa kurenya is yotafa ke ikagadikya.

Trakusik ( The Thinker ) san-bareaf berpotam va mustafe yikye yoltkirafe gu Seth Richmond pulvir, i va korik pestaler da va runda koe selt ke Winesburg me dadir. Teni lan sielcek tiskin do Helen White nazbeikya ke nelkafe omeltikye ke widava, dakter da va Winesburg parmon djubulur.

Lana perdafa velikya tisa nazbeik ke andik ke alkiskeem ke widava, tir koredik ke san-balemeaf trelapaf berpotam vergumveltkiraf gu Tandy ; va bata yoltega askiyina gan izakikye vanikatcur, i gan ayikye domuse edje valeve resta ke mona do gadikye tigiyir. Battanye va rietavikya pimtar nume ruyer da ina di govanpir Tandy.

Koe Po ke Lorik ( The Strength of God ), Curtis Hartman gertik va Kate Swift tavesikya ke Winesburg gojer. Inafa jugemera griawir viele ba lan noldas mielcek onser da inya lebafa bliker.

Direfa rupa vergumveltkirafa gu Tavesikya ( The Teacher ) bak mil mielcek dilizer ise va zoera ke Kate tove George Willard tavembikye kareizur. Kate iskur da koe bazaxo ke lizukafa fela gan George zo kutcar voxen gunuca va ine otcesir, tubizakason va George.

Koe Antiuca ( Loneliness ), Enoch Robinson va Winesburg van New York bulur. Va intafa vreda gu gestanaf nik frofar voxaze aloyar moida va sin pu vegungikya al lapulvir.

Koe Lana divmodara ( An Awakening ), George Willard bal mielafa gestara fogerazdur ; pu Bella Carpenter refa fertya vaon lapulvir voxe gan tane inafe nesasikye zo alier numen batcoba va dioluca ke sielcek tenar.

Tan-balemeaf berpotam vergumveltkirf gu Abiguca ( Queer ) va vidjera ke Elmer Cowley nazbeikye ke blotonyik pimtar. Dere bantan me tir trabiangaf koe Winesburg lize va intafa runda me lajutrasir. Liter da varafa widava krupter da dalintafa yasa co tir abigafa. Tere inafa zidera kev George Willard jiadar nume fiker abdida kan impadimak va widava mallapir.

Koe Mewelidayan rotuxadaks ( The Untold Lie ), Hal Winters tawamidusik va biyara icde kurera pu Ray Pearson are midusikye erur. Numen bantan va intafa skedara va kurenya toz under nume zo boiker.

Ulira ( Drink ) va taneafa bagalara ke Tom Foster icde ruyat pimtar, i ke dinafe yikye deltane mu belisik.

Tol-san-toleaf berpotam vergumveltkiraf gu Awalkera ( Death ) va Elizabeth Willard is Reefy kurmikye nakilar. Tiskiyison va belcafa rekola, sin va sint korenad kore Elizabeth astirbon akoler. Kadimi muluftera, George nazbeye va Winesburg parmon djukubulur.

Koe Rotuvuca ( Sophistication ), George is Helen White bal kapasielcek gozad ; deasewed ise kotliz vulted nume va rumeugal katrasid viele siel toz dur. Va widava djuprobulud ; Helen va kotla fu denfir.

Mallapira ( Departure ) bocaf berpotam va malfira ke George van aryona coyunta kareizur : va impadimak rundanyar nume va darefa blira jovler, i va blira banvielu titisa azentekwa ke inafa milgafa klokura.

Sebuks

Po ke bat berpotamak tir meaykara va beta malyera iku sebura is zoltera va meka rupa. Noglaza is mekaliks is meja ke kot koredik va inaf skedeem do irubasikaf arak ke widava tenekad. To berpot icde kobudera is ayaf tikieem nelkon tir. Dace bocaf luz va meka zoltera vanzilir ; belisik me di gruper kase George al vanpir suterotik inde djumeyer, meie va inaf stekeugal. Sherwood Anderson va min mo miltafa vwa do koredikeem mukodackon rundar.

Dere rupel

• Sherwood Anderson : Amerikaf englavaf suterotik ( 1876-1941 )