María Luisa Bombal

María Luisa Bombal Anthes, kobliyis ba 08/06/1910 koe Viña del Mar koe Tcilea az awalkeyes ba 06/05/1980 koe Santiago, tir tcileaf suterotik.

María Luisa Bombal
1910-1980
Espanavaf tcileaf suterotik

Blirizva

Gadikye ke María Luisa Bombal tiyir argentinik xantaf gu Franca isen gadikya xantafa gu Germana. Bak 1923 moi awalkera ke gadikye, María Luisa is gadikya is toloya berya ko Franca lapid lize va sardugal di tiskir. Francava vanpir inafa gubefa ava numen inaf taneaf suterotam batkane tid. Batcoba rotir pebur dume inaf martig tir aftackaf is volslikaf voldum prostewaf espanavaf martig tis veda rusagafa gu muxasa rotuvaca.

María Luisa Bombal dene Sorbonne kotla ke Paris kan tcilk icde Prosper Mérimée francaf suterotik ke XIX-eafa decemda zo dobar. Va pizopa dere al vayar ise va konak wenyusiktum koe Franca lidam Tcilea al paker. Remi inyona tazukasa tanda koe Paris, suterotaf is yambaf vameogeltrevaf lizor tiyir urmaf numen vamoegeltrevafa niedarapa koe inaf berpotaf grabomeem exaksawer.

Grabom

Bak 1931, María Luisa Bombal ko Tcilea vo dimlapir voxen arti tolda va Buenos Aires koe Argentina di koirubar lize den zaskaf suterotaf rijay dem Jorge Luis Borges is Victoria Ocampo denfir. Mu Sur virda ke Ocampo kobar lize toloy inaf berpotam zo sanegad. Banugale Pablo Neruda koe argentinafu kelu bliyir ise va María Luisa luxe inaf taneaf berpot ( La última niebla ~ Areldafa bra ) sanegayan bak 1935 az siskeyen gan malyopasikeem koswayar.

Bak 1938 toleaf berpot ( La amortajada ~ Koxawanikya ) zo sanegar. Mililanon va argentinaf lingesik kurer voxe arti tolda joar.

Diretandon ko Tanarasokeem tcilon koyar lize va zolonaf suterotik dum William Faulkner is Sherwood Anderson di rungruper. Dim Buenos Aires, va toloya nega sanegar : El árbolAal ) is Las islas nuevasWarzaf ewaleem ). Kadimi jonvielerama koe Tcilea bak 1941, ko Tanarasokeem gire lapir. Banlize bak 1944 va francaf amerikik gire yerumar.

Bak barsandafa rekolapa, María Luisa Bombal koe New York soker lize abicote is nelkon englavon suter. Mali 1970 ko Tcilea dimlapir lize koe Santiago ba 06/05/1980 mulufter.

Inafa zolonuca mu suteroteem

Bombal tiyir tan taneaf espanamerikaf berpotik joayasa va geltrevafa prostewa ke sorda is suteyesa kan pilkapaf is ilkaf martig, bloskason gu meovafa ok levjilafa watsa. Bak 1930-e sanda, solve lo naf suterotik va grabom karakes va seltafa koboda warzeyed, pune trasitison va koswara Bombal gu to koee va int istfiyir nume va konak grabom katcalon dugapaf al warzer. Batinde gu abdufisik va suterotiktum ke Trelay ke 1960-e sanda isu 1970-e koe latinafa Amerika zo rotorigir. Ise kan veda dem jontika ezlindafa yartera is pestaka ke furefa folva al askir, i ke kexaf alpoz lize askisiki va ugal is awalk orikon yordad.

Koe inaf toloy berpot, belisik va cugcoba kan iteem is pestabeem ke askisik wickir, i ke askisik satolepes va cobeem. Izva ko yordama zo stanjur, tulon koe Areldafa bra (La última niebla). Ezlopa va bata vewukafa veda numalfir isen Bombal va lecafa ewava faver (dum bra ik muva ik suka) ton keskanya is kan glabaf martig. Gradilikya ke The House of Mist koe klokana tamava loedje blir, i koe tamava miv asketcana sume geltruca ke intafa kureraja. Koe Koxawanikya (La amortajada), askisik koe nomulk awalkon dayker, disukeson va lo boresik tantanon pis az wis, is gin ugalason va darekefa renara is yasafa skeda ton terefa aftuca is barlipafa utcoruca. Koe Aal (El árbol) inafa lokotgrupafa rupa, belisik va osk swavopafa luzdarapa va ayikya voxosk dere woese ckane ke uxafa voxuca zo ralentar. Edje Brígida va dolpa terektar, pune inafa blira isu folva sokid, divrozanon gan lexaroti.

Remi cuga blira María Luisa Bombal va riwena sposuca me zomeyer. Voxen mali vonewera ke ayikyevaf lizor mali konaka sanda, inaf grabomeem lomanton zo belir ise zo sebur.

Dere rupec

Tcileaf suteroteem

Vuestexa

  • (es) Marjorie Agosín, Las desterradas del paraíso. Protagonistas en la narrativa de María Luisa Bombal. New York: Senda Nueva de Ediciones, 1983.
  • (es) Marjorie Agosín is Elena Gascón-Vera is Joy Renjilian-Burgy, María Luisa Bombal. Apreciaciones críticas. Tempe (USA), Bilingual Press, 1987.
  • (es) Lucía Guerra-Cunningham, La narrativa de María Luisa Bombal: Una visión de la existencia femenina. Madrid: Playor, 1980.
  • (en) Linda Irene Koski, Women's Experience in the Novels of Four Modern Chilean Writers: Marta Brunet, María Luisa Bombal, Mercedes Valdivieso, and Isabel Allende. Stanford University, 1989.
  • (de) Erna Pfeiffer, Territorium Frau: Körpererfahrung als Erkenntnisprozeß in Texten zeitgenössischer lateinamerikanischer Autorinnen. Frankfurt a.M.: Vervuert, 1998. ISBN 3-89354-098-9

The Dinner Party ( Ayikyafa jorestura ), sposafa ayikyevafa yambaxa ke Judy Chicago (1979)    The Dinner Party
   Miwanikya (28-e deba)
 ( 3-e berk )
María Luisa Bombal

María Luisa Bombal

 Blira 1910-1980
 Ava Espanava
 Suterind Berpot
  Suterot 
Berpot :

Reizak is berpotamak :

  • Las islas nuevas - Warzaf ewaleem, 1939
  • El árbol - Aal, 1939
  • Trenzas, 1940
  • Lo secreto, 1944
  • La historia de María Griselda, 1946

Ezlak :

  • Mar, cielo y tierra, 1940
  • Washington, ciudad de las ardillas, 1940
  • La maja y el ruiseñor, 1960
María Luisa Bombal  Tuveli icde Suteroteem  María Luisa Bombal

Tags:

María Luisa Bombal BlirizvaMaría Luisa Bombal Dere rupecMaría Luisa Bombal VuestexaMaría Luisa BombalSantiagoTcilea

🔥 Trending searches on Wiki Kotava:

YambaSimone de BeauvoirVesnol (Dyacopterus spadiceus)Camille Pissarro30-e ke santaneaksatSloveniavaTcernigivVegeduropaEsperantoavaNiccolò AmmanitiIngrid JonkerVimkol (Sylvisorex isabellae)Sinkestol (Mandrillus sphinx)Medjitol (Cercopithecus wolfi elegans)SidlekeugalVesnol (Rousettus amplexicaudatus amplexicaudatus)Kolavasik moe piluda ke Trouville (trutca ke Boudin)DurrësStukol (Catagonus wagneri)Vitus BeringSeltSaint-Louis (Senegala)Chichén ItzáKanadaFreetown3-e ke taneaksatPollard dzopoka (trutca ke Van Gogh)PolskaSuolema (kuksa)Ipom (Leucogeranus)KošiceMeftava koe Saint-Rémy dem orikafa mona (trutca ke Van Gogh)Surbol (Raphicerus melanotis)Vimkol (Sylvisorex oriundus)Blizesina kelda, kene kuksa (trutca ke Boudin)Xanta ke tamava (trutca ke Courbet)Talakoldunol (Dermoptera)LexopaIpomay (Diaphorapteryx)Soyora (Prunus dulcis)Tatyana LebedevaSuteroteemNastopaTanzaniaMbeyaGolaVesnol (Ptenochirus jagori)Bitejkiraf mielcek (trutca ke Van Gogh)FrancaSinka is anameda (Amerika -1000-800)20-e ke taneaksatTSSSInterlingueavaRune raporxo (trutca ke Van Gogh)LatviaTanzaniaManyaraGolaVesnol (Cynopterus horsfieldii harpax)Delt va Sofia Tarnovskaya (trutca ke Repin)Tamavafa gadakiewega koe Sierraleona19631-e ke pereaksatCongoaIpomay (Lewinia)🡆 More