Suterot Divlamasikaf Bwoy

Bat bwoy ke Vilhelm Moberg ( sverigavon Utvandrarserien ) vas balemoy dov ruldar :

Divlamasikaf bwoy

  • Utvandrarna – Divlamasik ( 1949 )
  • Invandrarna – Kolamasik ( 1952 )
  • Nybyggarna – Boniasik ( 1956 )
  • Sista brevet till Sverige – Bocafa twa pu Sveriga ( 1959 )

Divlamasikaf bwoy ke Vilhelm Moberg va izva ke yon wawaf tawadayik mea roblidas va intaf kobaruk koe Sveriga ke XIX-eafa decemda negar, i va tawadayik batdume goras va divlamara ko tawava firvisa va rotisaceem : ko Amerika. Sinafa stuva manton kontepesa is kulafa gu skes koredik tir tela ke blira, i kindany.

Divlamasikaf bwoy : blira koe vo, tawadayafa Sveriga bak XIX-eafa decemda

« Mjödahult tir tan losavsaf vesk ke Ljuder. Inaf yolt koe munesteda ke malyera ba tol-decemda abdi kosmara va Amerika zo ozwar. Niba yasa irubar ise va ban vesk midur mali losavsafi oxilafi nami is kruldera ke losavsaf suteyen valdig. »

Koe Sveriga, koe Småland gola tigit ; XIX-eafa decemda biwe tir ackufa isen tawadayik nope kobaruk is felira ke Luther ujabolk blaganyad. Cadimarmor va vieleuca axazer vieli bolk banvielu rotis volalmotces vion nek parmon toz yargadawer. Tire giatewera ke omaveem ke kotabaf selt lize nope gronafa pakara va pilkot darpe konolera, tawadayik va tawa adre voldrikon blidad, i va pilkot liparsayan is tupinarsayan remi oxileem : tawa toz tir enjapafa numen mea walnon roblid ! Elupkaf kobaruk va sinkara va jontika yasa ravaldansar, numen wawuca is moekote warolaraja nope mutacek ik rodcek va lanyono kro kotrafo gu abduplekura mal Warzafa Tamava pu oblaka dead, i va kro mal ketaf is nazbukaf siday vugdroe ronovurlicken !

Karl Oscar Nilsson is Kristina kurenikya moe tawayam kum bodansaf sid dun furoved ise kobavarsad, i moe taway lize rapor lodam goyna loote tid : yasa al laumar isen rumeik aeled isen Karl Oscar va direkeugal dirnunsur. Robert jotafe berye me tir vungaf vox duxibes va nuyuca nume va Amerika klokar. Vogar da arse lanviele mallapitir viele ke intafa vieleikafa dodera umote al megatar, viele gu miremba ke felisik va int rovotunuyatar. Virnafa awalkera ke taneafa nazbeya ke Karl Oscar bak aeles fentugal va bali ke yasa di fartur : ba imwugal ko Amerika sin mallapitid, van siday abduplekus va lokiewaf direkeugal. Batdume bak muvas viel ke awis imwugal, Nilsson yasa va guazaf gadikeem koe vo isker ise divlamar, do konakar widik ke adlutaxo : lana gruspenikya is inafa nazbeikya, is kurenikye joayase va tolonga, is jotafe vieleikye nik ke Robert. Va kobliyiso vo medjupodimpison bulud.

Bam gevas is ilmataf is kontepes is gulaf bwoy bagaliaf gu savsaf bwoy tozuwer : kind ke lospa dem sverigaf tawadayik mallapiyis dum stuvus ambik ta zabdura va warzafa ebava is grupera va warzafa blira estobason ko megrupene. Mal azeba ke Charlotta tota kal bodafa azeka ke Minnesota gola, Karl Oscar is yasa nekev keveluca is sugawalk meviele di momad. Remlapira abrotcifa gu sanoya safta va pokolera is batcera ke kottel armorar : Kristina nazber aze riwe blidrasur ; Karl Oscar en tir pistok ise va klokara cugeke gir ; Robert gruravenglavur goleteson mali artlapira ko Amerika ; Arvid va Robert wiiskon radimefir ; daavafa Ulrika nijur tel lodelaf koredik edje Danjel is Fina-Kajsa guazya tunyobrawed.

Divlamara van abduplekun siday : New York, xo ke rotisaceem

Duxara ko New York tere tenukewer lize divlamasik va iteem me folid : va tari is ruxeem is batakaf beg rolusten is fedaf vrod, i va manote wazdexa va kruldera ke abduplekun siday !

New York tis maluta van ara blira voxen vawa di tir abrotcifa is iyelakirafa : sverigik va impadimak az setcatota taneatomon faved aze va men vestapayano tawavo tere vankrid. New York is divulafa ensa dankagasa va evluba icde nuyuca is moava pu Robert : rozara ke California va in kofir aze mea bulutur, lanviele in titir moavaneyasik, tukulaweter nume tere titir nuyaf !

Voxen to gemelt ta gire lapira van Minnesota soka tir, nyapenon gan milpatectik pomas va tarutera va yone ikse plekune kev warzaf kolamasik... Mil sverigik mea tid divlamasik voxe vanpid kolamasik gotcedes va intafa korundara gu jotaf is lembiewes is dure towas amerikaf selt.

Abduplelun siday krulder, vox anton mu kontel wiyon rodeblitis kaiki soltawara, is moblitis kev vorotok, is kavlepetes va ewazalteem ta gridubura is egara is fayara va bana bodafa tawa dye kesa va bourgara ke loyta.

Savsafa Fina-Kajsa va drasuyune nazbeikye katrasir, i va mises nazbeik kuraninsise va armara va dilintafi tawayki : Sveriga guon gracar, Amerika va ayikya slikote gracir numen ayikyefa antiuca alkejackar. Karl Oscar tir amidaf : va intafi tawayki poke bumafa uzda narar, koe vema anton nobana gan abic diliokaf amerindiaf grelt. Va erodiskafa kepaita abdi fentugal fiste kolnar kire Kristina fu radekar, nazbason va taneaf amerikik ke yasa. Wico kum drim duskon divgaben divsidawer, voxen tawa me zo rotegar meie zo rofayar kiren cadim tir naavarsaf. Fentugal di tir abrotcif is figaf neken erba ta lustera va direfa faytawaza zo govider.

Tove Karl Oscar is Kristina, portaf is olgaf kobaruk lion dam tel ke daref sverigaf vesk daktewer. Blira is cuga zelara is kobara dene vesk is yona nazbera va Kristina di lamed. Kristina tir tan ribiegaf koredik ke bat bwoy, afifa koe daava lidam etrak, i takrelafa gadikya is sagaf is delaf renasik, tisa ayafamapafa koe kota tegira nek rabenason kranavesa nope bulura va vo is yasa, i va gadafa yasa mea gire witina !

Kexuca va ina jontikviele lictar, ikuza otson icu pauray traspur aze ton soist kevo gexata merotazavzanon tanamur. Lanviele abica dorga ke tela pruva atrisa poke ragu ke mona ke inaf gadikeem zo stakseyed. Va sina alavon ice warzafa mona kolnayana gan Karl Oscar renason faytawar... fure anga vion toz vonewer aze kadar jotafa pruva az listafa pruvacka aze lanviele va kratelaf iltany di firvir, pu tel mevulkuyus va buluyuno vo.

Sverigaf tanealik ta olgalicura va moava

Amerika tir patecta ke kota rotisaca : Daavafa Ulrika kureson va gertik va poruca di vansatar, isen Robert do Arvid kazokeveteson va teremta dem tanealik jekun gan blandafa moava ke California di mallapir. Bata patecta ke rotisaceem va Robert lidam Kristina di pomar enide sin va bali is runda di naled beka batcoba tir droon gu bli. Amerika tir abdufisa abduxoa : sumesutesiki is intaburmesiko is asadasiko is dierk is basfayasiko.

Batcoba dere tir to abdufisa izva, jowa is soka darpe boniara zovdawed, to tena ke seltay mwon gu tuwava is toza ke levrotijis firday tid. Izvasuka va tanealik skotcesir : edje Wideytafa Geja va geef sokeem kovilar, pune Sioux sane aelesine oye fafigera va intafo tcabanexo gan meem ke tawamidus tanealik bexodiskon bocon exur. Zuguca ke yona ruzadera jontikedje zavzatar gretcayana koe dofa gestira ke tanealikeem. Lane sane xonuker kire va runda mu are divvawase va ael is miremba gonisker, ton lana izva gronon gire dilizesa. Amerindiik zo relvad enide nuyafa darka mu warzaf wideyik ke jotafa xultusa Amerika di zo isker, ton jlokafa lionara tove Savsafa Tamava ligundena gan durefa mallapira ke dilintaf wawaf is tawayiskaf tawadayikeem van abduplekura ke Kaikatlantikaxo.

Kristina va ava ke emudesa patecta meviele al djuraver, Karl Oscar aotceson va sverigavaca va bata ava suler, sinaf nazbeik va gadava mea gildad ise al vanpid ageltaf amerikik.

Amerikafa vuka abdufir, ton gamdot ke kota europafa araya is nuyaceem. Ba siel ke blira, Karl Oscar va liwot ke vofo adlutaxo bevion disuker isen iteem rem bra ke lekeugal va kelda stasa den Kristina abdi kurera gire wir, is va raporki bastawayani, is va vesk lize kabdueon gadikeem mezekason ranyeyer, trabe va vo tere meviele drasuyuno.

Divlamasikaf bwoy : rupa kotrafa gu kontera

Adre koe klubafa setikera ke jotaf oxileem Sveriga solelawer, reizutuson va alaakafa remlapira ke Faltafa Welfa az kusafa werdabira gan abic sverigik pabus va bodaf is kulackaf siday, ant pruva wan krulder.

Dere rupel

Divlamasikaf bwoy
Suterot Divlamasikaf Bwoy
XANTO
Vergumvelt Utvandrarserien
Sutesik Vilhelm Moberg
Ava Sverigava
Suterotinda Bwoyberpot
Evla 1949-1959
betara teza
Suterot Divlamasikaf Bwoy  Tuveli icde Suteroteem  Suterot Divlamasikaf Bwoy
Suterot Divlamasikaf Bwoy
Balumaks kaatoes va Karl Oskar Nilsson isu Kristina, skuyun gan Axel Olsson, tigis koe Karlshamn (Sveriga)

Tags:

Vilhelm Moberg

🔥 Trending searches on Wiki Kotava:

Ipomay (Diaphorapteryx)GanaProkladunol (Passeriformes)Álvaro de MendañaTalakoldunol (Dermoptera)Baroy aal dem eftela (2) (trutca ke Van Gogh)Mivdelt (3) (trutca ke Courbet)Blikapburedopa1922Jean-François MilletÉlisée ReclusSloveniaMariol (Semnopithecus)Delt va Trabuc weltikya (trutca ke Van Gogh)30-e ke santaneaksatXadola/DaretelizeemVesnol (Lissonycteris)Dentxo dem vebaltasik is awalt (trutca ke Van Gogh)Sven DelblancDnister (kuksa)Koyara ist Tawava (suterot)Mispodunol (Apterygiformes)Vesnol (Cynopterus minutus)Vimkol (Sylvisorex oriundus)Vimkol (Myosorex okuensis)Surbol (Madoqua saltiana)Susanna RowsonStukol (Pecari tajacu crusnigrum)22-e ke santaneaksatGaussier mefta is Saint-Paul waba (trutca ke Van Gogh)Kotava2008Vesnol (Paranyctimene)Théodore RousseauKocopa19-e ke balemeaksatVesnol (Nyctimene albiventer)Kolom koe Deauville (1) (trutca ke Boudin)2015Anton TcexovXingu Patectolaf GerdWocokol (Odocoileus hemionus eremicus)Oxotsk BiraTallinnSustol (Saiga borealis)Xadola/Nelkaf betakseem/BrudaxoVesnol (Dobsonia pannietensis pannietensis)13-e ke toleaksatVesnol (Syconycteris australis crassa)Yamba ke UrartuNakila koe Tyrol Alp (trutca ke Bierstadt)Taelaftara lev piluda (trutca ke Munch)Surbol (Ourebia)TawavaMeftava koe Saint-Rémy dem orikafa mona (trutca ke Van Gogh)Bergamo2001București🡆 More